كراكيب الكراكيب كلاكيت مع (الحب الصامت

[ساحر الأحزان]

بسم الله الرحمن الرحيم

أهلا بأخونا شباب وبنات بنات مصر

اليوم جايين ليكم بحلقة وببرنامج جديد اسمة

كراكيب الكراكيب



برنامج شامل متعدد وأول حلقة مع شخصية

معروفة للبعض بسى الاغلبية ما يعرفوها بعت
لية الدعوة وقلتلة أستلقى وعدك بقى حنسويك
على نار هادية والكل حيعرفك أكتر وأكتر ومعنا
اليوم الأخ

الحب الصامت

اهلا بيك يا هيثم منور البرنامج نخلص البرنامج الأول وبعد كدة حندخلك على بوفية
اليوميات عند مرشدى وكبريانو على شان نعمل
معاك أعلى واجب

الأول عايزين نعرف الحب الصامت الأنسان

ممكن هويتك؟
هيثم علي

1/10/1987 دا تاريخ الميلاد يامعلم

من المنصورة :\

هواياتك

بص ياسيدي هوايات , انترنت , بلاي ستيشن وخروجات مع اصحابي

هيثم أية حكاية منتدى بنات مصر الفكرة جت أزاى وعملت أية لعرضها فى النور؟

احكلنا بقى حكاية بنات مصر من طقط لسلامو عليكو؟

الفكرة ياسيدي قبل ما اعمل المنتدي كنت بتعلم في اكتر من دومين اعمل منتديات واقفلها واجرب كل انواع السكربتات , وبعدين قررت اعمل المنتدي اختيار الاسم بالشكل ده علشان كان اسم الدومين msryat ونجح في بدايته عن كل المواقع اللي عملتها مع ان ممكن زوار المواقع اللي قبله كانت اكتر منه بمراحل بس كنشاط مفيش دا كان من بدايته ناس محترمه جدا وتفاعلهم مشجع جدا


أنشاء السايت شىء سهل ولكن المحافظة علية
وتكبيرة صعبة أية الصعوبات الى قابلتك منذ نشأئة المنتدى لحد دلوقتى؟

حاجات كتيير جدا كان منها شركة استضافة من دمنهور في كوم حماده

اشتري منهم محمود سيرفر وطلع في بي اس مش سيرفر وبعد ما حولت لهم

الفلوس الموقع اشتغل يوم او يومين ووقف مش بيفتح مع اى حد

اتصل بهم موبايل مش بيردوا , اكلمهم ميل يقفل الميل اول ما يشوفني بتكلم

قولت لمحمود انا هروح لهم بلدهم

وروحت لهم ومحمود معايا , علشان اوصل للعنوان

روحت لمكتب البريد اللي محول لهم عليه الفلوس وبقول للموظف

عايز اعرف عنوان الشخص ده قلق يديني العنوان وقال لي مش عندي

قولت لمحمود يبقي اللي هيجيب العنوان بتاعه مأمور القسم , كنت اعرف واحد

ربنا يصلح حاله يعرف المأمور بتاع كوم حماده

المهم يعني اتصلت من موبايلي ع الناس دي وانا في بلدهم مفيش رد

قولت اجرب اتصل بهم من رقم تليفون ارضي من كوم حماده وفعلا ردوا

وقولت لمحمود لانه هو اللي بيكلمهم قول لهم ربع ساعة وتكونوا عندي

بدل ما الشرطه هي اللي تجيبكم

واتحلت المشكلة مش فاضي احكي ياعم بس كان حوار ممل

وتوكتوك الفجر وحوار من كوم حماده لمحطه دمنهور تقريبا ومواصلات زباله وانت

راكب اسكندرية وبتنزل في طريق مفيش فيه بني ادم علشان كوم حماده

كنت ابعت لحنون وكوين سوما ومشتاقة كانو شرتحوهم وضربوهم ولا تتعب نفسك



هيثم مختفى على طول عن المنتدى أية السبب؟

كسل بعيد عنك بس بحاول ابطل كسل

تناوب اكثر من مدير على بنات مصر وكل مدير لية الى يميزة عن غيرة كلمنا عنهم ؟

فاضي انا بقي اتكلم علي الناس

انا مؤدب ياعم مش بحب اجيب سيرة حد

واحنا مقلناش حاجة غير ذكرهم بالخير

هل فية تواصل بينك وبينهم خارج المنتدى؟

اللي قابلتهم من المنتدي علي ما اتذكر

نزف الزكريات وبطل يدخل < راجل زي الفل ربنا يصلح حاله

و محمود

بعيدا عن الشكليات وبعد ذهاب المنصب عنهم ولا بعد المنصب كلة بيروح؟

طيب ما ضياء كان اداري ياعم وعمل مشكلة تقريبا مع طارق و طارق راح له القاهره

طالما في احترام بين الناس يبقي كله تمام التمام

ربنا يدوم الأحترام بين الجميع

أنت كصاحب موقع بتختار مدير الموقع أزاى؟

مش عارف بس ممكن اقول لك الموقع اللي بيختارة

كيف يدير المنتدى نفسة ؟وما هى موارد الصرف على المنتدى؟

من الاعلانات

نزل فى صوت الأعضاء موضوع لطارق عن سياسة المنتدى الجديدة وهى بيع الخصائص
والعضويات للأعضاء يعنى الى يشترى ياخد
وبعد كدة طلعة كدبة أيريل هل دة ممكن يحصل فعلا ونشوف ان المنتدى تحول لتجارى الى يدفع يقعد والى ما يدفع الله يحنن ؟

لا مستحيل دا يحصل لا هنا ولا في اي منتدي عربي الا لو كنت بتقدم خدمه معينة مش موجوده الا عندك فقط , وبعدين ياعم في موضوع كدبة ابريل بتاعة طارق ماتشوف الناس اللي بتطنش تدفع اشتراك النت هتيجي انت تقول لهم عضوية بفلوس

تشكرات مستر حب صامت




الحب الصامت موجود الأيام دى هل حنشوفة على طول ولا اية هى زيارة خاطفة وترجع ريما لعادتها القديمة وتختفى ؟

بحاول اكون موجود علي طول والله بس انا النت بتاعي اساسا زباله

التليفون الارضي مش بتصل به الا بـ 19777 علشان اتخانق معاهم وشكرا

مين اكتر أدارى مقرب لهيثم؟

طارق بتاع الـ 50 جنيه اكتر حد بتكلم معاه من الاداريين

أية حكايتها ال50جنية دى خلى الأعضاء تعرف
الى خلف الكواليس

ومين من الأعضاء القدامى مقرب ليك؟

المفروض بقي اني اقعد افتكر في اسامي واقول وكدهون

طيب خد عندك ياسيدي

طارق , محمود , ضياء كنت بتكلم معاه زمان , حنون , و صارا المجنونه

شفنا الشهور الى فاتت أنخفاض فى عدد الأعضاء والزوار للمنتدى وطارق أتكلم عن النقطة دى فى صفحاتة وشفنا دلوقتى فية تحسن فى تسجيل العضوات هل مشكلتكم مع جوجل دخلت فى طور الحل ولالسة عرفنا

بحكم معرفتك للفنيات ولا لسة حطول؟

المشكلة تقريبا اتحلت بس الارشيف اللي اتمسح مش رجع كله يعني مع الوقت هيبقي افضل من الاول بمراحل

طارق بيعتبر الأب الروحى للجيل الحالى

من الاعضاء لان المنتدى توسع فى عهدة بطريقة كبيرة جدا اية الى ميزة عن غيرة ؟

طارق اكيد

ومميزاته عن غيره بيحسبها بالورقة والقلم والبرنتات

ممكن يعرف حاجات انا مش عارفها

شهادة جميلة نعتز بيها فى حقك من هيثم
حودة جة فترة وعمل نشاطات فى المنتدى فية أراضية دلوقتى

حيرجع ولا حيفضل مختفى؟

محمود مفتكرش هتششوفوا وشة الا بمعجزه اخر مره كان بيقول لى هيعمل عملية

بس شكلة بيحور عليا

اخر مرة كلمتة قلى انة فتح مطعم جديد ربنا يوفقة ومحمود لا ينكر بصماتة فى المنتدى

ما هى تصورات الادارة للأرتقاء بالمنتدى؟

سنحيا كراما < اعلانات في كل مصيبة الخطه الجايه

ربنا يستر



نخش على كلاكيت تانى من كراكيب

أنت من محبى السياسة ؟

مش عارف بس السياسة دي حاجه قذرة بس عموما لا بحبها ولا بكرهها

ماهى ميولك السياسية ؟وهل أنت منتمى لأى حزب؟

لا انا رئيس جمهورية نفسي , وانتمائك لحزب بيبقي هدفك مصلحة الحزب ده اولا وبعدين تبقي تشوف مصالح بلدك او جماهير حزبك مفيش حزب في مصر اساسا بيعمل علشان مصر كله علشان مصلحتة ومصلحة الاعضاء

حرية الرأئى والتعبير كانت ملغية ايام النظام السابق دلوقتى الكل بقى سياسى ودخل مفهوم
التعبير عن الرائى الى شتيمة للرئيس والتقليل منة هل دة مفهوم الحرية عندنا؟

حسني مبارك كان بيتشتم , ومحمد مرسي هو اول واحد بيقلل من نفسه



بعد شهر من تولى الرئيس مرسى للحكم شفنا مظاهرات وأعتصامات للمطالبة برفع الاجور والمرتبات هل الوقت مناسب لكدة واقتصاد البلد فى النازل؟

كلمني عن وعود الـ 100 يوم وخطة توظيف كم مليون واحد

لو وفي بوعوده اللي هو بنفسه وجماعته حددوا لها 100 يوم

ونفذ ولو 2 % منها كنت هتلاقي الشعب كله واقف معاه وبيحترمه

ومش هتشوف مطالب فئوية ولا اللي بتتكلم عنه ده بس انت بتتعامل

مع جماعة قالت لك القروض حرام مع ان كان في قرض من صندوق النقد الدولي

بدون اي فوائد وهما رفضوا ودلوقتي بيطلبوا قرض بفوائد

السلفيين بعد الأنتخابات تم تهميش دورهم فى الحكم وأنتهت مرحلة الهدنة بينهم وبين الجماعة وتحولت لمرحلة تكسير العظام ما قولك؟

فى اول انتخابات هتلاقيهم حبايب

كل واحد أترشح للرئاسة ولم يوافقة النجاح
هل يتحول لمعارض ويحس ان لية الحق فى الحكم؟

اذا كان حزب الحرية والعدالة بيعارض الحكومة

ما هو الحزب اللى تتوقع لية النجاح مستقبلا؟

حزب الكنبه

فين الحزب دة

ما هو أكتر حزب لفت الانظار ودورة ملموس داخل الشارع المصرى ؟

ولا حزب
معظم الأحزاب حبر على ورق او شكلى فقط أمتى حنشوف دور ملموس للأحزاب فى مصر؟

اما اشوف حزب بيحل مشكلة من مشاكل البلد

نقول مثلا مشكلة المرور < مش موجود احزاب تقدر تبني كباري ومعاهم مبالغ كبيرة جدا , زي القوات المسلحه ولا دا دور الحكومة وشكرا والجيش !!

هل تتوقع أنفراجة فى الأزمة بين جبهة الأنقاذ الوطنى وبين الحزب الحاكم؟

لا جبهة الانقاذ معارضة , ولا الحزب الحاكم حزب

بيمثلوا معارضة وحكومة زي الاخوان ومبارك بالظبط

هل الضغط على الرئيس بيخلى ثقتة تهتز فى نفسة وتخرج قرارت مهزوزة ولا عندة ثقة فى نفسة ظاهريا انما داخليا العلم عند الله ما قولك فى الفترة الى فاتت فى حكم الرئيس؟



أية دة ياعم ضحكنا معاك؟

ما هو تصورك لمستقبل مصر السياسى؟

مالوش ملامح

كلمة منك لكل من ::

الرئيس.

انت رئيس انت !!

شباب الثورة,

الثورة خطفوها الاخوان


اللأخوان.

السجن فى انتظاركم

جبهة الأنقاذ الوطنى.

بطلوا انقاذ

حركة 6أبريل

عايزها تولع بكره بقي والمخلوعين يزيدوا مخلوع

الأعلام ,الشعب المصرى

الصبر طيب



ونختم

كلمة منك للأعضاء

المنتدي مش هيبقي احسن الا بكم

لطارق

ان تعطي القليل خير من لا شيء

حنون

مسا مسا احاجه شوفي لي الاخواني اللي قولتي لي عليه


اركو بلانكو

دل بيرو برنس وذوئك زي الفل

اهه زيك كدة بتحب ديل بيروربنا يوفقها

لمعد البرنامج

حرام عليك انا بجاوب وخايف النور يفصل

طيب الحمد لله انة كمل معاك ستر ونعمة من عند ربنا

نورت يا هيثم البرنامج بجميل تواجدك

دا نورك ياحاج

ويلا بقى نخش مطعم اليوميات برجلنا اليمين

اصلهم بيخافوا من الحسد

كان معكم من أمام قسم اليوميات

ساحر الأحزان

[نجم وزهره ومسافات فراق]

ابو الافكار دايما الراقي ساحر الاحزان مش جديد منك تقديم الفكر الدسم المميز وبصراحه هنا استفدت معلومات كتيره اهمها اني عرفت واتشرفت اكيد بالاستاذ هيثم نجم حلقتك الفاضل كل ما هنا يسموا بالرقي تحياتي لكما ونجومي اخوكما

[phalsteen]

دا حوار دا ولا انتقام
ههههههههههه
بس حوار دمه خفيف
بالتوفيق

[۩۩ elMagic ۩۩]

ههههههه
ايه الدماغ العاليه دي ي عم
نورت ي هيثم الحلقه
وإن شاء الله تفضل موجود دايما فى المنتدى
بس مش يبقي مجهودكـ مقتصر علي صفحات مكشوفه
عايزين نشوف دماغكـ فيها ايه ي معلم :d
تسلم ي عم أمجد لمجهودكـ الجميل
موفقيـــن ي شباب دايما ,,

[حنـــــون]

هههههههههههههههههههههههههههه
مات الواد ياهيثم هو بعد الى عملناه فيه هيعيش

حلقه جامده والله
نورت ياهيثوم
وتسلم ياامجد ع البرنامج الجميل

[العاشق الذى لم يتب]

سعيد جدا بمعرفتى للسيد الكبير أنا
البرادعى ياأمجد
مرحب بيك أستاذنا هيثم
وكنت من زمان بسأل روحى وأقول ليه صاحب المقام دكتور طارق متعصب تجاه الإخوان
الحمدلله دلوقتى عرفت السر
ربنايوفقك يازعيم وتفضل زعيم الزعماء
والشكر الخاص لأحوياأمجد على براعته فى إدارة الحوار والأسئلة الجامدة دى
مودتى لكما

[مُنـــــايا]

حلقه جميله منكـ امجد واسئله اجمل وضيف خفيف الظل اتشرفنا بمعرفته دمتم بسعاده

[countess]

اقتباس صارا المجنونه

هتشوف جنوني باذن الله قريبا بس اما اشوف هو ينزل لا نو انت فاهم قصدي بقا

فاهم بقا قصدي عشان هدوئي هو الهدوء الي بيسبق العاصفه بقا هههههههه

[روح صامتة]

هههههههههههههههههه
^^
بجد مش قادرة
حتى الاسئلة الجد بتهزر فيها ^^ :d
بس بجددد موضوع ممتع فعلاا ..
عجبني الردود وكمان اسئلة مميزة منك ي امجد ..
ابقوا تعالو كل يوم ي جماعة
^^
ارق تحياتي

[Ŗăήćy]

هههههههه برنآمج جميل بجد
وآجـآبآت جميلة من أ/هيثم تسلم ايدك بجد منور الحلقة
تسلم أ/آمجد مجهود جميل منك