لحظات مع المربعات(فن الواو)..

[حجازى فارس المصرى]

بسم الله الرحمن الرحيم

ماهو فن الواو أو المربعات؟
هو فن شعبى انتشر فى صعيد مصر وبالخصوص فى قنا فى مركز قوص، حيث ولد رائد هذا الفن فى قنا وهو يسمى أو يلقب ب(ابن عروس) وكان مولده1780م...ثم انتشر هذا الفن وذاع صيته بعد ذلك.
هذا من حيث النشأة والموطن.
وصفه: هو فى الأصل فن شفاهى غير مدون ولكن ينتقل من خلال الرواة والمحبين لهذا الفن، وهو يعتمد على اللغة الشعبية، وهو فن سماعى وليس كتابى تجد لذته وحلاوتة فى سماعه وذلك لانه يعتمد على الجناس فى تركيبه... والكتابة تفصح المعنى المختلف فى الجناس أما حينما تسمعه فينشغل العقل بالمعنى المخلف للجناس فى داخل المربع فيحدث ذلك جمالا فى المربع بعدما ينكشف المعنى المراد.

تركيبه: ينظم هذا الفن على وزن بحر(المجتث) من أبحر العروض وهو وزن(مستفعلن فاعلاتن) فى بيتين الشطرتين الأولى والثالثة بحرف واحد ، وتنتهى الثانية والرابعة بحرف آخر واحد.

فى الحلقة الثانية إن شاء الله نتعرف على أنواعه ولما سمى فن الواو بذلك.
وإليكم بعض الأمثلة من الواو :
يقول ابن عروس:
اللي حبـــــنا حبـناه
وصار ماتعنا مــــتاعه
واللي كرهنا كرهناه
ويحرم علينا اجتماعه

ويقول أيضا:
ولابد من يـوم معلـــوم
ترتــد فيـه المظــــــالم
أبيض على كل مظلـوم
واسـود على كل ظـالم

ويقول عبدالستار سليم

أول كلامي ح اصّــــــــــلي
ع اللي الغزاله مشـــــت له
واحكي له ع اللي حصل لى
وارمي همومي ف مشاتله

وقال القوال القنائى على النابى رحمه الله
خشب المراكب من السنط
فى البحر ياخد مهاجه
واجب على العاقل السنط
لما الندل ياخد مهاجه

وقال الشاعر عادل صابر
من خد على العيب مايسلا
حتى ان شبع بعد جوعُه
شجر البرك مهما يعلا
فى الوحل طابّة فروعُه

ومما قلت بقلمى:

هلت علينا كــــــمهرة
محلى الخطاوى يابوى
فى الحال جهزت مهره
وأخدت أمــــــى وابوى



ـــــــــــــــــــــــــــــــــــــــــــــــــ

فاصل ونواصل فى الحلقة القادمة
تحياتى/ حجازى فارس المصرى

[جبل عالي]

الله الله بصراحة فن جديد عليا واعتقد انه يشبه الرباعيات

ولا ايه حجازى ؟؟

كنت حابة أعرف ايه الفرق بين فن المربعات او الواو والرباعيات

ولك كل الشكر والتقدير

[حجازى فارس المصرى]

اقتباس المشاركة الأصلية كتبت بواسطة جبل عالى الله الله بصراحة فن جديد عليا واعتقد انه يشبه الرباعيات ولا ايه حجازى ؟؟ كنت حابة أعرف ايه الفرق بين فن المربعات او الواو والرباعيات ولك كل الشكر والتقدير

الراقية جبل عالى نورتينا بهذه الإطلالة الجميلة ولكن يا عزيزتى الكريمة فن المربعات يختلف تماما عن الرباعيات فالمربع كما ذكر سابقا مكون من بيتين الشطرة الاولى مثل الثالثة فى القافية والثانية مثل الرابعة فى القافية...أما الرباعيات فيتكون من أربع أشطر الأولى والثانية والرابعة بقافية واحدة والشطر الثالث مختلف عنهم أو جميع الأشطر بقافية واحدة وأوضح مثال لذلك رباعيات جاهين
مثال:

أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!

[صمتى كلام]

شكرا لك اخ حجازى
فن الواو هو جديد هنا لكن قديم حيث نشاء

[جبل عالي]

فالمربع كما ذكر سابقا
مكون من بيتين الشطرة الاولى مثل الثالثة فى القافية والثانية مثل الرابعة فى القافية...

أما الرباعيات
فيتكون من أربع أشطر الأولى والثانية والرابعة بقافية واحدة والشطر الثالث مختلف عنهم أو جميع الأشطر بقافية واحدة


الله ينور عليييييييييييييييييك يااااااااااارب

كده انا عرفت الفرق بينهم الله يكرمك

تسلم ياحجازي وادام الله عليك نعمائه

تقبل كل تحية وتقدير

[جبل عالي]

سكة طويلة من غير نهاية

لا زاد ولا زواد و ماشيين

خطاوينا تحكي عنا حكاية

ناس عايشة وقلوبها ميتين


********************


ياترى دي تتحسب ايه ياحجازي ؟؟؟

[ويبقى الأثر]

رائع واكثر حجازى

ناس م الظلم مقهوره
وهاجر جفنها النوم
وناس تظلم ومغروره
ولا تعرفشى ليها يوم!

[حجازى فارس المصرى]

اقتباس المشاركة الأصلية كتبت بواسطة صمتى كلام شكرا لك اخ حجازى فن الواو هو جديد هنا لكن قديم حيث نشاء

أخى الرااائع صمتى كلام صاحب القلم الصاعد الواعد
خالص تحياتى لك أيها الجميييييييل

[حجازى فارس المصرى]

اقتباس المشاركة الأصلية كتبت بواسطة جبل عالى سكة طويلة من غير نهاية لا زاد ولا زواد و ماشيين خطاوينا تحكي عنا حكاية ناس عايشة وقلوبها ميتين ********************

ياترى دي تتحسب ايه ياحجازي ؟؟؟




الرائعة جبل عالى إنت كدا ماشية تمااااااااااام ومظبوط وفعلا إحنا كدا عرفنا الفرق بين المربع والرباعية..أحيكى عزيزتى الكريمة .....ومشاااااااااااااء الله بدأنا
أهو نكتب كمان مربعات وبنشتغل زى الفل .... والمربع بتاعك فيه معنى جميل وقوى ولكن يا جبل لازم ناخد لبالنا من الوزن لان الواو أو المربع لايكون إلا من بحر المجتث على وزن مستفعلن فاعلاتن
ولو حبيتى تعرفى الفرق بين المربع اللى انت كتبتيه فى الوزن وبين مثلا اى مربع تانى موزون حاولى انك تنغمية مع نفسك هتلاحظى الفرق لكن على العموم ولا يهمك ...واحدة بواحدة هتلقى الامور تمااااااام وزى الفل.وهتعرفى إن شاء الله معلومات أكتر لما أنزل الحلقة التانية من التعريف بهذا الفن الجميل...
خالص ودى وتفديرى

[حجازى فارس المصرى]

اقتباس المشاركة الأصلية كتبت بواسطة قيثارة الصمت رائع واكثر حجازى ناس م الظلم مقهوره وهاجر جفنها النوم وناس تظلم ومغروره ولا تعرفشى ليها يوم!

الله الله الله ولا يحلو اللقاء إلا بوجود الغالية قيتارة
دائما تبهجينا وتدخلى السرور علينا بإطلالتك الرائعة
ولكن اسمحيلى عزيزتى من أجل إستقامة الوزن فى فن الواو
أن أجرى تعديلا على مربعك وهو يحمل صورة فنية رائعة
فيكون بعد التعديل إذا سمحتى لنا بذلك كالتالى:

م/الظلم ياناس مقهورة
والنوم هاجر جـــفونى
ناس تظلمنى ومغرورة
حتى الحبايب جفونى

خالص ودى وتقديرى