حساب شم النسيم ..

[SiLver Spectra]

((اقرأ الموضوع بتركيز))

في أول سنة ليه كاملة في مصر و اللي كانت بالتحديد 2006- 2007
لاقيتهم بيقولوا يوم الإثتين الموافق 9 ابريل اجازة رسمية عشان شم النسيم !
قولت أكيد دا يوم ثابت في السنة اذا كان بيوافق التاريخ الميلادي,,, او يوم متغير بمقدار 10 إلى 11 يوم اذا كان تابع للسنة الهجرية و بما انه عيد فرعوني قبطي فاكيد بيتعلق بالسنة الميلادية

جت السنة اللي بعدها (في 2008 ) كان شم النسيم يوم 28 ابريل !
الله ..مش قولتوا انه أول اتنين في شهر ابريل و لا ايه نظامه دا !؟
قولت جايز بتغير بمقدار ثابت برضو

جت السنة اللي بعدها (2009 ) و كان شم النسيم يوم 20 ابريل
و عرفت ان ليها حسابات معقدة ..

و استمر الوضع المتغير على ماهو عليه

المهم ان في سنة 2012 كان شم النسيم يوم 16 ابريل
و السنادي شم النسيم يوم 6 مايو !!

قولت لا بقى ..لازم اعرف بتتحسب ازاي
بحثت عن طريقة حسابها لاقيت كذا موقع بيتناقل طريقة بحساب (سنة الشهداء) و اجراء عمليات حسابية عليها مع قواعد شاذة على شكل ملاحظات,,, و لكن باختبار الطريقة اكتشفت انها فاشلة و مش صحيحة حسب تاريخ شم النسيم في السنوات الماضية

و عدت للبحث مرة أخرى ..و لاقيت ملف PDF و فيه طريقة اخرى لحساب شم النسيم و واضح ان اللي كاتبها عاملها من 13 سنة ((من الامثلة اللي فيها))
جربت الطريقة و بحثت عن تاريخ شم النسيم في السنوات السابقة لاقيت الطريقة بتظبط فعلا بشكل دقيق

و من هنا جاتلي فكرة عمل مسابقة تفاعلية منها

بصراحة الحسابات فيها ممتعة و فيها لعب حلو.
و بعد انتهاء المسابقة هيكون ليه موضوع في الاقلام بيخص شم النسيم
خلونا دلوقتي في المسابقة اللي ان شاء الله هتفيدكم في تحديد اجازة شم النسيم بدون انتظار النتيجة او التقويم او الاخبار

هديكم طريقة حساب شم النسيم لكل سنة + مثال تطبيقي لسنة 2013
و بعدها هطلب منكم تعرفوا معاد شم النسيم في سنوات قادمة..

**********************

يلا نبدأ
طريقة حساب يوم شم النسيم

لحساب و تحديد يوم شم النسيم لابد من معرفة (اليوم المهم) و من ثم (يوم البدر) و هي ايام تخص التقويم القبطي
و من يوم (البدر) سيتم تحديد معاد يوم شم النسيم

أولا تحديد اليوم المهم في شهر مارس
في البداية يتم تقسيم السنة على 19
المثال لسنة 2013
2013 تقسيم 19 يساوي 105 و الباقي 18
و سنرمز للباقي برمز X

ثم يتم ضرب الباقي من العملية الحسابية السابقة (X) في رقم 19 ثم يجمع الناتج مع 24
و بعدها يقسم على 30 ليخرج لنا باقي جديد سنسميه (Y)

نطبق على مثال 2013
X كما استخرجناها بالأعلى تساوي 18
18 ضرب 19 يساوي 342 + 24 يساوي 366
نقسم 366 على 30 =12 و الباقي 6
الباقي هنا هو Y كما اتفقنا و هو يساوي 6 حسب المعادلة السابقة

بعد استخراج ال (Y) نقوم بتحديد اليوم المهم في مارس من المعادلة التالية :
Y + 21
و اذا كان الناتج اقل من 32
يكون الناتج هو اليوم المهم في مارس

أما ان كان الناتج اكبر من 31 فستكون المعادلة كالتالي
Y + 21
تقسيم 30
باقي القسمة و ليس ناتجها سيكون هو اليوم المهم

في مثال 2013
Y = 6
اذن 6+ 21 = 27
و هو اقل من 32
و يكون اليوم المهم هو 27 مارس

ثانيا : نحدد يوم (البدر)
اذا كان اليوم المهم قبل 30 مارس فإن يوم البدر يكون بعد 34 يوم من اليوم المهم
أما اذا كان اليوم المهم 30 أو 31 مارس فسيكون يوم البدر بعده ب4 ايام فقط

اذا في مثال 2013
اليوم المهم هو 27 و هو اقل من 30
و بالتالي فيوم البدر سيكون بعد يوم 27 مارس ب34 يوم
اجمع الرقمين
27+ 34 = 61
اطرح منها 31 (عدد أيام شهر مارس) يساوي 30 ابريل
و بالتالي فيوم البدر لعام 2013 هو يوم 30 ابريل

ثالثا و اخيرا نحسب يوم شم النسيم
هتفتح النتيجة و هتشوف ..اذا لم يوافق يوم البدر يوم الأحد فسيكون شم النسيم في يوم الاثنين الذي يلي يوم البدر

اما اذا وافق يوم البدر يوم الاحد في النتيجة فسيكون شم النسيم يوم الاثنين من الاسبوع التالي (اي بفارق 8 ايام من يوم البدر)

في مثال 2013
يوم 30 ابريل و هو يوم البدر يوافق يوم الثلاثاء
و بالتالي فشم النسيم سيكون يوم الاثنين الذي يليه و هو يوافق يوم 6 مايو ((و هو المطلوب))


شوفتوا طلع الموضوع كبير ازاي ههههههههه
انا من كتر ما طبقت على سنوات مختلفة و بحثت لاقيت فعلا تطبيقي صحيح و تقريبا حفظت المعادلات و الطريقة

الموضوع هتحسوا فيه شوية صعوبة بس هو سهل على فكرة
انت مجرد هتقرا و هتطبق خطوة بخطوة


ملاحظة هامة جدا تفيدك في عمليات الحساب
** بما ان العقول اتعودت على استخدام الآلة الحاسبة فممكن البعض يلاقي صعوبة في ايجاد باقي العمليات الحسابية بسبب ظهور الكسر العشري
فبسهولة تقدر تعرف الباقي عن طريق اخذ الكسر الظاهر بشكل مفرد و ضربه في الرقم المقسم عليه


مثال 2013 تقسيم 19 يساوي 105.947
الباقي هو 0.947 ..لابد من تحويله الى رقم صحيح
اضرب الباقي 0.947 في 19 هيساوي 18

لو 2010 على 19 يساوي 105.789
الباقي هو 0.789
اضرب الباقي في 19 هيساوي 15
يبقى كدا قدرت تحول الكسر العشري الى رقم صحيح لاستخدامه في المعادلات

و نفس الطريقة بالنسبة للقسمه على 30 ,,الكسر الظاهر هتضربه في 30 عشان يتحول الباقي لرقم صحيح


المفروض دي مهارات حسابية بس انا عارف ان ناس كتير مخها تخين في الحساب هههههههه
((أنفع مدرس حساب أنا مش كدا ,,حتى بهزق اهو ))


***********************

و دلوقتي مطلوب ايجاد يوم شم النسيم لسنة 2015
و أول واحد هيجاوب صح له 5 نجوم سيلفرية
و بامكانك استخدام نتيجة من الموبايل أو من جوجل أو من المنتدى (المنتدى فيه لغايه 2015 فقط )

و يمنع وضع العضو لاكثر من اجابتين و يمنع وضع حلول عشوائية
و بالتالي لازم تحدد يوم شم النسيم و يوم البدر عشان اكون متأكد انك حليتها مش ضربت اي حاجه

في انتظار اول اجابة صحيحة..

[دمعه حائره]

ماشاء الله اكتشاف كان شاغلنى جدا وخصوصا السنه دى
جاى فى شهر مايو
برافو دكتور وهانشوف الحسبه دى

[واد حبيب]

****************** مفهاش شم النسيم
علشان كده مش اعرف احسبها
لما ارجع مصر اقعد تحت التوت
واحسبها

[fanky girl]

13 ابريل 2015

[SiLver Spectra]

اللي يجاوب يحط يوم البدر و يوم شم النسيم زي ما كنت موضح في المطلوب

[واد حبيب]

طيب والله ما اعرف حاجه عن شم النسيم
غير لما البنت بتاعتي بتقولي انا اروح اتفسح يوم شم النسيم
والله ما عندها دم عوزه تتفسح من غيري

[აα∂ Ԑγεა]

106
الباقي
1 x


1.4 y

25 مارس اليوم المهم
59 يوم
- 31


28 ابريل اليوم البدر
\يوم ثلاثاء


يوم شم النسيم
4 مايو 2015

[Mahmoud Mohie]

مشغولين ف القسم العامى ..
مش كنت تستنى شويه يا طاروق ..
عامة هحاول اركز هنا وهناك ..
بس أظن صعب ..

بالتوفيق

[توليلا غسان]

هههههههههههههههه ما هتصدق سبب الخلني تدخل ادبي ميشان رياضيات

تيجي تحكي شم نسيم شو يعني هاد عيد ؟؟؟؟؟!!!!! ما فهمت ياريت توضح

ومسابقه حلوه و بتجنن تسليم ايدك

[აα∂ Ԑγεა]

هو انا جاوبت بسرعه معرفش وصلت لتسرع ولا
انا اللي اعرفه ان الناس سريعه جدا
قلت ابقي اسرع هههههه

معرفش صح ولا غلط
بس لو كانت 2014 كانت بقيت ساهله جدا
لكن 2015 فيها كسور ودي المشكلة
انا عملت تقريب ومحسبتش الاقل من 5 من عشره
اما جيت في الاخر احسب الايام
لو هيتحسب هيبقي 5 علي ما اظن
لكن انا محسبتش وطلع معايا كدة

ياريت يكون صح
ليا زمان مكسبتش حاجة ^_^