الحلقة الثانية من ( لمن يجرؤ فقط ) مع ( Mahmoud Kamel )

[morshooo]

بسم الله الرحمن الرحيم

اهلا بيكم جميعا

والحلقة الثانية من برنامجكم

( لمن يجرؤ فقط )

نظام الحلقة :

هيكون عندنا ( 8 نقاط ) اساسيه الضيف هيختار منهم ( 5 نقاط )

نكلم عنهم وهيكون من حقى اختار فى النهاية ( نقطة ) اكلم

مع الضيف فيها .

ضيف حلقة النهاردة

Mahmoud Kamel

فى البداية تعالو نشوف الـ ( 8 )

نقاط الـ اختار منهم ضيفى

حياتى / اعترافات

اعضاء المنتدى / سياسة المنتدى

وجع دماغ / سؤال من مجهول

كلام فى السياسة / صورة وتعليق

اهلا بيك ( Mahmoud Kamel )

الفقرة الاولى

اخترت ( سؤال من مجهول )

فى البداية عايز اعرف لية ابتديت بـ ( المجهول )

ودى مغامرة والا حب معرفة :

سؤال ( المجهول )

فى البداية / اهلا بيك ( محمود )

انا شايف ان مع وجودك دائما بيكون فى مشاكل فى سيرفير المنتدى

دائما بنشوف منك حاجات وخصائص يمكن بتدخل تحطنا فيها

غصب عننا وكتير بيحصل مشاكل فى المنتدى وفى رسائل

ومواضيع بتروح والمنتدى بيقف يومين او 3 ايام بسببها .

فعايز اعرف اية اهمية الى بتعملة يمكن اخر حاجا كانت غريبه

معرفش منك والا من مين انى كان لازم ادوس على مربع قبل

اعتماد الموضوع ومن فشلها اتلغت حاليا ؟

اخترت سؤال من مجهول لانى

حـابب اعـرف الـناس واخده فكـره عني ازاي مش اكتر

,,

الشخص اللي بيسئل علي وجودي مرتبط بتعطيـلات في السيرفر

والموقع دا غير صحيح الوقت اللي اتوقف فيه الموقع لمده

يومين تقريبـا كان لتجديد السيرفر وزياده كفاءته والمفروض

صاحب السؤال كان ممكن يقدر يفرق سرعه تصفح الموقع

عن قبل تحديث السيرفر للموقع وبعد التحديث واي شئ حصـل

وقت وجودي من تعطيلات في الموقع قبل كده دا طبيعي زي

تفريغ الكاش الخاص بالموقع من السجلات وغيره علشـان

نتفادي الاخطاء اللي ممكن كانت بتحصـل من رساله خطا عند

ناس كانت بتظهر بتقولهم رمز الامن مفقود في المشاركات

او ارسال رساله .

وبالنسبه للاجـابه بخـصوص الموافقه علي قوانين المنتدي وقت

طرح موضوع جديد كـان له سبب لفتره كـانت مشـاكل في

المنتدي وكلنا كنا عارفين المشاكل دي ,,

الاول تم تحديث في سياسات المنتدي وكنا مشددين ع المواضيع

اللي كانت بتهين اشخاص بطريقه مباشرة او غير مباشرة

ومع ذالك لما كنا بنتعامل مع المواضيع دي الناس كانت

بتقول ديكتاتوريه

فكـان لازم اننا نلفت نظر الناس ان اي موضوع بينزل بيبقي

خاضع لقوانين المنتدي وعند اختياره لعلامه الموافقه

ع الشروط فـ هو ملتزم بالقوانين دي وعند التجاوزات

هيتم الاجراء الطبيعي الموافق للقوانين اللي مطروحه يعني

زي ما تقول كده انت التزمت بالقوانين يبقي هتلتزم بالاجراءات

لو كان موضوعك مخالف ,, والاضافه دي اخدت وقتها

علشان تلفت نظر الناس وبالفعل الناس كلها اخدت بالها فـ

مكنش لازم نطولها اكتر من كده ..

ودا كان سبب اضافه الموافقه ع القوانين قبل انشاء الموضوع .

الفقرة الثانية

اخترت ( وجع دماغ )

وفـ ( سؤالين )

1 / من فترة اقل من سنة ظهرت علينا وطلبت ان يكون فى قسم ( برجك اليوم )

القسم فضل شهر تقريبا واتشال من المنتدى .

مش شايف اننك كتير لما تعوز تعمل حاجا بتعملها حتى لو هتفشل ودا دليل

قسم ( برجك اليوم )

2 / خلال الفترة الاخيرة تم حظر ( احساسى صحيح ) بسبب اعتراضه على نتيجة مسابقة هو شارك فيها وكنت ضد رجوعه مرة تانية المنتدى

مهما حصل ومش انتا بس فى الادارة كنت ضد عودتة مرة تانية وفجأة شوفنا عفو أدارى من ادارة المنتدى لعودة جميع المحظورين منين رفضك بالعودة ومنين موافقة الادارة والا انتا كنت ضد العفو مع انك دخلت توبيك العفو بس تقريبا مردتش فيه .

بالنسبه للسؤال الاول ,,

بخصوص قسم الابراج انا مش من محبي التطلع ليهـا

لكن فكرة القسم هو جزء من متطلبات الجمهور وحبيت اطرح

القسم كـ نوع من التجربه و كنت انا مهتم بيه وقت وجودي

لكن بعد ما غيبت تم اهماله و تم اخفائة ..

مش عيب الفشـل علي فكرة العيب انك متجربش وتعرف

التجربه هتستفاد منها ايه ولو هتسئل عن الاستفاده في وقتها

برضه كان المنتدي بيمر باعطال وقله وجود اعضاء جدد

وكسب الاعضاء الجدد مش من موضوع مقالي او غيره ,,

لازم يبقي عندك جمهور كبير حتي لو مهتم بمجالات تانيه

لو شاف منتداك ومواضيعه هيعجب بيه ويشارك

وبالنسبه للسؤال التاني ..

هـو الموضوع مادام هذكر فيه اسباب حظر شخص ياريت قبل

ما تنشر الاسباب ياريت تسأل الشخص نفسه ان محمود

هيقول الاسباب موافق ولا لا ..

وبالنسبه لسبب حظر ياسر (احساسي صحيح)

كان لتحريض واتهام الادارة بعدم الحياديه في المسابقات +

اهانه اشخاص من الاداره في الرسائل الخاصه .. واهانه

واستهزاء بمشرفين لا داعي لذكر اسمهم .

بخصوص موضوع الاعفاء واني كنت رافض اني اشيل

المحظورين دا فعلا انا كنت رافض .. لكـن اتجمعنا مع اعضاء

الادارة واتكلمنا ووصلنا اننا نبدأ صفحه جديده مع الناس

وقلنـا دي فرصه وفرصه اخيره ونشوف سلوكهم لان احنا

سامحنا كتير ودي اخر فرصه مننا علشان نثبت للناس اننا

مبنشيلش من اي شخص ولا بنفضل حد علي حد

وبالنسبه لعدم ردي في الموضوع دا عـادي امجد كان معايا

ع الايميل

واتكلمنا كتير وعارف الموضوع هينزل بمحتواه ايه لكن

مش صحيح اني رافض فكره العفو .

الفقرة الثالثة

اخترت ( اعضاء المنتدى )

خلال الفترة الى فاتت وتقريبا من شهر ونص كان فى خلاف

بينك وبين

احدى عضوات المنتدى واتهمتها بالمساومة والعضوة دى كانت

Nefertiti

ورغم دخولها واعتراضها على كلامك ولكن مدخلتش ترد

على اعتراضها

وشايف انتا كا ادارى ان الحل الامثل كان هو عزلها

من القسم رغم تعين مشرف معاها اعترضت على التواجد

معاة ومحدش اخد على الاقل رئيها .

لا انا محبتش ارد علشـان معملش جـو قلق مش أكتر وزياده

ومشاحنات

لكن لو كانت حبت تتناقش بطريقه افضل في قسم اداري

او علي الرسائل الخاصه

طبعا كنت هـرد عليهـا كويس جدا لانى الحمدلله عمري

ما ميزت شخص عن شخص

وبخصوص نقطه انك بتقول عزلتها علشان عينت شخص

معاها ع القسم بدون ما ناخد رائيها

طبعـا لو انت تفتكر والناس كلها كانت عارفه وقت تعيين

بيج بوص علي قسم الخزعبلات وقتها

كان نفرتيتي مكنتش بتدخل وسمعنا خـبـر انها كانت

بالمستشفي والخبر ده احنا عرفنـاه من بيج بوص

وهي جت وقـالت انها كانت تعبانه فعلا وفي المستشفي

فـ دا دليل اننا لمـا سالناه اننا هناخد رائيها كـنوع

من التقـديـر والتفاهم قـال انا اخدت رائيهـا وبـاماره انها

فِ المستشفي ,, ومن وظيفه المشرف علي قسم معين

انه بيتابعه وان كان قـادر علي قيامه بالقسم لوحده مفيش

مانع ان يكون عليه مادام مكفيه وقادر ينشطه

لكـن وقت غيـاب نفرتيتي عن القسم وفي وجود شخص نشيط

في القسم وبشكل ملاحظ وطلب انه يكون مسئول

عن القسم وتنشيطه مكنش له اي مبرر للرفض ..

وفي نقطه أحب اوضحهـا لاي شخص من حقوق الاعضاء

ع الادارة .. الادارة لو شـافت شخص هيفيد قسم معين

ونشيط فيه ويستحق الاشراف عليه وهيضيف للقسم اكتر مفيش

مـانع انه يكون مشرف عليه لاننا هنـا موجودين

كـ حـب في المنتدي وحابين نضيف له .. مش هنقضيهـا احتكـار كراسي

الفقرة الرابعه

اخترت ( سياسة المنتدى )

بمناسبة سياسة المنتدى البعض بيشتكى وبيتهم الادارة بالديكتاتورية

ودا من خلال حزف المواضيع حزف الردود حظر بعض الاعضاء لمجرد

مهاجمتهم ليكم ( حوده ) مش شايف ان لما يكون عدد المعارضين

لسياسة المنتدى نوعا ما مش قليل دا بيكون فى حاجا غلط من الادارة

والا شايف ان المعارضين سبب اعتراضهم اسباب شخصية

يعنى اتحظر قبل كدا كان مستنى ترقيه ومحصلتش ...... الخ .

2 / لية الاعضاء بتشتكى دائما من عدم عداله الادارة فى موضوع

الترقيات ودائما شايفين ان الادارة بتتجاهل بعض المميزين والاعضاء المتواجدين دائما وعلى سبيل المثال ( الرجل المتواضع ) ( خارج عن القانون ) . ونفس الوقت سايبين مشرفين ومراقبين مش متواجدين .

اولا

والله يا احمد سياسه المنتدي مفيهـاش اي ظلم لاي شخص ولا

كبت للحرية لكن هي حفظ الاحترام بين الاعضاء وبعضهم او

الاعضاء والتيم الاداري اي كان في مشاركات او مواضيع

وطبعا الحذف مبيكونش من الاوليات اللي بيتم الاجراء فيها

بالعكس لو المخالفه خفيفه ونقـدر نتناقش فيها بنتكلم

وبنوصل فكرتنا وبنحاول نوصلها للناس

اما في مواضيع او مشاركات بتكون قاصده الاهانه باشخاص

ودي غير مقبوله لـ في سياسه المنتدي ولا في اي عرف ..

الحظر هو الا مجـرد عقـاب لعضويه عن ارتكـاب مخالفه

والحظر بيكون اوقات مؤقت او دائم ومش لازم يكون دائم الا

علي حسب المخالفه واختيار المميزين لازم يكون اختيار الاسم

ده يكون اسم علي مسمي مميز لاحترامه للاخرين و مميز

لنشاطه مش مجرد عدد مشاركات وخلاص

ثانيا :

اختيار المشرفين بيكون علي اسس يا احمد وانت عارف

بالكلام دا

لازم يكون في عنـاصر مهمه في العضـو اللي بيتولي

اشراف قسم

واهمهـا نشاطه في القسم اللي هنعينه عليه .. وطبعـا في

اقسام حيويه

بيكون فيها التنـافس شديد فـ هنـا عنصـر النشاط الدائم و

الخبره واللباقه هي اللي بتفـرد نفسهـا عليك في التعاون

معاهم في اشراف علي قسم

لكن عندك نـاس كتير نشيطه في اقسام مش عليهـا منافسه

اكيـد بنراسلهم لانهم اكيد ممكن يضيفو جديد ودا اكيد الناس

ملاحظاه زي ما تم من فتره تعيين مشرفين ع اقسام في المنتدي .

نقطه سايبين مشرفين ومراقبين غير متواجدين

دي أحـب اوضحهـا بمثـال صغيـر مينفعش تـاخد واحد علي

حلوه بس لا تاخده بحلوه ومره يعني بالعربي كدة

لمـا الواحد يكون عنده ظروف بنقـدره وبنديله الفرصه لما

تخلص ظروفه وقتها بنقدر نحاسبه ع نشاطه من تانى

الفقرة الخامسة

اخترت ( حياتى )

فى اعضاء تقريبا ماتعرفش مين ( حوده ) ودا بسبب عدم دخولك كتير

المنتدى وطبعا انتا عارف الاعضاء هنا متطفلين جدى

عرف الاعضاء بتدرس اية ومنين وياترى اية اخبار قلبك ( بتحب / خاطب )

..... الخ

2 / من فترة غبت ولما رجعت قولت ان كان فى ظروف مرض انتا

مريت بيها بس مقولتش كان فى اية حابب تقول والا الموضوع

مش حابب تقولة ؟

اولا :

مفيش مشاكل ..

بالنسبه لاسمي فـ هو محمود مصطفي كامل

دراستي : 4 نظم معلومـات باكاديميه المدينه للهندسه

سني : 23

البلد : المنيـا - الصعيـد

لا مش خـاطب لسه الموضوع عليه شويه

ثانيا :

هـو الحمدلله علي كل شئ ..

حصـل واني عملت عمليه كده في ضهري

والالم فيه رجع تانى فـ الدكتور قال لازم عمليه تاني

مش حـابب اوضح التشخيص لانه مقرف الي حد ما

بس التفاصيل الباقيه مبحبش افتكرهـا خلينـا كده احسن

ههههههههههههه

طبعا اختيارات الضيف انتهت

وفاضل انا هختار فقرة نكلم فيها مع ( حوده )

الفقرة المختارة

( صورة وتعليق )

عايز رئيك بالتفصيل فى الصور دى

ديكتاتوري ,, طـاغـي

اهلك نفسه واهل شعبه

مجاش وقت وقولت فين ايامك

لا طبعـا

2 /

أخدت فرصتك وخربتهـا زيـاده ,, مينفعش شخصيه ضعيفه

تحكم دوله عظيمه .. لنا الله ولك الله فيما فعلت

فعلا كان يصلح يكون رئيس مصر فى وقت من الاوقات

لا

3 /

هل يستحق يكون شخصية العام فى مصر وانتا معاة والا ضدة

كنت بحترمه جدا لكن بعد طلبه للتفويض استحقرته

وبعد الطائره الاسرائلية اللي دخلت سيناء وزي ما قالو

انها اتفاق .. اتفاق علي مين ؟؟ بتسلم أهلك لليهود يقتلو فيهم !!

بكدا بتخلص ثانى حلقات البرنامج .

انتظرونا الحلقات القادمة

تحياتى .

[موري كول]

حلقه جميله تسلم علي المجهود

[Aya 7ekaya]

حوار جميل جدا واجابات محمود هاديه من غير لف ولا دوران

[عطر اللافندر]

جميلة الحلقات بتاعتك

والاجمل ضيفك

اللى تعرفت عليه من خلال رده على اسئلتك

كل الشكر لك على التوبيك

[♥SaRa]

ـحلقة جميلة يا احمد
واتعرفنا اكتر عن شخصية محمود
رغم اني مش كنت اعرف عنة حاجة غير انة اداري وماسك المنتدي مع هيثم
والاجابات وضحت شخصيتة
ومنتظرة الحلقة القادمة يا احمد

[-esraa-]

جميلة الحلـــقة
واجابات عقلانية جدا ,,

تسلم عالحلقة مورشو ,,
موفقين

[حافظة القرآن]

حلوة الحلقة اوى
الحوار جميل جدا
تسلموا بقا
فى انتظار الجديد

[countess]

اقتباس هـو الحمدلله علي كل شئ .. حصـل واني عملت عمليه كده في ضهري والالم فيه رجع تانى فـ الدكتور قال لازم عمليه تاني مش حـابب اوضح التشخيص لانه مقرف الي حد ما بس التفاصيل الباقيه مبحبش افتكرهـا خلينـا كده احسن ههههههههههههه

سلامتك ماتشوف شر

آحوده

[خارج عن القانون]

حلقة عقلانية جدا من الضيف والمضيف

والف سلامه عليك يا حودا


بس ليا تعليق بسيط

اقتباس / لية الاعضاء بتشتكى دائما من عدم عداله الادارة فى موضوع الترقيات ودائما شايفين ان الادارة بتتجاهل بعض المميزين والاعضاء المتواجدين دائما وعلى سبيل المثال ( الرجل المتواضع ) ( خارج عن القانون )

انا ومع كل الحظر اللى اخدته

مبعتبرش ان الاداره غير عادلة

مره واحده بس اللى الاداره حظرتنى فيها بـــ ظلم

وبعديها اعتذرولى

ومخالفتى للقانون لا انتظر مقابل ليها الا تطبيق القانون ^^

يعنى لما عملت الجروب بتاع اعضاء المنتدى ع الفيس واتحظرت

مزعلتش والا حطييت فى دماغى انى اتحظرت والله انا كنت مبسوط ان طارق حظرنى

كنت مبسوط عشان هو طبق القانون وللعلم هو نبهنى قبل الحظر اكتر من مره

وزى ما الاداره سمحت فى موضوع الجروب وشالو الحظر

انا كمان سامحت فى موضوع قانون الصورة الرمزية اللى شال منى المشاركات ورجعت تانى

وانا اساسا مبعملش حاجه عشان استنا ان الاداره تكافئنى عليها

انا بخش المدونه وبحل مسابقات طارق ودمتم ع كده

وفى الاول وفى الاخر كلنا بشر نخطئ ونصيب

[sεηυσяιтα ησOση]

حلقة جميلة جدا

موفقين ان شاء الله