الحلقه السادسه من برنامج (لتطوير ذواتنا وتغير حياتنا ) ومعانا ألحان الورد

[ياسمينااا]

أهلاً وسهلاً بكم أعضاء منتدي بنات مصر وحلقه جديده من برنامج (تطوير ذواتنا وتغيير حياتنا ) إسمحولي أرحب بضيفتي معانا الحان الورد مشرفة التنمية البشرية ღмεмoяιεѕღ أهلا ً بيكي معانا ألحان أهلاً بيكِ يا ياسمينا في البداية كدا تحبي تشربي إيه ؟ قهوة إسبرسو لو فيه عشان نفسي أجربها إتفضلي حبيبتي ونبدأ معكم الأسئله 1- ماهي نقطة ضعفك ؟ تصدقي أنا فكرت كتير فعلاً في نقطة ضعفي ومعرفتهاش ! طب إيه هو تعريف نقطة ضعفك أصلاً ؟! خلينا نقول دماغي ومتسألنيش ازاي لاني بجد مش عارفة أجاوب ع السؤال دا أوك مش هسأل رغم إني مش فاهمه 2-اذا واجهت مشكلة ما تحب ان يشاركك احد بحلها أم تعتمد على نفسك؟ أعتمد على نفسي ممكن طبعاً أستشير اللي حواليا وأسمعهم كويس بس لازم القرار في الآخر يبقى مني أنا 3-ماهي اصعب كلمة ممكن ان تقولها لأي شخص ؟ أي كلمة فيها جرح لمشاعره 4-تعتبر نفسك محبوب اذا الجواب ( نعم) برايك ايه السر؟ مش عارفة بصراحة ودايماً السؤال دا بيراودني ^^ وعموماً أي انسان محبوب بتلاقي سر دا في حاجات صغيرة بيعملها بس بتفرق مع اللي حواليه 5-ماهي مشكلة العصر في نظرك ؟ كتر الأفكاااار والمعلومات بجد بتلاقي مليون طريقة تجيبي بيها معلومات ومليون فكرة في كل مكان .. مش كلها أفكار صحيحة وعشرات الأشخاص اللي بيتكلموا كل دا بحس انه بيسبب ضوضاء جوانا ! + كل واحد ماشي بدماغه يعني مبقتش فيه قواعد ولا مبادئ عند كتير وأي حد يغلط تلاقيه مطلعلك مليون تبرير لغلطه وميكونش ندمان ! الأفكار والمعلومات أكيد بتفيد الشخص بس مهم إننا نستخدمها صح فعلا ً معاكي حق مبقاش فيه مبادئ وكل واحد فاكر نفسه أنه بيفهم في كل حاجه 6- ( فاشل..ناجح ..طموح..قوي..) بتعنيلك ايه هذه الكلمات؟ فاشل ==> لو بمعناها الحقيقي اللي مش ظاهري ف هي بداية النجاح ناجح ==> كلمة مش بتطلق على حد الا لما يكون تعب فعلاً وبتكون زي التكريم ليه طموح ==> أول خطوة في طريق انك تكون ناجح قوي ==> القوة حاجة بتيجي من الإرادة وانك تكون عارف انت عايز ايه بالظبط مش دايما كل فشل بيؤدي إلي نجاح ممكن يؤدي إلي فشل أكبر 7-ماهو الشيء الذي يطاردك في كل مكان وانت تهرب منه ؟ ان في الآخر أطلع أنا مش أنا بجد موتيني من الضحك هتطلعي مين يعني 8-متى تشعر بانك محبط ؟ يمكن أكتر حاجة بحبها فيا أني مش بُحبط لاني عارفة أول خطوة للفشل الشعور بالاحباط يمكن بحس بالتعب , لما مثلاً أجتهد عشان حاجة ومتطلعش معايا مش بحبط لكن بحس بالتعب مؤقتاً وبرجع بعدها عادي .. 9--هل تمنيت الموت يومآ ومتى ؟ لأ .. اللي أعرفه ان ربنا مخلقناش عبث ومادام انا لسه عايشة يبقى أكيد عايشة لحكمة ف مش هتمنى الموت أبداً رغم اني ساعات بحسه راحة .. بس الراحة دي هتيجي في وقت معين ربنا كاتبه 10-من هو الشخص اللي اذا شفتو بتحس الدنيا لسا بخير؟ عيلتي بصراحة ^^ وبعضاً من أصحابي .. وناس تانيين 11--ماهي الطريقة التي تعبر فيها عن غضبك ؟ غالباً غضبي مش بيبان غير ب التكشيرة اللي بتكون على وشي ^^ ولما ببقى عايزة أخفيه بسكت وممكن أقعد لوحدي في أي حتة 12-ماهو دافعك في الحياة ؟ حكمة ربنا من خلقنا في الحياة اننا نعمر الأرض ، ويكون لينا هدف عايشين علشانه مش عايشين حياتنا عبث لان اكتر حاجة ممكن تكره الانسان في حياته وتخليه مش عايزها أصلاً انه يحس انه عايش كدا .. عيشة والسلام يعني 13-عبارة تفائل دائما ترددها ؟ " أنا عند حسن ظن عبدي بي " 14-متى تكذب ؟ لما ببقى مش عايزة اللي قدامي يزعل 15-ماهو شعارك في الحياة ؟ مش عارفة يعني الموضوع أكبر من مجرد شعار أنا عايشة لهدف أو أهداف .. ومش لاقية كلام كافي يعبر عنها 16-حكمة تتاخذها شعارا بالحياة؟ هو السؤال دا زي اللي قبله بس بطريقة تانية ^^ عموماً في مقولة وحدة قالتهالي من زمان وفاكراها ومعلقة معايا " كن لله كما يريد ، يكن لك فوق ماتريد " 17-انت قوي-اذآ ( من الشخص الذي تضعف امامة) ؟ اللي بحبهم أو اللي بيكونوا مستنيين مني حاجة معينة والناس اللي بتقولي كلمة " عشان خاطري " ^^ دي بقى نقطة ضعفي 18- ماذا علمتك الحياة ؟ كتير ولحد آخر يوم أنا هفضل أتعلم منها .. 19-ما لون كل من : الامل ، السعادة ، الحزن ، التفاؤل ، ؟ الأمل ==> أصفر السعادة ==> أبيض الحزن ==> اسود رغم اني بحب اللون دا جداً ^^ بس هو لون تحسيه مكتوم كدا ف بيرتبط بالحزن التفاؤل ==> وردي 20-شيئ لايعجبك بنفسك وحابب تغيرو؟ الكسل والتسويف واللامبالاة أحياناً 21-هروب الكلمات من مخيلتك عندما تكون في أمس الحاجة لها كيف تعالجه؟ بسكت وبحاول أجمعها تاني 22-تؤمن بلبس الاقنعه لتتكيف مع الحياة من جميع النواحى ؟ أؤمن بالمرونة والمرونة لاتعني النفاق أبداً لكن لبس الاقنعة واني ابقى حد تاني غير نفسي لمجرد مصلحة ما ف أكيد لأ .. 23-هل فشلت في تحقيق شيء مهم في حياتك؟ لحد دلوقتي لأ الحمدلله .. 24-باقة ورد لمن تهديها من الاعضاء اللي بالمنتدى. وباقة من الشوك لمن تهديها ؟ الورد لـِ كل الناس اللي بعزهم وبحترمهم الشوك مش لحد 25-من تتمنى ان يكون الضيف بعدك ولماذا ؟؟ سلمى اللي هي رنين بنوتة بحبها وبحب دماغها تسلمي حبيبتي ع قبول الإستضافة نورتينا تسلمي انتِ ع البرنامج والاسئلة الحلوة شكراً ليكِ .. تسلمي حبيبتي مره تانيه عجبتني جدا ً إجاباتك نورتي الحلقه أتمني إن الحلقه تنال إعجابكم دمتم بحب وخير

[ساحر الأحزان]

استضافة جميلة ياسمينا

مع الحان

اجابات عقلانية جميلة

واسئلة مميزة منك

فجائت حلقة جميلة ومميزة

تحياتى لكم

[Words Whisper]

اقتباس 7-ماهو الشيء الذي يطاردك في كل مكان وانت تهرب منه ؟ ان في الآخر أطلع أنا مش أنا

تصدقي نقطة مهمة
مش عارفة انتِ قايلاها بجد ولا هزار
بس هو فعلا دي حاجة تستحق التفكير فيها
بس اي ثنك مادام عندك مبادئ مقتنعة فيها
يبئا مش هيحصل ..


حلقة جميلة
وعجبتني اوي الاجابات ماشاء الله ..


ياسمينا
ألحان
نورتوا
وتسلموا ..


دمتم بتوفيق وسعادة ...

[توحد ارواح]

ألحان الورد شخصيه جميله حبوبه اوى
بحس جواها طيب و بتحب الناس
من الناس بجد ال انا اعتز بيهم جداااا
شكرا ياسمين مجهود رااائع منك و استضافه مميزه
تحيتى

[شاعرة الرومانسيه]

الله عليكى ياااااقمر

بجد انتى مُحاوره ممتازه

وضيفتك ماشاء الله

روحه خفيفه ومنوره الدنيا

لقاء رائع مع ضيفه اروع

احلى تقييييييييييم

[عاشقة ذكر الله]

حلقه جمييله اووى منك ي ياسمينا ,,
وطبعا الحان الورد بنوته عسووله ومميزة
ربنا يوفقكم ويسعدكم دائما
يسلموو على الحلقه الجمييله

[وهج الايمان]

حوار جميل جدا

واجابات جميله

نورتي ي قمر

تسلمي لمجهودك ياسمينا

تقييمي

[الحان الورد]

اقتباس المشاركة الأصلية كتبت بواسطة ساحر الأحزان استضافة جميلة ياسمينا مع الحان اجابات عقلانية جميلة واسئلة مميزة منك فجائت حلقة جميلة ومميزة تحياتى لكم

شكراً ليك أ/أمجد على وجودك
إن شاء الله تكون الحلقة عجبتك .. نورت

اقتباس المشاركة الأصلية كتبت بواسطة Words Whisper تصدقي نقطة مهمة مش عارفة انتِ قايلاها بجد ولا هزار بس هو فعلا دي حاجة تستحق التفكير فيها بس اي ثنك مادام عندك مبادئ مقتنعة فيها يبئا مش هيحصل .. حلقة جميلة وعجبتني اوي الاجابات ماشاء الله .. ياسمينا ألحان نورتوا وتسلموا .. دمتم بتوفيق وسعادة ...

قلتها بجد
اللي مخوفني إن الانسان يكون مخدوع في حاجات في نفسه ..
بس زي ماقلتِ فعلاً ، المبادئ هي اللي بتثبت الواحد وتريحه

شكراً لوجودك المميز يا أسماء
نورتِ

اقتباس المشاركة الأصلية كتبت بواسطة توحد ارواح ألحان الورد شخصيه جميله حبوبه اوى بحس جواها طيب و بتحب الناس من الناس بجد ال انا اعتز بيهم جداااا شكرا ياسمين مجهود رااائع منك و استضافه مميزه تحيتى

تسامي بجد يا توحد على كلامك
انتِ كمان من الناس اللي المنتدى يعتز بيهم ..
شكراً لوجودك
نورتِ

[سارية فى درب الرسول]

-تؤمن بلبس الاقنعه لتتكيف مع الحياة من جميع النواحى ؟


أؤمن بالمرونة
والمرونة لاتعني النفاق أبداً
لكن لبس الاقنعة واني ابقى حد تاني غير نفسي لمجرد مصلحة ما
ف أكيد لأ ..
***********

اجابه متزنه بس نقدر نقول لباقه اكتر منها ليونه
الباقه مطلوبه للحياه انما النفاق مرفوض تمام

الحان الورد اجاباتك متميزه وعاقله

وياسمينا محاوره بعتز دائما ببرامجها
مجهود مميز

[العاشق الذى لم يتب]

تسلمى مذيعتنا المتألقة ومشرفتنا الرائعة
بس إيه حكاية أمنية الموت دى
بذمتك حد بيتمناه ولا بيطلبه دى حاجة معقولة ولا عاوزة تزعلى الحان واطفشيها
بس هى كده ماشاءالله عليها شطورة وبتعرف تهرب لما بتتزنق تقول مش فاهمة السؤال ده
حوارجميل وأسئلة فى الصميم وإجابات كلها عقلانية وفهامة
تسلموا أنتو الأتنين
سعدت بوجودى معاكم
تقبلا تحياتى وودى
رفعت