حلمـــت إمتـــه

[Şα3Đ..♥]

قولي اخر مره فيها
حلمت امته
طب بقيت شجاع متين
ولا لسه
اصلك انت من سنيين
مندفن مكبوت
قولي اخر مره فين
لما قلبك كان له صوت
اصلك انت من سنيين
عايش ف ضلمه السكوت
مخنوق ف زنقه البيوت
جربت تطلع عالسطوح
جربت تلمس السطوع
جربت ترجع من الجروح
ولا مش لاقي الرجوع
يابني قلبك من الجروح
حبل داب وهينقطع
ولا هو كان مقطوع
طب كنت حاول افتله
ولا اطلع بدله
من اي بياع للامل
انت فين من اللي حصل
لساك بتهوي الكسل
لسه بتكره العمل
انت مين انت فين
عيني تايهه عن ملامحك
عينيك لسه مختفيين
وسط خوفك
وسط شبحك
كنت اعلي صوت بيضحك
كنت لامحك
روحت فين
لساك مضلم جو أوضتك
لساك مضلم جوه أوضتك
خايف من تراب الشوارع
ييجي يعفر ف وشك
خايف من خضار المزارع
لا يفكرك بطفولتك
طول ما انت عايش ف جحرك
مين بس هييجي يعبرك
افتكر كده وقت فرحك
افتكر كده وقت صغرك
مش فاكر ,, انا هفكرك

فاكر لما كنا صغار
والبلي والكوره والفرق
لما كان قلبك مطار
لطيارتك الورق
حلمت يومها تكون طيار
بس اهو حلمك مرء
فاكر الشراع والمركبه
فاكر لعبك والكركبه
فاكر سعد بتاع زمان
فاكر ضحكه اللي كان
يملي اجواء المكان
كل ده راح وغرق

طب فاكر حنان
البنت الحلوه
بنت الجيران
لما كانت تيجي جمبك
تمسكلك طرف الخيطان
وتطير الطياره معاك

ولا لما اديتها ورده
فاكر كانت لونها ايه
ايوه كانت ورده حمره
فاكر اخر يوم مابيينا
يومها قفلت الشباك
يومها مشيت من هناك

اوعي كلامي يعورك
ولا يصحي الوجع
انا بس كنت بفكرك
ان انت كنت عيل جدع
قادر ع الحزن بالفرح
بس انت قلبك انجرح
والجرح كعبله ووقع

ليه حاطط علي قلبك حصار
ومن الفرح ليه محصنه
قوم نفض وشك من العفار
ولملم ف قلبك لصمه
دخل ف قلبك ضوء نهار
وغور اليأس واردمه
لو مفكرتش تاخد قرار
هتخسر قلبك وهتعدمه

[شاعر واسير الحب]

رائع جدا
شكرا علي المجهود
دمت بخير

[inglorious]

فاكر لما كنا صغار
والبلي والكوره والفرق
لما كان قلبك مطار
لطيارتك الورق
حلمت يومها تكون طيار
بس اهو حلمك مرء
روعة تسلم ايدك

[toty tota]

رائع جدا
شكرا علي المجهود
دمت بخير

[♥SaRa]

كلمات جميلة معبرة عن التفاؤلـ
يسلــم قلمكـ المبدع

[Şα3Đ..♥]

اقتباس المشاركة الأصلية كتبت بواسطة شاعر واسير الحب رائع جدا شكرا علي المجهود دمت بخير

متشكر جدا
ربنا يكرمك
نورتني

[ويبقى الأثر]

ما شاء الله ربنا يديم عليك موهبتك سعد
مقطوعة رائعة وكلمة رائعة قليلة على هذا الإبداع الرقيق
السابح فى فضاء النغم والحس الجميل
تحياتى يسبقها تقديرى