الحلقه الاولى من ( الرأى الاخر ) ( هو العيب فى مين )

[morshooo]

بسم الله الرحمن الرحيم

اهلا بيكم جميعا ^^

دائما بيكون فى اعضاء ليها أراء خاصه بيها ممكن الاراء دى تكون معارضه

لوجهة نظرى وساعتها مش هتقبل ان حد يدخل موضوع ليا ويعارضنى

لان فى اوقات اعضاء بتستنى موضوع لعضو معين عشان تدخل تعترض

على فكرة وكلامه ورئيه عشان كدا قررت انى اعمل موضوع

( الرأى الاخر )

البرنامج هعرض عليكم موضوع بقلم عضو معانا بيوضح من خلالها

وجهة نظرة فى قضيه معينه محدش هيعرف مين الضيف دا

حتى هو هيدخل يناقشكم بعضويه اتعملت مخصوص للتوبيك دا

العضويه بأسم ( الرأى الاخر ) .

العضويه دى هنشوفها طوال الحلقات القادمه .

احب اقولكم حاجا مهمه الاعتراض مطلوب والاختلاف فى وجهات النظر مطلوبه

ولكن .

( بهدوووووووء :d ) والسبب انك مش عارف مين هو ( الرأى الاخر )

بس هتعرفو فى اخر الحلقه وبعد المناقشه .

ودلوقتى تم استضافه عضو/ة ودا المقال الـ ( بقلم العضو )

هو العيب فى مين ؟!

العنوان يمكن غريب شويه بس لازم ندور سوا على اجابه

الموضوع فى المنتدى فى البيت فى الشارع فى الشغل فى الجامعه فى كل مكان

العيب بقى فى مين ؟1

دلوقتى تيجى تتكلم مع اى شخص تلاقيه بيشتكى وزهقان وتيجى تقوله مالك

تلاقي الناس كلها ظلماه وهو مكتئب ومحدش مقدر قيمته فى المجمتع :d

'طيب وبعدين

وده مش مع شخص واحد ده مع كتيييييييير

طيب يا جماعه العيب فى مين ؟!

لما تلاقى معاكسات فى الشارع لللى لابسه محترم وال لابسه مش محترم

يبقى العيب فى مين الولد ولا المجمتع ولا البنت ولا مين ؟!

لما تلاقى بنات معقده من ولاد والعكس كمان

يبقى البنت هى اللى غلطانه انها حبت من الاساس ومحدش يقدر يلوم غيرها

ولا الولد هو اللى انتهازى ؟!

ولا الولد هو الى صادق جدا والبنات مبقتش تتعاشر فعلا

وهل مبرر للولد انه يقول البنات كلها بقت كدا انه يبقى انتهازى ويلعب بمشاعر الناس

وهل من حق البنت انها تقضيها علشان الكل بقى كده والولاد اصلا مش بتعرف تحب

لما تلاقى واحده وثقت فى واحده تانيه وحصل بينهم سوء تفاهم

والتانيه اذتها فى اى شىء ومحترمتش خصوصيتها اللى اؤتمنت عليها فى يوم من الايام

يبقى العيب فى اللى وثقت واتعاملت بحسن نيه وترجع تتهم انها معرفتش تحافظ على نفسها ؟!

ليه دلوقتى بقى اللى مستبيع واللى مش بيهمه حد غير نفسه ولا شايف

سوء الظن دايما هو اللى كسبان طول الوقت ؟!ّ

واللى الى حد ما شايف نفسه كويس بقى كل اللى خايف عليه انه يتلوث

من المجتمع بس بمزاجه غصب عنه لازم هياخد طباع من الوحش !

واصلا محدش بقى بيسيب فرصه لحد كويس يفضل كدا لاخر ؟!

طيب ايه مقايسس الكويس والوحش دلوقتى !!

نرجع نبقى ضد التعميم ونقول لاا الناس كلها مش كده

متفق معاك جدا التعميم وحش

طيب هو من حق حد لما يتصدم يشوف الناس كلها سودا اصل محدش اتصدم غيره ولا اتجرح غيره ؟!

وهو مش هيعيش عمر تانى على عمره علشان يثبت العكس !

وافترضنا انه حب يثبت العكس مين يضمنله انه مش يتجرح تانى ؟!

طيب بلاش كل ده

ليه دايما شايفين العيب فى غيرنا

ليه مش بنواجه نفسنا

احنا بشر وبنغلط !!

بس ليه الغلط بقى بيوجع ليه علشان لما تتعلم لازم تتوجع !!

والغريبه انها بقت بتيجى بالعكس مش بنغلط ونتعلم

لا بنغلط ويتحول الموضوع لمش فارق خلااص

فبقينا نتوجع مره وعشرين ونقول مش فارق !!

مجرد اوجاع بتتراكم جواك وخلااص

كام مره لما حصل سوء تفاهم وقفت وقولت انا اللى غلطان !

بس بقى مش انا الى غلطان علشان طيبتى الزياده ولا علشان قلبى الطيب

لا انا اللى غلطان انا اللى جرحت انا اللى استغليت انا اللى مراعتش مشاعر حد !!!

يمكن مفيش فكره معينه ولا واضحه فى الموضوع بس ندور سوا

العيب بقى فى مين !!!

المقال خلص والضيف وضح وجهة نظرة

الدور عليكم ياترى موافقين الضيف فى كلامه

والا عايزين تقولو رئيكم وتعترضو على كلامه

ملحوظه : الضيف هيرد عليكم وعلى كل استفساراتكم بعضويه ( الرأى الاخر )

[Magic Dreams]

جميله الفكره ونشوف بقا بجد حلوه الفكره تسلم
تحياتى ادم

[Lamees]

الموضوع من واقع المجتمع بالفعل
كل ما ذكره الضيف احنا لمسينه وحاسينه
في المجتمع زادت الحماقات والخداعات
وسؤ التصرفات والغلطات وللاسف انحطاط الاخلاق
وعدم مراعة لشعور الاخرين
بس العيب في مين
دي مش قاعدة نقدر نعممها
كل موقف يختلف عن الاخر
والاشخاص ايضا تختلف عن الاخر
وكل شخص به من الصفات الحلو والوحش
ولابد ان نتفهم الاخرين حتى نستطيع التعامل
معهم ومنع اي من هذة التصرفات
انا لا اختلف مع الضيف بل بالعكس
كلامه منطقي وواضح جدا وواقعي ايضا
كنت هنا
روني

[دمعه حائره]

للاسف الاخلاق فى غيبوبه وماتت قيم كتير فينا
العيب من اساس التربيه اللى اهملت جوانب كتير فى شخصيه الفرد
بقينا نعتمد بس على المدرسه اللى اصلا مش بتربى
ومافيش مراقبه ومتابعه فى البيت
النتيجة جيل يفتقد اساسيات كتيرغيرت شكل المجتمع كله
اصبح مثلهم الاعلى البلطجه واللى مايبقاش كده يبقى ضعيف وهايضيع
الخيانه والغدر وعدم تقدير الاصدقاء دى مسؤليه مشتركه بين اى اتنين
واحد فيهم عاش مغفل والتانى كان ماهر فى الخداع
هوا ده العيب اننا نسينا نربى وسيبناهم للنت والتليفزيون يتعلموا منه
الطيبه عمرها ماكانت عيب فى الانسان ومهما كانت المواقف اللى اتظلم فيها
اكيد بيظهر الحق وبينصفه
فمش تلوم نفسك وتقول العيب فيا
احنا حاليا بنمر بمرحله تغيير كامل لمجتمع بعاداته وتقاليده
واتفرضت علينا اخلاق وتصرفات اشبهه للغابه
وعشان نرجع للاحسن لازم كل واحد يبدا بنفسه

[العاشق الذى لم يتب]

أهلا بيك أخى مورشو
وأهلا بأخى أدهم
متهيئلى ده كلامه
وده حواره وده موضوعه وأعتقد إنى قرأت ذلك المقال فى قسم النقاش والله أعلم جايز أنا بحلم
على كلٍ
كلام جميل وعظيم
وهو جمع كتير من المتناقضات
والممغصات
والعيب فى مين
ماأظنش إجابة السؤال ده تكون بالبساطة أو سهلة
لوأنك حق تبحث عن العيب فى مين
أبحث أولا فى عيوبك
لأن الذى يرى عيبه لايرى عيوب الآخرين وإن تاعظت كبيرة
ولقد قال الإمام الشافعى عليه سحائب الرحمات
عينك إن أبدت إليك معايبا فصنها وقل ياعين للناس أعين
ولسانك لاتذكربه عورة امرءٍ فكل عورات وللناس ألسن
وأنا أسأل الضيف الكريم
كيف تجعل الذى سرق يتوب ويرد ماسرقه لصاحبه
أو الذى عاكس امرأةٍ وهى تسير وجرح مشاعرها بكلام خدش حياؤها
كيف له يجرؤ ويذهب إليها ليعتذر
أنتظر كيف يكون الرد
مودتى

[big bốss]

متسألش العيب فى مين ؟

العيب فى الذات نفسها لان لما حبت و اتجرحت محدش اجبرها هى الى اختارت

لما كدب و سرق محدش جبره لانه هو الى اختار بنفسه

لو هنلقى اللوم على حد يبقى احنا افعال الغلط عندنا مبرره

ومكنش ربنا حسبنا لانه غصبن عننا

لكن الانسان مخير مش مسير

فأن احسن فلنفسه

و ان اساء فلنفسه

مفيش حاجه اتقالت غلط فى التوبيك علشان اعترض عليه

كلامه صح

و شكرا يا مورشو ع الحلقه الجميله دى

و بشكر الضيف ع كلامه دا

بالتوفيق

[۩۩ elMagic ۩۩]

كلام واقعي جداا
وكل الناس مرت بمواقف كتير منه
الموضوع فى الاول والاخر بيتوقف ع الشخص نفسه
هو صاحب رد الفعل
سوااء منه يقدر يسيطر ع الموقف او يخليه يسيطر عليه
وصوابعك مش زي بعضها زي ما بيقولوا
ومفيش حد مبيغلطتش والانسان كل ما يعيش أكتر
كل ما هيتعاامل مع أشكال كتيير من البشر
ودلوقت الحال مش يرضي اى حد
لا ضمير ولا إيمان بقوا موجودين
ومفيش حد بيراعي ربنا فى اى عمل بيعمله
الناس قلوبها ماتت وكل واحد مبيعملش غير لمصلحته وبس
وطبعا مبدأ التعميم مش موجود
لان اكييد لسه فيه نااس بتراعي ربنا فى اللى بتعمله وعندها ضمير
ولكن للأسف دول أقليه ...
ربنا يهدي الجمييع بقآ
جميل موضوعكـ ي أبو حمييد
والضيف نور طبعا الحلقه
بالتوفيق ان شاء الله ,,

[روح صامتة]

الناس عاملة افلامانات
حتى والله ناس معندهاش مشاكل حقيقية ولا ضغط ف مشكلة
تعلمهم حاجة وتلاقيهم بيزعلوا من اي سبب نفسي
الاعلام بالنسبالي سبب فرق كبير اوي في حياة الناس
ويمكن كبر نقطة النفاق و التمثيل على بعض
و الانترنت كمان ،، بعتبره هدم لعلاقات كتير على قد ما بيفتح باب لتانية
الناس غلبها المرض النفسي
ومبقتش تستحمل واتخذت السلبية طريق طويل لها
ع العموم جيلنا مش اكتر من جيل عنده كل حاجة
بس نسي يفتكر ان حياته الاجتماعية اساس ف عيشته
و بقه منعزل ف حاجات كتير
شكرا يا استاذ راي اخر ع الاستماع
عايزة اعرف وجهة نظرك
وشكرا يا احمد ع الحلقة
ارق تحياتي

[beauty angel]

فكرة الموضوع حلوة يامرشدى
العيب فى مين ..؟ ببساطة العيب فى الاخلاق الى أنقرضت
العيب فى الضمير الى انعدم
العيب في مجتمع بيخاف من كلام الناس أكتر من خوفه من عقاب الله !!
وتعدد الاسباب وتختلف .. والنتيجة واحدة
كل واحد فينا شايف أنه مظلوم من ناحيه و كل واحد شايف أن الخطأ من الأخر
طبعا الا من رحم ربى .. لان مبدا التعميم مرفوض فى آى شىء
زى ماذكر الضيف الكريم وأنا بتفق معاهـ فى رايه
مثلا الى أتصدم فى شخص وشاف الدنيا كلها وحشه
العيب فى سوء الاختيار من الأول
العيب فى أنه وضع ثقته فى حد ميستحقش الثقة ..
وكل حالة وليها اسبابها وليها ظروفها
فى النهاية كل الاشياء الى غلط حوالينا فى مجتمعنا
الى أصبحت بعضها تحت مسمى عادات وتقاليد للاسف
مش هتغير فى يوم وليلة ولا هتغيير لما نعمل ثورة وتفضل عيوبنا زى ماهى
التغيير لازم يبدأ من أننا أحنا ومن الرغبة فى التغيير للأفضل
" إن الله لا يغير مابقوم حتى يغيروآ مابأنفسهم "
موضوع جميل ..
ميرسى مورشو والضيف على الحلقة
تسلم الايادى

[الابتسامه المصريه]

كلام الضيف صح
العيب بقى فى مين
فينا نحن ماهو انا جزء
من هذا اصلح نفسى اولا
ومن حولى ابنائى اخوتى وهكذا
حتى نكون بلا عيوب
حتى تصلح حال بلدنا

جميل ما تقدم احمد

والراى الاخر مرحبا
بك منور الحلقه

بوركتم من رب العباد