الحلقة الرابعة من حوار خاص ومعانا ( دمعه حائره) ( الجزء الاول )

[عاشق متيم]

بسم الله الرحمن الرحيم النهارده معايا فى حوار خاص ضيفة غنية عن التعريف أطلق عليها القاب كتير منها شمس المنتدى وروح التسامح معايا الادارية المتميزة دمعه حائره اهلا بحضرتك وبشكرك انك قبلتى الاستضافة انا اللى بشكرك على الدعوة اولا حياتك 1- سنه 2012 كانت قاسيه بالنسبه لكى (السبب) ؟ 2012كانت قاسيه فعلا بس مش بقسوة السنه دى ومن خمس سنين فاتو كانت اكبر قسوة يمكن عشان مريت كتير بأحداث اكتشفت فيها حاجات من الممكن تكون سبب فى عزلتى اكتر من الاول بس انا مش بندم او بقف عند خساره الحمد لله برضي بقضاء ربنا وبحاول اتأقلم مع الدنيا 2- فى ناس كتير خذلتك كنتى بتتعاملى ازاى ؟؟؟ الخذلان دايما بيكون مشكله اللى بيعمله مش اللى وقع فيه لانه اكيد هايتحمل نتيجة خيبات الآخريين فيه وبعد فتره هايلاقى نفسه بيخسر الناس وبتعامل عادى بالتجاهل واعدى المواقف ومش اتعشم زيادة عن اللزوم عشان مش ازعل 3- ليه مرت عليكى فترة وقمتى بالحجر على قلمك وكنتى نويتى اعتزال الكتابة ؟؟ كانت فتره صعبه جدا لانى بدأت اكتب كل اللى يجى على بالى وبعد ماانزله وانا بقرأه احسن انى مكنش مفروض انزل الكلام ده برغم انه كان بيلاقى اعجاب كتير بس مكنتش بكون مبسوطه انى كتبته لكن ماطولتش الفتره دى وقدرت اكتب تانى 4- ايه سبب تعلقك بالمسلسلات التركى وحكاية توبا ولميس ؟؟؟؟ ههههه ماشاء الله مراجع كويس تعلقى بالمسلسلات التركي مش كلهم هوا بس مسلسلات لميس او توبا ده اسمها الحقيقى بحس انه فيه رابط كبير بينى وبينها وبتعجبنى جدا اختيارتها للقصص اللى بتقوم بالتمثيل فيها غير شخصيتها وروحها كلها على بعضها مالهاش حل عندى وبحبها وخلاص ومن يوم ماسجلت هنا حطيت رمزيتها وماغيرتهاش ولما بغيرها بحس انى مش انا 5- والله ذبحتونى خلافات فرفقا بى ؟؟ لمن قلتى هذه العبارة ؟؟؟ كانت فتره فيها خلافات كتير حسيت بزهق وبقيت مستغربه ليه بقينا كده مش متفاهمين ووافقين لبعض على الواحده واكيد هنا فى المنتدى مش لازم الاسامى 6- الكناريا بتمثل لكى ايه ؟؟ وليه قررتى انك مش تربيهم تانى ؟؟ كانت هوايه مهمه عندى وبربيهم وجيبت كتير منهم لحد ماكان عندى اتنين اتعلقت بيهم جدا واخدوا من وقتى واهتمامى حيز كبير كانوا هديه من حد غالى عندى ومات واحد منهم وحزن التانى لحد ماحصله اتأثرت جدا بالمنظر وحلفت مااجيبهم تانى 7- ليه كنتى عاوزه تاخدى كورسات فى فهم الناس ؟؟؟ هههه ومش اخدتها لحد دلوقتى يعنى جاتلى فتره كنت بتفاجىء بحاجات وتصرفات لناس اقف قدامها وماعرفش افسر معناها ولااعرف يقصدوا ايه وكنت بنخدع كتير فيهم عشان كده فكرت اخد الكورسات دى يمكن انجح فى كشفهم 8- وصلك من اقرب الناس كلام جارح فكان رد فعلك انك قلتى شكرا لمن جرحنى وهسامح لكن مش هنسى لانى لازم اتعلم ؟؟ اتعلمتى ايه ؟؟؟ كان يوم قاسي فعلا بس فكرت انى اقول شكرا لان اى حد بيجرحك لازم تتعلم من جرحه ده وتقدر ياتغير من نفسك ياتاخد بالك منها اكتر والتسامح دى صفه جميله ومهمه لكن مش معنى انك مش بتنسي تبقى وحش لاطبعا ده درس لازم تتعلم منه وتشكرهم عليه 9- ليه اتخذتى الكتمان اسلوب فى حياتك ؟؟ وهل فى حد معين بتبوحى له بكل ما بداخلك ؟؟؟ لما تلاقى اللى بتحكيله مش فاهمك ولامقدر مشكلتك او مش بيقف جمبك وقت زعلك يبقى مافيش داعى تحكى وتخلى الكتمان اريح واكيد عندى صديقه مقربه ليا بحكيلها كل حاجه واختى كمان وقبلهم بابا ربنا يخليهولى 10 - ليه اكتر دكاترة بتخافى منهم دكاترة الاسنان ؟؟؟ انا بخاف من اى جراحه ومنظر الدم واسمه نفسه بيرعبنى يمكن ده السبب اللى بيخلينى اروح للدكتور متأخر اوى وتكون الحاله صعبه ومش سهل انى اروح كمان غالبا حد بيودينى غصب عنى عشان كده بهتم اوى بنظافه سنانى عشان اقلل الزيارت دى 11- انتى عنيدة جدااا ؟؟ شايفة ان الصفة دى حلوة ولا عاوزه تتخلصى منها ؟؟؟ لابالعكس مش عنيدة فى الامور العاديه ومتفاهمه جدا مع اى حد وفى اى نقاش بوصل لحل مش بتمسك برأى لو غلط لكن فى الامور اللى تمس الكرامه او المشاعر بعاند وبقف عند موقفى ومش خناقه قد ماهو تخلى عن اى انسان ممكن يسبب لى ازعاج او جرح 12- ليه ذكرياك كلها حزينه وعاوزه تتخلصى منها ؟؟ مافيش حد معندوش ذكريات حزينه وطبيعى اى حد فينا بيفتكرها بيتمنى يحرقها او يخلص منها لانها بتجدد الحزن والالم الى سببته ليه فى الماضي فمش هانقف عندها كفايه الحاضر اللى مش سايبنا فى حالنا 13- انتى كنتى بتهربى من المشاكل بالنوم ؟؟ ليه مش كنتى بتواجهى ؟؟ ايوة فعلا بفضل انام وبالغصب اريح بردوا للمشاكل اللى مالهاش حل او بمعنى اصح اما تكون مشكله فى شكل واقع صعب تغييره فالافضل لما تلاقى نفسك تعبان تنام يمكن ترتاح يمكن تعبت من المواجهه لانها غالبا بتفشل او بتخسرك ناس 14- ايه الجزء اللى انتى استئصالتيه منك وكان مهم لكن كان يؤلمك ؟؟؟ لامش استأصلت حاجه هههه دى كانت لحظه زعل كده وقولت الجمله دى فشة خلق 15- ايه افضل مرحلة فى حياتك ؟؟؟؟؟ ليه ؟؟ مرحله الثانوى كانت احلى ايام حياتى لانى اتعرفت فيها على اصحاب لحد دلوقتى اصحابى وسافرت رحلات معاهم كانت ممتعه يعنى تقدر تقول كانت اكتر مرحله استمعت بيها 16- علاقتك بأصدقائك عاملة ازاى ؟؟ وهل قطعتى علاقة بصديقة ؟؟ ايه السبب ؟؟ علاقتى بأصدقائى كويسه لو هانتكلم على الاصدقاء اللى بجد اللى بيثقوا فى بعض ومش بسهوله يخسروا بعض بيقفوا جمبك وقت الشدة ويساعدوك ومش قطعت علاقتى بصديقه هما يمكن اكتر ومش قطيعه بمعنى الكلمه قد ماهى اختلفنا فى وجهات النظر فالبعد بيخلى الانسان يحتفظ اكتر بالناس بدون مايجرحوه وبيكون حل كويس 17 - ايه الامنية اللى نفسك تحققيها ؟؟؟؟؟ الامنيه اللى بسعى ليها حاليا انى اسافر ومن فتره نفسي اعملها وكل مره للاسف بتحصل حاجه تعطلنى آخرها تعب والدتى ربنا يشفيها واخويا ضحك عليا وسبقنى من شهر ولازم مش ابعد الفتره دى 18- امتى ابتديتى كتابه الشعر ؟؟ ومين اللى شجعك انك تستمرى ؟؟؟ بكتب من زمان يمكن من ثانوى فى مذكرات والتشجيع كان من هنا فى المنتدى اول ماسجلت دخلت قسم الخواطر ومكنتش بنزل حاجه شجعونى ومنهم شاعر واسير الحب وواد حبيب والسفينه وبحر ولكن وجبل عالى وناس كتير اسفه لو نسيت حد اتعلمت منهم كل حاجه جميله بشكرهم جدا كانت ايام جميله 19- عائلتك بتمثل لكى ايه ؟؟ ومين اقرب حد ليكى ؟؟؟ عيلتى كل حاجه عندى وبتدور حياتى حواليهم والاهتمام بيهم واقرب حد والدى 20- لو اعطيناكى تذكرتين سفر لاى دولة ؟؟ تسفرى فين ومع مين ؟؟؟ هاسافر تركيا مافيش كلام واخد معايا لوست بيرل صديقتى الصدوقه واشترى تذاكر لباقى الاعضاء مش اسيبهم انا هنا 21- انتى مميزة فى صنع المفارش اللاسيه ؟ مين علمك ؟؟ وهل لسه بتعملى ولا المشاغل ابعدتك عن هوايتك ؟؟ كانت فى مُدرسه فى الاعدادى علمتنى وبطلت الحقيقه اشتغل المفارش دى لانها مرهقه جدااو يمكن عشان انشغلت فى حاجات تانيه 22- انتى زملكاوية ؛ رأيك فى انتكاسات الزمالك الفترة الاخيرة مشكله الزمالك دايما فى سوء الاداره وده اللى مأخرهم وذى ماتقول مالهمش حظ كل مايتقدموا خطوة ينتكسوا تانى 23 - اخر فترة فى حياة جدتك ( رحمها الله ) ودخولها العناية المركزة عدت عليكى ازاى ؟؟ وبعد وفاتها ؟؟؟ الله يرحمها كانت اصعب فتره فى حياتى لدرجه انى تعبت جدا وقت ماروحت وشوفتها بتتألم وفاتها كانت صدمه كبيره ولحد دلوقتى لسه ماعدتش من المحنه دى لانها مكنتش بس جدتى دى كانت امى هى ربتنى وعلمتنى كل حاجه عايشه معايا فى كل حاجه بعملها وصورتها مابتفارقش خيالى ودايما بحلم بيها الاعضاء يسألون الضيفة سؤال بيج بوص - هل ليكى اصحاب بنات فى المنتدى ؟ و هل بتحكلهم اسرارك الشخصيه و عن حياتك ؟ انا علاقتى بالاعضاء هنا كلها اخوة واغلبهم بنات مع احترامى لكل بنت عرفتها لكن مش متعوده احكى اسرارى او حاجات عن حياتى الخاصه لحد وده مش معناها انى مش بثق فيهم ابدا بس دى وصيه ماما ليا وده ماشي على اصحابى برا المنتدى كمان اسرارى لنفسي او لاختى وامى و لو عرفتى ان فيه حد خان ثقتك و فشى سر من اسرارك ؟ انا كل اللى عرفتهم محترمين ومحدش فيهم يعرف سر عنى اكتر من المعلومات اللى بتتقال فى صفحتى او استضافات مافيش حاجه تانى و نشره لان البنات رغايه و مش بيتبل فى بقها فوله هتعمل ايه ؟ استحاله تكون صحبتى اكيد بتقول كده وخلاص فلو بتتباهى انها صحبتى مش معقول تتباهى انها خاينه وبتطلع سر صحبتها واقولها ( وإما تخافن من قوم خيانة فانبذ إليهم على سواء إن الله لا يحب الخائنين) و لو عرفتى كمان ان فيه حد عمل توبيك عن السر دا ؟ ههههه هاقولك هات الرابط اتفرج واضحك شويه اشوف التأليف وصل لفين اكيد ناس عاوزة تتعرف وتحقق مكاسب بس بطريقه رخيصه ولو انت شوفت حاجه كده ليه مش تعرفنى؟ سؤال العضو مسك الشهادة الحياة عبارة عن ماضي وحاضر ومستقبل ...كيف ترى منة نفسها في تلك المراحل من هذة الحياة من حيث الأحداث والتفكير والطموح والقناعة ونسبة النجاح والرضا الذاتي ؟ اللى مالوش ماضي مالوش حاضر ولامستقبل والحمد لله انا راضيه جدا عن حياتى بكل اللى فيها واتمنى ربنا يرضي عنى واقدر اكمل المشوار اللى بدأته واحقق كل اللى بحلم بيه كان لكى برنامج جميل ( هتطبخى ايه النهارده ) بقالك كذا شهر مش بتعمليه ؟؟؟؟ قرأت انك طباخة شاطرة جداااااا انا هعمل معاكى حلقة هتطبخى ايه النهارده ؟؟؟ مش كزا شهر ولاحاجه بس انت عارف الاستضافه بتاخد وقت واعباء الاداره شويه بتعطلنى لدرجه انى اتفقت على حلقه ونسيت ابعت الاسئله والحمد لله بطبخ كويس وبحب الطبخ وخصوصا الاصناف الجديدة بحب اتعلمها واوك موافقه نعمل الحلقه وعلى حظك عملت محشي النهاردة اتفضلوا عندنا 1- مين علمك الطبخ ؟؟ وامتى دخلتى المطبخ ؟؟؟ جدتى الله يرحمها وماما واول ماتعملت كان عندى 10سنين 2- ايه اكتر اكله بتعرفى تعمليها ؟؟ وايه اكتر اكله مش بتعرفى تعمليها ؟؟ اغلب الاكل بعرف اعمله ده انا دخلت على الاصناف العالميه دلوقتى والبركه فى cbc سفره بس البيتزا الله يسامحها هاتضيع مستقبلى 3- بتطبخى بزيت ولا بسمنه ؟؟؟؟ الاتنين بس مش بكترهم 4- ايه اكتر اكلة بتحبيها غير البيتزا ؟؟؟؟ بحب المشاوى والاكل الايطالى 5- هل حدثت لكى حوادث فى المطبخ ؟؟ وفاكرة اول مرة حرقتى فيها الاكل ؟؟؟؟؟؟ كنت زمان بحرق الرز دايما واللحمه المحمره وانا بتكلم فى الفون او قدام التليفزيون مش فاكره اول مره الماضى حافل بالحوادث 6- انتى مش بتعرفى تشترى حاجات من السوق ؟؟ مين بيشترى لكم الحاجات ؟؟؟؟؟ الحاجات الخفيفه بشتريها بالفون وبروح مره كل شهر اشترى الحاجات الاساسيه من ماركت كبير لكن مابعرفش اروح السوق 7- رأيك فى برامج الطبخ ؟؟ وهل بتابعيها ؟؟؟ وهل فى أكلة معينة اتعلمتيها من البرامج دى ؟؟؟ جميله طبعا وغيرت فى حياتى كتير واتعلمت اكلات ممتعه وعجبتهم جدا فى البيت اغلبها اكل آسيوى وايطالى 7- لو معزومة عند ناس والاكل كان وحش جدااااااااا ؟؟ هل هتيجى على نفسك وتاكلى ؟؟ولا هتعملى ايه ؟؟؟ مش بحب اتعزم برا اصلا ولو اضطريت والاكل مش حلو باكل سلطات المهم مش احرج الناس 8- اخترى عضو وعضوه تعزميهم عندك وهتطبخى لهم ايه ؟؟؟ من غير وصف لطريقة الطبخ ( اذكرى الاصناف فقط ) هاتزعلهم منى كده انا اعمل وليمه كبيره واعزمهم كلهم ونجيب كام خروف وطباخ لانى هاتعب انا كده ونعمل مشاوى ومحاشي وطواجن ونخربها اوتوجراف خاص الوالد ربنا يخليك ليا وتعدى الازمه اللى انت فيها على خير وترجع احسن من الاول الوالده ( ربنا يشفيها ) ربنا يشفيكى وترجعى بكامل صحتك وحشتنى وقفتك فى المطبخ واتصالك بيا كل يوم تسألينى عملت ايه الاخوات لاخويا ربنا يوفقك فى سفرك وترجع بالسلامه ولاختى ربنا يخليلك البيبى الجديد ويقويكى على خدمته جدتك ( رحمها الله ) الله يرحمك ويسكنك الجنه وانا حطيت صورتك جمبى اللى اديتهالى آخر يوم شوفت فيه وكأنك كنتى عارفه انى مش هاشوفك تانى بس انتى عايشه معايا فى تفاصيل حياتى صحباتك اكبر نعمه فى الدنيا ان يكون عندى اصحاب زيكم وربنا يديم الاخوة الجميله بينا توبا خلى بالك انا قولت لخالد يجيبلى صوره منك وعليها اسمى ومستنيه او اجى بنفسي مش هاصبر كتير وآخر مسلسل كان رائع وبكده يكون انتهى الجزء الاول من الحوار انتظروا الجزء الثانى من حوار خاص مع المتميزة دمعه حائره دمتم فى امان الله

[ساحر الأحزان]

منورة الاستضافة يا منة

ولسة برضة بتحرقى الرز؟

بدل ما تسافر تركيا ولا عايزة تشوفى لاميس صحبتك

روحى طليانو

اتعلمى البيتزا

حلقة جميلة عاشق

ومنة تكلمت والحوار طويل بسى شيق

تحياتى لكم

[SiLver Spectra]

يعني مورشو تبقى الاستضافة كلها كورة و منه طبخ و انا البطة السوده اللي تبقى كلها سياسة

منه منورة ..مستنيين الجزء التاني

[big bốss]

استضافه جميله عرفتنا كتير عن منه

و هى شخصيه جميله الجميع يكن لها الاحترام و التقدير

و بطلوا التركى الى لحس دماغكم دا هههههههههههههه


حلقه جميل يا عاشق

موفقين دوما

[morshooo]

ال تركيا ال
مالها السنبلاوين يعنى ^_^
منورة يا دمعه طبعا
وماشاء الله حوار سياحى و مطبخى
من الدرجه الاولى

منور يا معلم واقولك نصيحه
مال الاستضافات دى بقسم ( النقاش )
وكنت مستنى الواد نور يقولك الكلام دا
بس شكله مطنش او مش واخد باله ^_^

[عاشق متيم]

اقتباس المشاركة الأصلية كتبت بواسطة morshooo منور يا معلم واقولك نصيحه مال الاستضافات دى بقسم ( النقاش ) وكنت مستنى الواد نور يقولك الكلام دا بس شكله مطنش او مش واخد باله ^_^

هو انا لما اسأل الضيف عن وجهه نظره فى امور معينه مش ده اسم نقاش ؟؟؟؟
ولما سألتك عن المنتدى والضيوف اللى قبلك والضيوف اللى بعدك ؛ مش دى زى ظواهرك اللى انت بتعرضها فى النقاش ....؛
الاستضافة دى شاملة كل حاجة والبرنامج ده غير اى برنامج ....
ومفيش له قسم معين يتعمل فيه ؛ لانى بسأل فى كلة حاجة
ما انا سألتك فى الرياضة ؛ كنا نروح نعمله فى القسم الرياضى
على كده اقسم الحلقة وروح اعمل كل جزء فى القسم اللى يناسبه ..

[morshooo]

اقتباس المشاركة الأصلية كتبت بواسطة عاشق متيم هو انا لما اسأل الضيف عن وجهه نظره فى امور معينه مش ده اسم نقاش ؟؟؟؟ ولما سألتك عن المنتدى والضيوف اللى قبلك والضيوف اللى بعدك ؛ مش دى زى ظواهرك اللى انت بتعرضها فى النقاش ....؛ الاستضافة دى شاملة كل حاجة والبرنامج ده غير اى برنامج .... فلما اعمل البرنامج فى النقاش ؛ لان فى اسئلة للنقاش ؛ ومش عاوز اذكر برامج بتتعمل مالهاش اى علاقة بالقسم

ههههههههههههه
استنى بقى ماتدخلش شمال كدا
يعنى حوارك مع منه دا مثلا نقاش
يعنى لما تقولها بتحبى ايه وبتسئلها عن اعضاء
واعضاء تسئلها وتكلمها عن حياتها دا يبقى نقاش اكيد لا
اى قسم اكيد بيكون ليه هدف واحد يعنى لو الاستضافه
عن قضايا اوك نزل فى النقاش .
لكن انتا بتقول برنامجك غير اى برنامج
يبقى خلاص نزله فى مكانه الصح
وعلى فكرة مش بقولك كدا عشان تنزله فى
اليوميات والا حاجا بس يعنى بما انك رديت كدا
فبوضحلك وانا على فكرة من اول حلقه طارق
وانا عايز اقولك مكان التوبيك مش النقاش
لان التوبيك مش بينقاش قضايا للنقاش
انتا عامل استضافه عامه .
رساله لنور بقى ^_^
صحصح يابنى وشوف ايه صح فى قسمك
وايه غلط بدال ما اوصى عليك الادارة انتا حر ^_^

[عاشق متيم]

اقتباس المشاركة الأصلية كتبت بواسطة morshooo ههههههههههههه استنى بقى ماتدخلش شمال كدا يعنى حوارك مع منه دا مثلا نقاش يعنى لما تقولها بتحبى ايه وبتسئلها عن اعضاء واعضاء تسئلها وتكلمها عن حياتها دا يبقى نقاش اكيد لا اى قسم اكيد بيكون ليه هدف واحد يعنى لو الاستضافه عن قضايا اوك نزل فى النقاش . لكن انتا بتقول برنامجك غير اى برنامج يبقى خلاص نزله فى مكانه الصح وعلى فكرة مش بقولك كدا عشان تنزله فى اليوميات والا حاجا بس يعنى بما انك رديت كدا فبوضحلك وانا على فكرة من اول حلقه طارق وانا عايز اقولك مكان التوبيك مش النقاش لان التوبيك مش بينقاش قضايا للنقاش انتا عامل استضافه عامه . رساله لنور بقى ^_^ صحصح يابنى وشوف ايه صح فى قسمك وايه غلط بدال ما اوصى عليك الادارة انتا حر ^_^

انا هكلم الدكتور طارق
واشوف الحلقة الجاية واللى بعدها هنزلها فين
وبعد كده مش عامل البرنامج خالص ...
ولا هستضيف اعضاء ولا فى قسم النقاش ولا فى غيره
يكفينى شهادة الاعضاء فى البرنامج ......

[morshooo]

اقتباس المشاركة الأصلية كتبت بواسطة عاشق متيم انا هكلم الدكتور طارق واشوف الحلقة الجاية واللى بعدها هنزلها فين وبعد كده مش عامل البرنامج خالص ... ولا هستضيف اعضاء ولا فى قسم النقاش ولا فى غيره يكفينى شهادة الاعضاء فى البرنامج ......

يابنى انتا واخد الكلام كدا ليه ههههههه
الموضوع مش مستاهل كل الى قولته دا
وشهادة الاعضاء ايه الى تكفيك مانا واحد
من الاعضاء الى بدخل مواضيعك وبرد عليها
وخلاص ياسيدى هو دا القسم المناسب
لموضوعك .

[Reem♡A|❀]

جمممميلةةة جدإ الحلقهه من اسئلةة لاجـأإبـأإت