ظاهرة المعاكسات ...........و معانا ( Mind language )

[big bốss]

اهلآ بكل رواد قسمنا العزيز


نلتقى معكم فى برنامج جديد و هو مشكله نعانى منها فى مجتمعنا


و نستضيف شخصيه او ضحيه لها لناقشها فيها


و اليوم معنا مشكلة المعاكسات فى الشارع و معانا Mind language

Mind language

Ultimate aşk
مشرفة قسم التنمية البشرية سابقا

أهلآ ببنت بلدى سمو الاميره

اهلا وسهلا بحضرتك أستاذ نور ابن بلدى : )


- طبعأ اكيد كنتى ضحيه من ضحايا مشكلة المعاكسات الى

بتعانى منها البنات . صح


اكيد طبعا .


طيب بصراحه كدا جوبينى



1- فى نظرك أيه سبب ظاهرة المعاكسات دى ؟

بعيدا عن لبس البنت وبعيدا عن انى ممكن يكون مرض
فى الولد انه يعاكس فدول مش قواعد ثابته للمعاكسة من رائى ارتفاع الاسعار اللى يخلى الولد ميكونش بيت واسرة غير بعد ردح طويل من الزمن هو اللى يخليه يلجأ
للمعاكسة على أمل انه يلاقى واحده تتسلى معاه فى
التليفون لانى للاسف الشديد فية قلة من البنات بتنساق
وراء النوع دا من المعاكسة وبتتجاوب معاه وهما الاتنين
بيكونوا عارفين كويس انهم بيتسلوا ودا مش حب ولا
بداية لارتباط رسمى لانى عمرى المحترم مايعاكس حد
ولا عمرى المحترمه ماتنساق وراء النوع دا من الكلام.


2- أيه هى مظاهر المعاكسه و هل بتختلف من شاب لشاب و لا كلها واحد ؟

أكيد بتختلف تبعا للبيئة اللى جاى منها كل ولد يعنى
فية اللى بيعاكس كنوع من الجنتله والشياكة وانه
يبان انه ولد كول وكلامه بيكون ياسكر ياعسل
اما فية ناس تانية بتكون جاية من بيئة لاحول لها
ولا قوه فدا فيلجأ لأسلوب تانى فى المعاكسة .


3- أيه اكتر حاجه بضايقك لما حد يعاكسك ؟

هو أنه يتماده فى المعاكسة يعنى مش بيقول كلمة
ويسكت لا فية اللى بيوصلك للمكان اللى رايح
لية والكلام الاوفر اوى .


4- رد فعلك بيكون أيه لما حد يعاكسك ؟

فى الغالب بحاول انى مردش على اى حد علشان
ميطولش معايه فى الكلام ويعرف انه مهما قال
مش هعبره .


5- أيه هى الاماكن الى بتتعكسي فيها ؟

الجامعة طبعا بما انى اغلب وقتى بقضية فيها .


6-احكلنا كام موقف كدا حصل معاكى معاكسه ؟

-مرة من المرات كنت ماشية مع اصدقاء عمرى المقاطيع
دعاء ومى راجعين من درس ايام الثانويه العامة قام سواق توكتك بعد مانزلنا من التوكتك قالنا وربنا احلى واحده
ام رجل واحده بصينا على بعضنا احنا التلاته واول ما اختفينا من قدامه قعدنا نضحك ونقول مين فيكم برجل واحده .
-مره تانى فى الجامعة ماشية مع اتنين من بنات الدفعة
قام ولد قال حلوتك يا اهلى هو الاهلى بيفوز من قليل .
-مرة تالته كان الراجل اللى بدفع عنده الفلوس علشان
اخد البون واجيب السندوتشات فى الجامعه فبقوله واحدة طعمية قاللى واحد بس مافيش واحد عسل مفيش واحد سكر قولتله فية فية رزاله وقلة ادب
على اول الصبح ودا كان اول مره ارد على حد بيعاكس بس الراجل دا انا بروحله كل يوم لو كل
يوم يقول كلمة وانا اسكت لية هيتماده فرديت عليه
فاحترمنى جدا وقاللى اتفضلى يافندم باقى الفلوس .
-واحد تانى قعد يكلم شوية بعد كدا راح قاللى ياسلام
ومالك كدا حلوه لية ههههه. تحس انى حد ضربه علشان يعاكس : )

7- ياترى الجمال او الشياكه بتكون من الاسباب الرئيسي الى
بتدفع الشاب لمعاكسة البنت ؟

هو ممكن فية ناس كتير بتهتم بالحاجات دى فعلشان كدا
بتعاكس انما فية بنات تانيه ملهاش فى كدا وبردا بتتعاكس وكل ولد وذوقة فى الاختيار ولولا اختلاف
الاذواق لكل البنات بارت : )

8-لو حد عكسك و تجاوز حدوده معاكى لدرجه كبيره هتعملى أيه ؟

ممكن ارد علية بالكلام بس دى حاجة بعيدة شوية
ومتهيئلى هحاول امشى بسرعة واسكت لانى ساعتها هخاف انى لو طولت لسانى هيبقى لسانه هو اطول
ويرد عليه كلمة بكلمة فى الشارع فا انا برجح اكتر
امشى بسرعة ومردش .

9- ( اميره فتاه جامعيه من صعيد مصر ) يا ترى ليه بتتعاكس ؟

مش عارفة بصراحة ممكن يكون علشان عيونى خضره
ولا حاجه لا طبعا بهزر ما انا قولت كل واحد وذوقة
انت مثلا لوشوفتى هتلاقينى عادية انما ممكن حد تانى
يشوفنى هيلاقينى فوق العادى وكلها اذواق وربنا مالية
دخل فى حاجة بريئة .

10 - من وجهة نظرك نعمل أيه علشان الشباب تبطل معاكسات ؟

ترخصوا الشقق شوية ياعم الوزير علشان كله يقدر يجوز
ويكون بيت واسرة ويكون مسئول عنها وبكدا هيجرب
انه يكون لية زوجة وبنت هيخاف عليهم من المعاكسة
وبالتالى مش هيعاكس حد وكما تدين تدان .


كل سنه و انتى طيبه

وأنت بصحة وسلام وكل الامة الاسلامية بخير وسلام
ياااااااارب .

و شكرآ لقبول الدعوه

العفو .

[العاشق الذى لم يتب]

يسلام كده حلو خالص ياابن عمى
لوتبطل تنيلها وتهببها فى السياسة
أحضنك وأبوسك
ربناجابك فى النقاش
ناقش مواضيع زى كده ذات حوية وأهمية
وتمغص على مجتمعنا صنوف حياته
أناصراحة معجب بيك جدا
شايفك محاورومذيع لبق وحكيم
ونصيحة من قلبى
خليك كده أحسن يازهرة السوسن
نروح لأختى أميرة
طبعا بلدياتى أناكمان
وكانت مشرفتنا
ولازالت أختنا الفاضلة صاحبة قفشات اللغة العربية الجميلة
كل سنة وانت طيبة أختى أميرة
صراحة أعجبت بالطرق والتى سلكتيها وتصرفاتك والتى عملتيها
وأنت تواجهين تلك المشاكل العضال
هى مش عضال أوى بأعتبار خلاص دى أصبحت من موارثنا وشبه عاداتنا
بس طول ماأنت عيونك خضرة لازم هتتعكسى يعنى هتتعكسى
وأسمحيلى أنا كمان أعكسك شوية
وأقلك منورة الحلقة ياجميل ياعسل أنت
كل سنة وانتم طيبين
مودتى

[۩۩ elMagic ۩۩]

حلقه مميزه جدااا
أسئله وإجابات جميله
منوره ي بنت بلدي وجامعتي :d
تسلم ي نور لمجهودكـ ي معلـــم
,,

[big bốss]

الحق يا احمد رفعت بيعاكس بنت بلدنا


أيه رايك ههنضربه ولا نخطفه ولا نشوف اميره

[تجملت بالعفآف]

ههههههه

حلوه اووي الحلقه مع سمو الاميره

واجابتك في منتهي العقلانيه

استمتعت كثيراً بالأجوبه

وربنا يهدي الشباب

تسلم ياا نور ع مجهودك

ودي

[✿ Celiηα]

حلقة جميلة واستضافة ضيفة رائعة
بالتوفيق ...

[♥SaRa]

ـجميلة جدا الحلقة بجد
وإجابات مميزة
واسئلة جميلة منك نور
ومنتظرة الحلقة القادمة

[esra2 mohamed]

الحلقه جميله جدا
واجابات رائعه

لكن عايزه اوضح ان فى ناس متزوجه وعندها اولاد وزوجاتهم ايه فى الجمال وبيعاكسوا على فكره
ورجال كبار بيعاكسوا
الازمه مش ازمه شقق وفلوس بس
الازمه ازمة اخلاق

[sεηυσяιтα ησOση]

حلقة جميلة

ومميزة

[معذب القلب]

موضووووووع اكثر من رائع يسلموووووووووووو