عاوزه احول =((

[dяєαм..|♥]

مسساء الخير
ازيكووا
انا من زمان مكتبتش ف القسم ده
كنت كتبت كده موضوعين تقريبا ولا حاجه
بس انا محتاجه اخد رأيكوا فى حاجه محتارة اوى فيها
الوقتى انا داخله اولى ثانوى عاام
وخلااص قدمت ورقى للمدرسة وبدأت دروسى وكل حاجه تمام
بس مش تمام اوى يعنى ,, مش تمام خالص اصلا =(
انا مش عاوزه اكمل عاام وعاوزه احول فنى
انا الحمد لله مستوايا كويس بشهاده مدرسينى ف الاعدادى وناس كتيير
وكنت علطول بجيب درجات كويسة ف اعدادى ,,,انا عارفه انو مش مقياس اصلا
وعارفه ان اللى فات ده كووم واللى جاى ده كوم تانى خالص
اللى انا حسااه دلوقتى انى مش عاوزه ادخل ثانوى عاام
متفكروش ان قرارى ده مفرحنى والله انا مغلوبة ع امرى ي جماعة =((
هو لأسباب كتيير اووى عاوزه احول ,, منها مثلا انى عاوزه افضى للبيت وكده ,, ع اساس ان مفيش حد ممكن يفضى للبيت وانا ف مدرستى ودروسى
انا متأكده انى لو دخلت ثانوى عام هأهمل البيت ,,, وانا ي جماعه مش بحب اشوف حاجه ناقصة ف البيت ,, علشان مش عاوزه احسس اى حد ف البيت بفرق يعنى عن الايام اللى ماما الله يرحمها كانت موجوده معانا
فى نفس الوقت انا مكنتش عاوزه احول لأنى طول عمرى بحلم انى ادخل كلية قمة ,,,والله نفسى اوى
بس اللى حصلى هو اللى شقلب حياتى كده
اللى خلانى بقى احس فعلا ان التحويل هيبقى احسن ليا ,, انى لما بدأت دروسى
حسيت ان مفيش حاجه بتدخل دمااغى زى ما يكون دماغى قافلة ومش عارفه استوعب اى حاجه خالص
انا مكنتش كده بس كل ما ادخل سنه جديدة كل ما احس انى مستوايا بينزل وهبقى فاشلة =((
انا تعبانه اوى والله وكل ما ارجع من دروسى ببقى منهارة ومش عارفه اعمل ايه
والله مش بستنى اما اوصل البيت انا والله بعد اعيط ف الحصة علشان الكل فاهم وانا اعده زى العبيطة بالظبط والله
ي جماعه مشكلتى انى مترددة بشكل فظيع ,, انا مستوايا كويس وبحب افكر واذاكر
بس ده كلو رااح التركيز حتى رااح من عندى معتش قادرة افكر ولا اى حاجه بتدخل دماغى
انا عارفه ان ثانوى فنى مش سهل ,,,بس مقارنه بالعام اكيد هيبقى اريح واسهل
مع انى عارفه كلام الناس ع الثانوى الفنى ,, بس انا اصلا كلام الناس ولا بيفرق معايا
ع الاقل هلاقى وقت اعمل فيه اللى انا عايزاه ف البيت ,,مش هيبقى فيه دروس
كل ما اقرر خلاص انى احول فنى ,, الاقينى اضايقت واقول لأ مش هينفع انا عمرى ما هعمل كده
وكل ما اقرر انى اكمل عاام عادى بقول لأ مش هينفع مش هعرف اصلاا
ياما ناس نصحتنى يعنى انى انظم وقتى وكده ,, بس انا مش مقتنعه انى ممكن اوفق بين مذاكرتى وحاجات ف البيت وحاجات تانيه كتيير ,,, هو انا ايه جبل ,, انا لسه يعنى ف اولى ثانوى
انا تعبت اوى والله ودماغى متلغبطة
اه صحيح ,, ع فكره انا لسه معرفتش حد ف البيت انى بفكر فى حاجه زى دى اصلاا
هما غالبا مش هيوافقوا ,, بس انا هحاول اقنعهم لو انا اقتنعت بموضوع التحويل ده
يلا قولولى رأيكوا بقى ,, قولولى اعمل ايه ^^

[رنين]

اولا ربنا يرحم والدتك يارب ويجازيكى خير عن صبرك لفراقها

ثانيا لازم تحددى هدفك وانتى عايزه ايه
يعنى مثلا انتى بتقولى نفسك فى كلية قمه واكيد ده كمان كان حلم ماما الله يرحمها يبقى ليه لاا
عارفه انتى مش بتفهمى ال بيتقال ومش بيدخل دماغك
لانك حاطه فى دماغك فكره معينه وهى انا انك عايزه تحولى وتسبى الثانوى العام وتتفرغى للبيت وحاجات كتير
بدلى الفكره دى بفكرة انك لا هتوصلى وليكى حلم وعايزه توصلى له
هو انتى مممكن من الفنى تكملى تقريبا كليه هيبقى طريق طويل شويه
فى كل الاحوال ال عايز ينجح بيتوكل على الله وبيعمل ال عليه وربنا مش بيضيع تعبه
بس انتى لازم تفكرى كويس وتصلى استخاره
علشان مش ترجعى تندمى بعد كدا انك مش كملتى
وتفضلى تقولى ياريتنى كنت عملت
او تستنى من ال قدامك رد فعل وتقدير معين ومش تلاقيه فتحسى انك ضيعتى كل حاجه
بصى لقدام شويه
الطريقين هيوصلوكى لايه وهتبقى مرتاحه ومرضيه ولا لا وايه البدائل التانيه
طبعا البيت ومسؤلياته مجهود كبير عليكى
بس انتى ممكن تقعدى مع ال معاكى فى البيت تفهميهم انتى عاوزه ايه وتقدرى تعملى ايه وايه ال مش تقدرى عليه
واكيد هم هيساعدوكى وهيقفو جمبك لان نجاحك نجاح ليهم كلهم
ربنا ييسر ليكى الامور يارب ويهديكى للصح

[^^khL oUD]

بصي
هي ثاانوي عام صعبة جدا
وعلي فكرة انا قديكي اولي ثاانوي عاام
بس انتي لازم يكون ليكي هدف في الحياة وعايزة تحققية
ولو ليكي هدف هتذااكري وهتعملي اي حاااجة عشات تحققي هدفك او حلمك

انا كنت زييكي في الاول كنت هحول
بس قولت لاء انا ليا هدف ولازم اوصلة وربنا يوفقنا كلنا
وشوفي اللي في مصلحتك واعملية
عشان دة في الاخر قرارك انتي لوحدك
واللي انتي شيفاة صح اعملية
وربنا يوفقك

[✿ Celiηα]

يعني هتضيعي مستقبلك وحلمك عشان البيت !
ده كلام واحدة عاقلة ينفع تقولي كده !
اللي فالبيت مقدرين اللي انتي فيه
وبعدين دي كلها 3 سنين وجامعة مش صعبة وهتقدري توفقي فيها
ثم ان انتي ملغبطة ومحبطة عشان كده مش فاهمة حاجة فالدروس

ونصيحتي ليكي ثانوي عام مش صعبة لواحدة شاطرة زيك
وهتقدري توفقي بين الدراسة والبيت ان شاء الله
واللي فالبيت معاكي هيقدرو ده واللي بتعمليه
وربنا يرحم مامتك يارب

دي نصيحتي ليكي وشوفي اللي يريحك

[روح صامتة]

انت طلاما بتقولي انهم غالبا مش هيوافقوا يبقى اكيد ان دا ناتج
من فكرة ان همة هيرفعوا عنك التكليف شوية ف بداية دراستك
ثانيا انا و انا قدك كنت بعمل كل حاجة ف البيت بمساعدة اخواتي
و كنا بنخلصه قبل ما نذاكر و بهد ما نذاكر
دا امر روتيني مش محتاج تفرغ منك له
ثانيا انت ربنا كرمك ووصلتي لمرحلة قوية بفضل مجهودك
اختيارك لحاجة تانية مش عيب
بس هوة الوحش انك تطلعي اسباب رغما عنك عشان تحولي
اعتقادا منك ان دا الصح
اولا لازم الي ف البيت يشاركوك شوية شغل البيت
و كمان انت وجهيهم انك بتتعبي و لازم تتفرغي شوية لدروسك
ثانيا اعتقادك انك مش فاهمة حاجة دا بيفكرني بنفسي
لان مستحيل معلومة نلزق من اول مرة دي مرة انت بتاخديها من الاستاذ ببساطة
و ترجعي البيت تفتحي عليها
تخلي اي حد ف البيت يقراها معاك
سلي نفسك لان واضح انك ضاغطة نفسك اوي
عقلك بس بيحتاج ةقت عشان يكبر و يستقبل المعلومة ملهاش دعوة بانك فاشلة
و ربنا يرحم والدتك و يتغمدها بواسع رحمته
تسلمي ي جميل
ارق تحياتي

[خارج عن القانون]

الخيرة فيما اختاره الله

انتى خلاص قدمتى عام وكمان ابتديتى الدروس

يبقا خليكى زى ما انتى ووانتى فى الترم الاول بعد شهر والا اتنين

عيدى التفكير فى الامر وشوفى اللى هينسبك

بعد شهر او اتنين مش بعد يوم او يومين

[-esraa-]

انت حاطه قدامك هدف وهو انك تدخلي كلية من كليات القمة يبقى لازم تسعي إليه‏
انت بس خلي عندك طموحات وأمل وهتتجاوزي كل الصعوبات عشان توصلي لهدفك‏
والبيت اكيد اللي فيه هيقدر انك محتاجه لوقت اضافي في المذاكره وممكن تخلي بيتك في اوقات فراغك وكده‏
فانت بس استعيني بالله وشوفي قدراتك وهدفك واسعي إليه وبإذن الحال ربنا هيسرلك الأمور

[موري كول]

انا حولت امبارح فني !!
مع اني بحلم اروح كليه كبيره من وانا في ابتدائي !!



انزلي اقري حكايتي
^^^^^^^^^^^^^^

والله بالظبط كأنك بتوصفيني انا برضو قدمت في ثانوي عام وروحت الدروس اسبوعين وبعدين مره واحده كده
حسيت اني مش هعرف اكمل ابدا في الثانوي لان الثانوي عايز انظباط جامد وقولت احول فني وبعدين اخدت رأي اصحابي والمدرسين كمان واخواتي وكل الناس
في اللي قالي حولي لانك لو حاسه انك مش هتعرفي تكملي خلاص مش تظلمي نفسك
وفي اللي قال لاء خليكي في الثانوي علشان تروحي كليه وان الفني مش ضامنه انك تروحي كليه يعني ممكن اجي علي الاخر واكسل واقول كفايه دبلوم

بصراحه انا احترت وزملتي قالتلي اخليني في الثانوي المهم قلت خلاص علي بركه الله اكمل بقي ثانوي وانظبط في الدروس ومش بقيت افتح النت

بس برضو لقيتني مش عارفه اذاكر اوي ولا اظغط علي نفسي شويه في المذاكره مع العلم اني كنت جايبه 230 في الاعدادي

فبعد كام يوم رجعت قلت تاني لماما اني هحول فني ماما قالتلي تاني هنتكلم في الموضوع ده تاني مش كنا خلاص خلصنا منه

المهم قعد اصلي استخاره وبقيت مش عارفه يوميها انام من التفكير شويه افكر في الثانوي وان بعده الكليه اللي بحبها وشويه افكر في الفني وان ممكن اتفوق فيها برضو واروح كليه حقوق او تربيه او تجاره انجليزي او معهد فني تجاري

بس برضو اخاف اني لما احول اكسل في اخر سنه واقول كفايه عليا بقي فني

والله وكنت تعبانه جدا من التفكير ده لدرجه اني وصلت لاني بقيت اقول في نفسي ياريت الانتحار كان حلال والله كنت انتحرت

وفي الاخر بقي قلت خلاص هروح احول والحمدلله حولت وان شاء الله اتفوق واخد كليه بعد الفني
وماما قالتلي يلا علي البركه لعله خير مش يمكن الفني فيه خير ليكي عن الثانوي

المهم نزلت تاني يوم الصبح انا وبابا وبنت عمي وحولت

بس هي دي كل الحكايه وخلاص هاخد برضو 3 دروس بس فرنساوي ورياضه ومحاسبه
وعلي فكره اللي خلاني اطمن اوي للتجاره ان بنت عمي في 3 تجاره وطمنتني خالص خالص وقالتلي ان المواد سهله اوي اوي واخيب بنت بتجيب 18 من 20 في المحاسبه

ودرس الانجليزي بيديهم 6 كلمات بس في الحصه يتحفظو والجغرافيا سهله اوي اوي الدرس سطرين ومش محتاج درس
والفرنساوي مبسط عن بتاع الثانوي وبقيت المواد تجاريه سهله خاص



بس هي دي كل الحكايه معلش طولت عليكي وان شاء الله ربنا يوفقك للي فيه الخير وانا بجد حاسه بحرتك دي لاني جربتها

[طمطم]

بصى انا هتكلم معاكى بكل صراحة ,,

انا واحدة لسه مخلصة ثانوى من شهرين اهوت ^^..
الثانوى دى مرار ع فكرة .. تعبه مبيخلصش :d
بس ده مش معناه انه صعب لدرجة ان محدش بيطلع منه ^^


لا بنطلع بس طبعا بعد مجهود فظيع..
لازم تكونى مجهزة نفسك ذهنيا ونفسيا للثانوى ده ,,
ولو انتى عندك طموح وحابة تكونى حاجة بشوية مجهود ربنا هيكرمك ..


اما موضوع البيت ف ده طبعا حاجة مهمة .. بس مستقبلك اكييد اهم ..


وربنا يوفقك ..

[Aya 7ekaya]

ماتعمليش حاجة تندمى عليها
كل حاجة حلوة عايزة توصلى ليها لازم تتعبى علشانها
والانسان بدون هدف ولا حاجة
رايى وهتحسى بيها بعدين لقدر الله لو حولتى ، هتندمى لما تشوفى نا حواليكى بقو حاجة
زى ماقالت ميرنا انه مرار
بس صدقينى لو ذاكرتى اول باول الموضع هيعدى
واان له مخلصه ثانوى ودخلت الكليه اللى كنت عايزاها الحمد لله
والحمدلله بفضل الله دلوقتى اسستريحت كتير
بس شوفى بقا تبقى معاكى دبلوم فنى
هتفرق كتير ف حياتك
ف جوزك ان شاء الله هتجوزى واحد ممكن يكون معاه اى حاجة غير لما تتجوزى دكتور او مهندس او او
هتحسى بالفرق
صدقينى بتفرق كتير
فكرى تانى دى نقطه تحول ف حياتك لازم تخلى بالك كويس انك ممكن تندمى قدام ومش هتقدرى ترجعى الزمن