خفايا و اسرار ( SiLver Spectra )(تابع مسابقة الحروف)

[big bốss]

خبايا و أسرار ( SiLver Spectra )

SiLver Spectra

هذه الاستضافه مع شخص لآ يختلف عليه أحد فى درجة ذكاءه او عطاءه

للمنتدى ، مع وجود أنتقادات له و حاله كحال أى شخص مسئول

و لكن أحببت ان أتطرق الى اسراره و خبايه لتقروا ما لم تعلموه

من قبل عن طارق محمد عباس

كان معكم المحاور ( big bốss )

اهلآ دوك طارق

منور الأستضافه ، أستعد بئا



اولآ : أسرار و خبايا




1- ( يتسم سليفرا سبيكترا بالغموض و لا يتحدث عن حياته الخاصه )

فلماذا ؟ و هل انت شخص غامض ؟
يا راجل دا انا فاضح نفسي معاكم
بص ..في امور معينه مش بيكون لها داعي انك تتكلم فيها
يعني هقولك قابلت فلان و علان ..ايه لزومة الكلام دا الا لو كان الشخص دا مثلا معروف هنا ؟
الخلاصة ان الناس مش لازم تبقى عارفه عنك كل حاجه طالما دا اصلا مش هيفيدهم في شيء
خلافا لو انت هتتقدم لواحده مثلا فدي لازم و حقها تعرف كل حاجه عنك قبل اي حاجه

2- هل مررت بتجربة حب فى حياتك ؟ و هل انت مؤمن بالحب ؟
مش بؤمن بيه ازاي يعني !
انت كفرد ممكن ماتكونش خضت تجربة لاسباب عدة لكن دا مش يخليك لا تؤمن بالحب !
عامله زي واحد لا يؤمن بالخير ..ماتمشيش لان طبيعي في حاجات بتحركك
كونه بقى له فلسفة خاصة في تنظيمها فدا امر اخر
لكن الاكيد ان الكل بيميل للجنس الاخر و الا فهتبقى انسان مش مظبوط

أما التجارب ..فأكيد ليه تجارب
و التجارب بتعلمك و بتخليك تصوب امور كثيرة بعد كدا
زي مثلا طب الاسنان ..مهما قرأت كتب او اتفرجت ..مش هتكون زي اللي بيمارس و بيجرب و بيخوض في حالات

3- ( السيد عباس ) والدك حدثنا عنه ؟ و كيف علاقتك به ؟
عباس دا جدي مش والدي
والدي اسمه (محمد) و هو اسم نكره بيتم حذفه
نفسك انت تعمل سبق صحفي مش كدا ؟
طب يا سيدي خد المعلومة دي مع انها تندرج تحت بند (مش هتفيد الناس في حاجه )
والدي متوفي عن عمر يناهز ال 39 عاما
علاقتي بيه هي علاقة طفل عنده 5 سنوات

4- من هو اقرب شخص الى طارق ؟ و يعرف كل أسراره ؟
ماحدش يعرف كل أسراري ببساطة لاني مش بخلي نفسي كتاب لحد
غير اني مش بتاع فضفضة و جو الحزن و الحاجات دي
فمش من النوعية اللي بقول كلام و حكاوي من غير داعي . و كمان مش بحب اسمع حكاوي او مشاكل عن حد الا لو هو اللي بيحكي لغرض ما ..زي ما تقول ماليش دماغ ادخل في امور شخصية لحد

5- ماذا تفتقد فى حياتك ؟ و ما هى طموحاتك ؟
أفتقد حساب ادسنس في جوجل هههههه
مش في بالي حاجه معينة
و طموحاتي نفسي ابقى رئيس جمهورية
و لا بلاش ..دا حتى قنديل الفرفور سجنوه يا عم ..انا نفسي ابقى رئيس بس زي مبارك كدا

6- ( حب الاستطلاع و التجربه ) ما أثره فى حياتك ؟ و احكى لنا مواقف عنه معك ؟
أثر كتير جدا و مازال يؤثر
يا ابني احنا شعوب عايشه في قولبة و قافله على نفسها ..لازم اخرج برا القولبة دي عشان اتفطم و اشوف الدنيا فيها ايه
و لا مثلا عايزني افضل عايش على اسطورة اننا ادينا اسرائيل على افاها ! و احنا بعد فض الاشتباك حتى و لغايه 75 كانت اسرائيل بتذلنا في امداد القوات في سينا بالغذاء و الاكل ! و تخليك تدخل 31 عربية بس بحيث انها تكفي الجنود يوم او يومين بالكتير ..عشان لو لعبت بديلك تقطع عنك الامدادات
و قيس على كدا امور كثيرة جدا منها امور دينية

فالاطلاع ولد عندي فلسفة خاصة للدينا بصفة عامة

7- ما هى حدود أنفعالك و غضبك ؟ و هل تطور الامر الى ضرب او أنضربت مره ما ؟
لا مافيش الكلام دا
الحاجات دي اخرها 14 سنة ..أنا اصلا بكره هزار الايدين
و كل ما بتكبر كل ما الحاجات دي بتلقاء نفسها بتختفي

انت عارف الجنس الذكري الصغير بيمتاز بان ايده بتبقى طارشة ..و كل ما يكبر كل ما بيتلم لغايه ما بيعقل على 20 سنة كدا








ثانيآ : شبابيات


1- أيه هى مواصفات البنت الى بتحلم بيها ؟
تتقبل افكاري الفلسفية ..مش معنى كدا انها تخضع ليها او تقتنع بيها
لكن ما يوصلش الموضوع لصدام ..
زي ما انا مش هفرض عليها افكار معينة هي كمان مش تفرض عليه افكار معينة

2- انت من معجبي استيلات الفيزون و السرتيش و الموضات هذه الايام ؟
اكيد الحاجات دي حلوة يا نور ..و لا انت يعني هتلبس مراتك عباية في البيت ههههههه
الفكرة بقى انها تخرج بحاجات زي كدا اكيد هيكون في ملاحظات ساعتها لان الشوارع مليئة بالكلاب الضالة

3- فى الكليه هل كنت بتتعرف على بنات و بتعزمهم فى الكافيه و بتمشي معاهم ؟
ياعم انا بتكسف
في الكلية علاقاتي بالبنات سطحية جدا
غير ان الكلية محترمة جدا ..حتى الجو مش يساعدك انك تنحرف ..في دائما فصل تلقائي بين الشباب و البنات و مش اجباري
بمعنى السكشن بيكون فيه بنات كتير ..بس هما في وادي و احنا في وادي
ياعم احسن يا عم خلينا نهزر براحتنا مش طالبه نلبس بامبرز هههههههه

4- أيه رايك فى موضة الشباب فى البنطلونات الجينز الايام دى ؟ و هل بتلبسها ؟
اللي هي عامله ازاي ؟
ضيقة من تحت ؟ هو بصراحة انا بحب الواسع من تحت اللي هي موضة بقالها 12 سنة ههههه
بس السنادي لما روحت اشتري بناطيل لاقيت كلوا ضيق من تحت او البنطلون كلوا شكل واحد ماعتش في الواسع من تحت ..لبسناه و خلاص ياعم نور
مش بدقق انا

لو قصدك عن حاجه تانيه فقولي و وضحلي







ثالثآ : المنتدى



1- ذكرت فى أحدى المرات فى المدونه انك عايز تكتب مذكراتك و تطلع اسرار المنتدى
يا ترى أيه هى الاسرار دى ؟
دي هتبقى فضائح بقى ..و هتجرس الناس كلها ههههههه
عارف ويكيليكس ؟

2- اتذكر ان جو المنتدى و نشاطه عام 2010 أفضل بكتير من 2013 حاليآ ؟ من وجهة نظرك ليه ؟
مشاكل في الارشفة
انت كل اعتمادك على الاعضاء القدماء
الناس الجديده اللي بتضخ عندك ضعيفة مش زي زمان
دا غير طبعا الفيس بوك اللي سحب طاقة الشباب كلها هناك

3- كل ابن ادم خطأ و لا احد معصوم من الخطأ - ما هى الاخطاء التى ارتكبتها فى المنتدى ؟
فنية و لا شخصية و لا ايه بالظبط
اكيد في اخطاء طبعا
بس مش في دماغي خطأ معين
يعني اكيد حد اتحظر ظلم قبل كدا ..زي ما حصل مع البت فارما
لو خطأ فني فمره كنت بدمج قسم فروحت دامج اقسام المنتدى كلها في النقاش
و كلو بتكة زر
و عملنا باك اب بقى و رجعنا المنتدى يومين لورا و كانت شغلانه
المهم ان الاخطاء الواحد بيتعلم منها ..و بيتم تصحيحها
انا مش ملاك هقولك لا مش بغلط ..مع ان سهل اني اقول كدا
بس هبقى بشتغل نفسي قبل ما اشتغلكم

4- هل لديك ملاحظات على اداء المشرفيين الجدد او القدامى ؟
عادي ياعم ..عدي السؤال
اصلا مش بتابع المشرفين ..زي زيك كدا بلاقي ناس زارقة جديده
مش قولتلكم من زمان اني سلمت مهامي كلها
انا بس بساعد بشكل فني ..او لو عندي فكرة بطرحها مش اكتر من كدا

5- هل هناك أفكار جديده هطبقها فى المنتدى الفتره الى جايه ؟ او مسابقات ؟
حاليا ماعنديش اي حاجه
حظك وحش يانور







رابعآ : السياسه



1- هل انت راضى على اداء حكومة الببلاوى حتى الان ؟ ام تؤيد عزلها ؟
ياعم هي شغلانه كل ما نجيب حد نعزله
ما تهمدوا بقى شوية
عادي عادي ..عدي السؤال
ايه الامر الفاذ اللي عملته الحكومة مثلا ..اهي حكومة زي اي حكومة

2- كيف ترى التقارب الروسي المصرى الآن بعد توتر العلاقه مع الامريكان ؟
فين هو التقارب دا ؟
فرقعات اعلامية ..لما يحصل حاجه على الواقع ساعتها هحلل
لان الاعلام بيضخم الامور دائما و يحسسك اننا داخلين في تحالف سوفيتي
بوتن نفسه في قمة العشرين لما اتكلم عن مصر قال ان الامور فيها غير واضحة ..ماحستش انه واخدنا في حوضنه و لا حاجه

لما نبقى نشوف حاجات واقعية نبقى نتكلم
لكن اللي شايفه هو حرب تصريحات مش اكتر

3- ( تركيا تريد اعادة العلاقات مع مصر و خرس ارداغون - قطر تريد عودت العلاقات - و كذالك الولايات المتحده )

كيف تفسر تراجع الدول المعارضه لثورة 30 يونيو عن موقفها ؟
ماحدش منهم عايز يعمل خصومة
خلينا نكون صريحين ..ليهم مصالح
و بعدين اللي حصل برضو عليه مليون علامة استفهام
خلينا نتكلم بصراحة انت عزلت رئيس منتخب
و بعدين دخلت في دوامة عنف ..
فهما ليهم حق يكون لهم رأي ..ايه المشكلة ؟
هتقولي اصل هو بيتدخل ..ما انت بتتكلم عن سوريا و عن قطر و بتتكلم عن الغرب و بتقول اللي يعيجبك ! حد بيقولك انت بتتكلم ليه و بتدخل في شؤون و مش شؤون !

ثم انت وضعك مش مثالي ..و فيك العبر عشان تبقى مش عايز حد يتكلم عنك مثلا !

4- هل تؤيد ترشح السيسى للرئاسه ام ترفضه ؟ و لماذا ؟
هي خربت ..
لو خلصت من فاشية دينية هتجيلك فاشية وطنية زي اللي احنا فيها دلوقتي و شغالين تخوين و طابور خامس و معرفش ايه
انا كان عندي طموحات ايام ثوة يناير ..و للاسف احنا انجرينا لانقسامات طائفية هدمت الطموحات دي
و قريب هكتب موضوع بخصوصها بتسلسل الاحداث اللي عشتها بداية من التصويت على التعديلات الدستورية اللي كان في مارس 2011
لو عايز توصل لاصل المشكلة فابحث عن بداية الفتنة اللي ولدت تشرذم

فعموما ..أنا فقدت الامل في الشعب دا
و واضح ان الحالة اللي هو فيها دي هي مستواه الطبيعي

5- هل بلوغ الاخوان المسلميين للحكم نكبه ام نعمه لمصر ؟

هجاوبك من الحكاية دي :
بعد ثورة يناير ..كنت قاعد مع 3 زمايلي في الكلية
واحد سلفي و واحد اخواني و واحد حزب كنبة
فبتاع حزب الكنبة (مالوش في السياسة) سأل سؤال : تفتكروا التاريخ هيقول ايه عن مبارك ؟
فكل واحد منهم قال : فاسد ديكتاتور مستبد معرفش ايه خرب البلد
انا بقى اديتهم جواب صدمهم ..
قولتلهم مش انت انت اللي هتقول و لا انا اللي هقول ..التاريخ هو اللي هيقول
فالاخواني قالي ازاي ؟
قولتله و الله لو حالك بقى اسوأ الناس هتترحم على مبارك و دا هيكون له اثر في التاريخ ..لو حالك بقى افضل الناس هتلعن فيه و التاريخ هيذكر اننا كنا في جحيم و باقينا في نعيم

طبعا الكلام دا مش عجبهم ..ازاي و بتاع
و وقتها لا انا و لا اي حد كان عنده ذرة تعاطف مع مبارك لانه كان لسه مخلوع ....الكلام دا كان في مارس 2011
بس انا اديت اجابتي بانصاف

و هي نفس الاجابة عن فترة حكم الاخوان
اللي هيجي بعد كدا هو اللي هيحكم

6- ما رايك فى وقف قنوات سي بي سي لبرنامج باسم يوسف ؟
اهي دي حاجه من الحاجات اللي هتيجي بعد كدا اللي بكلمك عنها ههههه
القرار حسب المعلن هو قرار عم محمد الامين
و عم محمد الامين دا فلولي

دلوقتي طالع يقولك رموز الدولة ..دا باعتبار ان مرسي كان رز بلبن مثلا

باسم دا حمار اصلا انه ذل نفسه مع العالم دي
و للاسف العالم دي هي اللي معاها فلوس !


و شكرآ لضيفنا و مع تمنياتى بكل التوفيق له

[حنـــــون]

حلقه جميله يانور
نورت ياطارق باجاباتك
العقلانيه كالعاده
ربنا يوفقك دايما
كانت حلقه جميله جدا
موفقين

[SiLver Spectra]

ظاهرة في المنتدى ..انتشار اسم طارق في المواضيع
انا لسه مخلص الاسئلة تقوم منزلها على طول ..
فين ايام التخليل
كبرياء رجل كان بيخلل الحلقة اسبوعين عبال ما تنزل
عصر السرعة بقى

[big bốss]

اقتباس المشاركة الأصلية كتبت بواسطة silver spectra ظاهرة في المنتدى ..انتشار اسم طارق في المواضيع انا لسه مخلص الاسئلة تقوم منزلها على طول .. فين ايام التخليل كبرياء رجل كان بيخلل الحلقة اسبوعين عبال ما تنزل عصر السرعة بقى

ما دى مسابقه يا خويا

و محدد لها وقت معين

أعمل أيه يا عم المهم

ليهم حق الاعضاء تتكلم عنك و تقول مفيش غيرك بيستضيف :d

فينك يا ياسر

[DESERT]

الحوار جميل احب انا الاسئلة اللى خارج النمط الطبيعى
فى كذا سؤال كدة كالعادة طارق هدوء وترتيب واجابة عقلانية وبساطة
تحياتى

[حَرفُُ هجآءّ]

حلقة جميله
عن طارق وعرفتنا شويه حاجات
بس بلاش ياطارق حكايه رئيس الجهمورية دى
البلد مش ناقصه ههههههههه
عشان ديمقراطيتك مش هتعجب الجيش
غير انك هتكبر دماغك عن حاجات كتير
ولا بلاش بدل ما تروح ف حديد العيانين محتاجينك

[SiLver Spectra]

اقتباس المشاركة الأصلية كتبت بواسطة حَرفُُ هجآءّ حلقة جميله عن طارق وعرفتنا شويه حاجات بس بلاش ياطارق حكايه رئيس الجهمورية دى البلد مش ناقصه ههههههههه عشان ديمقراطيتك مش هتعجب الجيش غير انك هتكبر دماغك عن حاجات كتير ولا بلاش بدل ما تروح ف حديد العيانين محتاجينك

ما انا قولتلك ابقى زي مبارك هههههه
دي هي الشغلانه الحلوة ..بس قبل السجن طبعا ..او نحكم 30 سنة و بعدين اسجنوني
لكن ابقى مرسي ..و احكم سنة واحده بس
لا ياعم ..احنا كدا حلوين اوي

[Lost Pearl]

نور انت اول ما شفت حرف ال s اخترته ههههههههه

استضافة حلوة و ردودك طبعا عقلانية كالعادة

بس ابتديت أقلق من الأفكار اللي لازم الطرف التاني يتقبلها

و بلاش فكرة الرئيس دي بقت شغلانة متأكلش عيش

ربنا يرحم باباك يا رب

حلقة حلوة يا نور بالتوفيق

[دمعه حائره]

حوار جميل واى استضافه لطارق بتجمع معلومات من مختلف المجالات
ربنا يرحم والدك ويخليلك والدتك ويوفقك يارب
تسلم نور على الاستضافه

[ساحر الأحزان]

المفروض يا طارق انك تطلب بقى مقابل نظير استضافتك

نجوم ولا مشاركات

من الى بيستضيفوك

غلبت باسم يوسف

نورت الحلقة يا دكتور

وربنا يرحم والدك رحمة الله علية