وبعد 3سنين

[دمعه حائره]

السلام عليكم ورحمة الله وبركاته

زى النهاردة من 3سنين سجلت فى المنتدى
اكيدحكيت قبل كده انا اتعرفت على المنتدى ازاى
وقد ايه كنت قلقانه ومش عارفه لسه هاعمل ايه
اخدت وقت على ماقدرت اتأقلم واعرف هابتدى ازاى
ووقت تانى اكبر عشان اتشجع وابدأ اكتب مواضيع
واضح جدا فى الفتره دى انا اتعلمت حاجات كتير
سواء فى طريقة الكتابه اوالتعامل مع الناس

دايما لما بيكون واحد معندوش خبره اوى أو منعزل
مش بيحتك بحد وبيتوتر...وقت المشاكل
بيكون مستحيل انك تتوقع منه يكون اجتماعى
المنتدى قدر يعالج المشكله دى فيا
وقدرت ااقل كتير من الحساسية الزيادة
واتقبل كل الناس والآراء بإرتاح واقتناع
مش مجرد انى مضطره لكده
هوا صحيح بتكون صعبه فى الاول
لكن مع الوقت بتقدر
وده انعكس على حياتى ومشاكل كتير
عرفت اتخطاها واحلها
ده اكيد بمساعدة اصدقاء بجد
وقفوا جمبى فى كل وقت قبل حتى مااحتاجهم
بشكرهم جدا ومش هانسى جميلهم طول عمرى

كل مره كنت بنزل التوبيك الخاص بمرور سنه
على وجودى فى المنتدى كنت بكون فرحانه
مع انى مكنتش بكون واثقه انى هاستمر
وبعد 3سنين
اعضاء سابوا المنتدى وغيرهم مستمر
واعضاء جداد وخصوصا الفتره الاخيره ابهرونا بتميزهم
حاجات كتير حصلت
السنه دى احساسي مختلف
مش هابالغ واقول فرحانه وفخورة انى كملت
ويمكن اكون نجحت
ولاهاشتكى من حاجات مدايقانى
واقول اتغيرنا
بس احساس معتدل وفيه شويه عدم ارتياح
يمكن لانى بقالى فتره عندى ظروف ملخبطه
سواء هنا او فى حياتى عموما
اكيد بتأثر على اى حاجه ممكن تكون كانت بتسعدنى
لكن دوام الحال من المحال
دى اكتر جمله برددها
والحمد لله ربنابيقف جمبى وبتعدى اى ازمة على خير
حطوا دايما فى بالكم ان الثقه فى ربنا وفى نفسكم
اقرب طريق للنجاح وانك تعيش مرتاح ومش تشيل هم الدنيا
حبيت النهاردة اسجل التاريخ ده معاكم
مش فى سجل الاعضاء لانى مش بحتفل
لكنه كان فضفضه مش اكتملت لسه وده الافضل
ربنا يوفقناكلنا ونفضل متجمعين على الخير
وماينقص حد منا ابدا
واختم بالدعاء لى ولكم
ربي أكتب لي تغيراً للأفضل في نفسي وحالي
وحقق لي ما أتمنى
وأرزقني الخير من حيث لا أحتسب

[™Amiliya]

بدايتنا متشابهة كـ اول مرة في منتدى واول خطوة نخطوها فيه
كان عندي 14 سنة لما اشتركت في منتدى كان اخويا مراقب فيه هو علمني وتعب معايا لغاية متعلمت
وفهمت
صحيح المنتديات مع الاحتكاك بنتعلم وبنكبر واحيانا بنكون اكبر من سنننا
بس ليها فضل كبير علينا في صقل شخصياتنا وتغيرها لافضل او للاسوء احيانا

ناس بتعدي عليكي زي شريط القطر وناس تنزل في محطاتها وناس مالهاش محطات

بس الطيب فيهم وابن الاصول بيسيب طيب اخلاق وطيب انفاس
وسيرته تذكر كالعطر مبتروحش ريحته من ازازته

منة
انتي من الشخصيات التي لا تنسى مهذبة وانيقة وكلك شياكة اسلوب

بالتوفيق ليكي حببتي دايما

[big bốss]

ربنا يوفقك فى حياتك منه

و كل حياتنا متلخبطه و دا الطبيعى فى الحياه

و كل سنه و انتى طيبه عقبال ما نعجز كلنا فى المنتدى هنا


و بالمناسبه السعيده دى

ههديكى أغنية ( أم الصابرين )


و هحطهالك فى التوبيك

[ساحر الأحزان]

الواحد بيتعلم يا منة

جوة المنتدى وبرة المنتدى من مواقفة فى الدنيا الواسعة.المهم أنة يستفيد

اهو انتى كملتى 3سنين م100سنة عقبال ما تكمليهم هنا أنتى وولادك وأحفادك

وتبقى عجوزة كركوبة ؟

ربنا يوفقك بحياتك

[اشرف 2006]

ربنا يوفقك دائما وتكتبى موضوع بمرور 10سنين وانتى فى المنتدى


اسلوبك راقى جدا وتعاملك مميز بالفعل


وبالتاكيد الاحتكاك والتعامل مع نوعيات كثيره


من البشر على مختلف افكارهم بيزيد الانسان خبره وحنكه


ويعيطى القدره على التعامل فى كافه المواقف بدلا من الهروب والصمت والانطواء


تقبلى تحياتى

[العاشق الذى لم يتب]

ربنايكرمك منة
وييسر لك امورك
ويشيل كل معكرات صفوك
ويصلح حالك آمين
3 سنين من العطاء والابداع
والنشاط والتميز
أشهدبذلك شهادة لله دون رياء
ربما لم أكن معك منذ بداية تسجيلك
ولكن شاطرتك نصف المدة وزيادة قليل
{ايتك أخت محبة ومتوددة الجميع
كل سنة وانت طيبة اختى منة
مودتى

[عاشق متيم]

كل سنه وانتى معانا وانتى بألف خير وصحة وسلامة
وبتمنى لكى التوفيق فى حياتك والسعاده
وكل واحد بتبقى عنده شويه لخبطه
ولكن هى دى الحياة ..
يارب امورك كلها تكون على افضل ما يكون ...
وتبقى فى احسن حال

[مِسكُ الشَهادة]

ربنا يسعدك يا رب ويوفقك ويمنحك رضا بعد دعاء
وثواب بعد صبر وجنة بعد موت ويجنبك الحزن
ويغمر حياتك بالسرور دايما ً ...
يشرفنا جميعا ً حضورك يا منة ويسعدنا
ما شاء الله عنك ... وربنا يجمعنا ع الخير دايما ً
وتفضلي معانا على طول ... اللهم آمين
خالص تقديري وإحترامي لك ِ
ربنا يوفقك يا رب

[نور ونار]

حسيت فى فضفضتك رغم
المشاكل اللى انتى ذكرتيها
فى حياتك خارج وداخل المنتدى
حسيت بالرضى وقدر كبير
من الامتنان للمكان والاشخاص
وايضا رايت معك مرور الذكريات
والامل الذى يتجدد مع كل يوم
فرايت الرضى والامتنان والامل
قواك الله واسعدك واكرمك
ودوما تكونى مصدر الاشراق

وعقبال ما تكونى معانا ميه سنه كمان
تحيتى

[Lamees]

يارب تسعدي وتنولي ما تتمنيه