هى دى مصر ياسااااااادة

[كوين ميرو]

محمد : بقولك اية ياض يا مينا يا كافر يا عدو الله

مينا: قول يا عم المؤمن .... إرغي يا رغاى

محمد : الا صحيح انت بتزعل لما بيحرموا المعايدة عليكم في العيد بتاعكم

مينا: وحد الله يا مؤمن

محمد : لا الله الا الله سيدنا محمد رسول الله ... لا بس بجد قولى !!!

مينا: بص يا اسطى تزداد نسبة تهنئتي بالعيد طرديا مع كمية فتاوي تحريم المعايدة عليا و على امثالي

محمد : ترجم يا منيل انا كنت ادبي يا تحفه

مينا: ماشي يا لوح .. يعني كل ما الفتاوي اللي بتحرم المعايدة علي بتزيد كل ما بتزيد معاها نسبة الناس اللي بتعيد عليا ... تقريبا كدة والله اعلم الفتاوي دي بتفكر حبايبي يكلمونى في العيد فبفضل طول اليوم عامل مهم في امها من كتر ما تليفوني بيرن و بتعوج على طوب الارض

محمد: شوفت يا معفن احنا اللي بنعمل لأمثالك قيمة يا نتن

مينا: دة حقيقة يا اوطى اصحابى اللى خلقهم ربنا

محمد: تسلم يا غالي يابن الغالي و قول لامك المقدسه تعمل حسابي في المكرونة بالباشاميل النهارده

مينا: عامله صنية و هتبعتها لامك بالليل عشان تتعشوا بدل ما بتناموا جعانين و معاهم حتتين رنجة وحتيتين فسيخ لزوم الرمرمه بكره بقى

محمد: نبات جعانين مين يادض ياللي تتشك في بطنك ؟! مانا امي كل عيد بتبعت كحك ولحمة ضاني اللى عمرها مابتدخل بيتكم الا على عيدنا ولا انت ناسى

مينا: خلاص خلاص اخرس الله يفضحك احنا على القهوة يا منيل

محمد : طيب اطلبلي قهوة زيادة بقى على حسابك تمن مكالمة المعايدة

مينا: بقولك ايه !! ياريت متتصلش تانى وامسح رقمي من على تليفونك

محمد : طيب خليها دوبل بقى علشان خاطر الكلمتين الحمضانين دول

مينا : استنى ارد على التليفون .. ايوه يا حاجه ..... أبنك ؟؟ .... لا اهو مرزوع قدامى بيرازى فيا ... خد الحاجه بتسأل عليك

محمد : ايوه يا جاحه لا والنبى تليفونى فصل شحن وواديكى عرفتى تجبينى اهو بقولك ايه انا هاتغدى عند خالتى ام مينا النهارده وابقى أجبلكم باقى الاكل معايا وانا نازل ههههههههه يالله سلاموا عليكم

هى دى مصر ياسااااااااااااااااااااااااااااااااااااااااااااااا اااااااااااادة



منقوووووووووول من فيس بوكى

[ابراهيم دياب]

موضوع جميل اختى الكريمة

فعلا اقولك على حاجة بسيطة والله طول عمرنا نعيش فى حى واحد

من زمان فى مدينتى حلوان وعمر مكان هناك فرق بين مسلم او مسيحى

وكنا نعيش الاعياد سويا ولا نفرق بين عيد اسلامى ولا مسيحى

لاننا فى الاول والاخر مصريون وكانت تعم الفرحة علينا جميعا فى الافراح معا

ولكن الاعلام الفاشل هو من زرع الفتنة بيننا ويعلم الله نحن اصدقاء فى العمل ناكل ونشرب ولا هناك فرق

فى اى شئ الا فى وقت الصلاة
والله كم من المرات يذكرنى اخوانى بوقت الصلاة وانا نائم مثلا من التعب
هى دى مصر كما قلتى

راقت لى كلمات وان كانت منقولة كما ذكرتى الا انها رائعة

دمتى بكل ود والدين لله والوطن للجميع

ابراهيم دياب

[غزاوية وافتخر]

شكراً للطرح الرائع


مميزفي كل وقت


وفي كل طرح


ما ننحرم من جديدك ^^

[كوين ميرو]

اقتباس المشاركة الأصلية كتبت بواسطة ابراهيم دياب موضوع جميل اختى الكريمة فعلا اقولك على حاجة بسيطة والله طول عمرنا نعيش فى حى واحد من زمان فى مدينتى حلوان وعمر مكان هناك فرق بين مسلم او مسيحى وكنا نعيش الاعياد سويا ولا نفرق بين عيد اسلامى ولا مسيحى لاننا فى الاول والاخر مصريون وكانت تعم الفرحة علينا جميعا فى الافراح معا ولكن الاعلام الفاشل هو من زرع الفتنة بيننا ويعلم الله نحن اصدقاء فى العمل ناكل ونشرب ولا هناك فرق فى اى شئ الا فى وقت الصلاة والله كم من المرات يذكرنى اخوانى بوقت الصلاة وانا نائم مثلا من التعب هى دى مصر كما قلتى راقت لى كلمات وان كانت منقولة كما ذكرتى الا انها رائعة دمتى بكل ود والدين لله والوطن للجميع ابراهيم دياب

ربنا يحافظ على بلدنا مصر وروحها الحلوه

ويزرع المحبه فى قلوبنا ويبعد عننا شر الفتن

اشكرك جدا استاذ ابرهيم لرقى مرورك

تحياتى وامتنانى

[كوين ميرو]

اقتباس المشاركة الأصلية كتبت بواسطة غزاوية وافتخر شكراً للطرح الرائع مميزفي كل وقت وفي كل طرح ما ننحرم من جديدك ^^

شكرا جدا ياقمرايه

شكرا على مرورك الرقيق وروحك الطيبه

امتنانى وتحياتى