قالتلي دا انت بحر ... قلتلها يعني أيه ؟؟!!

[أحمد الجمل]

قالتلي دا انتَ بحر
قلتلها يعني أيهْ ؟

قالتلي بنْسى روحي
وبَغْرق جُوّا فيهْ

وبطْلع بالسلامه
عطشانة قُل لي ليهْ

قلتلها يا حبيبتي
دا الغدر طبْع فيهْ

بتقُولي إنىّ بَغْدُرْ
مَتْقولي قَصْدِك أيهْ


قالتلي يا حبيبي
مَتِفْهَمْ قصدي أيهْ

أنا قصدي بحر واسع
ومالوش قرار يا بيهْ

تِرميني بأعلى مُوجهْ
لِبْحور هواكْ وأيهْ

ألاقيني فْ دُنيا تانيهْ
مَهْمَا اتْمنّيتْ بَلاقيهْ


حُبّ ينسّيني روحي
وحياتي واموت عليه

وحنانْ بيكفّي العالم
ويفيض ويا عيني عليه

بغرق من غير مَبَعْرف
أنا إمته غِرقْت فيه

أو هخرج تاني إمْتَهْ
دا انا لسّه دايْبَه فيهْ

مَتْقولِّي سِرَّك ايهْ
بَرْجع عطشانه ليهْ

قلتلها عشان تشتاقي
دايما وتْعُودي إليهْ

وتقولي يا بحر ياللِّي
بعشق نظرة عنيهْ

خُدْني فْ حضنك دا حضنك
بالعالم واللّي فيهْ

*******************

بقلمي
أحمـــ الجمل ـــد

[جبل عالي]

ماشاء الله صاحب القلم الأنيق

والحضور المميز

معزوفة راقية ورائعة جدا

أحييك واغبطك لهذه القريحة الفذة

كل الشكر والتقدير والاحترام

[همسه دموع]

امم
بس البحر غدار

يوم حلو
ويوم بياخد اغلى واعز الناس تحب تعيش قصاده
بس تخاف تعيش جواه
وحتى لو افخم سفينه لزم بر ترسى عليه يوم
جميل اخى احمد

[صمتى كلام]

استاذ احمد
بارك الله قلمك المبدع
ابهرتنى حروفك تشع بالحنان والمحبه

[Lamees]

غرقانة في بحر هواك
ولكنها عطشانة لقربك
وتشتاق اكثر للغرق
في بحور حبك

احمد الجمل

يا له من ابداع كنا على
موعد معه هذا المساء

[أحمد الجمل]

اقتباس المشاركة الأصلية كتبت بواسطة جبل عالى ماشاء الله صاحب القلم الأنيق والحضور المميز معزوفة راقية ورائعة جدا أحييك واغبطك لهذه القريحة الفذة كل الشكر والتقدير والاحترام

ربنا يبارك في عمرك ويحفظك من كل سوء
وكل الشكر على مرورك العطر

اقتباس المشاركة الأصلية كتبت بواسطة عاشقه للاحلام امم بس البحر غدار يوم حلو ويوم بياخد اغلى واعز الناس تحب تعيش قصاده بس تخاف تعيش جواه وحتى لو افخم سفينه لزم بر ترسى عليه يوم جميل اخى احمد

صحيح ، وانا بخاف من البحر جدا
وما بعرفش أعوم
ولو نزلت البحر مرة من نفسي والمية وصلت لنصفي رجليا مش بتشيلني
والدنيا تلف بيا وأحس إني هقع وأغرق
سعيد بمشاركتك
وأشكرك من كل قلبي

اقتباس المشاركة الأصلية كتبت بواسطة صمتى كلام استاذ احمد بارك الله قلمك المبدع ابهرتنى حروفك تشع بالحنان والمحبه

ربنا يعزك ويرفع قدرك
أشكرك على كرم المرور

اقتباس المشاركة الأصلية كتبت بواسطة ro♥ony غرقانة في بحر هواك ولكنها عطشانة لقربك وتشتاق اكثر للغرق في بحور حبك احمد الجمل يا له من ابداع كنا على موعد معه هذا المساء

أسعدني هذا المرور الأنيق روني
شكرا جزيلا لك