زوجة في مأزق (2)

[الأميرة رودي]

السلام عليكم

شو أخباركو

من فتره كده كنت عرضت مشكله لواحده من صديقاتي وقولت ان فيه مشكله تانيه لواحده تانيه هطرحها فى موضوع مستقل
المشكله اللى فاتت كانت عباره عن رغبه الزوجه فى تكمله مشوارها التعليمي ورفض الزوج للموضوع ده
بس الحمد لله ربنا هدى الحال وهو اقتنع وبدأت هيا المشوار الصعب لحد ماتاخد الدكتوراه باذن الله

المشكله التانيه النهارده

واحده برده من صديقاتي ( هما اصحابي كده كلهم مشاكل ) عيال نكديه

المهم المشكله ده عويصه
وصعبه عن اللى فاتت

لآنها وصلت للآنفصال

صحبتي وجوزها اتنين بيحبو بعض ومرتبطين جداا من ايام الجامعه
اتجوزو بعد مشاكل ورفض من أهلها لانه كان لسه بيبدأ حياته ومخلص جامعته ومحدود الدخل
واحنا عندنا اهالينا عاوزين واحد جاهز من مجاميعه شقه وعربيه وفلوس ودخل حلو وكله فله

رفضو كتير وهيا أصرت وكانت متمسكه بيه وهو كمان متمسك بيها
فى الآخر وافقو أهلها وتم الزواج

يمكن رفض أهلها الدائم له وحيه الشديد لها خلاها تزيد من دلآلها عليه
بقت عاوز كل طلباتها مجابه
والكلمه اللى تقولها تتنفذ
ولو ماتنفذتش تهدده بالطلآق
عشان هيا عارفه انه بيحبها ومش هيقدر يطلقها
استمرت فتره طويله على الحال ده وهو يسكت وينفذ كل اللى تقول عليه خوفا لتسيبه
كل يوم تقوله يااما تعمل كذا يااما تطلقني وهو يفهمها ان الامور مش بتتاخد بالشكل ده
وان لآزم يكون فيه وفاق ومشاوره فى كل شئ بس مش بالاجبار والآمر
وهيا لآحيات لمن تنادي
لحد مافى يوم هو طفح بيه الكيل ونفذ صبره
وفى يوم بتقوله انا عاوزه كذا
قالها لا مايفعش ظروفي ماتسمحش
راحت قالتله خلاص طلقني
راح مطلقها

هيا اتصدمت لانها كانت دايما واثقه ان الكلمه دي بتقولها لمجرد انها بتهدده عشان ينفذلها طلبها
مع العلم هيا بتحبه جداااااااا

بس بالفعل يومها طلقها
وساب البيت واختفى وهيا راحت لآهلها منهاره طبعا لانها فعلا بتحبه

هيا دالوقتي عاوزه تكلمه عشان ترجعله وتصالحه
بس خايفه لرجوعها بالشكل ده يكون اهانه لها
قالتلى بنفس اللفظ انا لو كلمته هفضل عايشه معاه طول عمري ماليش كرامه ولا قيمه

السؤال دالوقتي

تفتكرو هيكون رد فعله ايه لوفكرت تكلمه وطلبت منه يسامحها ويرجعو لبعض ؟
هيوافق ولا خلاص هو نساها وباعها بعد الحب ده كله ؟

وهل لو هيا كلمته يبقى بكده فعلا بتهين نفسها وهو هيستغل الموقف ده فى انه مش ينفذلها اى طلب تطلبه بعد كده ويهمشها فى قراراته ويعيش دور سي السيد ف البيت ؟

ولو تدخل أهلها فى الموضوع وحاولو يصالحوها هل هيقبل الصلح منهم ولآ هيفتكرلهم موافقهم القديمه ؟
وهل هو اتسرع لما طلقها فى اللحظه دي
لو أنت شاب ومكان الزوج ده هتتصرف ازاى ؟
ولو انتى بنت ومكان الزوجه هتتصرفي ازاى ؟

يلا شاركونا بئى البت مُحطمه نفسيــا

[جبل عالي]

يامشاكل يامشاكل .... ههههههههههه

حاسه هنقلبها محكمة أسرة هنا هههههههههههه

هارجع لك ياقمر من تاني ان شاء الله

لأن فعلا الموضوع محتاج قدرة كبيرة ع الصبر والعقل

[۩۩ elMagic ۩۩]

ههههههه
انا لو مكان الزوج هأعمل زي ما عمل ^^
اصل الطلاق دا مش لعبه وكلمه زي اللبانه تتقال عمال على بطال
كان لازم البنت دي تتعلم ودا هو الدرس إن الموضوع يبقى جد
بس الزوج هنــا لو لسه بيحبها وعايزها ومتأكد انها كمان بتحبه
يروحلها البيت ويتكلم معاها ويفهمها علشان متقولش الكلمه دي تاني
ويبداوا يكملوا حياتهم بشكل جديد والزوجه تغير من طريقتها معاه
ومش عارف هنا الزوجه تتصرف ازاى
هل تنستني المبادره من الزوج ولا هى تروح تكلمه ؟
وبعدين إزاي الزوجه خايفه على كرامتها وهى كانت مضيعه كرامة الزوج
بطلبتها كل شويه وإجباره إنه يعملها
لازم يكون فيه تضحيات ولو الزوج مجاش البيت
يبقى الزوجه تحاول تتكلم معاه وتفهمه إنها إتعلمت الدرس
ومش هتكرر دا تاني ..

[big bốss]

بصراحه الطلاق جه متاخر

هى فكره الطلاق لعبه كل شويه تهدده و تنفذ رغبتها غصبن عنه

حتى لو بيحبها تستغل ليه حبه هى

انا لو مكانه كنت طلاقتها من زمان ^_^ لانها مش انسانه الى تعمل كدا

و بصراحه الزوج مش غلطان و لو هى كلمته

يبقى هو من حقه يطلع عينها و يربيها من جديد على الى عملته

لانها كانت فى نعمه و ضاعت من ايدها

و الى فات عمره ما بيرجع فرصه و عدة

يبقى تستحمل بئا غلطها دلوقتى اما تطلق او ام تعيش مذلوله من غير كرامه

فى كل الحالات هى الى خسرانه و بايدها عملت فى نفسها كدا

استمرى يا ساره و هاتى مشاكل ^^

[Caramilla]

بيج بوس ..كلامك قاسي اوي للزوجه
لو انا مكانها وقريت كلامك ده قلبي هيوجعني بجد
هو يا جماعه مفيش حد مش بيغلط
هي غلطت فعلا واستهترت بحاجه كبيره
وتصلح غلطتها وترجع مع جوزها
وكاين مفيش حاجه حصلت وحياه زوجيه سعيده
وتتعلم منه وتوفق بين طلباتها وطلباته

نايس توبيك يا قمر

[✿ Celiηα]

تستاهل بجد ده رأيي رغم اني بنت

معلش انا لو جوزي وبحبه عمري ما هقله اعملي يأما هتطلقني ! مستحيل
وده بيدل انها بتحب نفسها اكتر منه وهي يعني مكانتش عارفة انه هييجي يوم من الايام هيزهق

وبعدين كرامه ايه دي
وهو لما سكت ده كله وبيسمع منها الكلمة دي وبينفذلها زي المذلول دي مش اهانه لكرامته
والله ده كتر خيره دي تبوس اديها وش وضهر ان فيه حد بيحبها كده

الله اعلم بقى لو كلمته هييرضي يرجعلها و لا لا
ولو مرضاش بصراحه حقه

[الأميرة رودي]

اقتباس المشاركة الأصلية كتبت بواسطة جبل عالى يامشاكل يامشاكل .... ههههههههههه حاسه هنقلبها محكمة أسرة هنا هههههههههههه هارجع لك ياقمر من تاني ان شاء الله لأن فعلا الموضوع محتاج قدرة كبيرة ع الصبر والعقل

ههههههه شوفتى بقى كل المشاكل بتاعتي واقعيه والله

ماشي مستنيه رأيك

نورتيني ياجميله

[جبل عالي]

تمام كل واحد قال رأيه الخاص واللي بينم عن شخصيته

بصراحة كل رأي يُحترم بالفعل لأن الحياة مش مستحملة نتلاعب بيها كده


اما بالنسبة لرأيي ..... بصراحة هو طبعا عنده مليون حق يعمل كده

بعد ما اتحمل عشانها كتير ... بس ليا عتب عليه

ليه من البداية تساهل معاها كده ؟؟؟

ليه سمح لها انها تنطق الكلمة دي من أصله لغرض تحقيق طلبها ؟

هو تهاون في حقه من البداية ...... وده برضو غلط

وهيا استغلت النقطة دي وغلطت برضو .... بس بنظري غلطها أكبر

يبقا مفروض فعلا ....يكون مبادرة منها مطلوبة

واعتقد قصة الحب اللي بينهم إستحالة تكون ماتت وان جوزها منتظرها

منتظر ترجع هيا وتتعلم الدرس القاسي ده ...... متفتكروش ان هو كده مرتاح

لا اعتقد ......... لأن العشرة اللي بينهم إستحالة تروح بثانية

بما ان هي دي النقطة الوحيدة المنغصة عليهم .... هيا تجربة وعاشوها

وكان لازم يعمل كده لآجل تاخد هيا الدرس ..... وأعتقد ان ممكن حد يقنعهم

هم الاتنين ......(حكما من اهله وحكما من اهلها) واحنا كشرقيين

بنقدس الحياة الزوجية والأسرية وأكيد رح ينجحوا فى اقناعهم

اما سؤالك انها لو راحت تكلمه هل ده يقلل ومعرفش ايه

فبقولك لاااااااااا طبعا اللي خلاها تحارب لغاية ماترتبط بيه

وتعارض أهلها وهو كمان ... من باب أولى انها تدور عليه

وتسترجعه ليها وتسترد حياتها من تاني ويكون درس عمرها كله

وان شاء الله ان شاء الله يرجعوا لبعض تاني

شكرا لك سارة لمواقف متنوعة هنا

[الأميرة رودي]

اقتباس المشاركة الأصلية كتبت بواسطة ۩۩ elmagic ۩۩ ههههههه انا لو مكان الزوج هأعمل زي ما عمل ^^ اصل الطلاق دا مش لعبه وكلمه زي اللبانه تتقال عمال على بطال كان لازم البنت دي تتعلم ودا هو الدرس إن الموضوع يبقى جد بس الزوج هنــا لو لسه بيحبها وعايزها ومتأكد انها كمان بتحبه يروحلها البيت ويتكلم معاها ويفهمها علشان متقولش الكلمه دي تاني ويبداوا يكملوا حياتهم بشكل جديد والزوجه تغير من طريقتها معاه ومش عارف هنا الزوجه تتصرف ازاى هل تنستني المبادره من الزوج ولا هى تروح تكلمه ؟ وبعدين إزاي الزوجه خايفه على كرامتها وهى كانت مضيعه كرامة الزوج بطلبتها كل شويه وإجباره إنه يعملها لازم يكون فيه تضحيات ولو الزوج مجاش البيت يبقى الزوجه تحاول تتكلم معاه وتفهمه إنها إتعلمت الدرس ومش هتكرر دا تاني ..

الله ينور عليك ياأحمد
رأيك جميل ومنطقي
هيا صحيح غلطانه بس ندمت وعرفت غلطتها بعد ماخسرته
ودالوقتي محتاجه فرصه تصحح فيها الخطأ اللى وقعت فيه
بس خايفه تكلمه يصدها فتنجرح زياده
وفى نفس الوقت خايفه ليستغل رجوعها ليه ويعاملها بقسوه بعد كده
وفى كل الحالآت جماعه الخير اللى حواليهم بيحاولو يصالحوهم على بعض

وربنا يهدي الاحوال

[الأميرة رودي]

اقتباس المشاركة الأصلية كتبت بواسطة big bốss بصراحه الطلاق جه متاخر هى فكره الطلاق لعبه كل شويه تهدده و تنفذ رغبتها غصبن عنه حتى لو بيحبها تستغل ليه حبه هى انا لو مكانه كنت طلاقتها من زمان ^_^ لانها مش انسانه الى تعمل كدا و بصراحه الزوج مش غلطان و لو هى كلمته يبقى هو من حقه يطلع عينها و يربيها من جديد على الى عملته لانها كانت فى نعمه و ضاعت من ايدها و الى فات عمره ما بيرجع فرصه و عدة يبقى تستحمل بئا غلطها دلوقتى اما تطلق او ام تعيش مذلوله من غير كرامه فى كل الحالات هى الى خسرانه و بايدها عملت فى نفسها كدا استمرى يا ساره و هاتى مشاكل ^^

ياساتر عليك يانور
كلنا بنغلط ،، ( البشر خطاء )
هيا غلطت واعترفت وندمت
يبقى ايه بقى لازم يربيها ويعمل ويسوي
اسكت ساكت خالص

ماشي حاضر هجيبلك كل المشاكل اللى ف بلدنا مش اللى عند اصحابي بس

نورتني انور