بنحبك يا مصر

[شادي راضي]

بنحبك يامصر

وانا مسافر بحس ان المكان مش هو المكان
ولا الزمان هو الزمان
ومش عارف ليه بحب السفر وقت الغروب
يمكن يكون هروب
من حياتنا
من دنيا بنجري فيها جري الوحوش
وعشان ايه
عشان بس نعيش ...
ناكل نشرب
ونزوق حياتنا بشوية رتوش

او يمكن عشان بحس بالسكون
والطيور راجعه لعششها تسبح ربها
وتقول الملك لك لك يا رب الكون

وبشوف من ورا الشباك معايا القمر
مسافر معايا خطوه بخطوه

ويطمني ويقول ماتخفش
وفين مارحت انا معاك
هتكون انت انت
وانا انا نفس القمر

وساعات يقولي
مش مهم تكون فين
او ويا مين
المهم يكون معاك

دي الفلوس في الغربه وطن
وساعات بتلاقي في الغربه اهل وسكن

ولما سافرت فعلا
لقيت القمر هو القمر
والسما هي السما
والسحاب هو نفس السحاب
شايلاه الرياح

والاذان في الجوامع هو هو
بيقول حي على الصلاه حي على الفلاح

شيء وحيد هو المختلف
الناس مش هما نفس الناس
وحكمه جت على بالي لحظه طنشتها
ان الجنه من غير ناس ما تنداس

وفي الغربه لاقيت حاجات كتير تبهرك
تخطف عيونك تسحرك
تنسيك نفسك واهلك
تشغلك

ومرت سنين وراها سنين

وارجع من تاني ياخدني الحنين
واشتقت لحاجات غريبه
عمري ما كنت باشتاق لها

اشتقت لوشوش الناس الغلابه الطيبين
اشتقت لقعده عالمسطبه وبتاع العرق سوس
وعربية فول الناس كتير جنبها متجمعين
اشتقت لعامل ويا فاسه في الصبح بدري
يقول قويني يا رب العالمين

عارف هتقولوا عليا فقري
مش وش نعمه
او غاوي فقر
واحلفلكم ما حسيت بجد اني عايش
الا في حضن مصر

اشتقت لمنظر العشاق على شط نيلها
والعيون مليانه حب
وبيعيشو احلى عمر

اشتقت لنسمة عصاري بتلاعب غصون بنات حلوين
وتسلم على خدودهم
وتقول لهم ده جمالكم خلى الضلمه ضهر

اشتقت لشباب جدعان
والنكته في لسانهم ترسم الضحكه
وتمحي من قلوبهم طعم القهر

وبرغم الظروف الصعبه
وكل العيوب وبرغم كل شيئ
بنحبك يا مصر

[واد حبيب]

من فينا مش بيحب مصر
من فينا من بيخاف علي ام الدنيا
مصر دي ام الدنيا وشبابها اجدع شباب
تسلم يا غالي علي كلماتك الجميل
في انتظار جديدك

[شادي راضي]

شكرا لك على كلماتك الرقيقه

[عاشقه الورد]

كلمات جميله اوى
وفيها احساس مرهف
تقيييييييم
دمت بود

[شادي راضي]

شكرا لك
ولك كل التقدير

[اندرسون]

مصر تسكن فينا وليس نحن من نسكن فيها

لك كل التقدير عل كلمات الرئع

[شادي راضي]

اقتباس المشاركة الأصلية كتبت بواسطة اندرسون مصر تسكن فينا وليس نحن من نسكن فيها لك كل التقدير عل كلمات الرئع

شكرا لك علي تقديرك

[حمدى محمد محمد]

جميل ياد انت شكلك حويط وبيع كلام

[ana aslan moza]

كلماتـ تجنن

[شادي راضي]

شكرا لك مايا
على مرورك الكريم