الحلقه الثانيه من ( خلف الستار ) مع ( morshooo )

[morshooo]

بسم الله الرحمن الرحيم

اهلا بيكم جميعا

والحلقه الثانيه من

( خلف الستار )

البرنامج مش هنعمله عشان عضو يهاجم اخر

الاسئله كلها هتكون شخصيه بالعضو الى هيتم استضافته

وهيكون ليه حريه الاختيارسواء

بأعلان اسمه فى نهايه التوبيك او بعدم الاعلان .

والضيف هيكون مسئؤل عن كل كلامه لانه هيتحدث عن نفسه

ودلوقتى تعالو نشوف الضيفه الثانيه قالت ايه عن نفسها :



س / اهلا بيكى فى برنامج ( خلف الستار ) ؟

اهلا بيك يا مورشو وبأسئلتك ^_^

س / طبعا عايزينك تكلمى براحتك بما ان محدش هيعرف انتى مين ؟

اوك هاخد حريتى بما اننا ورا الستاار

س / فى البدايه اية رئيك فى شخصيتك ؟ شايفا انك بنت مثاليه ؟

كويسة ^_^ بس كنت حابة تكون احسن من كدا
ومش شايفة خالص انى مثالية بالعكس انا بنقض نفسى فى حاجات
كتير ومحتاجة اغيرها فى نفسى وبحاول اغير من نفسى

س / اية هى عيوبك من وجهة نظرك ؟

اكبر عيب بكرهه فى نفسى انى مترددة اوى فى اتخاذ اى قرار
وكلام الى حواليا بيأثر فيا بنسبة كبيرة

س / محصلش قبل كدا معاكى انك اتصرفتى تصرف وندمتى عليه ؟

كتير اوى حتى تصرفاتى فى حياتى العادية لكن هوا فى حاجة
فى حياتى كدا مش موقف هوا فترة مرت عليا خلتنى اهمل
مذاكرتى ودراستى وكان بدون سبب
كان نفسية وسبتها اتغلبت عليا ولحد دلوقت مش قادرة
اتغلب عليها انا
لانى فقدت ثقة كتييييييير اوى من الى حواليا وبقت نظرتهم
ليا غبية جدا

س / شايفا انك بتسمعى كلام اهلك وانتى مقتنعه والا بتسمعيه غصب عنك ؟

وانا صغيرة كنت بسمع كلامهم على اقتناع تام على الرغم
انى كنت طفلة
انما لما كبرت وبدأت مرحلة المراهقة معايا بدأ التمرد عندى
يزيد اوى ممكن فى حاجات ابقا مقتنعة بيها وبرضوا بعمل
عكسها وفى حاجات ممكن انفذها وانا مش مقتنعة بيها لكن
لازم انفذها ودا من الاسباب الى بعدتنى عن اهلى اوى الفترة الاخير

س / مين الاشد فى المعامله والدك والا والدتك ؟

والدى اشد بكتير

س / بصراحه شديدة مين الاقرب لقلبك الوالد والا الوالدة ؟ وايه السبب ؟

الاتنين قريبين لقلبى طبعا بس الى اقرب لحياتى وفى التعامل معايا والدتى
يعنى ممكن تقول اصحاب مش بنت وماماتها بس الفترة الاخيرة وزى ما قللتك
فوق بقيت بعيدة عنها اوى ونفسى ارجعلها زى الاول لانى عارفة انها زعلانة
منى انى بعدت عنها وحتى هى بتحاول تقرب وانا الى ببعد نفسى ارجع اقرب منها زى الاول بس مش عارفة

س / انتى مريتى بتجربه عاطفيه وانتهت ؟ انتهت عن اقناع والا ظروف اجبرتك ؟

لا ظروف اجبرتنى على كدا

س / شايفا انك بتمرى بظروف صعبه بسبب انهاء العلاقه والا دا وضع طبيعى ؟

عمرها مهتكون امر طبيعى بالنسبة لاى حد ومش سهل ان تمر وتتنسا

س / مش شايفا انك اتسرعتى فى الارتباط وانك تدخلى فى علاقه عاطفيه فى سنك دا ؟

عمرى ماشفتها بالمنطق دا لانها مش بايدى

س / شايفا انك اجتماعيه والا انطوائيه ؟ وانتى صح والا غلط ؟

لو على النت اعتقد انى اجتماعية اوى اوى اوى كمان مع معظم الناس
انما برا النت فى الحياة العادية مع الى قريبين منى اجتماعية جدا جدا انما الى
معرفهمش شخصيا او مليش ارتباط جامد بيهم حتى ممكن اكون بقابلهم يوميا كمان فمش بحس انى اجتماعية معاهم ابدا مقارنة من الى بشوفه من تعاملات
اصحابى او كدا واجتماعياتهم وكدا معرفش ان كنت صح ولا غلط بس اعتقد انى عادى يعنى

س / محصلش قبل كدا وحسيتى انك عايزة تتعرفى على شخص معين ؟

والله مش فاكرة حد معين بس انا من طبعى لما الى قدامى بيجذب انتباهى
باسلوبه وشخصيته سواء بنت او ولد ببقى عندى فضول انى اعرف عنهم اكتر

س / امتى اهتميتى بمظهرك او لبسك عشان تلفتى انتباة حد معين ؟ وكان مين ؟

مش هكدب عليك انا عندى وسوسة من موضوع مظهرى دا يعنى لازم اكون خارجة من البيت وانا برفكت من كل حاجة وبرضوا مش ببقا مقتنعة بكدا
انما عشان حد معين اعتقد انى احب اكون مميزة قدام الكل فى جميع الاوقات ^_^

س / حاسه انك اعترفتى اعترافات مهمه اول مرة تعترفى بيها ؟

على فكرة اه وعايزة اقولك حاجة بقا ربنا يسامحك لان فى كام سؤال
خلونى ابكى وانا بكتب

س / تحبى تقولى ايه لنفسك ؟

نفسى ارجع زى الالو وارجع ثقة فى نفسى وثقة الى حواليا فيا
واثبت للى حواليا انى اقدر ارجع زى الاول مش زى ماهما متصورين

وبكدا بتخلص الحلقه الثانيه

انتظرونى وضيف جديد فى

( خلف الستار )

[العاشق الذى لم يتب]

جميلة فكرة البرنامج جدا
وأسئلة معقولة وإجابات أيضا معقولة
ضيفة صريحة جدا
ومش لاقى شيئ معين أنقد به الضيفة
غير حكايةةتمردها على والديها لما كبرت
ربنايصلح حالك ويرزقك ابن الحلال
والشكرلك مرشو تعيش واتمرشنا
مودتى

[سارة بنت مصر]

جميل اوى البرنامج وحلقه جميله

بالتوفيق

[دمعه حائره]

على فكره الترددوانك بتهتمى بكلام الناس
دى اوقات بتكون ميزة لانك عاوزة تكونى دايما احسن
بيكون عندك فرصه تفكرى قبل ماتتخذى قرار
بس مش تخليهم يأثروا بشكل كبير عليكى
يعطل طموحك او يأثر على قرارات مهمه فى حياتك
خدى وقتك فى التفكير ده هايكون احسن من التسرع
وحكايه التمرد دى امر طبيعى فى سن معين بس بتاخد وقت ولازم انت تبطليها
التجارب العاطفيه لما بتفشل لازم ناخد منها حكمه
ونتجنب الخطأ اللى وقعنا فيه قبل كده
برغم ان الحب مالوش قانون تقدرى تحددى بيه شكله وظروفه
لكن من البدايه بتقدرى تحجمى الموضوع
حاولى تكونى هاديه اكتر ومتصالحه مع نفسك وعندك ثقه كبيره
هاتكونى مرتاحه فى كل تعاملاتك
وماتفكريش فى الى فات
وربنا يوفقك
تسلم موروشو

[Mahmoud Kamel]

بــصـي اي شـخـص بتمـر بيـه ظـروف صعـبـه جدا
بس بـقـدر الامكـان تحـاولي تتغلـبي عليهـا ومش تـاثر فيكـي
موضوع تمردك ع والدك فعـلا هـو اللي لازم يتعالـج قبـل اي شئ لان رضا الوالدين من رضا ربنا
ولو ملكيـش خيـر فِ اهلك مش هيبـقي فِ خـيـر من اصلـه فِ اي شئ ممكن تعمليه
اعزمـي النيـه انك تكـوني انسـأنه أيجـابيه واتوكلـي علي الله وبـصي للطـريق الصح بدون
ما اي شئ يخليـكي تتوسوسي زي ما بتقولـي واكيـد ربنـا بيـقف جنب عبـادة اللي محتاجينله

حلقة مميزة يا مورشو زي ما عودتنـا وضيـفة فـعـلا فتحـت قلبهـا بـ كلامهـا وربنـا يصلـح حال الجميع

[حَرفُُ هجآءّ]

بصى اى انسان بيمر بصدمه او كبوه اكيد بتأثر فيه
لكن بالعزيمه بيقدر يخرج منها
اشغلى وقت بالحاجات اللى تسعدك ديما
اتعرفى على اصدقاء جدد
اخرجى واتفسحى والعبى انتى لسه صغيرة
عيشى حياتك بالطول والعرض
اليوم اللى بيفوت مش بيرجع تانى
احنا فى الدنيا مسيرين مش مخيرين
نرضى باللى ربنا قسمه لينا مهما كان صعب
تعرفى كمان الشغل بينسى كتير اووى المهم انك تشغلى وقتك
واذا كانت فى علاقه وفشلت اكيد ربنا هيرزقك اللى يستحقق فعلا

بالتوفيق ليكى

حلقه جميله اووى ياحمد

[kenzy sweet]

فعلا كلام منه صح وعجبنى

اهم حاجه انسى اللى فات ومتفكريش فى الوحش اللى فيه

دورى على الحلو وافتكريه

والحياه مش بتوقف على حد

الحياه تجارب وزيادة خبره فيها

ان شاء الله تكونى احسن وتوصلى للى انتى عوزاه

حكايه التمرد دى كلنا مرينا بيها

فى الوقت اللى كنا بنشوف فيه الغلط صح والعكس

او

انك حبه تعملى لنفسك شخصيه وعشان كده بتتمردى وخلاص

علشان يكون ليكى رأيك

وفى كلتا الحالتين لما تفهم الدنيا اكتر مش هتحتاجى التمرد ولاهتحسى بيه

لانك هتعيشيها صح ان شاء الله

تسلم موورشوو

[احساسى صحيح]

علاقتك بوالديكى هما طريق نجاحك فى حياتك
رضاهم عنك هو اللى هيوصلك للراحة النفسية
واللى بيها تقدرى تحددى لنفسك مستقبلك بدون اى تاثيرات نفسية
وزى ما عرفت من الحوار ان سنك صغير
فا موضوع الحب دة يا ريت ما تنشغلى بية دلوقت
الاهم يكون عندك طموح تحققى حاجة فى مستقبلك وخاصا الدراسى
ربنا يوفقك وشكرا مورشو على الحلقة الجميلة
احترامى

[مِسكُ الشَهادة]

قبل العلاقة مع الوالدين ... عليك ِ يا أختي الغالية
أن تكون علاقتك بالله قوية جدا ً جدا ً لأنه
قسما ً بالله من يستشعر قيمتها لا يحزن أبدا ً
وإن طافت به كل الهموم ودا أملنا فيكي برضو
طاعة الوالدين هي جزء من إرضاء الله عز وجل والعقوق من الكبائر
عليك ِ أن تبحثي كثيرا ً عما يسعدك
ولا تنظري للماضي كثيرا ً دائما ً جددي من حياتك
ترقبي الأمل بالله دوما ً
إعلمي أن هناك من يحسدك ِ على ما انت ِ فيه
لذا أشكري الله
إقبلي النصيحة إن كانت في مصلحتك ولا تلتفي لها
إن كانت على غير رغبتك ...
لا تفقدي الثقة في نفسك فالأيام التي أفقدتك ِ الثقة في لحظات ضعف
كفيلة أن تسترجع قوتك في لحظات صبر وقوة
تعلقي بالأمل بالله ولا تلتفي خلفك
إحتضني الإبتسامة وودعي الألم وذلك بالشكر لله ع الضراء قبل السراء
لا تحزني إن فقدت ِ شيئا ً لأن ربك ِ برحمته ِ الواسعة منحك ِ أشياء كثيرة
في زمن الرسول ص الله ع وسلم
جاءت أمراة للرسول وقالت له
فقدت إبني وفقدت مالي وفقدت زوجي وفقدت أخي يا رسول الله
ضاقت الدنيا في وجهك ...
فقال لها أتريدن الجنة أم النار
قالت وهل يريد أحد النار ... طبعا ً أريد الجنة
فقال لها من يصبر ع قضاء الله وقدره
له الجنة ...
ثم قال لها :_ أنت ِ رغم ذلك لم تفقدي شيء
قالت كيف
قال من يخسر الدين هو من يخسر الدنيا والآخرة
وبالتالي يخسر كل شيء
لا تحزني وإصبري ثم إنظري لنعم الله عليك ِ
من حواس وصحة وعقل لو وضعت في كفة ميزان
والدنيا في الكفة الأخرى ... لرجحت حاسة البصر لوحدها
لذا إصبري وجددي من حياتك ولا تيأسي
فالله والأمل به موجود دوما ً في كل لحظة وثانية
فقط يبتليك ليختبرك
ونسأل الله أن نكون وإياك ِ من الصالحين
مشكور يا أحمد يا غالي
وكل الشكر للضيفة المحترمة

[حلم عمري]

اولا حبيبتي علاقت مع اهلك سبب سعادتك وضرورية جدا في حياتك
عشان كدة لازم تحاولي ترجعي علاقتك بيهم زي الاول وخصوصا مامتك لانك مش هتلاقي حد يخاف عليكي وينصحك زيها
وكمان انتي لو عندك العزيمة والارادة انك ترجعي زي الاول اكيد هترجعي حاولي وقربي من ربنا اكتر
وربنا هيوفقك ان شاء الله
نورتي الحلقة
تسلم مورشو بانتظار ضيف جديد باذن الله