قصيدة شعرية ضد محمد مرسى بعنوان «حس» بطابور مدرسة

[انسانه*]

قامت الطالبة سالى ابراهيم، بإلقاء قصيدة شعرية ضد محمد مرسى بعنوان «حس» بطابور مدرسة السيدة زينب الثانونية بنات، اليوم الأربعاء، بالمحلة الكبرى.
وقد قررت محاسن الفلاح ، مديرية المدرسة ، بتحويل اخصائية الازاعة المدرسية وفريق الاذاعه من الطلاب الى التحقيق معهم حول الواقعه .
ومن جانبها قالت فاطمة خضر ، وكيلة وزارة التربية والتعليم بالغربية ، عن قيامها بتوعية مديرين المدرسة بعدم فتح نقاش حول سياسة البلد داخل المدرسة مما يؤدى الى مخالفة القوانين ، فالمدرسة مكان للعلم وليس للنقاش السياسى والانتمائات السياسية ، وعلى الفور تم اتخاذ اجرائات قانونية مع من خالف التعليمات





وهذا نص القصيدة:
حس يا سيادة الريس بينا
حس بالنار اللى والعة فينا
حس بشهيد حلمه ضاع
حس بقهرة أهالينا
ليك رب هتقابله طب هتقوله إيه؟
لما يسأل جنابك علينا
حس بشوارع ماليها دم
حس بقهرة أب وأم
حس ببيوت جواها هم
والقلوب ماليها الغم
حس ببلد بتموت
وعز شبابها بيبتسم

حس بجدع عياله جاعت
نزل يوكلهم فكرامته اتباعت
اتسحل واتعرى فى وسط حكومتك
وبعد ده كله حقوقه ضاعت
ده أنا المصرى بن البلد
حلمى فى وسط الميدان اتولد
حلمى فى بلدى تعلى لفوق
وحلمى قدامى اتعرى واتجلد
يا سيادة الريس شرفك فين؟
لما اتعرى المصرى المهان
لما اتسحل واستغليت انه راجل جعان
وعاوز تكممه وتكتف عزته
وتهز بلدنا.. بلد الشجعان
لا مش هسكتلك ولا أسيبك تنهش
فى لحم بلدى زى زمان
م أصلى خلاص م الموت معودتش بخاف
عارف الموت؟ عارف معناه؟
الموت أحلام بتموت وتضيع
الموت مش بس موت الحياة
الموت صديق عمر يروح
وصاحبه يتوه مجراه
الموت مش بس روح بتطلع
الموت ابن يموت وأمه م تقدر تنساه
الموت أب انكسر ظهره
ابنه كان ظهره وقواه
الموت يعنى مستقبل بيموت ويضيع
وتموت أحلامك وياه
حق اللى اتعرى يا ريس فين؟
ولا هو اللى عراه أصلاً مين؟
اللى عراه ظلمك وكدبك
اللى عراه حكمك المهين
اللى عراه ديابة ملهاش إحساس
اللى عراه كلاب مسعورين
اللى عراه سكوت . اللى عراه جبروت
اللى عراه سلطة بتكسر عين
ورسالتى أخيرة لنظام جبان
نظام فاسد ملوش عنوان
لو همـــــوت
لو دمى منك يلاقى الجحود
وتهددنى بسجن ظلام
ولا لوجوده أى وجود
… مش هتسكت فيا الصوت ..
… مش هتسكت فيا الصوت ..
… مش هتسكت فيا الصوت ..

[اميره الشعر الشجين]

على فكره سالى دى صحبتى والله معايا فى الفصل وبصلراحه القصيده مقصوص منها كتير بصراحه بصراحه يعنى

تسلمى وتسلم يا يسيسى ^_^

[ياسمين الروح]

بصراحه كل مواضيعك بتعجبنى اوى تسلمى يا رومنساء وتسلم يا يسيسى ال محمد مرسى ال ده منظر رئيس اصلا

[ملاك الحب*]

والله البنت دى برافوا عليها انها جريئه كده مفيش حد طايق مرسى خالص حتى الاطفال لا اله الا الله اصلا لا يصلح رئيس لا مرسى هيرجع ولا السيسى هيتراجع والله السيسى ده راجل جدع مفيش منه عشان كده الاخوان متغاظين منه وهيولعوا تسلمى عالموضوع رومنساء

قصيده بجد رائعه

[اميره الشعر الشجين]

مرسى مين والناس نايمين

تسلمى سالى بس هبقى اجيب القصيده الكامله هحاول عشان القصيده نقصه كتير

[واد حبيب]

مش مهم محمد مرسي ولا مهم السيسي
المهم الشباب اللي بتموت من غير ذنب
والبلد اللي بضيع علشان كرسي
ربنا يصلح حال البلد يارب
تسلمي علي القصيده

[همسه دموع]

بصراحه مرسى سيسى طنطاوى مبارك اى حد مش هتفرق كتير كلهم العن من بعض


وكفايه الموت والدم اللى على ارض مصر بقى زى المايه

تسلمى على نقلها

[اندرسون]

حسبنا الله ونعم الوكيل فيك ياسيسي وفيك يا مرسي
اقل حاجه اقولها
اخوان باعو عسكر خانو امريكا ولي نعمتهم

تسلمي عل الموضوع

[الحب المفقود*]

البنت دى جريئه اوى ربنا يوفقها وتسلمى عالموضوع والقصيده الرائعه

[йǿǿř ǺŁ 8ǿǿ๓ąř]

والله البت دى جدعه وانا بحيها بجد انها قالت الى كل الناس بتقولو فى قلبها ال محمد مرسى ال ده اصلا اخره يخطب خطبه فى جامع مش يبقى رئيس جمهوريه ده والله فى مره كان فى محاضره فى الزقازيق فى كلية تجاره والعيال عاملين دوشه معرفشى يسيطر عالمدرج هيعرف يحكم شعب لا اله الا الله