أتحدى أن يظهر باسم يوسف من جديد

[SiLver Spectra]

أكيد سمعتوا العبارة دي مليون مره على الفيس أو اليوتيوب

و بما اننا في المنتدى هنا فالموضوع دا اهداء لشخص هو عارف نفسه كويس و أول حرف من اسمه (ياسر)

في استضافة ليه سابقة مع الاستاذ خالد (مسك الشهادة)
طرح عليه (مسك الشهادة) السؤال التالي :

برأيك وبصراحة تامة معهودة بك :_ أين باسم يوسف الآن لماذا لم نرى برنامجه الساخر من جديد وبإعتقادك لو عرض البرنامج بنفس السخرية التي كانت ع محمد مرسي على النظام الحالي ماذا سيكون ردة الفعل وهذا ينطبق ع هاني رمزي واحمد ادم لماذا إختفوا فجأة برحيل مرسي أم أن النظام الحالي ملاك لا يوجد به عيوب ام
أن النظام الحاكم لا يسمح بذلك على عكس النظام السابق ؟

فكان ردي عليه بالشكل التالي


هو النظام السابق ماكنش هيخليهم يكملوا بعد 30 يونيو لو كانوا استمروا
و مرسي اعلنها بوضوح و قال : كفايه عليهم سنة
و كان وزير الاستثمار الاخواني بعت لقنوات المعارضة انذارات و دا كان تمهيد لغلقها بعد استقرار الاوضاع (بعد 30 يونيو)
يبقى هو السيناريو الاقصائي كان هيحصل في كلا الحالتين
و بالتالي فأنا شخصيا افضل السيناريو الحالي لأنه على الاقل مش بيحرض ضد المسيحيين مثلا ..و في اسباب كتير

بمعنى اصح مشكلة القنوات الخاصة مع الاخوان سياسية
بينما مشكلة الاخوان مع المعارضين طائفية
يبقى مين افضل السيئين ؟

دي حاجه

أما باسم يوسف ..هو اعلن في اغسطس ان برنامجه هيبدا في سبتمبر
و بعدين في أول الشهر والدته توفت

أنا مش عايز أستعجل في الحكم بس أظن انه ممكن يعاني من التضييق في اعادة تشغيل البرنامج مش في البرنامج نفسه
يعني لو البرنامج بدا يشتغل ما اظنش انهم هيجوا جنبه
لكن الاشكالية في انه يبدا البرنامج من جديد لان صاحب المحطة (محمد امين) له توجه السياسي
فلسه أنا مش هقدر اوضح رؤيتي بشكل واضح خلال الايام دي

توقعي شخصيا انه هيظهر و البرنامج هيشتغل بس في وقت متأخر من السنادي
السنة اللي فاتت باسم بدأ في اخر نوفمبر

و ممكن فعلا مش يظهر ..الايام هتوضح و هتبين اكتر

ثم علق ياسر (احساسي صحيح) بالشكل التالي :
فى نقطة بس حبيت اوضحها لانكم تجادلتم فيها كثيرا وهى نقطة باسم يوسف
إن اللى حصل فى 30 يونيو كان مرتب وكل الناس عارفة كدة ,, يعنى باسم يوسف كان من ادوات
الانقلاب والاعداد لة زية زى باقى الكوورس الاعلامى المعروف وهو سينارية موضوع مسبقا
مهما حاول اى شخص ينفى فلا مجال لللهروب من تلك الحقيقة واتحدى ان يظهر باسم يوسف مرة اخرى ,, إلا اذا طلب منة كبير العسكر ان ياتى بحلقات للتريقة على الاخوان ومؤيدية ورافضى الانقلاب فهذا شىء اخر ,, فلا مجال هنا ان ينطق بحرف عن العسكر .

ثم كان ردي عليه كالتالي :

موضوع باسم يوسف
فمش هنسالك مشاركتك دي لو ظهر و ساعتها هيبقى منظرك وحش
انا مش قولت اتحدى ان ما ظهرش ..قولت لسه الايام هتثبت بينما انت اقريت و قولت اتحدى انه يظهر
يبقى لو ظهر في نوفمبر هظبطك بموضوع حلو كدا و هيكون ردك في اوله
اما ان ما ظهرش ..فانا مش قولت كلمة (اتحدى) ببساطة لاني مش بنجم و بنتظر الحقائق لتحليلها

و زي ما وعدته بإني هظبطه بموضوع حلو
و دا هو الموضوع
اهداء مني ليه بمناسبة رجوع باسم يوسف النهارده
و الموضوع مش كتبته الا بعد مشاهدة الحلقة بالكامل ..و كان فيها نقد بنفس الطريقة و بنفس الاسلوب مع الدكتور مرسي
و لسه دي أول حلقة ..أول حلقة من الموسم السابق ماكنش انتقد مرسي
و اللي عايز يكون منصف يتفرج على الحلقات السابقة و يقارنها بحلقة النهارده

طبعا ناس كتير منهم الاخ ياسر ..هو اصلا عنده حكم مسبق
هيكون ردهم بان الحلقة مش اد المستوى و اقل من اللي كان بيعمله مع مرسي ..من غير ما يشوف الحلقة حتى او مجرد ما يشوف لقطة ..لانه اصلا مطلع الحكم من قبل اي حاجه
و لذلك فأنا بدعوه لمشاهدة الحلقة و لو على الرابط فأمره سهل



ظبط بس انت القاعدة و اتفرج يا نجم

ملاحظة بس كدا عالسريع ..دائما الانصار بيكونوا مادة خصبة للسخرية
فاللي كنا بنشوفه من انصار مرسي لا يختلف نهائيا عن المدعوا توفيق عكاشة مع المجلس العسكري بس الفارق ان اعدادهم كانت اكبر ..و اظن ان الايام القادمة لسه هنشوف كتير مع الوضع الجديد

...

ردي بقى شخصيا على المزايدين ..
احنا شوفنا باسم بينتقد بعض الاعلاميين ايام مبارك على اليوتيوب
و شوفناه بينتقد المجلس العسكري
و شوفناه بينتقد مرسي
و لسه مخلص الحلقة بتاعت النهارده و شوفته بينتقد بشكل لاذع و بنفس الايحاءات (جماهير و أسامة و غيره) النظام الجديد

سؤالي ليك يا ياسر : انت كنت بتعمل ايه بقى ايام مرسي ؟ فكرني كدا ؟
لما الواحد كان بيكتب موضوع فيه نقد لامر معين ضد مرسي ..كنت بتخش تعمل ايه في الموضوع ؟
يعني انت مثلا لو انتقدت السيسي ..بتشوفني بخش موضوعك و اعمل غربلة و اعكس الاتهامات ؟ حتى لو عندي راي مخالف في بعض الامور ؟ ما تنتقده و قول اللي يعجبك ..سواء بقصائد أو غير قصائد ..نزل ياعم انت اكيد ليك نظرة . يبقى ازاي اخش و اعكس كل التهم و الانتقادات اللي فيها ضد النظام ؟

لكن فكرني انت كنت بتعمل ايه ؟

يبقى ازاي تطلب من غيرك انه يبقى محايد و انت اصلا بعيد كل البعد عن الحيادية ؟
ازاي تقول على باسم يوسف انه كذا و كذا ..و بعدين نشوف باسم طالع ينتقد الحكم الحالي ..حتى لو انتقده بكلمة واحده بس فهو بكدا تفوق عليك
انت ياريتك كنت ساكت ..انت كنت بتهاجم بشدة اي معارض !

يبقى بالمقياس اللي في دماغك (مش هجيب مقياس من برا) فانت اسوء منه بمليون مره
يبقى على اي اساس بتتكلم عنه و بتزايد عليه حتى !

ياريت نتعلم ..مش انت بس كل الناس تتعلم انها مش تحكم على حاجه غير لما تشوفها
اصبر ..لو كنا عدينا كام شهر و مش طلع ساعتها اتكلم و قول اللي يعجبك
لكن اسلوب الحكم المسبق من غير اي حاجه فدا مش حلو
لأن لو حد حكم عليك دلوقتي و قال انك كذا و كذا و كذا بأحكام مسبقة انت مش هتبقى مبسوط

و اظن انت استاذ في الحكم المسبق ..اي تغييبر يحصل في المنتدى كنت بتتهمني بسوء النية و لو كنت ناسي افكرك بفكرة عمل اعادة في الانتخابات الادارية
و فكرة عمل درجات للاستبيان اللي اتهمتنا فيها بانه فيلم هندي عشان ماتركس
دا على كدا ينفع اشتغل في بوليود
عمري ما تخيلت ان ممكن حد يتفه عقلي بالدرجة دي .
يعني اعمل موضوع و قصة كبيرة و مولد ضخم عشان موقف تافه !
ما علينا ..أنا مش من طبعي افتح في القديم ..بس دي رسالة أتمنى انك تاخد بالك منها
و قول رايك و اللي يعجبك ..بس بلاش تحكم على اشخاص بشكل مسبق دا كل اللي عايز اوصلهولك

أنا طبعا عمري ما كتبت موضوع و حطيت فيه اسم شخص ..
و لا حتى من طبعي اني اتعمد اوجه كلامي لشخص بعينه
بس انت اللي فرضت عليه التحدي مش أنا
..

بالمناسبة الحلقة عجبتني جدا

و هنهي الموضوع باقتباس من مقالة باسم يوسف الاخيرة

بس قبلها احب اوضح أمر
لو البرنامج اتمنع او حصل تضييق ..فدا لن يقلل من باسم يوسف في شيء لأنه خرج بكل جرأة و صراحة و عبر عن رايه لو حصل منع او غلق فدا سيقلل من السلطة الحاكمة

المهم عندي هو ان الراجل اثبت المبدأ بتاعه

ليظل باسم my hero

........

مقالة باسم بتاريخ 22 اكتوبر

«هاه!!!! حتتكلم على مين دلوقتى؟»
كم مرة سمعت هذا السؤال منذ عزل محمد مرسى؟
كتيييير.
يربط الكثير من الناس بين السخرية وبين تحطيم الأشخاص، أو باللغة الدارجة: «أنك تعلم عليه»، وهى عبارة مستوحاة من خناقات الشوارع و«التعليم على الوش» بالمطواة.
حين بدأنا البرنامج على الإنترنت ثم انتقلنا إلى التليفزيون كنا نعتبر أن هذه فرصتنا لتقديم طريقة جديدة للتعبير عن الرأى، وذلك عن طريق السخرية والكوميديا على قدر ما نستطيع.
وفى حين تقبل الكثير من الناس هذه الطريقة الجديدة اعترض عليها آخرون مرة بدعوى أنها حرام ومرة بدعوى إنها غير لائقة.
لكن فى الواقع الكثير من هؤلاء كانوا يعترضون فقط لأن اتجاه البرنامج وآراءه «مش على مزاجهم».
فالكثير من الإخوان المعجبين بالبرنامج فى موسمه الأول انقلبوا عليه لمجرد أدائنا أغنية (راب) ضدهم. وازدادت العداوة بالطبع فى الموسم الثانى حين قدم لنا مرسى ومقدمو البرامج الدينية مادة متجددة دائمة.
وعلى الناحية الأخرى كان البرنامج هو المفضل لأعداء الإخوان، ولكنهم لم يتحملوا فقرات قليلة سخرنا فيها من أحمد شفيق أو عندما انتقدنا موقفهم حين خرجوا لحصار مقر الإخوان فى المقطم.
فى بلادنا يربط الكثير منا موقفه من برنامج أو من مذيع ليس على أساس جودة ما يقدمه ولكن يقيمه على أساس اتفاق هذا المذيع مع آرائه.
يقولون لك: «قول اللى انت عايزه بس خليك موضوعى.. خليك محايد»
وتحتار أنت فى تفسير «محايد وموضوعى» لأنها فى الحقيقة تعنى «قول اللى على مزاجى»
يقابلنى أنصار السيسى ويبادرون بضربة استباقية فيحذرون: «اوعى تتكلم على السيسى» مع أنهم نفس الناس الذين كانوا ينتظرون البرنامج ليتكلم عن مرسى بل كانوا يقابلوننى بعد الحلقات، ويقولون: بس أنت كنت حنين عليه، وكأن السخرية تعنى أن أسب المرء بأهله و«أعلم عليه» حتى يرضوا.
حين أواجههم بذلك يكررون نفس كلام الإخوان من قبل من أنه «ما يصحش، أو أن مرسى يستاهل أو أن مش وقته أو منظرنا قدام العالم».
الحقيقة أنه لا يوجد تسامح لا من ناحية الإخوان ولا من ناحية من يطلقون على أنفسهم ليبراليين، فالكل يبحث عن فرعون على مقاسه.
على قناة الجزيرة عرضوا تقريرا وثائقيا مفاده أن البرنامج كان سببا مهما لسقوط مرسى. يعنى هم يسيئون لحكم مرسى أكثر مما أساء هو له بأن يقولوا إن برنامجا ساخرا يأتى مرة فى الأسبوع ومدته أقل من ساعة قادر على أن يسقط نظام حكم وتنظيم عمره أكثر من ثمانين عاما. وإن كانت حقيقة فهو دليل على هشاشة الحكم وليس قوة البرنامج.
عادة لا أتكلم عن البرنامج فى مقالاتى، ولكننى أتكلم اليوم عنه لأوضح بعض الأمور. لقد التزمت الصمت فى الأسابيع الماضية حين كنت أقرأ وأشاهد وأسمع الشائعات التى أحاطت بالبرنامج وتوقفه وعودته. ولذلك اخترت أن أوضح هذه الأمور لأن الموضوع له أبعاد أعمق من مجرد الحديث عن برنامج تليفزيونى.
توقفنا فى رمضان وعيد الأضحى لأنها إجازة معلن عنها سلفا. وتأخرت عودتنا بسبب فرض الحظر وخاصة أننا لا نصور البرنامج من داخل مدينة الإنتاج ولكن من وسط المدينة على بعد أمتار قليلة من ميدان التحرير، فكان من غير المقبول أن نعرض فريق العمل والجمهور للخطر. وحين أعلن عن تخفيف الحظر اتخذنا قرارا بالرجوع وتم التأجيل مرة أخرى بعد وفاة والدتى، فاتخذنا قرارا بالرجوع بعد ذكرى الأربعين.
على مدى الأسابيع التى توقف فيها البرنامج راقبت بتعجب الشائعات والتحليلات والتكهنات، التى أصبحت أخبارا وأمرا واقعا، فهذا خبر عن وقف البرنامج وخبر آخر بمنعى من الظهور وإنهاء التعاقد مع المحطة بعد «أن أديت دورى» كما يقولون.
المثير للاهتمام أنه بعد أسابيع من التقريع والشماتة لأن البرنامج «اتمنع خلاص» وبعد أن أعلنا عن عودة البرنامج وأسباب التوقف تغيرت النغمة لـ«نتحداك أن تنتقد السيسى وعدلى منصور» وإذا فعلنا ذلك سيقولون إن ذلك ليس كافيا، أو إنها تمثيلية أو يطالبون بأن «اعمل فيه زى ما عملت فى مرسى»
طب يعملوا زى مرسى وأنا تحت أمركم!
لذلك إن كنت إسلاميا أو ليبراليا، محبا للعسكر أو الإخوان لا تقنع نفسك انك موضوعى أو حيادى، أنت متحيز ومتحامل مثلما تصف هذا المذيع أو هذه القناة.
يستخدم محبو السيسى نفس المصطلحات التى كان يستخدمها محبو مرسى.
هم لن يطيقوا كلمة عن السيسى، ودفاعهم عن الحرية والديمقراطية سيتوقف فى اللحظة التى تزعجهم نفس النكتة، التى كانوا يصفقون لها من قبل الإخوان لن يكفيهم أى نوع من الانتقاد أو السخرية إلا ما يريدونه هم، وسيعايرون من لم يقف معهم وينصفهم مع أنهم يطلبون ذلك ممن علقوا له صورا ترسم مشنقة حول عنقه، وأطلقوا عليه سلاح التكفير وطالب شيوخهم وقياداتهم علنا بإيقاف البرنامج، وذهبت بسببهم إلى النائب العام الذى ربما سأراه قريبا ولكن على يد ناس آخرين يحبون الحرية «زى عيونهم» أو على حسب المزاج.
أعترف أن الأمور الآن أصعب بكثير ليس لمجرد أن المادة الخام الآتية من القنوات الدينية أو من مرسى قد تضاءلت ولكن لأن المزاج العام أصبح مختلفا.
كيف نخرج ببرنامج ساخر وكوميدى وحديث الدم هو حديث الصباح والمساء؟ كيف نجعل الناس يضحكون وحياتهم اليومية مليئة بأحاديث عن الإرهاب والخوف والقتل؟
حين يعيش الناس فى حالة من الرعب والخوف والغضب والكراهية لا أحد يريد أن يستمع لصوت العقل فما بالك بالسخرية؟
حين يسألنى أحدهم «هتعمل إيه بعد كده.. هتضحكنا إزاى؟» أقول له إن برامج السخرية السياسية هى مرآة للمجتمع. إذا كان ما يحدث فى البلد «دمه خفيف» فسنكون كذلك. أما حين يكون كل ما يحدث فى البلد يدعو للاكتئاب فبدلا من أن نقول «طب ونجبلكم منين؟» سنبذل قصارى جهدنا لوضع ابتسامة على شفاه من أصابهم الملل من البرامج التقليدية وسنضحك معهم بدلا من أن نبكى.
التحدى كبير ولذلك أحب أن أجدد شكرى وتقديرى للفريق الرائع الذى أعتبر نفسى محظوظا لأن أقضى معهم وقتا أطول مما أقضيه مع عائلتى.
سيدى الفاضل لا أعدك أنك ستنفجر أحشاؤك من الضحك مع البرنامج ولكن نعدك أننا ستستمتع بما نفعله ليخرج لك منتج إعلامى مختلف بذلنا فيه قصارى جهدنا.
أعتذر مقدما لأنك لن تتفق مع كل شىء أقوله وربما ستكرهنا أو «ننزل من نظرك».
ولذلك أختم المقال بهذه الأقوال المأثورة:
«رضا الناس غاية لا تبغى»
«لولا اختلاف الأذواق لبارت السلع»
«ولهذا خلق الله الريموت»
نراكم 25 أكتوبر بمشيئة الله

[حنـــــون]

بصراحه الحلقه عجبتنى واسلوبه ماتغيرش
هو هو
احنا بس لو نبطل نبالغ فى كل افعالنا ونبطل
يكون حكمنا مطلق ع الاشياء
وحكايه التفتيش فى النويا ومعرفه الغيب دى شئ سئ جدا
عن نفسى بشوف باسم حد جرئ وبيقول الى فى دماغه
مش ماغ حد تانى ولو حصل فعلا وحد ديق عليه
يبئه العيب مش على باسم العيب ع السلطه :d

[نور ونار]

اتوجه له تهم كتيره منها السخريه
وكمان انه برنامج مبتذل
طب ايه فى حياتنا مش ساخر ومبتذل
الفيس كله الش وتريقه
تيجى لما يتكلم ويكشف الحقيقه
من خلال شويه سخريه يقولك لا يجوز
وافلام السبكى والشوارع اللى بقت كلها ابتذال
ده فيرى نايس
طيب ياريت النقد يكون فى الماده الاعلاميه
مش يبصوا على الاسلوب ويسيبوا المضمون
يطلعوا مثلا يقولوا الماده الاعلاميه مضلله
والدلائل اهى
مش يقولك ده ساخر ده دمه تقيل
ده مبتذل
لالالالا نستبيح دمه
كآنت فى دكتوره صديقه
بتقولى دايما كله الا الافكار القبليه
يعنى تحط فكره مسبقه نتيجه رؤيه حد
ده بيخليكى عاميه فتحى عنيكى وشغلى مخك واحكمى
حتى لو غلطى تقولى انا غلطت واتعلمت
مش هما اللى قالولى = ))

[الحان الورد]

،

ههههههههه
أنا كنت واثقة انك هتعمل موضوع عن باسم d:
وكنت عارفة رأيك نوعاً ما ^^

بدون الدخول في تفاصيل كتير ، ولاني مش حابة أحكم عليه من دلوقتي
ومن أول حلقة
إلا إن الحلقة عجبتني ، فيها حاجات معجبتنيش برضو
لكن الأغلب كان حلو وبداية موفقة من رأيي
وعموماً أنا كنت شبه متأكدة ان باسم مش هيكون من " المطبلاتية "
بحترمه الراجل دا حتى لو إختلفت معاه في حاجات

وادينا مستنيين بقية الحلقات ^^

[كريم عاصم]

اسمع الفيدو غدا ان شاء الله
بس في ملحوظه احب أقولها
القوات االمسلحة المصرية لاتُلقب بكلمة عسكر
العسكر اللى هما المرتزقه من أاجناس تانية
ودول تانية
انما القوات المسلحة الحمد لله كلهم مصريين ووطنيين
لي عودة .........

[عاشق متيم]

ما بحبش حد يحكم على حد بحكم مسبق
بس احنا للاسف بنسمع كلام ونردده ...
فى عضوة عملت موضوع عن باسم وقالت انه مش هيخرج لانه جبان
ومش عارف ايه ؛؛ نفسى اشوف رد فعلها دلوقتى
انا فاكر اول حلقة لباسم فى الجزء الثانى
واتريق على لميس وخيرى وعماد الدين اديب وعلى قناة سى بى سى نفسها
وسخر من نفسه وقال كلب سويرس وغيرها
وتقريبا الحلقة دى هى نفس ظروف حلقة النهارده
كان انتهى برنامجه على اون تى فى ...
واكتر حاجة بتعجبنى فى باسم انه مش بيخاف من حد وبيقول اللى هو عاوزه
يمكن البرنامج بيبقى فى بعض الحاجات السيئه وصور والفاظ مش حلوة
حتى لو كان بينوه انه برنامج للكبار فقط ...
اول ما اتعمل برومو ان باسم هيرجع افتكرت كلامك لياسر
ما كنتش احب انك تعمل موضوع عن شخص بس هو اللى اجبرك على كده
مقال باسم عاجبنى بس مش عارف مقوله ( لهذا خلق الله الريموت )
ما اعتقدش ان البرنامج ده هيكمل

[Nàdøỡsha]

إمممم هـآآآآحححح

هى الحلـقهه كـآنت جامده ^^

وأحلي حـآجهه بتـاعت الزمـآلك

وإللى عجبني إنه رجع كده بعد الحـزن إللي مـر بيـهه بسبب وآلدتـهه ،،

تسلـم أستـآذذ أرسطـوو ع التوبيك

[احساسى صحيح]

اية دة يا عم انا اسمى مكتوب
طوويب ..
كل دة علشانى دا انتا لمعتنى وعملتنى نجم
تشكر والله يا مديرنا
انا شفت الحلقة وكنت منتظرها زى كل الناس
عايزين يشوفوا التوجة بتاعة
واكييد من المقدمة هو فاهم الناس منتظرة اية
بدليل المقالة إللى انتا افردتها ف الاخر
شكلك ع الاخر منى يا طروق هههههههه
شووف ..
نص الحلقة تريقة لسة على مرسى والاخوان بدليل اغنية الاطفال اللى اتركب عليها كلام
وربع تريقة على الاعلامين
والربع الاخير مقسم الى نصة كلام أباحى خصوصا فى فقرة ( ست جمهور ) دى
كلام لا يمكن ان يوصف او يقال او يدخل بيوت مصريين
او مجتمع زى مجتمعنا ابداََ تحت اى ظرف
التبرير اللى قالتة الاخت نور ونار لا يمكن يتفق مع اعلام مرئى
يراة الجميع وعالم ألكترونى زى الفيس لا يطلع علية مثلا الامهات او الاباء
او شريحة كبيرة من المجتمع
الجزء المتبقى اللى كان بيلمح فية للسيسى كان ضعيف جدا وليس فية اى سخرية مباشرة
تمس السيسى بل كانت السخرية على مؤيدية الذين يعشقونة
بل عندما ياتى سيرة السيسى كانت تظهر علية علامات التردد
كانت واضحة جدا وكان حريص جدا جدا ان يمسة بأى سوء
يعنى الحلقة كانت كمالة لما رددة من قبل عن نظام رحل وانتهى
يبقى اية الداعى فى التريقة على اشخاص ليسوا موجودين ؟
هل تلك مصداقية برأيك ؟
ع العموم مش عارف البرنامج هيكمل تانى ولا لأ
لأنك تعرف ان الحكومة افرجت عن قرار لمفوضى مجلس الدولة للنظر فى الدعوة التى
نظرها القضاء ورفض فيها القضية لعدم الاختصاص بخصوص القضية التى رفعها الاخوان
على باسم يوسف لوقف البرنامج
وقالت المفوضية فى قرارها
ان رئيس الدولة رمز لا يجب ان يمس واوصت بوقف البرنامج
وسحب تراخيص قناة سى بى سى
اعتقد ان دة هيكون السيناريو القادم وهو وقف البرنامج بطريقة قانونية
مفيش عاقل فى مصر هيصدق ان باسم هيطلع ويقول ان السيسى قاتل وسفاح
هل هو طلع وقالها فعلا ؟
هنا الحكم يكون صحيح ودفاعك عنة صحيح ..
على فكرة انا ارى طريقة دفاعك عن باسم بالذات غريبة شوية
وكأنة الحاكم بأمر الله .. دا شخص عادى جدا بس احنا شعب بيحب يقدس
وشكرا على اهتمامك بشخصى المتواضع
احتراماتى ..

ملحوظة ..
انا كنت ذكرت لمشرف القسم والماجيك انى مش هدخل القسم دة تانى
وكنت على وعدى
بس مينفعش انى ما ارد عليك وإلا اكون اتهربت من الرد
وانا لا يمكن اهرب ابدا من اى مواجهة
طالما انا عندى مبدأ ,, فلا يمكنى ان اهرب ابدا ََ
وبلاش تجرجرنى ارد تانى بقا

[SiLver Spectra]

زي ما كنت متوقع
الفلول هيشاركوا الاخوان في القلبان على باسم ..
و بالتالي باسم مش هيكسب شعبية من الاخوان مهما انتقد مستقبلا ..و لكنه هيخسر شعبية من المؤيدين للسيسي ..بس اظن كمان ان في ناس كتير واقفه على حياد هيعجبها باسم زي ما شوفت تعليقات على تويتر

ياسر ..
اللي ممكن يكون مش واصلك في اللحظة دي هو ان بعض انصار السيسي او ممكن نخصصهم بالفئة اللي مع السيسي و ضد ثورة يناير شايفين ان باسم تطاول على السيسي خاصة في فقرة جماهير

للاسف كل طرف عايز باسم يتريق على خصمه لكن مش يتكلم عنه او عن الشخص اللي بيايده !
و دي المصيبة و الكارثه اللي واقع فيها الشعب المصري

قبل ما نفكر نكون ديمقراطيين المفروض نقبل النقد و السخرية
خاصة لو كنت هتحكم

...

المهم زي ما ذكرت في الموضوع ..كافي جدا انه طلع و انتقد ..انت تتفق او لا تتفق فدا امر وارد مش هناقشك فيه
لكن الاشكالية انك كنت طالع تقول اتحدى و مش هيفتح بؤه و مش هيتكلم ..اداه و غيره من الكلام
و زي ما توقعت ..لما يتكلم هتقول لا عايز اكتر من كدا ..طب ما تعمل انت الحلقة ؟
سيب الراجل يعبر عن نفسه
سيبه يعبر عن افكاره ..ماهو كمان له راي !
أو له وجهة نظر

في ناس تانيه بتنتقد معارضي مرسي بس و ما بتتكلمش عن الاخوان في اي حاجه و لا حتى بنص كلمة .. زي جو تيوب ..ممكن تتفرج عليه
بس انا حسب وجهة نظري بشوفه مستوى اقل بكتير ..ممكن انت تشوفه حاجه عظيمة دا رايك

انا عايزك تكتب (بلكونة) واحد اسمه شوقي بيعمل فيديوهات محترمه جدا و محايده جدا جدا ..اتفرج عليه لو مش بتحب اسلوب باسم

أما لو عايز تسمع من باسم اراءه بعيدا عن التريقة فممكن تقرأ مقالاته او تشوف ندواته و لقاءاته
انا بشوفه عقلية حلوة جدا ..اما الطريقة اللي بيعرضها في البرنامج فهو بيعرضها بشكل مختلف (السخرية) و بطريقة ذكية متعوب فيها ..و بصراحة الواحد مل من الاسلوب العادي اللي بنشوفه في البرامج اللي ماليه التلفزيون


و اخيرا بخصوص الايحاءات ..ليه موضوع بفكر اكتبه عنها و هوضح فيه باستقاضة حسب وجهة نظري ..


نورت يا ياسر ...

[აα∂ Ԑγεა]

ايون فاكره الموضوع الطويييييييييييييل دا :d
اظن اني رديت فيه وقتها وقلت اني متوقع عودته
وانه هيهاجم اي حاجة غلط وانه مش هيقف علي حد
والا هيكون حد تاني غير باسم اللي في نظري

عالعموم بعيدا عن الموضوع الخاص بينك وبين ياسر
متفرجتش علي الحلقة النهاردة
ولسه التحميل شغال اهو ومستنيها توصل

المشكلة ان الناس في مصر اما بتايد بتأيد اوي اوي
لدرجة انها بتهلل وبتزيط وبتدافع عن اي حاجة يعملها اللي بتايده حتي لو غلط
وفي نفس الوقت بتكره وبتشتم اي حد يعارض اللي بتايده حتي لو في كلامه صح

نفس الوضع مؤيدي الاخوان بيشوفو الاخوان صح في كل حاجة
واي حد بينتقدهم سواء باسلوب موضوعي او اسلوب ساخر
فهو عميل كذاب او منافق او فلول او مدفوع او سوسته
ومؤيدي السيسي هيشوفو السيسي صح في كل حاجة برضوة
واي حد يتكلم عليه فهو فلول او اخوان ارهابي او عميل
وهكذا دايرة بتدور مفيش وسطية وعقل

تعرف انا عرفت من صفحات الزمالك ف الفيس بوك
انه باسم يوسف سخر من الزمالك ف حلقته
واغلب الصفحات بتشتم فيه وبتقول الزمالك خط احمر و هكذا
وتقريبا احتمال يتشتم في اول ماتش بجمهور :d

انا زي ما قلت لسه مشوفتش الحلقة وهشوفها اما تحمل
ومعرفش نوع السخرية او الكلام اللي اتقال ايه
لكن احتمال كبير لما يسخر من الزمالك هضحك برضوة
لاني المفروض قبل ما اقول عليه ابن كذا وكذا واقول الزمالك خط احمر والكلام دا
ابص لناديا دا اللي بشجعه عامل ف نفسه ايه ووصل لدرجة ايه
اظن وقتها هلاقيه هو اللي وصل نفسه لمرحلة انه يتم التريقة عليه


باسم كنت متوقع عودته وانه مش هيكون عنده خطوط حمرا
واتوقع انه هيعمل كتير وانه هيتطور وهيزيد مع الحلقات الجايه
وبحترمه جدا لانه عارف انه هيتكره من ناس كتير جداا
مكره من الاخوان من الاساس وحاليا هجوم علي السيسي يساوي فئة مؤيديه بتكرهه
وهيتشتم طبعا كتيييير
بس برضوة ظهر وهيظهر وهيقول وهينقد
كفايه عليه اللي بيفكرو بعقلهم ومش بيايدو لدرجة العمي