الحلقه الثانيه من ( ساعدوووونى ) ( مشكلتى مع الحياة وجوزى مبحبوش )

[morshooo]

بسم الله الرحمن الرحيم

تم بحمد الله اختراق

( فضفضة الاعضاء )

من فترة نزلت توبيك فى

( يوميات الاعضاء )

بعنوان

( ساعدوووونى )

هنـــا

الفكرة باختصار هيتم عرض مشكله عضو معانا فى المنتدى

هيكتب مشكلته وهيبعتهالى وهنزلها وهيبقى مطلوب

من الاعضاء انهم يحاولو يقولو رئيهم فى المشكله دى

يمكن نقدر نساعد العضو فى حل مشكلته .

طبعا لقيت ان القسم هنا طرح التوبيك

فيه هيكون افضل فهنزل الحلقات هنا .

طبعا انا كدا كدا عندى حلقتين جاهزين هنزلهم

وكمان الـ حابب يتم عرض مشكلته فى التوبيك

يبعتلى على الخاص وهنزل مشكلته ومحدش هيعرف

هو مين .

دلوقتى تعالو نشوف المشكله الـ بقالها اكتر

من 3 شهور عندى بس طبعا صاحبه المشكله بعتلها

ووافقت على طرحها الفترة الحالية .

( مشكلتى مع الحياة وجوزى مبحبوش )

فى البدايه مبروك انطلاق البرنامج وبعتقد ان البرنامج

دا هينجح فى المنتدى ورغم انى مترددة انى اتكلم فى الموضوع

بس اكيد هيكون فى أراء ممكن استفيد منها .

مشكلتى باختصار انى اتجوزت من واحد من المكان

الى ساكنه فيه هو صحيح حد محترم جدا والناس كلها

بتشهد بكدا بس مكنش هو دا الشاب الى بحلم بيه ويكون

زوجى فى المستقبل رغم انى اعترض عليه بس مكنش فى

اى تجاوب من اهلى فى البيت والدى مصمم على زواجى

من هذا الشاب لسبب بسيط انه شاب مضمون ومستقبله كبير

ودا عشان هو شغال فى الخارج .

فعلا تم الزواج ورضيت بالامر الواقع وقولت لنفسى

خلاص مفيش حاجا هقدر اعملها وهحاول انى احبه لان دى

حياتى المستقبليه فى بدايه الزواج قعد معايا لمدة

( 25 يوم فقط )

ومعلش نسيت اقول ان الخطوبة كانت ( 5 شهور فقط )

بالرغم من اهله خطبونى ليه وهو خارج مصر ونزل قبل الفرح

بـ ( 7 ايام فقط ) .

هرجع تانى لمرحله الزواج اعتقد ان ( 25 يوم ) ميكفوش

انى احب زوج فيهم بعد سفره حسيت انى لسه زى مانا

مفيش حاجا جديدة غير انى بقيت ( مدام ) سفره فضل

تقريبا سنه ونص تقريبا ورجع تانى وقولت خلاص

الفترة دى هتبقى فترة التعود وانشاء حاله حب جديدة اعيشها

مكدبش عليك محصلش اى حاجا جديدة خلال شهر كامل

قعد معايا فيهم فى البيت شهر كامل مش هنكر انه شخصيه

جميله جدا وطيب جدا وبيحبى فعلا ودا متاكدة منه

بس من ناحيتى انا بجد مفيش اى حاجا مش عارفه دا

عيب فيه انا والا العيب فى مين بالظبط انا دلوقتى

متجوزة بقالى تقريبا ( 5 سنين ) مفيش اى جديد حصل

بينا او من ناحيتى انا رغم انجابى منه ( طفله )

بجد مش عارفه المشكله فى سفره الدائم

ومش بيكون معايا الا شهر واحد فقط كل

سنه ونص يعنى طول الـ ( 5 سنين ) تقريبا

مقعدناش مع بعض الا شهور بسيطه جدا .

والا الغلط عندى انا انى لحد دلوقتى مرتبطش بيه

وفعلا مش بحبه رغم انى متاكدة انه بيحبنى جدا جدا جدا

اسفه على الاطاله بس بجد كنت محتاجه اتكلم .

دى مشكله ضيفه النهاردة

ياريت لو حد حابب يقولها حاجا يقول

يمكن عشان برضو يبقى فى مصداقيه الضيفه

وافقت تقول عندها كام سنه

بين ( 25 - 29 ) سنه

فى انتظار أرائكم

[دمعه حائره]

الاحساس اللى عندك ده طبيعى
هاتحبيه امته وهوا بعيد عنك دايما
ده غير ان الجواز تقريبا كان فرض عليكى واقناع مش اختيار
ضرورى لو عاوزة تكملى معاه
قدامك حل من اتنين ياتسافرى معاه يايرجع هوا يستقر معاكى
لو المده ذادت عن كده يمكن تحصل تحصل مشاكل اكتر
لان الفجوة هاتذيد بينكم
لكن لو فضل معاكى هايعرف يخليكى تحبيه طالما واثقه من حبه كده
غلطه بيعملها الاهل بيفكروا انهم بيضمنوا حياه سعيدة لبنتهم
مايعرفوش انهم بيضعوا عمرها هدر
ربنا معاكى ويصلح حالك

[✿ Celiηα]

الحقيقة ممكن يكون مفيش اختلاط بينكم عشان السفر
او انكم ملحقتوش تعيشو فترة ما قبل الجواز مع بعض
ودي فترة بتحبي فيها الشخص عن ما تتجوزي وتحاولي تحبيه بعد الجواز
بس انا من رأيي طلاما هو كويس معاكي وبيحبك يبقى انتي عايزة ايه تاني
حاجة صعبة انه مش بيقعد معاكي غير شهور قليلة حاولي تكلميه
فالموضوع ده وجبيهاله من ناحية انه بيوحشك اوي وعايزة تقعدي معاه فترة
اكبر من الشهر اللي كل فترة بييجي ده وشوفيه هيقولك ايه
غير كده حاولي انتي فالشهر اللي بيقعده معاكي تقربي منه وتتكلمي معاه
وتقعدي معاه كتير يمكن تلاقي انجذاب منك لما تعرفي عنه اكتر
لأني معتقدش انك لحقتي تعرفيه كويس لحد دلوقتي
وربنا معاكي ويسعدك يا قمر فحياتك ويخليلك بنتك

وفكرة جميلة اوي يا مورشو تسلم افكارك ،،

[♥SaRa]

آكـيد طبعاً الاحساس دة طبيعي
لأن هو دائم السفر ازاي هتحبوا بعض ومفيش اصلا اختلاط
بس انتي حاولي تقربي منة لما بتزل من السفر
حاولي تطمئني لية وتحبية وتقربي منة ومجرد ما تقربي
هتحبية
وحاولي تصارحية ان السفر مأثر عـ العلاقة بينكم
بالتوفيق يا قمر
ربنا يهدية

[الحب الوردى]

طبيعى جدا انا مش متصوره انى فضلتى كل الفتره دى ازاى يعنى ايه تتجوزى واحد ما تعرفهوش الا قبل فرحك ب 7 ايام مش فاهمه اازى قامت ما بينكم علاقه اصلاا مع واحد اكيد كنتى حساه غريب عنك والى انتى بتشعرى بيه دا طبيعى بصى الحل لمشكلتك من وجهة نظرى انك تسافرى معاه بره وبكده هتتعرفى عليه اكتر وممكن تحبيه العشره بتولد الحب اكييييييييييييييييد

[Caramilla]

سبحان الله مشكلتك ديه
عن واحده زميلتي بردو وبتحصلها طبق الاصل
وجوزها دايما بيسافر
ومش بيعد معاها وانا فعلا بقيت مش محترمه جوزها
انتي يا قمر الله يصبرك والله انتي وطفلتك الجميله
انتي اعملي زي ماقالو البعض
انكم تعدوا وتستقرو مع بعض في مكان واحد
سواء كان يا هنا او هناك بقي
وبالتوفيق والله ياقمر ربنا يحفظك يارب

[الأميرة رودي]

بيتهيألي احساس طبيعي اللى حسيتي بيه ده
لآن العشره والآختلآط والتعود بيكونو اساس فى تقويه العلآقه بين الزوجين
وحتى لو مش متجوزين عن حب فأكيد مع الوقت بيجي الحب
لكن السفر ده فعلا مشكله ومنتشره كمان
وبتيجي أضرارها على الزوجه أكتر من الزوج

الحل الوحيد عشان تتخلصي من حاله الفتور دي انك تكوني معاه فى مكان واحد لآن ده
اللى هيولد الآلفه والحب بينكم
يا تسافري معاه ياأما هو يستقر معاكي
أو على الآقل يطول فتره أجازاته معاكي ويقصر فتره سفره
ساعتها المعادله هتكون اتعدلت شويه وهتقدري تقربي منه اكتر

لآن سنه ونص فعلا كتير

ربنا يهديلك الحال ويخليلك بنوتك ويسعدك
مشكور على المجهود مورشو
منتظرين جديدك

[طمطم]

وانتي هتحبيه ازاي وانتي مش بتشوفيه غير كل سنة ونص .. شهر !

الحب ده بييجي بالتعود والعشرة ,, حياة كاملة بتعيشيها مع شخص ..
مش كام شهر والسلام !

الحل زى م الاعضاء قبلي قالوا انكوا تكونوا مع بعض سواء هنا او بره
انما طول م هو مسافر كده ,., هتفضل مشكلتك زى م هي ..


منور الفضفضة ي برنس :d

[morshooo]

طيب طبعا كلكم منورين

بس كان فى توضيح صاحبه المشكله حابه تقولها

وبعتتلى انى اقول الكلام دا .

المشكله ان جوزها شغله ماينفعش فيه انها تسافر

لانه شغال فى السعوديه ونظام الشغل قاعدين فى مكان

وبيكون بنظام كل كذا واحد فى غرفه فصعب انه يبقى ليه

سكن ليه لوحدة لان لو دا حصل هيكون بعيد عن مكان شغله .

فحكايه انها تسافر معاه صعبه .

وبتقول انه لو قرر انه ينزل مصر ويستقر المشكله مفيش شغل

وهو عليه فلوس كان مستلفها عشان الجواز والكلام دا كله

وسددها خلاص الحمد لله لكن المشكله فى الدخل الى هيحصل عليه

لو نزل اشتغل هنا فى مصر .

[همسه الجوارح]

فيش بيت يخلى من المشاكل
وان جوزها يسيب اللى وراه ويقعد جمبها فده مش صح
وطلما مش هيقدر يصحابها معه فده شئ خارج ارادته
اهم حاجه يقدر يحترمها وبيحبها
يابنتى الانسان اللى بتتكلمى عنه بالشكل ده مش بس بتحبيه
انتى على الاقل بتحترميه
واحمدى ربنا ان فى قبول لشخصيه بتحبك
ارضى بنصيبه وشوفى الجانب الكويس اللى فيه
شان تقدرى تصونى غيابه وماتسلميش لهوس المشاعر
ربنا يسعدك
موفقه