محتاجة افضفضلوكوا

السلام عليكم

كنت محتاجة احكى معاكوا فى موضوع كدا بينى وبين بابا

من البداية بابا دايما بيسافر من قبل ما اتولد حتى وكل الى بشوفه ال 3 شهور الى

بينزلهم كل سنة المهم انا الكبيرة ودايما كان كل شىء ليا مستجاب وكدا

وانا صغيرة كان علاقتى ببابا عادى جدا وانا الوقتى فى تانية ثانوى جيت كدا من اول

تانية اعدادى وبقا اسلوب بابا متغير اوى فى التعامل معايا ممكن لاى سبب تافه مليش ذنب فيه

ميعجبوش يقوم مخاصمنى ولا بعرف انا عملت ايه ولا اي حاجة ممكن نواصل بالاسبوع كامل

انا وهوا مش بنكلم بعض وكنت باخد كل دا بحساسية قوى قوى وفضل على كدا طول الاجازة

نتخاصم ونتصالح على دا الحال فضل الكام سنة الاخيرة كدا لدرجة انى بقيت حتى مش فارق

معايا مخاصمنى مصالحنى مش مشكلة عندى واتطورت الامور انى وصلت لدرجة انى انى اعند قباله

حتى لو عارفة انى غلط لان زى ما قلت اى حاجة بتكبر وبيتعمل منها حكاية

وطول الفترة دى انا بعتبر علاقتى ببابا علاقة فلوس وبس لما اطلب حاجة بس عن طريق ماما

بتجيلى هوا دا بس الى بنا غير كدا عمره ما كان فى تعامل بنا غير اى تعاملات سطحية عشان

احنا اسرة دا حتى واحنا متصالحين وكدة انا عارفة انى وصلت لدرجة

بقيت انا الى غلطانة بس بجد تعبت من اسلوب التعامل

معايا لانى كان نفسى يقرب منى زى ما بشوف كل الى الى حوالينا وقرايبنا وصحباتى وكدا

ممكن ناس تقول بحكم سفره بس برضو الكلمة الحلوة والطريقة الحلوة حتى لو مش قريب منى

ومصاحبنى وكدا لا ابدا

انا وصل بيا انه جى من السفر فضلت اعيط اليللة قبل ما يجى لانى مش حاسة انى فرحانة

انه جى زى ما كنت زمان لانى عارفة الى هيحصل ايه وفعلا دا الى بيحصل وحتى ماما تعبت بنا

كنت زمان لو عمل كدا وخاصمنى اروح اصالحه و اتاسف وكدا وبردوا ميعديش يومين ونرجع نتخاصم

لاى سبب انما الوقتى انا بقيت بعند ولا حتى بتأسف لانى لقيت كله واحد مش هتفرق

معلش ازعجتكم بس فعلا كنت محتاجة اتكلم مع حد ومحدش فاهمنى

[دمعه حائره]

المشكله دى بتحصل عادى فى اى اسره الوالد بيسافر فيها
ودى طبعا لانه مش بيكون عارف طبع اولاده ولاشارك فى تربيتهم
وانتى كمان فى مرحله تكوين الشخصيه وده مزود الفجوة بينكم
مش هاقولك عشان رضي ربنا لانك اكيد عارفه
لكن هاقولك ده بابا وبيجى عندكم ضيف لازم تستحمليه
وتحاولى انتى واخواتك فتره اجازته تريحوه ومش تعملوا مشاكل
عشان هوا كمان يبقى مبسوط ويقدر يديكوا الاحساس اللى انتم محتاجينه
يقعد معاكم ويخرجكم لكن هاتقضوا الاجازه خصام يبقى كان بيرجع ليه؟
الموضوع عاوز منك اصرار انك تتخلصى من الحساسيه الزيادة
وتتأقلمى مع الوضع اللى انتو فيه وتفرحى انه راجع وماتحاوليش تعملى اى مشكله معاه
وانتى هاتشوفى تغيير كبير فى تعامله معاكى
ولاحظى انه طول السنه عايش لوحده واكيد اتعود على كده
ويمكن احساس انه مصدر للفلوس وبس ده مدايقه ماتحاوليش توصليه ليه
وده هايكون باهتمامك بيه وانك تسمعى كلامه
ربنا يخليهولك ويرجع بالسلامه

[۩۩ elMagic ۩۩]

غريب تصرف الوالد دا !
وأصلا مش تصرف سليم إنه يسيب اولاده فترات طويله كده
لان الوالده بردوا مش هتقدر تسد دور الوالد بالشكل المطلوب منه
كان لابد إن التربيه تتم برعايتهم هما الاثنين ..
طالما انتى شايفه إنك بتعملى حاجات غلط واوقات بتاخديها بعند مع والدك
لا يبقى متعمليش داا ودايما توضحي لوالدك من خلال تصرفاتك إنك بتحبيه
يمكن دا يخليه يقرب منكـ زي زمااان
يعني اول ما يرجع اقعدي جنبه واتكلمي وهزري معاه
واضحكي دايما فى وشه وكماان خلى والدتك تساعدكـ وهى تتكلم معاه
ماهى لازم يبقالها دور علشان الوالد يغير طريقة معاملته معاكي
وبعدين لو فى الامكان كلكوا تسافروا مع الوالد فى مكان عمله
طالما هو مبيقدرش يقعد معاكوا فتره طويله فا دا هيبقى أفضل
ومعاه هتستقروا ومع الوقت إن شاء الله الدنيا هتتظبط
ربنا معاكي ويوفقكـ ,,

[جبل عالي]

دمعه قالت رد قوي وقيم جدا وصحيح وياريت تقدري تبذلي مجهود

وماجيك كمل برضو بس منقدرش نحكم هل يقدر ياخدكم ولا لا؟



بصي بجد كلمة من قلبي وعقلي وكياني

الكلام اللي انتي كتبتيه ده بالضبط وبكل إحساسك ده

وواضح ان أسلوبك جميل فعلا في توصيل ووصف حالك

اكتبيه تاني ووضحي مشاعرك بدقة جدا بس المرة دي

تكتبيه ليه هو ...... لبابا نفسه ..... متستغربيش

انا اقدر اقولك انك قوية وشجاعة وتقدري على كده

صدقيني اكتبي لبابا ولماما كمان هم الإتنين

نفس الوصف اللي وصفتيه هنا بس هتكتبي وتركزي اوي اوي

على أحاسيسك تجاه بابا ضرووووري ومدى إحتياجك لمشاعره

والله ياقلبي هاتفرق كتير وهتشوفي

وعايزاكي تأكدي على مدى إحتياجك كبنت للمشاعر دي من أبوكي

ومتنتظريش من حد فيهم رد ... لأن إنتي بالشكل ده

هتكوني بتحطيهم قدام مراية كبيرة يشوفوا فيها حالهم بالضبط

اعملي الخطوة دي ومتقلقيش وان شاء الله ان شاء الله

رح يكون كل الخير والله العظيم

ربي يسعد قلبك ويشرح قلوب الكل ان شاء الله

[нαиαи]

قبل اي حاجه حطي في بالك انه اضطر يبعد عنكم عشان يوفر لك انتي و اخواتك كل سبل الراحه
عشان لمن يكون نفسك في حاجه تحصليها موجوده عندك ..

عمل كدا عشان ما يخليكي تحسي انك اقل من غيرك و ان غيرك يملك اللي يتمناه و انت و اخواتك لا ..

لو حطيتي كلامي دا دايما في بالك راح تحصلي نفسك تلقائيا بتحبيه و تزعلي لزعله ..
لو في حد محتاج لوجوده فهي امك اكتر وحده محتاجه لوجوده ..
بس ربنا كتب لكم تعيشو فتره مؤقته و انتو بعيدين عن بعض و الحال هذا ماراح يدوم
راح يجي يوم و يبطل شغل برا و يكون معاكم علطول ..

يعني لازم تتعودي على اسلوبه هوه بيعمل كدا مش عشان بيكرهم بس يتمنى يشوفك افضل وحده ..
انتي ممكن تكلمي مامتك عشان تكلمه يخف عليكي شويه ..

بس ثقي انه بيحبك جدا ..

[جبل عالي]

اقتباس المشاركة الأصلية كتبت بواسطة нαиαи قبل اي حاجه حطي في بالك انه اضطر يبعد عنكم عشان يوفر لك انتي و اخواتك كل سبل الراحه عشان لمن يكون نفسك في حاجه تحصليها موجوده عندك .. عمل كدا عشان ما يخليكي تحسي انك اقل من غيرك و ان غيرك يملك اللي يتمناه و انت و اخواتك لا .. لو حطيتي كلامي دا دايما في بالك راح تحصلي نفسك تلقائيا بتحبيه و تزعلي لزعله .. لو في حد محتاج لوجوده فهي امك اكتر وحده محتاجه لوجوده .. بس ربنا كتب لكم تعيشو فتره مؤقته و انتو بعيدين عن بعض و الحال هذا ماراح يدوم راح يجي يوم و يبطل شغل برا و يكون معاكم علطول .. يعني لازم تتعودي على اسلوبه هوه بيعمل كدا مش عشان بيكرهم بس يتمنى يشوفك افضل وحده .. انتي ممكن تكلمي مامتك عشان تكلمه يخف عليكي شويه .. بس ثقي انه بيحبك جدا ..

فتح الله عليكِ

الله يحميكِ يا جميلة القلب فعلا

دي نقطة مهمة جدا ماشاء الله عليكِ

ربنا يسعد قلبك ياااارب دايما

[SiLver Spectra]

لازم تحطي في بالك ان موضوع السفر و الغربة مش سهل
بامكانه انه يعد في مصر و القرشين اللي يجوله يصرف بيهم عليكم و ان كان عاجبكم
لكن هو عاش حياته برا عشان انتوا تعيشوا حياة افضل
بمعنى اصح هو بيضحي بعمره عشانكم

تفتكري هو اصلا حاسس انه عايش حياة كريمة و هو منعزل عن أسرته ؟
أو و هو متغرب و بيشتغل و بيتعب ؟
موضوع انك تجيب فلوس عشان تصرف على غيرك مش سهل

مش هو احسنله شخصيا ينزل و يعد في مصر وسط اهله و اصحابه و يقضيها على القهوة ؟
بس ساعتها بالنسبالكم انتوا مش هيكون احسن كمستوى معيشة
يبقى لازم تعملي حسابك انه بيتعب عشانكم انتوا
و بناء عليه لازم انتي كمان تستحملي غضبه ..و خصوصا اني حسيت من كلامك انه مش بيضربك مثلا او بيسيء اليكي ..مجرد خصام عادي

فاحنا شوفنا تضحيته ..فين بقى التضحية بتاعتك اللي اصلا لا تقارن بتضحيته ؟