أنا و أعضاء المنتدى و مع مديرنا "SiLver Spectra"

[stefo]

السلام عليكم و رحمة الله
معانا النهاااردة نجم كبير وووحش من وحوش المنتدى
و ربنا يستر علينا الحلقة دي ههههههه
إسبت حضورك يا برنس

ممنوع الرد قبل إنتهاء الحوار

[stefo]

سيتم الأسئلة و الأجابة على الخاص و بعد ذلك يتم نشرها

[ana aboodya]

فكيره حلوه

[stefo]

أخيرا و بعد طول إنتظار أطلى علينا الأستاذ طارق منورنا و الله
1_ هل انت تفعل ما تقوله هنا بالمنتدى ؟
أكيد مش دائما
هنا في المنتدى الأغلبية بتظهر بشكل مثالي . تقول دول ملائكة ..و في الحقيقة احنا بشر و الاخطاء وارد كلنا نقع فيها
و في النهاية أنا مش هقدر أحكم على نفسي لأن ماحدش بيشوف نفسه وحش

2_ اعتذار تريد ان تقدمه لمن؟
اي حد زعلان مني
3_ ما ردة فعلك عندما يقول لك حبيبك : أحبك نعم أتزوجك لا ؟
هلطشها بالالم و اقولها انتي طالق انتي طالق و بعدين هجرجرها من شعرها و هنضف بيها الاوضة هههههههه
يعني هعمل ايه يعني ..عليكم اسئلة عجيبة
4_ ماذا ستكتب لنا لتعبر عن حياتك التي عشتها الى الان في كلمات قليله ؟
اتولدت فكبرت كبرت كبرت كبيييييرت . كبييييرت اوي ..بس
5_ اذا اردت ان تبكي الان فعلى من تبكي؟
أبكي على الفوضى اللي عايشينها
نفسي البلد دي شعبها ينظف فكريا و يبطل يدعي على غيره و يلغي نظريات المؤامرة من دماغه و يطور في نفسه و ابسط حاجه ينضف نفسه من الزبالة اللي هو عايش فيها

6_ من ستختار ليمسح دموعك ؟
هجيب السيسي يمسحلي دموعي ههههههههههه
هختار المنديل يا عم

7_لو خيروك بين حبيبك وبين اعز صديق فمن تختار ؟
اهو دي بقى الاسئلة اللي تطلعك ندل
عموما انا ندل من غير سؤال اصلا
هسيب الاتنين هههههههههههه

8_ماهو تقييمك لهذا المنتدى بصراحه ؟
مش هقدر اقيم شخصيا لان اكيد دا بالنسبالي احسن منتدى ..انا اقدر اقيملك بالمقارنة بسنين عدت هقولك ان التفاعل و التواجد حاليا سيئين

9_ من يسكن قلبك؟
بعته تمليك من زمان هههههههه
انا ساكن فيه ..و لا نبات في الشارع مثلا
10_ هل تعتقد ان حظك سيئ؟
لأ

11_ هل تدخل الشات ؟
عمري ..يمكن بداياتي على النت بس كنت بدخل اتفرج و الاقي الشاشة بتجري بسرعة و مش بلحق اقرأ الكلام و ماكنتش بعرف اتكلم . عايزله تفاهه كدا و ظرف غبي
زمان بقى ايام الدايل اب بتاع سلك التليفون اللي بيديلك داونلود 3 كيلو في الثانية ماكنش في حاجه على النت غير الشات ..مره حملت فيديو اعلان عن لعبة جديده نازلة كان حجمه 100 ميجا باين ..قاعدت احمل فيهم 10 ساعات

12_ هل هزمك حزنك في يوما من الايام؟
بلى هزمني حزني في يوم من الايام يا سيدي
بس انا عموما بعرف اخرج نفسي من الكآبة بدون مساعدة حد
انا كائن سعيد بالفطرة ..يمكن دا ناتج من الطفولة السعيدة
طب بالذمة عايز واحد يكون بيسمع اغنية زي كدا و هو طفل


و يطلع مش سعيد ؟

13_ ((مستحيل انساك)) لمن تقولها ؟
اقولها للعبة streets of rage

14_ (( اللي راح راح وماتفيد كلمة ياريت )) إذا أردت ان توجه هذه العباره لنفسك* فماذا
تقصد بها ؟
العمر يا سيدي
بيجري بيك بدون ما تحس بيه
متهيقلي لسه قريب كنت فرحان اني جبت العشرين سنة ..دلوقتي عديت نص العشرينات اهو امبارح و باقيت عجوز

15_ (( انت كل شيء بحياتي )) لمن تقولها ؟
النت
آه و الله ..طب احسبها كدا ..بتذاكر من عليه و بتثقف من خلاله و بتفرج على وثائقيات و افلام منه . و بتسلى عليه و بعرف الاخبار منه . دا حتى التمرينات الرياضية بتجيبها منه و بكتشف حاجات منه
هاتلي حاجه في حياتي ممكن تعملي كل الحاجات دي ؟

16_ متى اخر مره بكيت؟
انا مره قولت اني مش بعرف اعيط و دا فعلا حقيقي مش بعرف اعيط نهائي
بس ممكن اتفرج على فيلم و اتاثر من مشهد و أدمع ..بس مش ابكي تلاقي عينك بس اتملت دموع ..و دي نادر برضو ..مابتجيش غير من فيلم جامد اوي اوي ..مش هدمع على مسلسل مصري مثلا
و لا حتى تركي ..انا مش بتاثر غير من فيلم مثلا بيتكلم عن موقف انساني ..مش حب و رومانسيات و كلام فاضي

17_ اي الدول تتمنى ان تزورها ؟
دول تكون لغتها انجليزية عشان انا دخلت الانجليزي و العربي في دماغي بالعافية اصلا ..انا بطيء في الحفظ و مش بعرف اتلقن كويس بشكل سمعي ..و بالتالي لو رحت بلد بيتلكموا فرنسي الماني اي حاجه غير الانجليزي او العربي هتأقلم بصعوبة جدا
طب ليه مش بفكر في بلد عربي ؟
لسبب بسيط ..هو العنصرية ..هناك هتتعامل كمواطن درجة عاشرة ..لكن لو رحت بلد غربي مرتبي هيبقى زي مرتب المواطن العادي ..دا غير الجنسية اللي بتقدر تاخدها
لكن الموضوع صعب و مش سهل و عايز ميزانية للمغامرة تكون كبيرة لان الاسعار بتبقى مولعة
في حين المجازفة في اي بلد عربي بتبقى اقل بكتير

من البلدان الكويسه ..كندا و استراليا
و امريكا اهو نجيب من هناك الجنسية و اجي بعدها اديكم على دماغتكم ههههههههه

18_هل لديك الجرأه ان تقول عمرك أمامنا ؟ وسوري لو السؤال ضايق حد
ايه ياعم هو احنا بنات و هنتكسف و لا ايه ههههههه
25 و يوم و بكل فخر
يا ابني الراجل وسامته بتزيد لما شعره بيشيب

19_هل انت راضي عن نفسك ؟
مش اوي
طول عمري بحس اني دون المستوى
حتى ايام الثانوية العامة بيبقى عندي اعتقاد اني اقل من الكل ..بس الدرجات اللي كانت بتفاجئني
ايام الشطاره بقى

20_بماذا تقر وتعترف أمامنا الان ؟
أقر و أعترف اني باقيت بحب المانجا العويس اكتر من السكري

21_ اغمض عينيك دقيقه لو سمحت* ماذا خطر على بالك وانت مغمض العينين ؟
هو ايه موضوع غمض عينك دا
دا سؤال موحد من الوزارة ؟

أهو غمضنا

و لا اي اندهاش

22_هل تؤيد الزواج العاطفي ام الزواج التقليدي ؟ ولماذا ؟
مش فارقه
كل واحد يتجوز بالطريقة اللي تريحه
بص على ابوك و امك ..يعني قاعدين بيحبوا في بعض و عايشين دور مهند و نور مثلا !؟
و لا هتلاقي اي بتنجان من دا
المهم يكونوا متعايشين مع بعض بشكل كويس بس

23_ايهما اهم شهادتك الجامعيه أم الزواج ممن تحب ؟
هي الشهادة بتعمل حاجه دلوقتي ؟
طب قولي شغلانه حلوة و لا الزواج ممن تحب هقولك شغلانه حلوة
لان بعد الزواج هتلاقي موضوع الحب و انك هتموت عليها و هي هتموت عليك كل دا فس ..هيبقى الوضع عادي
لكن قولي مثلا ايهما تفضل . وظيفة حلوة و لا بنت حلوة
هقولك بنت حلوة ههههههههههه
دا انا عكيت الدنيا ..مع ان في برنامج عك عاملي استضافة برضو و لسه هنعك هناك

24_ هل من الممكن ان تتحول الصداقه الى حب ؟
طبعا ممكن
25_هل تعترف بشيء اسمه الصداقه بين الرجل والمرأة ؟
آه في و عادي جدا
ماهو الاعضاء عندك في المنتدى ..يعتبروا كلهم صحاب ..و لا مثلا كلنا بنحب في بعض

26_هل كنت السبب في يوما من الايام ان تدمر حياة شخص سواء العمليه او الاجتماعيه او العاطفيه؟
لا انا مش بتاع نقل كلام ..حتى لو شخص عارف عنه كلام مش بقوله للطرف الآخر
لان انت لو في نفس الموقف ..هتضايق جدا لو عرفت ان حد بيقول عنك كلام مش كويس
اللي ترضاه لنفسك ارضاه لغيرك

27_هل انت مدمن تفكير؟
جدا جدا جدا فوق ما تتصور
بفكر في كل حاجه
و بخرج برا الحفرة اللي احنا كلنا بنتربى فيها بعاداتنا و تقاليدنا و اعرافنا ..بشوف الدنيا من فوق و بعد افكر ..احنا ليه متخلفين ؟

28_ من هو اكثر شخص تفكر فيه؟
غالبا مش بفكر في اشخاص ..بفكر في فلسفة دينية اجتماعية سياسية
انا بكلمك في موضوع واسع ..مش اني اعد افكر في شخص

29_ اذا تم تعيينك ملكا لجميع البلاد العربيه فما اول قرار ستتخذه ؟
لو انا باقيت حاكم او اي حد بقى حاكم عمره ما هيقدر يغير من مجتمع اصلا فاسد
لما المجتمع يغير من عاداته الفاسده دي و اللي بدرجة كبيرة بيدخل فيها عوامل تقاليدية و دينية و عادات و ثقافة و حاجات كتير ..لما يقرر انه يتغير ساعاتها تغير الحاكم ممكن يدي نتيجة
لكن هتغير حاكم و الشعب بنفس ثقافته الاستهلاكية مثلا ..يبقى انت هتعمل ايه ؟ هتحرمهم مثلا من امور معينه ؟ خلاص زمن الحرمان انتهى من زمان

بس اقولك انا ممكن اعمل ايه ؟
همنع الصريخ من على منابر المساجد
انا بعد افكر كتير جدا ..هو ليه خطيب الجمعة بيصرخ في الخطبة !
ظاهره غريبة جدا ..ايه كمية الصريخ دي ..دا حتى الصريخ دا بيخليك مش تعرف تسمع عدل
ليه ماتبقاش الخطبة هادية ..احنا عايشين فين مش عارف !
هخلي في مخالفة للخطيب اللي يصرخ

30_هل تكره شخص بشده في حياتك ؟
انت بتكره تصرفات او طباع معينين ..اكيد لو التصقوا في شخص بشكل دائم هتبقى مش حابه..
زي مثلا واحد ليل و نهار بيكذب و كذب بين و غبي و بينفخ في نفسه ..هتلاقيك مش مرتاح معاه

31_ ما هو اقتراحك الذي تتمنى ان يحدث في هذا المنتدى ولم يحدث الى الان ؟
خلاص يا ابني انا برسم على استقالة

32_هل ملابس الشخص امامك تؤثر فيك لتأخذ عنه انطباع ؟؟
الاناقة حلوة مافيش كلام
بس المقصد هنا مش ان الشاب يعد يأنتك في نفسه زي البنات
لكن مش يبقى مبهدل

33_ماالذي يلفت انتباهك بسرعه في الشخص لكي تعجب به ؟
أكيد الشكل هو اول شيء بيلفت انتباه اي انسان من اول نظرة
مش بتكلم عن انك تبص لبنت ..حتى للشاب ..بتبص دا شكله ايه
بعد كدا بتبدا تكتشف دماغه و اسلوبه

34_ اذا احببت شخصا في الوقت الخطأ وفي المكان الخطأ فماذا تفعل ؟؟
لو كان الخطأ دا قابل للاصلاح ..فممكن يتصلح
اما لو كان غير كدا يبقى الافضل انك تنهي الخطأ
35_ حكمة تؤمن بها جدا؟؟
مش حكمة بس مقولة كدا من عندي : نحن من نصنع الشهوة و نلصقها في الأشياء من حولنا ..فكيف اذا لا نشتهي شعور أمهاتنا و أخواتنا ؟

36_ عاده تفعلها دائما تتمنى ان تتركها ؟
السؤال دا يتجاوب عليه بالتدخين بس انا مش بدخن
هقولك بلعب في مناخيري مثلا و لا بحط صباعي في بؤي هههههههه

في عادات بس مش مستاهله انك تتمنى زوالها . زي اني بمسك شعري من ادام و بعد اتحسسه كدا و انا زهقان ..مفكر بقى

37_ ماهو اجمل اسم لولد واجمل اسم لبنت من وجهة نظرك؟
السؤال دا بتاع بنات
مش في دماغي و الله ..بس انا بفضل الاسماء المخترعه سواء للبنت او للولد و نفكنا بقى من الاسماء المكرره دي لان الاسم الغرض منه تحويلك من نكرة الى معرفة ..التكرار اللي بنشوفه دا بيخلي الاسم برضو نكرة ..لو قولتلك احمد مثلا ..هتقولي احمد مين !
نص الشباب اسمهم احمد
يبقى دا كأنك سميته كابتن ..لما تنده على اي شخص نكره في الشارع بتقوله يا كابتن
اهو دي زيها كدا ..يا احمد ..احمد مين
لازم تديله وصف للعيلة عشان تعلمه ..طب امال انت مسميه ليه !
لكن لو هو اسمه فريد و مميز هيبقى معروف في الحته على الاقل اللي هو فيها

38_ ماذا تفعل اول شيء اذا ربحت ملايين او مليون عشان مانكون طماعين؟
هحطهم في البنك و هعيش بالفايدة بتاعتهم
39_ هل انت من لديهم رغبة حب التملك واذا امتلكت الشيء اصابك الملل منه ؟
مش عارف و الله ..اظن ان دا شيء طبيعي انت لو اشتريت اي حاجه بتفرح بيها و بعدين بتمل بعد كدا . الا لو كانت حاجه متجدده
يعني موبايل و بتجدد العابه مثلا


جاوب بقى إنت إلى جبته لنفسك هههههههههههه
جاوبت اهو يا خويا و عكينا الدنيا

[stefo]

بجد إجابات رائعة أنا أول مرة أستمتع كدا من رد واحد منور يا باشا ههههههههههههه

[morshooo]

اقتباس 18_هل لديك الجرأه ان تقول عمرك أمامنا ؟ وسوري لو السؤال ضايق حد ايه ياعم هو احنا بنات و هنتكسف و لا ايه ههههههه 25 و يوم و بكل فخر يا ابني الراجل وسامته بتزيد لما شعره بيشيب

السؤال دا بيعقد البنات يابنى هههههههه
معلش اطارك نسى انك ذكر ههههه
منورين ارجالة وعلى فكرة الحاجا الى متفق مع طارك فيها
المليون جنية يتحطو فى البنك واهو كل شهر هيطلعو فوائد بالهبل
يعيشو الواحد كويس ^_^

[countess]

اقتباس _ ماذا ستكتب لنا لتعبر عن حياتك التي عشتها الى الان في كلمات قليله ؟ اتولدت فكبرت كبرت كبرت كبيييييرت . كبييييرت اوي ..بس

هههههههههههههه تعجبني إجبات طارق كلها عفويه من 2009 لحد دلوقت

بكل لقاته نفس اسلوبه مش بيتغير خصوصا ع الأسئله الي زي كدا

برنامج جميل تشكرات ع الحلقه النايس

[stefo]

مدين هههههه
إيه يا عم هتقوي الراجل علينا هههه

[stefo]

اقتباس المشاركة الأصلية كتبت بواسطة countess هههههههههههههه تعجبني إجبات طارق كلها عفويه من 2009 لحد دلوقت بكل لقاته نفس اسلوبه مش بيتغير خصوصا ع الأسئله الي زي كدا برنامج جميل تشكرات ع الحلقه النايس

.

[Ṕřǿḟ_ṦęήίŏŘ]

آجــابات جميله جداًَ وحوار رائع مع شخصيه اجمل
واسئله رائعه
تسلم ايدك ستيفو
-