ده بجد 3 !

[طمطم]

المرة دى هحاول اكون متمالكة اعصابى ,,

لان الموضوع بيمسنى كـ باشمهندسة ميرنا xD



رغم ان الموضوع ده اتهرى كتير وناس اكتر اتكلموا فيه ,,

بس انا كـ ميرنا اتخنقت من الافورة اللى بلاقيها م الولاد ف الشارع ..

يعنى ي سيدى عندك السنة كلها بتعاكس .. شهر واحد ي حج بطل ,.,
صدقنى مش هتخسر حاجة يعنى ,,

لا والعيال بقت جريئة ,, يعنى مش بيهمهم مين معاك
دايسين عادى!



الفكرة م الموضوع ,, انا كـ بنى ادمة ليا الحق انى انزل الشارع وامشى فيه
من غير م حد يدايقنى ,, يقولى بئآ كلمة حلوة _كلمة وحشة
دى مش ازمتى ,,

لبسى ضيق _لبسى واسع ,, برده مش يخصه لانه مش هو اللى هيحاسبنى

لا والابشع انى حتى مقدرش ارد
يوم م افكر اعمل كده هيقول ,,

"بس ي معلم ,, دى بتفتحلك سكة !"

وهو تلاقيه شبه رجل الكنبة _ده تشبيه مش شتيمة



نفسى اى ولد منهم يحط نفسه مكان بنت ,,

قسما بالله م هيستحمل ساعة واحدة !

طب ليه بئآ بتعمل كده ,,

مشاكلك النفسية انك حد مش متزن وماشى تدايق ف خلق الله
انا مليش دعوة بيها ,, روح اتعالج ,,

وع رأى الدوكـ


لا مش بتاعناا ,, قصدى باسم xD





صدقتْ ..

سورى لو انفعلت
او شتمت

بس الموضوع .., غايظنى xD

#نراكم بعد الفاصل ..

[واد حبيب]

انا قولتها قبل كده واقولهالك يا طمطم
الشاب المصري لو بطل يعاكس يموت

[روح صامتة]

لازم تلاقي ناس بتتحشر كده ف اي حاجة ،،
على طول عارفة ان البني ادم دا معندوش دماغ و الله
دا لوحده انتهاك للحرية و الخصوصية كمان
و مين يسمحله انه يتعدى ع البنت بنظرة و لا بكلمة اصلا
بشكرك ي حلوة :*
ارق تحياتي

[۩۩ elMagic ۩۩]

بالجزمه وإديله بيها علطول ي طماطم
بصي أصل صعب متلاقيش حد بيعاكس
المهم إنتى تعملى اللى تكونى راضيه عنه
وتكونى ماشيه حسب دينك ما بيقول
والعيل السيس اللى بيعمل كده
دا بيرخص نفسه اوى وبيرمي كرامته فى الارض
عياال تافهه بتجري ورا حاجات هبله
ربنا يهدي ,,

[تيتشر نفشه ツ]

مممممممم
طب والله معاكِ حق
يعني نتعاكس = لازم نسكت
علشان لو اتكلمنا وشتمنا = مبسوطين وعاوزينهم يزيدو
يعني يانسكت ونكتم فنفسنا
يانرميهم باللي ف ايدينا >> فرجلينا يعني
ونطلع وحشين


انا كـ ميس زينب d×
قررت اني مش هطلع الشارع لوحدي
يااما معايا راجل يرد او يرمي بالي فإيده بدالي
يااما مش اعرّض نفسي لموقف يدايقني ومقدرش آخد حقي ..

كان في حلقه ف برنامج الستات مايعرفوش يكدبو لو عارفاه
قعدو يشوفو آراء الناس ومواقفهم
وتوصلو ل إن البنت لازم تاخد حقها لو اتعرضت للتحرش والمدايقه
حتى لو هيفكرو انها وحشه والكلام دا ..
لأن الشخص الي بيعاكس دا بيكون جبان أصلا

كان في وحده اتصلت بتقولهم انا كنت ماشيه في الشارع
ف جه واحد بيقولي " ايوا يامووزه "
قامت قايلاله بصوت عالي " أيوا ياجزززمه "
بعد احترامي للكلمه هيا ال بتقول مش انا
ف المهم ان هوا قام سابها وجاري

ف هما معاهم حق
لما قالو ان البنت لازم تاخد حقها بجد ..
بس انا مش بتجرأ ارد ع الرجاله :/
هيا بتعتمد على التعود
ف أنتي لو متعوده تردي وتاخدي حقك
ماتسكتيش

رغي رغي رغي
حلو الموضوع
جدا ً

[عاشق متيم]

اقتباس المشاركة الأصلية كتبت بواسطة طمطم لبسى ضيق _لبسى واسع ,, برده مش يخصه لانه مش هو اللى هيحاسبنى

مع احترامى لرأى حضرتك ؛ انا معترض على الجمله دى . لان البنت لما تكون ماشيه فى الشارع وطريقه لبسها مش كويسه ؛ ده بيخلى الشباب يطمع فيها وينظر لها .

اما بخصوص المعاكسة ؛ الصراحة اصبحت مرض مزمن ومش اعتقد اننا هنتخلص منه ؛ والواحد بقى بيشوف مناظر قبيحة جدااااااا ؛ والشخص اللى يعاكس واحدة او يبص لواحدة ماشية فى الشارع ! ده شخص مش متربى ومش محترم لانه مش عارف ان ممكن اللى هو بيعمله هيتعمل فى امه او اخته او مراته ( ده ان حد رضى يجوزه بنته اصلا )
واعتقد ان اسباب المعاكسة من جانب الولد :
ضعف الوازع الديني: فضعيف الدين ترى منه العجائب والمصائب، فهذا الدين مصدر العزة، فمتى تخلى المرء عنه أذله الله، كما قال عمر نحن قوم أعزنا الله بالإسلام، فإن ابتغينا العزة بغيره أذلنا الله )). فضعف الوازع الديني قاتل لكل الحضارات والشخصيات مهما كانت، وضعيف الدين لا يرح صاحبه ولا يجعله يخاف من عقوبة أو أحد، ولا يستحي من عمله، وكما قال النبي صلى الله عليه وسلم: ((إذا لم تستح فاصنع ما شئت)) ، ونسي أنه تعرض أعماله في كتاب لا يغادر صغيرة ولا كبيرة إلا أحصاها، وقال تعالى{وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِرًا وَلَا يَظْلِمُ رَبُّكَ أَحَدًا} . ويقول تعالى: {أحصاه الله ونسوه} ، عملوا أعمالا نسوها، ولكن الله أثبتها وأحصاها. ومحدش يجى يقول ليا اصل الشباب مش قادرين يتزوجوا بسبب كثرة طلبات اهل البنت ؛ مش قادر يتجوز يصوم زى ما الرسول قال ومن لم يستطع فعليه بالصوم .
بس فى بنات بتخرج من بيتها علشان تتعاكس وبتفتخر بكده ؛ وفى بنات لما حد مش بيعاكسها بتفتكر نفسها وحشة .
اما بخصوص جرأة الشباب
فى الجامعة عندنا السنه اللى فاتت ؛ بنت كانت بتأكل فى الكافتريا ؛ ودخل عليها ولد ؛ وعاكسها وراح مادد ايده واكل من اكلها وخد الكانز بتاعها وشرب منها ؛ شفتى قله ادب ووقاحة كده وطبعا البنت جابت شباب وقامت خناقة فظيعة

[-esraa-]

شوفي مافيش انسان محترم هيعمل كده ,,
وهو اصلا بيعمل كده فهو بينزل نفسه لتحت
لا والمشكلة تلاقيه بيتفاخر كمان : (
لو هوه انسان كويس كان هيحط امه او اخته مكان اللي بيعاكسها ويشوف هيقدر ولا لا ,,

حلو التوبيك
بس نفسي الاقي توبيك ليكي مش مذكور فيه باسم ده انا حطيته من احلامي الصعب تحقيقها

[طمطم]

اقتباس المشاركة الأصلية كتبت بواسطة واد حبيب انا قولتها قبل كده واقولهالك يا طمطم الشاب المصري لو بطل يعاكس يموت

طب م يبطل يمكن المشكلة السكانية تتحل =))


منور ارمضان ,,

[طمطم]

اقتباس المشاركة الأصلية كتبت بواسطة روح صامتة لازم تلاقي ناس بتتحشر كده ف اي حاجة ،، على طول عارفة ان البني ادم دا معندوش دماغ و الله دا لوحده انتهاك للحرية و الخصوصية كمان و مين يسمحله انه يتعدى ع البنت بنظرة و لا بكلمة اصلا بشكرك ي حلوة :* ارق تحياتي

الله يفتح عليكى ^^..


مفيش اى مراعاة للبنت .. وكأنها مواطنة درجة تاسعة
اقل مطلب انها تمشى ف الشارع براحتها ,, بئآ حق غير مشروع !


نورتِ ..

[طمطم]

اقتباس المشاركة الأصلية كتبت بواسطة ۩۩ elMagic ۩۩ بالجزمه وإديله بيها علطول ي طماطم بصي أصل صعب متلاقيش حد بيعاكس المهم إنتى تعملى اللى تكونى راضيه عنه وتكونى ماشيه حسب دينك ما بيقول والعيل السيس اللى بيعمل كده دا بيرخص نفسه اوى وبيرمي كرامته فى الارض عياال تافهه بتجري ورا حاجات هبله ربنا يهدي ,,

حلاوتك ي شرس انت =))
بس انا بلبس كعب وممكن اتحبس فيها xD


واتفق معاك تماما ,,