صدفة-قصيدة زجلية عاطفية

[حجازى فارس المصرى]

صدفةوكانت أجمل صـــدفة
يوم ما عرفتك أجمل صـدفة
قلت بحبك أسكت واكـــتم
قالوا الحب إزاى دا هيخفى
ــــــــــــــــــــــــــــــــــــــــــــــ
صدفة وكانت مش فى البال
إنى اتغير كـــــــدا فى الحال
حد يـــــــــــــــرد على يابـوى
رد ياعـــــــــــــــم ورد يا خـال
ـــــــــــــــــــــــــــــــــــــــــــــــ
ردوا قلولى طمنوا قلـــــبى
حاجة جديدة بتحصل عنــدى
قلبى يدق طاحون وبيطــحن
وفى عنيى الأسود بمـــــبى
ــــــــــــــــــــــــــــــــــــــــــــــــ
ردوا قلولى إزاى دا بيحـــــصل
جسمى بيرعد مفصل مفـصل
حتى العقل صبح أهو طايــــر
والمعلومة فى ساعة بتوصـل
ـــــــــــــــــــــــــــــــــــــــــــــــ
ردوا قلولى النــــــوم راح فين
حتى الأكل ما فيش خابورين
ردوا قلولى والله أنا خــــــايف
إنى أكون خدتلى عــــــــــين
ــــــــــــــــــــــــــــــــــــــــــــــــ
فى عز البرد جسمى مـــولع
دية حقيقة ومش بتــــــــــدلع
حد بىّّ شــــــــــــــوية يحس
حد يبص يشـــــــــــــوف يطلّع
ــــــــــــــــــــــــــــــــــــــــــــــــ
يوماتى أبيـــت عينى مفتوحة
حتى دماغـــى تقول مبطوحة
صف سنانى عـــمّال بيطقطق
طعم المية فى بقى مـــلوحة
ـــــــــــــــــــــــــــــــــــــــــــــــ
قلبى بينزل فى القولــــــون
وشى اتغير بقى ميت لـــون
آه يا نصيبى وآه يا عــــــذابى
خايف أصبح أكون مجــــــنون
ــــــــــــــــــــــــــــــــــــــــــــــــ
رد العــــــــــــــم وقالى ياواد
كفـــــــياك هجس وبطّل عاد
شوف مصلــــــحتك يلا وروح
والله دى خيــــــبة دى ياولاد
ـــــــــــــــــــــــــــــــــــــــــــــــ
أما خالى وقــــــــــف مشوار
قالى ياولدى ليــــــــــه تحتار
أسمع منى كلــمة فى ودنك
خدلك طبقة فى وســط الزار
ـــــــــــــــــــــــــــــــــــــــــــــــ
تطرد عنــــــــــــــك الملاعين
تشفى الهم تشــــيل العين
أنا ياولدى عنـــــــــــك أعرف
واللى مجـــــــرب يعرف زين
ــــــــــــــــــــــــــــــــــــــــــــــ
قلت ياخالى وقلـــت ياعمى
قلت يابويا وقلــــــــت يا أمى
اللى حصلى حالـــة مفاجأة
والله دى حاجة وغصبة عنى
ــــــــــــــــــــــــــــــــــــــــــــــ
عدى علىّ حكيم ومـــجرب
قالى ياولدى ليه بتـــــقرب
كاس الحب دا أصله جــنان
عاوز قلب يكون متـــــــدرب
ــــــــــــــــــــــــــــــــــــــــــــ
قلت ياعم استنى هنــــاك
جايلك أرمح أمشــــــى وراك
والله دى كانت صدفة وبــــس
قلى الصدفة سبب فى بلاك
ــــــــــــــــــــــــــــــــــــــــــــــ
قلت الحـــــــــل إيه وعلاجى
قلى الحـــــــل حبيبك ياجى
تلمحه لمـــــــحة كفاية وبس
هو ياولــــــدى ديتى علاجى
هو ياولـــــــدى ديتى علاجى
ــــــــــــــــــــــــــــــــــــــــــــــــــ ـ
حجازى فارس المصرى

[دمعه حائره]

زجلية جميله ومعبره من قلم مبدع
تسلم اخى ويدوم تواجدك المميز

[ويبقى الأثر]

الله عليك
خصوصا بقا لما تقراها باللهجه الصعيديه
تحفه ورائعه اخرى من روائعك حجازى
دمت اخى ودام رقى قلمك
تقييمى ونجومى
ووسام التميز

[نغم الشام بعد المغيب..]

	زجلية جميلة جداً .. كتابة الزجل أو الشعر العامي الصعيّدي لايجيّده إلا بن بيئته وأنت أتقنت ذلك بماهرة ماشاء الله تسلم دياتك ويعطيك العافية مع فائق احترامي ..

[موري كول]

جميله اوي اوي وعلي رأي قيثاره هتبقي اجمل لما تقراها باللهجه الصعيدي

حلوه بجد تسلم ايدك
تقيمي

[أحمد الجمل]

الله الله الله
راااااااائع أنت أيها الشاعر العبقري
ورائع ما جادت به أناملك
وشكرا لك على متعة تذوقتها في قصيدتك المبهرة

( وفى عنيى الأسود بمـــــبى )
ألا يحتاج هذا الشطر زيادة كأن يكون
( وف عيني الأسود بأه بمبي ) ؟

( إنى أكون خدتلى عــــــــــين )
ألا يحتاج هذا الشطر إلى زيادة كأن يصبح مثلا
( إني أكون خدتلي كام عين ) ؟

تحيتي لك أخي الفاضل
وتقبل وافر احترامي وتقديري

[جبل عالي]

قمة فى الروعة يا حجازي ماشاء الله

راااااائع وأكثر من رائع

سلسلت الحدث بمهارة ودقة

وقوة اللغة العامية والممزوجة بلهجتك اكيد

بصراحة نص له طعم خاص جدا

مميز انت اخي ماشاء الله

تحيتي لروعة وتمكن القلم بين يديك

[Lamees]

زجلية رائعة يدوم الابداع
كنت هنا

[العاشق الذى لم يتب]

الله الله الله عليك حجازى
قصديدة زجلية رائعة
كلمات ومعانى وقافية ووزن
تسلم الايادى
ديماأرى لك كل الابداع
سلمت والنبض
تقبل تحياتى وودى

[حجازى فارس المصرى]

اقتباس المشاركة الأصلية كتبت بواسطة دمعه حائره زجلية جميله ومعبره من قلم مبدع تسلم اخى ويدوم تواجدك المميز

دمعة حائرة الاجمل هو تواجدك الراقى عزيزتى دمتى بخير