انا وحماتي

---انا مخنوقه وكنت عيزاكم تساعدونى--وربنا يجزيكم خير----انا فرحى قرب---واحتكاكى بحماتى بقى اكتر من الاول ---كتير بتتريق عليا وعلى كلامى فبسكت --اكون عايزه حاجه متجيبهاش----واخر مره جرحتنى جامد وقالتلى انتى كنتى شبه العفريت فالخطوبه وشكلك غريب---وبنتها تقولى مفروض تجيبى تكييف زى اى بنت---رديت قولتلها انا لو معايا فلوس كنت جبت مكنتش هستخسر وامها لقيتها بتقولى كوافير وفستان هيبقى بالنص---قولتلها انا اول مره اعرف ان العروسه بتشارك فالفستان وكوافير دى جديده--واتحمقت بالعياط وانسحبت---انا عارفه ان الكل بيشتكى من حماته بس انا بسأل اعمل ايه وايه الصح--عشان انا داخله دنيا جديده --ومفروض يكون رد فعلى اي معاها اجتنبها ---طب الصح انى اقول لابنها لابنها خصوصا ان دى مش اول مره وبتحاول توقع بينى وبينه----انا مخنوقه وفيا اللى مكفينى خصوصا ان امى مريضه فالفراش ومبتتحركش --واسفه لو كنت طولت -

[زهرة الياسمين]

لا لازم تقولي لخطيبك طبعا ده حقك وهوا لازم يتفهم ده
لانك لو سكتي بعد كدة هوا هايتعود على ده
ربنا معاكي
والف مبروك مقدما^^

[Anosha]

انتي غلطانه لزم تقولي لي خطيبك
لنك لو مش قولتيله مش هتعرفي تتكلمي بعد كده انتي تقوليه من دلوقتي احسلك
وربنا يصلحلك الحال ويتتمملك ع خير

[♥SaRa]

معلش يـا قمر
بس الحل الوحيد زي ما الكل
قال لازم تقولي لخطيبك علشان يقول لمامتة
وهي اكيد هتلبي طلب ابنها
واول ما يحصل حاجة عـ طول روحي قولي لية

[دمعه حائره]

عامليها زى مابتعاملى مامتك واصبرى عليها شويه
والا الوضع هايذداد سوء
لان مش هاينفع تقاطعيها او تفضلى تشتكى لجوزك كل شويه منها
حياتك هاتتقلب لجحيم
الحاجات دى بتحصل فى عائلات كتير وغالبا بتكون غيره
وبعد فتره الامور بتتحسن

[fanky girl]

متزعليش نفسك يا حببتى
دى حاجه عاديه
بس لو لقيها بتهينك
كتير ردى عليها بس بى الادب احرجيها بس بى الادب
وهزقيها بس لى الادب وهى هتتخرس خالص بس لو فضلتى سكته كدا
هتفضل تتطول لسانها عليكى
وهتستضعفك

[تجملت بالعفآف]

متفقه مع رأي منه

لازم تصبري شويه عليها

[აα∂ Ԑγεა]

ربنا يتمملك علي خير يارب
اتكلمي ف حكاية الفستان والكوافير والكلام دا في وجود خطيبك واهله سوا
طالما المفروض علي العريس
هيا ماديات ولا ليها اي لازمه والاهم الحب
لكن برضوة مينفعش يتضغط علي طرف فوق طاقته اكيد لا


اما عن تعاملك معاها فزي ما قالت منه عامليها زي ما بتعاملي امك
اكيد مينفعش يكون في سلبيه بينكم ف التعامل
مش كويس ليكي ولا للجواز والحياه اللي جايا
اظن لو دايما بقيتي كويسة معاهم مش هتلاقي غير انه تبقي كويسة معاكي

ولو مبقيتش كويسة تقللي التعامل مش تردي وتشتكي والكلام دا
الا في اضيق واصعب الحدود
لان موضوع خناقات الام والزوجة بيقلب الحياه للاسوء دايما
ومحدش بيتحط ف الوضع دا وميخسرش


ربنا يتمملك علي خير يارب ويخيب ظنك وتبقي كويسة معاكي

[روح صامتة]

و انت ع البر غير و انت جوه المية ،،
بصي انت لسه ما اتجوزتيهوش
قوليله دلوقتي واعرفي هيتقبل و لا لا ،،
احكيله و عامليها كويس
ممكن نبرة صوتك زعلتها ،،
و بعدين ممكن تكون بس غيرانة حبتين على ابنها بتحصل فعلا
و الموضوع مش هيتغير دلوقتي عن بعد الجواز
فغيري من طريقتك معاها و بردو فهميها وجهة نظرك بهدوء
و احكي لخطيبك لازم يكون بينكم تفاهم
بشكرك
ارق تحياتي

[كوين ميرو]

بصى حبيبتى الحكايه محتاجه منك تحمل شويه

انتى ببساطه تتكلمى معاها وتقوليلها انتى زى امى

وانا محتاجه لنصيحتك ودعمك ليا واحتوائك

ولو عملت حاجه غلط اعتبرينى زى بنتك وانصحينى او عتبينى

وكلامك بالطريقه دى بيجرحنى وانا مش عايزه بينى وبينك اى زعل وفاهميها بهدوء

ولو لقيتى المعامله لسه زى ماهى ومحصلش تغير

لازم تعرفى خطيبك بس بردو بهدوء وتعرفيه انى جربتى معاها وبردو مفيش فايده

والمعامله هى هى

وربنا يمد ايده حبيبتى ويسعدك ويشفى مامتك