سواق غبي

[الأميرة رودي]

صباح الخيـــر

ازيكم ياأجمل أعضاء

فيه حاجه مضيقاني ومن ساعتها وانا كاتمه فى نفسي
فيه مواقف بتحصل بتخلينا نضايق ونبقى مش طايقين نفسنا
واللى بيخنقنا اكتر لما بنحس بـ قله حيله فى المواقف دي
حصل موقف قدام عيني أحزنني جدا
وتأكدت فعلا اننا على حافه الهاويه وأننا بايدينا هنوقع نفسنا فى غلطه كنا طول عمرنا بنحاول نتفاداها ونتجنبها
ومن ساعتها وأنا بفكر هل اللى حصل ده صح ولآ غلط

كنت راجعه من سفر وراكبه عربيه مع سواق أعوذ بالله منه
وفجأه شاورله واحد ملتحي واقف على طرف الطريق وكان باين عليه انه مستعجل لآنه كان بيبص فى الساعه وبيتحرك بسرعه ناحيه العربيه

لقيت السواق بيقول ده اخواني سيبك منه
بس لقيته راح مهدي العربيه ووقف قدامه وفتح الباب فعلا وجه الراجل يركب راح منزل ايده من العربيه وقاله مابركبش اخوان معايا
الكلمه دي انا اتفاجئت بيها اصلا مكنتش متخيله انه بالعقليه دي
وفعلا قفل الباب ومرضاش يركبه
بصيت لورا على الراجل بعد مالعربيه مشت لقيته بيهز دماغه وكأنه مصدوم . انا زعلت حقيقي

قولت للسواق لما انت مش عاوز تركبه معاك وقفت قدامه بالعربيه ليه وفتحتله الباب وبعدين سيبته ومشيت
قالي عشان اقوله الكلمه دي مخصوص. مكنتش هرتاح الا مااسمعه الكلمتين دول
قولتله وانت كده ارتاحت !!
قالى اه
قولته ماظنش
راح باصصلي بصه غريبه وكمل طريقه
كان هاين عليا اقوله وقف الزفته بتاعتك دي ونزلني منها
بس كملت مشواري
انا اضايقت منه
واستحقرته
واستغربت لما لقيت ناس من اللى فالعربيه بيشجعوه ( اللى يقوله والله انت راجل - واللى يقوله عاشت ايدك)
كان لآزم اسكت
بس عرفت انها أزمه كبيره احنا فيها ومفيش أى كلمه تنفع ف الموقف ده وخصوصا انه ممكن يسمعني كلمه تضايقني
بس جيت نازله قولتله انت لو أخر سواق فى الدنيا عمري مااركب عربيتك دي تاني ولآ يشرفني أصلا
قالي ليه ياأبله عرفيني انا عملت ايه
سيبته ومشيت بس مشيت مضايقه


................

أنا ممكن اختلف مع الآخوان
بس اختلافي يكون فى الفكر والآراء والتوجهات
اختلآف ايدولوجي فقط
السواق نسى ان ده مصري
ونسى اننا عايشين مع بعض طول العمر
نسى ان الاخوان دول ناس مننا _ قرايب ونسايب وجيران واصحاب
مجوش فجأه من المريخ ولآ حاجه
نسى حاجات كتير اوي..


...............

أنا صحيح مختلفه جداا معاهم بس اختلآفي مع الأخوان بيتمثل بس فى سوء ادارتهم..

فى الفكـر المنغلق ..

لما جات الفرصه ماقدروش يستغلوها ( أو بمعني أصح أستغلوها بشكل غلط )
ده كان سبب اننا نتعب ونحس بأنهم مش الآمل ولآحاجه زى ماكنا فاكرين
سياسات كتير خلت الآمور تزيد ســوء

لكن مش معنى كده أنى انسى حقهم فى البلد والعيشه الكريمه
ومش من حقنا نصنفهم على أنهم ارهاب
بقالنا كتير اوي عايشين وسطيهم وهما عايشين وسطينا ماشوفناش ارهاب فى تصرفاتهم ولآ حاجه
كل حاجه فيها الكويس وفيها الوحش

أدعو ان ربنا يهدي الحال لمصــر
وأننا مش نوصل للدرجه اللى نخسر فيها أصحابنا وجيرانا وقرايبنا عشان خاطر السياسه !!


( . الموضوع ده للفضفضه فقط عن موقف حصل وضايقني // مالوش علآقه بـالسياسه .. )

[سهـــر]

وهل اصبح اعفاء اللحى اقتداء بالرسرل _ صلى اﻷه عليه وسلم _
تقع تحت مسمى اﻷخونه
لﻷسف اصبح الشعب المصري شعب جاهل ماشي مع الرايجه
ربنا يهدي

[زهـــ*ــرة النرجــس*]

معاكي حق في اللي قولتيه
ويا ريت كل الناس اللي بتعمل كده يقرو ده
ويعرفو اننا فعلا مصريين مهما كان اختلاف وجهة نظرنا
و الموضوع ده كتر جدا
وبسمع كتير عن ناس ملتحية شباب وكبار بيحصل لهم بلاوي بسبب لحيتهم
مع انهم اصلا ممكن ميكونوش من الاخوان بس الناس بتفتكر كده
وزي ما قولتي كل حاجة فيها الكويس والوحش
تسلمي على الموضوع و تعليقك عليه
وربنا يصلح حال مصر

[Mahmoud Kamel]

عايزة ايه تانى من شعب بيسمع

علي الحجاز " انتو شعب واحنا شعب ليكو رب ولينا رب "

ولا تسلم الايادي " قتل البني ادمين باسم الارهـاب "

حسبي الله ونعم الوكيل

[جبل عالي]

فاكرين لما كنت بقول احنا على حافة الهاوية

والله ده صبح حالنا بيزيد سوء وجهل

وتصرف يفرق الأب عن أبنه والأخ عن أخوه

تناقضات بتموت آدميتنا من جوانا واحنا للأسف مستسلمين

لا عبارة تخلف بتهزنا .... ولا عبارة بنضيع الدين بتفوقنا

الله المستعاااان



انا ابني بدأت لحيته تكبر وبيحلم انه مايحلقها

إقتداء مش أكتر يعني مهواش من الإخوان ولا غيره

ربنا يصلح حالنا ونفوق بقا من الغمة دي



تسلمي يارودي للسرد والفضفضة دي

[♥SaRa]

لاإلـه الا الا الله
اولاً دة تخلف بعيد عنك يا سارهـ اة والله ناس عقليتها فـ الحضيض
ولا مخ ولا عقل من الاساس موجود
وبعدين كل الي داخل عمال يقول كذة وكذة وحسبي الله فيهم
وحولوا الموضوع لأحنا وهما
اية يا جماعة اية احنا وأنتوا دي
الي انتوا بتقولها
مفيش حآجة اسمها احنا وانتوا كلنا ولاد بلد وآحدة
وزي ما في ناس عقليتها كدة من مؤيدين الجيش
في ناس من مؤيدين الاخوان كدة بس مش سواقين بيكونوا فـ المحلات وبيكونوا كاتبين لافتات وبيمنعوا دخول اي حد حتي معارض لفكرة
المسألة مش مسألة سياسة المسألة مسألة عقل غبي بيربط حاجة بحاجة تانية خالص
ربنا يديهنا جميعاً
دة الي الوآحد يقدر يقولة

[طمطم]

انا مش مصدومة بصراحة لاني حضرت كذا موقف زي ده ف الفترة الاخيرة ..

طول م احنا بـ " نشخصن " الامور وبنحولها من اختلاف سياسى لاختلاف شخصى
عمرنا م هنتقدم ابدا وهنفضل محلك سر !!


..

[الأميرة رودي]

اقتباس المشاركة الأصلية كتبت بواسطة sahar..! وهل اصبح اعفاء اللحى اقتداء بالرسرل _ صلى الله عليه وسلم _ تقع تحت مسمى اﻷخونه لﻷسف اصبح الشعب المصري شعب جاهل ماشي مع الرايجه ربنا يهدي

يارب
ربنا يهدينا جميعا
وربنا ينصر الحق أيا كان

تسلمي ياسهر نورتيني حبيبتي

[Loyalty]

يا حول الله يارب
بجد شىء محزن جدا
واكن الاخوان او الشخص الملتحى دا مش انسان
ولو فيهم حد وحش يتعاقب كاى فصيل فيه وحش مش الاخوان بس اى فصيل فيه الوحش والحلو
لكن هو يحكم عليه ع اساس اية
عاوزة احكيلك حكاية بمناسبة الموضوع دا
واحد جارنا ابن خاله ظابط جايلهم اوامر انهم لو لقوا حد اخوان يتسلوو عليه بيدوا للبلجية فلوس عشان يسمكوا الاخوان
المهم والد الضابط دا ومامتة كانوا سايقين عربية طلع عليهم حبة بلطجية
المهم الرالج دا كان معاه ضبنجة عمرها وضرب طلقتين فى الهوا جريوا وسابوا
ورجعولهم تانى وقالوا عليهم اخوان والناس نزلت فيهم ضرب !!!
كسرولهم العربية من كترالضرب عمرر الطبنجة تانى وجة يضرب فى الهوا ايده اتزحلقت جه فى رجل مراته
بجد شىء صعب جدا
ربنا يستر ع البلد دى بجد لاننا تعبنا اوى

[حَرفُُ هجآءّ]

تعرفى انا مش مصدومه خالص
لانى سمعت الكلام ده واكتر منه من تصرفات سورى زبالة جدا
بس هى دى عقليات تافهه
واللى السبب فيها الاعلام الفاسد
وتشبيه السىء لفئة من الناس مصريين زينا
وعملهم ناس من كوكب تانى
يكفى كلمه خروف
عارفه واقع الكلمة للمره الاولى تسمعية يتعبك
بس لما تخدى علية هتلاقيه عادى من وجهه ظر الاغبياء
هو الخروف ايه غير حيوان دمه مباح ملوش كرامه واكله حلال من غير رحمه
شايفه التشبية عمل ايه فى الناس ؟
رسخ معانى سيئة جدا جواهم
خلى اللى حصل من دم واهانه تافهه

ربنا يرحمنا برحمته