اتعلمو ازاى تكلمو خدمه العملاء

[خارج عن القانون]

انا عامل التوبيك ده لــ نــــور

واتعلمو بقا من الاستاذ واتعملو ازاى تلعبو بالقوانين



انا كنت شغال بــ يو اس بى شريحة اتصالات

بنظام 19 جنيه طول الشهر وعملو نظام جدبد اسمه منجز

اتصلت بخدمه العملاء باستفسار عن منجز

وسالتهم عن الفيديويهات بعد الميجات اللى بيدهلى هل الفيديو هيشتغل والا لا

قالولى هيشتغل وكله تمام




فاشتركت فى منجز بس اكتشفت انى انا اضحك عليا والفيديوهات مبتشتغل ولازما اشحن

اتصلت بخدمه العملاء قالولى ايوه الفيديو مش بيشتغل الا لما تشحن

قولتلهم لا انا سالتكم قبل كده وقولتو اه وانا ماليش دعوه وعملت آزعرينه وزعقت

الراجل قالى مقدرش اعمل لحضرتك حاجه قولتله طيب ادينى رئيسك

قالى هقدم طلب واخلى السوبر فايزر يكلمك فى خلال نص ساعه

وفعلا السوبر فايزر اتصل بيا بعديها بنص ساعه وشرحتله الحوار كله قالى برضو مقدرش اعمل حاجه

قولتلته قدم شكوى واكتب فيها كل اللى انا قولتلهالك واطلب منهم انهم يحولونى للنظام القديم

قالى النظام القديم اتشال من السيستم ومش هينفع ترجع قولتله ملكش دعوه قدم بس فى الشكوى اللى طلبته منك

قالى خلاص كله تمام وتم تقديم الشكوى وهيتم الرد فى خلال 48 ساعه

ال 48 ساعه خلصو ومحصلش اى حاجه

اتصلت تانى بخدمه العملاء باستفسر عن الشكوى

قالولى تم رفض الشكوى



ساعتها انا اجننت وثورت ع الراجل ووانا بكلمه السكة فصلت

هنا ديه كانت القشه اللى قصمت ظهر البعير

اتصلت تانى ولسه جاى ازعق رد عليا صوت ملائكى

فطبعا المارد اللى جوايا اتحول لكروان

شرحتلها الحوار كله

وقولتها قدمى شكوتين

الاولى فى الراجل اللى كان لسه بيكلمنى علشان قفل السكة فى وشى

هى طبعا قعدت تحاول تقنعنى ان ربما تكون الشبكة سيئة
- وده كان فعلا محتمل علشان كنت ع طريق سفر-

بس انا ابدا شكوى يعنى شكوى

والشكوى التانيه عن حوار الفلاشه وانى ارجع لنظام ال 19 جنيه

ولو مرجعتش فى خلال يومين هقدم شكوى للمرفق القومى لتنظيم الاتصالات

قالتلى خلاص تم تقديم الشكوتين وانا هتصل بحضرتك بعد مواعيد العمل

بصراحه نقطة بعد مواعيد العمل ديه خليت دماغى تودى وتجيب

هى عايزه ايه بالظبط منك ياض يا عكاشه

وليه بعد مواعيد العمل اكيد الحوار فيه آن والبت عنيها منك

المهم استنا ان بنت الايه تتصل والا عبرت فى اهلى

اتصلت انا بقا بخدمه العملاء وبقولهم حصل كذا كذا

وقالتلى هتصل بيك
(انا مردتش اقول انها قالت انها هتتصل بعد مواعيد العمل خفت لاعملها مشكله)

لقيته قالى اه هى المفروض كانت تتصل بيك بعد مواعيد العمل
(هنا طبعا مش عايز اقولكم ع خيبه الامل بعد ما اكتشفت ان الحوار عادى)

وسالته ايه يا عم الحاج اخبار الشكوى
قالى فى خلال 5 ايام هيتم الرد عليك




فى اليوم الخامس ظهر ع التليفون رقم 0111111111

واخر رقم هو بس اللى مختلف

اتخضيت انا بصراحه من الرقم وبقول الو

ردت عليا واحده صوتها عادى

-حضرتك محمد سمير

-ايوه مين

-مع حضرتك فلانه من شركة اتصالات وبكلمك بخصوص الشكوى ع خط اليو اس بى

-ايوه ايه اللى تم

-مبروك رجوع حضرتك للباقة القديمة وتعويض من الشركة 20 جنيه رصيد

-طيب لو سمحتى حوليهم للخط ده مش للـــ يو اس بى
(اصلى بعيد عنكم كنت مفلس)

-لا مش هينفع للاسف هما للـ يو اس بى بس

-طيب خلاص اوك مافيش مشكله
(اللى يجى منكم احسن منكم فى سرى طبعا)

-وبخصوص الشكوى اللى كانت مقدمة ضد احد افراد خدمه العملاء
فاحنا بنعتذر عن هذا الخطا الغير مقصود وهيتم تعويضك ب 20 جنيه رصيد

-وده بقا ع انى خط؟؟

-ع الخط اللى بكلم حضرتك عليه

اوكيه شكرا جدا ومع السلام عليكم




اتعلمو بقا ازاى تاخدو حقكم من شركات المحمول
40 جنيه اهه رصيد مجانى
المعلومات ديه مش ببلاش
بس خليها علينا انتو حبايبنا برضو

[აα∂ Ԑγεა]

الكلام دا حقيقي ولا بجد هههههه
يخرب عقلك يعني انت فعلا دلوقت علي النظام القديم ؟!

انا طالع عين اهلي من مونجز
اشحن من هنا وفي نفس اليوم او ثاني يوم يقولولي خصلت الميجات !
مع اني ولا بدخل اليوتيوب نهائي !!
وكل اللي بستخدمه فيه هو الياهو ماسنجر بس !
واللي طبعا بيقفل اول ما بتخلص الميجات !
فيومين ف الشهر ياهو وباقي الشهر صفحات الفيس بتعذب في اهلي


لا والاسوء والاسوء السرعه بعد ما تقل بعد 5 ولا 6 ايام بكتيره
المفروض تبقي 64 كيلو بايت وثابته علي كدة لاخر الشهر
الكلام دا كان بيتم دايما من يوم ما اشتركت من اول ما نزل النظام
لكن اخر 3 شهور طلعت الفلاشه ف شلل جديد
دي بقيت بتفضل كدة 10 ايام علي سرعه 64 الطبيعيه
وبعد اليوم ال15 توصل 32 بالعافية
والصفحات تحرق ف دم اهلي انا

بص اهو ادي السرعه



شركة حرامية ولاد ستين ف سبعين
وكل ما اتصل بخدمه العملاء يقولولي اكيد من منطقتك والشبكة فيها
والمشكلة بقي انا مش بعرف اتكلم معاهم
ابقي مجهز كام كلمه وكام شتيمة والاقي حد يقولي حضرتك
اعمل ايه طيب
مش بقول اللي مجهزه كله
والمفروض لو منطقتي السرعه مكنتش بقيت صح اول 15 يوم !
ومنطقتي مش بتخلص 200 ميجا خاصة بالياهو واليوتيوب ف يوم ونص
مع ان معروفه ساعه الياهو ب1 ميجا بس
وانا مش بفتح غيره
يعني المفروض 200 ساعه ياهو ف الشهر


قولي بقي انت دلوقت علي النظام القديم ؟؟
ولا ايه ؟
لانهم قالو انها اتلغت ومبقاش غير مونجز
لان طالما السرعه هتفضل 32 هيا هيا نص الشهر
يبقي تفضل الشهر كله ومعاها ياهو اريح !

دا اذا فشلت مفاوضات توصيل النت الويرليس كالمعتاد
يبقي اعمل نفس الكلام دا احسن وارجع للقديم
او اكسر الخط زي ما مقرر وافك شفره الفلاشه بشريحة موبينيل ولا فودافون

[صافي]

امممممممممم انا بشحن ب40 باقه ماكس ومره شحنت وعملت كونكت علي طول وحسبوا الميجا ب25 قرش وسحبوا الرصيد واتصلت قلولي انتي غلطانه كنتي استنيتي رساله تاكيد تجديد الباقه قولت اوك وقفلت شحنت وجيت الشهر الي بعده شحنت واستنيت المسج مجتش اتصلت بخدمه العملا قالتلي مش مهم الرساله اعملي كونكت عادي وفعلا بس الرصيد اتسحب زي الاول اتصلت بيهم راح قالي المفروض تستني الرساله اممممممم بجد كنت حاسه انه هيعيط من الكلام الي سمعه قلتله مليش دعوة عايزة الرصيد بتاعي ومتبته في الكلام ومش مشكلتي اتصرف هههههههه بس برضه معملوليش حاجه وشحنت تاني اهي اهي
جيت الشهر ده شحنت ومتجددتش وبعت رساله ل555 قلولي رصيدك صفر رحتلهم فرع اتصالات الي هنا وحولولي رصيدي تاني الحمد لله
بس بجد حراميه
وكويس انك اخدت حقك انا المرة الجايه هقدم شكوي واجرجرهم في المحاكم ههه
بلتوفيق

[واد حبيب]

طيب والله انت كويس اهو
لما كنت في مصر كنت باشحن ب50 في الشهر
وافتح يومين واسيب الوصله تاني بعدها باسبوع افتح الوصله يقولي لزم تشحن
طيب اشحن ازاي وانا لسه شحن من اسبوع؟
بس بصرحه كنت بشحن وبكبر دماغي انا قولت انا قاعد 3 شهور في مصر مش هتفرق حتي 300 جنيه

[Hearts Whisper]

طيب كويس اوى انك عرفت تاخد حقك عشان تعرف قيمة البنات ههههههه

انا بقا شغالة بنظام منجز دا بس اصلا انا بشتغل بالخط بتاع الفلاشة

على الموبايل عشان اعرف الاقى نت لو الحجة مام سحبت الكومبيوتر منى ههههههه

وحصل فيا مواقف الشحن دى كذا مرة اشحن للخط للباقة واجى ادخل نت

ميدخلش استنى رسالة التاكيد ولا بتيجى ^_^ كام رمة واضطر اروح اشحن تانى هعمل ايه يعنى ^^

بس انا معايا ممكن السرعة تقل بس مش بتفرق مش عارفة بقا هل لانى شغالة من الموبايل ولا ايه النظام ^^

وممكن يعدى الشهر ومش بستخدم كل الميجات لان الكومب موجود

[مشاعر طفله]

ههههههههههههههههههههههههههههههه جميل اوووووووووى عليك
مبرروك 40

[خارج عن القانون]

اقتباس المشاركة الأصلية كتبت بواسطة Ѕad Єyes الكلام دا حقيقي ولا بجد هههههه يخرب عقلك يعني انت فعلا دلوقت علي النظام القديم ؟! انا طالع عين اهلي من مونجز اشحن من هنا وفي نفس اليوم او ثاني يوم يقولولي خصلت الميجات ! مع اني ولا بدخل اليوتيوب نهائي !! وكل اللي بستخدمه فيه هو الياهو ماسنجر بس ! واللي طبعا بيقفل اول ما بتخلص الميجات ! فيومين ف الشهر ياهو وباقي الشهر صفحات الفيس بتعذب في اهلي لا والاسوء والاسوء السرعه بعد ما تقل بعد 5 ولا 6 ايام بكتيره المفروض تبقي 64 كيلو بايت وثابته علي كدة لاخر الشهر الكلام دا كان بيتم دايما من يوم ما اشتركت من اول ما نزل النظام لكن اخر 3 شهور طلعت الفلاشه ف شلل جديد دي بقيت بتفضل كدة 10 ايام علي سرعه 64 الطبيعيه وبعد اليوم ال15 توصل 32 بالعافية والصفحات تحرق ف دم اهلي انا بص اهو ادي السرعه شركة حرامية ولاد ستين ف سبعين وكل ما اتصل بخدمه العملاء يقولولي اكيد من منطقتك والشبكة فيها والمشكلة بقي انا مش بعرف اتكلم معاهم ابقي مجهز كام كلمه وكام شتيمة والاقي حد يقولي حضرتك اعمل ايه طيب :d مش بقول اللي مجهزه كله والمفروض لو منطقتي السرعه مكنتش بقيت صح اول 15 يوم ! ومنطقتي مش بتخلص 200 ميجا خاصة بالياهو واليوتيوب ف يوم ونص مع ان معروفه ساعه الياهو ب1 ميجا بس وانا مش بفتح غيره يعني المفروض 200 ساعه ياهو ف الشهر قولي بقي انت دلوقت علي النظام القديم ؟؟ ولا ايه ؟ لانهم قالو انها اتلغت ومبقاش غير مونجز لان طالما السرعه هتفضل 32 هيا هيا نص الشهر يبقي تفضل الشهر كله ومعاها ياهو اريح ! دا اذا فشلت مفاوضات توصيل النت الويرليس كالمعتاد يبقي اعمل نفس الكلام دا احسن وارجع للقديم او اكسر الخط زي ما مقرر وافك شفره الفلاشه بشريحة موبينيل ولا فودافون

هههههههههههههههههههههه

يا محمود مه انا مش اى اى والا زى زى

وايوه انا ع النظام القديم ومش هيتلغى الا لما اغير انا الباقة

بس هو اتلغى من حيث انك تشترك فيه

يعنى مش هينفع انك ترجعله او تشترك فيه

ومعتقدش ان هينفع انك ترجع للقديم الا لو عملتلهم آزعرينه كبيره

بس اوع تشتم اوع زعق وهيص ورخم واوع تقفل معاهم المكالمة

طول ما السكة مفتوحه وانت بتكلمه ميقدرش يقفل السكة

حااااول مع انى معتقدش انها ممكن تجيب فايده دلوقتى

خاصة وان النظام اتلغى بقاله كتيــــــــــــر

ولو خلاص قفلت معاك ومافيش فايده

هديك فلاشتى وعشان انت حبيبى هعمل معاك الواجب

500 جنيه بس ^^

[ساحر الأحزان]

انت قلتلهم الأول أنك محمد عكاشة

الشهير بخارج عن القانون

الاول ما كنوش يعرفوا

دلوقتى عارفم

ونور كان فرحان بال2جنية

انت بقى طلعت معلم

قلبتهم كويس

ويلا خلى الناس تتعلم منك

ظريفة يا محمد

[الرحــاال المٌتَمرد]

إحنا فـ نَعيم كدا ,,
بندفع الـ الإشتراك ويفضل باقي مِن مساحه التحميل لحد ما يخلص الشهر
يسحبوها وينزلوا المساحه الجديده وكذلك كٌل شهر ,,
والسٌرعه بلا حدود أصلاً ^^
يالا مبروك يا عٌكاشه ,, و قلبى معاك يا محمود هههههه

[big bốss]

ههههههههههههههههههههههه

قشطه قشطه يا ابو عكاشه

والله جدع ياض

اخت منهم اربعين جنيه

و انا فرحان ع اتنين جنيه دا انا غلبان ^_^

تعرف ان انا عندى مودم اتصالات برضو ع باقة منجز دا انا هعملهم فرح و اقلهم زى محمد عكاشه حولونى

ابعتلى رقم خط المودم ههههههههههههه

و ياخى فيه نقطه عجيبه

بيجيبوا بنات فى خدمة العملآء صوتهم جامد زى الكروان هههههههه

يخلى اى ثائر يهدى و يستسلم ^^

برافو عليك عكاشه