حلقه جديدة من ( اجمد عضو ) معنا ( SiLver Spectra )

[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

( أجمد عضو )




طبعا تم اعلان ضيف الحلقه من خلال توبيك

وعرفنا ان الحلقه هتكون عبارة عن ( حصاد 2013 )

بخصوص ( المنتدى ) وهنشوف مع بعض أراء ( طارق )

السياسيه ووجهة نظرة وتوقعاته لاحداث عام ( 2013 )

وياترى كانت ايه علاقتها بعام ( 2012 )

وهنشوف ياترى مين الافضل فى عام ( 2013 ) من وجهة نظر

( طارق ) الشخصيه بعيد عن أدارة المنتدى .

طبعا معانا النهاردة

نجم المنتدى /

SiLver Spectra

س / فى البدايه اهلا بيك ياعم الحاج ؟

أهلا بالحاج مرشد ..بحب اقولك موروشو زي ماتركس كانت بتطلع منه عسل ..الحق يا دكتور طارك موروشو

س / فى البدايه ايه اخبار ( 2013 ) معاك فى حياتك الشخصيه ؟

السنين بتجري يا عم ..دا انا لسه فاكر ايام لما كنا منتظرين معجز

سنة 2000 ..ولا 2001 يوم ما اخويا فهم الصفرين الثابتين اللي

كانوا في ساعته و عرف لما باقيت 01 انها رقم السنة

اهو 13 سنة جريو .و لو حطينا عليهم.كمان 13 من المستقبل

هيبقى الواحد قرب على الاربعينات (سن الأمراض) دا لو كان

لينا عمر اصلا

((متفائل أوي أنا مش كدا هههه))

س / مفيش اى موقف حصلك فى ( 2013 ) وحاسس انه موقف

هيفضل معاك طول حياتك ؟

في بس مواقف خاصة مش حابب اذكرها

س / نقدر نقول طارق قلبه دق فى ( 2013 ) والا لسه والا دق

من سنين فاتت ^_^ ؟

ماهو بيدق على طول و لا انا عايش ازاي

موضوع انه دق و حب و من العشق و الهوى و الحاجات دي

كبرنا عليها يا عم مرشد

دلوقتي انا في سن التخليص ..يعني واحد + واحد = 2

مش لسه بقى يدق و نراقب من بعيد لأ دي بصت و نعيش في جو

المراهقين دا

الواحد بقى واقعي ..اكتر من واقعيته الطبيعية

س / شكلك مرتبط اساسا ؟ بس تحب تقول ايه لبنات المنتدى

المعجبين بسيلفريس ؟

أمور سيلفريس دا ..حتى أنا معجب بيه

ياعم انت عايز تخلص عمري بادري ليه .

سيبني ياعم براحتي شوية احنا هنلائيها منك و لا من أمي

س / توقعاتك كانت ايه بخصوص منتدى بنات مصر ؟

توقعات سيئة ..لو فضل المنتدى بمعدل التسجيل المتدني دا

يبقى المنتدى اخره كمان سنتين و هتلاقيه مخلي من الاعضاء

المتواجدون

هو حاليا واقف على كام شخص كدا منهم انت

(اللي هما بيكتبوا حاجات تشد)

لو شيلناهم يبقى كل سنة و انت طيب

و يمكن دي هي الحاجه اللي مخلياني مش عايز اقدم استقالتي

س / بصراحه كدا شايف انك هتقدر تكون فى المنتدى كا أدارى

سابق ؟ واقصد هتكون متواجد وهتشتغل فى المنتدى ؟

عادي جدا .. بس وجودي ساعتها هيتلخص في كتابة مواضيع فقط

س / بما انك ملك الاحصائيات ايه اخبار 2013 مع المنتدى

والاعضاء يعنى عايزين حاجا كدا تعرفنا من خلالها اداء المنتدى

فى تحسن عن 2012 والا لا ؟

أسوء

على سبيل المثال و حسب الاحصائيات اللي ادامي دلوقتي

معدل المشاركات في شهر نوفمبر 2012 اكثر من 72 ألف

مشاركة في حين معدل المشاركات في نوفمبر 2013

هو 31 ألف مشاركة

فرق أكثر من الضعف

س / ياريت تشرحلنا النقطه دى حتى الاعضاء تفهم الى بتقوله ^^ ؟

أنا بقالي كام سنة ادارة ؟

كمان 4 شهور بالظبط هكمل ال5 سنين ادارة

ممكن أقولك ان انشط سنة للادارة خلال الخمس سنين دول

هي سنة 2013

بالمقارنة مثلا ب2010 انا كنت منعزل جدا

و مش بشارك زي دلوقتي

اللي بيخلني اشارك حاليا هو ضعف التفاعل لما الاقي موضوع

كويس و ماحدش رادد فيه

دي كدا مقدمة عشان الناس اللي بتفكر ان المشكة في التفاعل

بالعكس منه و امجد عاملين تفاعل حلو جدا

طيب ايه المشكلة ؟

الأرشفة

و يمكن الكلام دا ذكرته كتير ..

س / ايه حكايه الارشفه دى ؟ ولما المنتدى بيقع بيحصل ايه كتير

الاعضاء بتلاقى ان مشاركاتهم بتقل دا كمان ليه علاقه بموضوع

الارشفه ؟

أقولك يا سيدي

موضوع المشاركات اللي بتنقص دي بتكون بسبب اننا بنعمل

(باك اب) و الباك اب يعني بترجع السيرفر لورا يوم او يومين

او حتى اسبوع

في امكانية او خدمة في السيرفر بتختص في تجديد حفظ نسخ

مستقلة من البيانات ..

يعني ممكن كل 24 ساعة تتاخد نسخة احتياطية و تتحفظ

بشكل الي

بحيث لما تحصل مشكلة (زي اختراق) تجيب النسخة دي

و دا اللي بيتسبب في ان العضو يلاقي مشاركاته نقصت ..

مش بشكل عددي لكن بشكل فعلي

كل حاجه عملها بعد الباك اب بتروح ..منها مشاركاته

مواضيعه اسمه لو غيره و هكذا

--------

في اخر اغسطس 2012 حصل ان شخص اخترق المنتدى بطريقة

بشعة شوية لانه كان على معرفة بهيثم و محمود و زرع ملفات

كانت بتخليه يقدر يوقع قاعدة البيانات

فكل ما نرجع المنتدى يرجع يوقعها تاني ..و الدعم الفني الخاص

بالشركة قاعد فترة طويلة عشان يشخص المشكلة و يعرف

هو بيدخل منين لان السيرفر مليان ملفات

((هيثم حاطت عليه مليون موقع ))

المشكلة اتحلت بعد 3 اسابيع تقريبا و دي كانت فترة كبيرة

خلال الفترة دي نقلنا على الجيل الرابع و دا ماعجبش الناس

فرجعنا للتالت تاني و دا عمل لخبطة كبيرة لان الترقية

و الرجوع تمو بشكل يدوي

لما رجعنا في اخر سبتمبر ..كان ظاهر ان مافيش اي مشاكل

في المنتدى

معدل التسجيل كان عالي (100 في اليوم) و نشاط الاعضاء رجع

تاني و المتواجدون الان بيوصل بين 80 ل90 في الذروة

حتى كنت ساعتها نزلت موضوع و قولت اننا رجعنا زي ماكنا

قبل المشكلة و بينت دا بالاحصائيات

فجأة ..بدات الاحظ انخفاض تدريجي في الزوار

و معدل التسجيل

بدات اكلم هيثم و محمود يشوفوا في ايه ..

كانوا بيردوا و يقولوا حاضر

الغريب ان الاتنين كانوا مختفيين

محمود بعد رجوع المنتدى على طول دخل في بياته الشتوي

السنوي .و هيثم ماكنش بيدخل و مش بشوفه

يوم ورا يوم حبيبي ما جاله يوم ..فجاة ماعتش في زوار خالص

و اتمسحنا بشكل كامل من جوجل !

و مش بس جوجل من كل محركات البحث !

بالمناسبة انا عمري ما اختصيت بشغل الارشفة ..

دا كان شغل هيثم و محمود

حتى ماكنش معايا ال FTP بتاع السيرفر

فأنا دوري في الادارة الداخلية ماليش في الاسبام و لا اللي بيعمله

الاخوان هيثم و محمود

المهم ..انا قولت يمكن عقاب من جوجل شوية و يروح زي ما

حصلنا كتير قبل كدا ..عدا شهر و مافيش تطور

كلمت محمود و هيثم تاني ..حد فيكم يدخل و يشوف الموضوع

دا و يعرف المشكلة من فين لان لو الوضع استمر كدا مش

هيبقى في اعضاء بعد كدا

و قولتلهم ..انت ممكن دلوقتي مش تحس بالضرر

لكن هتحس بيه بعد كدا

بمعنى ..لحظة المشكلة انت كان عندك ناس كتير مسجلة قريب

و بتشارك بنشاط ..لكن ماعتش في حد جديد بيتضاف ليك

و بالتالي الناس اللي بتشارك النهارده لما تزهق و دا امر طبيعي

مش هيكون في بدالهم حد جديد

و دا اللي كنت اقصده و هتلاقي اعراضه ظاهرة دلوقتي

في انخفاض عدد المتواجدون و في النشاط عامة

المهم لما كنت بكلمهم كان محمود يقولي هدخل بالليل ان شاء الله

انت سهران ؟ انا بس عندي ظروف و معرفش ايه و هدخل

و هنشوف الموضوع دا

يعدي اليوم بالليل و مش يدخل

يعدي اسبوع كمان و مش يدخل

اكلمه تاني ..يقولي برضو هدخل و هعمل و هنشوف ..حتى كنت

بقترح عليه يجيب دومين جديد لاننا حطينا افتراض بان اللي

حصلنا دا عقاب من جوجل

بس كنت مستغرب ان كل المحركات عاقبتنا مش بس جوجل !

معقولة حد عمل اسبام بطريقة خلت المحركات تحذفنا بالشكل دا !

و حاولت تاني و تالت مع هيثم ..ماكنش في اهتمام منهم

هيثم كان يقولي دومين مصريات القديم المسروق و هجيبه من

المباحث و كلام غريب كدا ياعم دومين مين ياعم الله يهديك

دا راح لحاله

لغايه ما عدا على المشكلة 3 شهور ..قررت وقتها اني احاول احل

المشكلة بنفسي برغم ضعف خبرتي في المجال دا

عملت حساب على ادوات المشرفين بتاعت جوجل (ويب ماستر)

..و بدات اتنصل من الاسبام بتاع هيثم و محمود

و بعت لجوجل اعادة نظر

كان جوجل يرد برسالة اليه ان الموقع بيخالف جودة البحث

و فيه روابط اسبام في مواقع تانية

و مهما اتنصل يرد بنفس الرسالة

المهم ..فين بقى عم هيثم لما بدات اشوفه و لاقيته بدا يفوق و يهتم

..لما عدا 6 شهور على المشكلة !!

هيثم له خبرة في الحاجات دي

دخل بالحظ من ادوات المشرفين بتاعت جوجل من خيار بيخليك

تشوف العنكبوت بيشوف موقعك ازاي

فالمفروض يشوف كود للصفحة لكل محتوياتها

لكنه فوجئ بان الكود صغير جدا ..و دا معناها ان العنكبوت

مش بيشوف اصلا محتوى للصفحات و للموقع ككل

و من هنا بدانا في اعادة تشخيص المشكلة من عقاب من جوجل

لمشكلة في المنتدى نفسه

اللي ماكنش باين هو ان هاك الارشفة المسمى (VBSEO) مش

ركب كويس بعد مشكلة الاختراق

الهاك دا معقد في ظبط اعداداته

و عشان القارئ يفهم برضو طبيعة عمله

الهاك دا هو اللي بيعمل اختصار لرابط الموضوع و رابط الملف

الشخصي

الوضع الطبيعي او زمان قبل ما نركب الهاك دا في 2010 كان

الرابط طويل ..و كمان بيعمل اختصارات و روابط للمواضيع

و بيكبر العنوان فوق ..و امور كثيرة فنية بيكون الغرض منها

تحسين الارشفة في جوجل

الهاك دا اول ما ظهر في 2009 عمل شغل عالي و فرق كتير في

المواقع اللي ركبته وقتها

لكن مع الوقت جوجل غير طريقة ارشفته (الخوارزمات بتاعته)

فتقريبا الهاك وجوده زي عدمه دلوقتي

المشكلة بقى في ايه ..انه هاك حساس ..

يعني اي خطأ بيوبظ الدنيا ..و كمان لو ركبته مش هتعرف تشيله

لانه كمان هيعملك مشاكل و عايزله حد بيفهم فيه

طيب ايه بقى اللي حصل ؟

اللي حصل هو ان الهاك مش ركب مظبوط و دا تسبب في ان

العناكب مش باقيت بتشوف محتوى المواضيع و من ثم محركات

البحث حذفت ارشفة المنتدى بالكامل

كأنك كنت فاتح موقع و بعدين قفلته ..بيتم حذف النتائج بعد فترة

من غلقه بشكل مؤقت و لو الغلق طول بيتم الحذف بشكل كامل

بعد 6 شهور ..كان للاسف جوجل حذفنا بشكل

دائم

و من ثم لما حلينا مشكلة الهاك و بعدها رجع جوجل يارشفنا

من جديد ..عاملنا معاملة الموقع الجديد اللي فتح ب100 الف

موضوع مثلا !!

ارشفنا لكن مش بنفس قوة الارشفة الماضية

و لحاد اللحظة كمان مش متأكد اذا كان العيب في الهاك فقط

و لا كان في عقاب لان مواقع بنات مصر الاخرى كانت متضرره

هي كمان

او يمكن التنصل من الاسبام كمان ضاعف الضرر !

الاسبام دا باختصار هو انك تخش مواقع تانيه و تضيف فيها كلمات

دليلية و فيها روابط موقعك ..دا بيقوي البيج رانك بتاعك ..

طبعا دا المفروض مخالف لجودة البحث بس دا لو اتقفشت

دا غير ان اغلب المواقع بتلعب اللعبة دي و ان كانت مش

بتجيب نتيجة زي زمان

المهم ان دي هي المشكلة و تفاصيلها

انا طولت فيها جدا بس كان لازم اوضح المشكلة

س / هتنزل السنادى تكريم للاعضاء الافضل فى 2013 زى

السنه الى فاتت والا لا ؟ مع العلم ان فى ناس زعلت وقتها ؟

ممكن نعملها

بس لو عملته هنخليه حاجه محدوده مش نكرم المنتدى كلو ! يبقى

ايه اللازمة !

ماهو عشان مش تخلي حد يزعل يبقى تعلها بوفيه مفتوح

و ساعتها التكريم مش هيكون له معنى

لكن الاحلى هو انك تختار الافضل و هي وجهات نظر في النهاية

زي ما بتشوف افضل لاعب كورة و خلافه ..ماهو ممكن يحطلك

قائمة من الف لاعب و يقولك عشان ماحدش يزعل !

الحلاوة هو انك تختار اسم و تصفي بينهم

و ممكن وجهة نظرك تختلف بس دا لا يقلل من الاختيار

س / بس لو هتعمل التكريم دا هيكون على مدار السنه ؟ وانتا كا

أدارى بيظهرلك مثلا كل عضو شارك فى المنتدى ازاى طوال

السنه والا لا ؟

هي بتبقى بالتقدير يا مورشو

و بالنسبة لاي حد بيدخل كل يوم مش هيكون صعب انه يختار

الناس اللي معلمه في دماغه

س / موضوع التقدير دا بيوديك فى داهيه والا مش بتاخد بالك من

الحكايه دى ؟

ايه هي الداهية دي يا مرشد ؟

أنا مش بجامل ..و ماعنديش حاجه لا هكسبها بالمجاملة و لا

هخسرها بدون مجاملة

و لا بدور على ان الناس تمدحني و لا الكل يحبني

بالعكس لو تتابع مواضيعي هتلاقيها جريئة جدا

انا بطرح الفكرة و مش بيهمني ردة الفعل و الا ابقى جبان

لو كنت بنزل موضوع عشان الناس تمدح فيه كنت هنزل المواضيع اياها ..

و مش لازم اقولك تفاصيلها عامله ازاي بس اللي هي المواضيع

النمطية اللي الكل يخش يقولي جزاك الله خيرا او يقولي اه معاك

حق الناس مش عندها اخلاق ..الخ

انا بدور على افكار تضيف للقارئ ابعاد جديده بعيدا عن القوقعة او الحفرة اللي احنا قاعدين فيها

س / السنادى شوفنا مع بعض تعيين اداريين معاك ؟ كان ايه

الهدف من تعيين ساحر ومنه ؟

من زمان و بالتحديد في مارس 2011 و انا اخدت قرار بتعيين

اداريين يتكفلوا بالرد على الاعضاء و المتابعة و يكون وجودي

بس للامور الهامة ..و دا تمثل في تكنيكال و حنون و ميشو

تكنيكال ظروف عمله خلته مش يعرف يدخل و ميشو اختفت

.استبدلتهم بعد كدا بضياء ..ثم ضياء استقال ..فاستبدلته بفكرة

الاداري المنتخب و اعطاءه صلاحيات واسعة

ثم بدا الموضوع يبقى مجهد بالنسبالي ..كل اداري يفوز بيبقى

عايز يعمل افكار كتير جدا عشان يكون عند حسن ظن منتخبيه

و لما بتنتهي فترته بيجي واحد جديد و مش بيكمل اللي عمله اللي

قبله و بيرهقنا في مقترحات و امور اخرى ..دا غير اني كان

بيطلع عيني عشان اعلم واحد واحد امور بسيطة

زي تركيب البنر مثلا

فكان القرار بتعيين اداريين ثابتين جدد و يكون نشاطهم في المنتدى

عالي

و سمحت للاعضاء تختار في موضوع بعنوان

(مين تختاره يكون مدير للمنتدى)

و كمان استبيان المشرفين ..كانت النتيجة هي ان ساحر و منه

هما اعلى اتنين فيه و هما كمان كانوا اختيار الاعضاء

و الموضوع مش بس اختيار الاعضاء ..الموضوع اني شايفه

نشاطهم و عارف خبرتهم بحكم انهم كانوا اداريين منتخبين سابقا

س / حصلت السنادى غربله للمشرفين وناس كتير اتشالت من

الاشراف ؟ شايف ان الموضوع دا اتاخر كتير والا كان دا الوقت

المناسب ؟

مش تأخر ولا حاجه ..انا كنت منتظر ارشفة المنتدى ترجع

و وضعه يتظبط بس اكتشفت ان العملية مش مؤقته ..

فشدينا الرحال بتعيين ناس جدد

و عموما العملية دي متجدده باستمرار ..

ممكن بس عشان انا غضيت البصر عن المشرفين فترة طويلة

مش اكتر

س / مش شايف ان الاستبيان الى عملته عشان تشيل المشرفين

والمراقبين كان ضمان ليك عشان محدش يقول انك شيلت دا

وسبت دا ؟

لا خالص ..ما طول عمرنا بنشيل و بنحط ..

يعني مثلا حد هيرفع علينا قضية

انا بستغرب من الناس اللي بتعد تظن كلام من دا و كاننا مثلا

خايفين من منظرنا أدام الأمم المتحدة

عادي انا بحب الجيم و الاثارة و كدا

زي ما عملت التحدي الاخير ..كان شبيه بيه برضو بس الجديد

اني قولت اللي هيسقط في الاستبيان هشيله و دا عمل اثارة اكتر

س / تقريبا بشكل كبير تم الغاء فكرة ( الادارى المنتخب ) السنادى

؟ ايه سبب الغائها وتفتكر لو رجعتها الادارة هتستحمل كل العدد دا

؟

لسه كنت بقولك السبب في اني كنت عايز ادارة ثابتة

و في نفس الوقت تكون نشيطه باستمرار

فكرة الاداري المنتخب هتعود وقت الحاجة ..

يعني لما نلاقي تقصير من اداريين متواجدين

خلي بالك شغل الاداري في تلبية حاجة الاعضاء روتيني جدا

و عايز صبر

و عارف ان العضو لما يسمع الكلام دا هيقول ياعم انت اداري

بتدلع هو حد ادكم ..بجد الموضوع فعلا روتيني و ممل لاقصى

درجة ..حتى انا متنصل من التزويد و التركيب

و الكلام دا كلو و سايبه على منه و امجد

الانتخابات الادارية كانت بتعمل جو حلو ..

و في نفس الوقت جو سلبي في المنافسة و كانت بتوصل لزعل

من بعض الاطراف

بس كانت فكرة حيوية

هتعود وقت الحاجه

دا غير اننا باقينا زي عزبة كدا ..مافيش مسجلين جدد يذكروا

ففرص الاختيار باقيت ضعيفة

على سبيل المثال في تالت انتخابات ادارية شارك في التصويت

240 عضو

في حين اخر انتخابات شارك فيها 120

في حين استبيان مايو شارك فيه 88

في حين اخر تحدي عملته لاختيار شخصية العام كان

بيشارك فيه من 40 ل50 عضو

و دا رقم متدني جدا

و لذلك ما اقدرش اعمل انتخابات يشارك فيها 50 عضو !

لو واحد مصاحبله خمسه بس و كل واحد منهم نده لصاحبه

ممكن يفوز فيها !

يبقى اخد بالكفاءة احسن

س / شايف ان الفكرة حققت هدفها ؟ ولو حققته ليه شبه اتلغت ؟

اه عملت جو حلو حتى واحد زي حالاتي كدا بيحب جو الاثارة

اشتاق للجو دا

و ليه اتلغت ؟

س / فكرة ( عصابات المنتدى ) اعلنت عنها فى اخر ( 2012 )

وعملت خلافات كتير بين الاعضاء ؟ تفتكر لو اعلنت عنها

دلوقتى هتنجح ؟

فكرة كانت غير مدروسة

يعني مثلا واحد عملك عصابة اللهو الخفي ..الاسم عاجب الاعضاء و كان انضم ليها بتاع 30 عضو

و بالتالي لو عملت انتخابات طبيعي العصابة اللي فيها ناس كتير

هي اللي هتفوز بغض النظر عن افكارهم ..كاف ان اعضاء

العصابة يصوتوا لنفسهم !

لو كان عندك متواجدون الان مثلا الفين عضو كنا نقول ماشي

..بحيث يكون الاعضاء هما الاغلبية اللي بترجح كفة فريق عن

التاني مش مجرد الانتماء للعصابة !

فما بالك بوضعك دلوقتي في تواجد اعضاء اضعف من وقت

تنظيمها السنة اللي فاتت

اكيد لأ طبعا مش هقدر انظمها بنفس الطريقة المفتوحة

لكن ممكن تنزل بشكل محدود زي ان العصابة مثلا يكون

فيها 4 اعضاء او 5 بس

و عموما و بصفة عامة فالتحزب بشكل واضح في المنتدى

مش حلو

كل واحد يبقى بيعبر عن نفسه احسن

س / ايه رئيك فى اعضاء المنتدى 2013 يعنى الاعضاء الجدد ؟

ومين من وجهة نظرك دخل المنتدى واتميز السنادى ؟

و الله مش بتابع ..اللي ممكن يرد على سؤالك دا منه و امجد

لكن بحكم اللي بوشفه بعنيه ففي عاشق متيم حد محترم و كويس

و نورونار بتكتب حلو و عندها عقلية رائعة بس دخولها متقطع

دول اللي في بالي حاليا

نور (بيج بوص) مثلا دا قديم ..

الجديد انه بقى مشرف نشيط و بقى اسمه بيج بوص

س / فى 2013 شوفنا كميه كبيرة من حالات ( الحظر ) فى

المنتدى كان ايه اهمهم بالنسبالك او مين العضو الى شايف انه

يستاهل الاوسكار فى الحظر ؟

أوسكار الحظر طبعا ميرو هههههه

مع ان الراجل دا كويس على فكرة بس مشكلته في العصبية

مابيعرفش يتحكم في نفسه

أهم من افتقدناهم هو قلم بلا حبر

و حاولت ارجعه بصراحة من بعد اول خلاف و فعلا كنا بنتكلم

عادي فيس ..بس للاسف ما حصلش نصيب بعد كدا

و على فكرة هو دخل بعضوية متخفية من فترة و شارك شوية

بيها و خلع

كنت مبسوط جدا .بس مش هقدر اقولك مين هي العضوية دي

يمكن عاشق متيم ههههههههههه (بهزر )

س / كنت موافق على عودة جميع الاعضاء المحظورين ؟

اه عادي ..في ناس كويسه و اخدت حظر مستحق وقت المشكلة

لكن وجودهم كان اضافة لينا

هتقولي ازاي ..هقولك زي مثلا انه اتخانق مع حد و شتموا بعض

و حاجات من دي

فدي كانت فرصة للعفو عن الكل و فتح صفحة جديده

في اللي قدر يستغلها و في اللي ما قدرش

س / فكرة ( شخصيه العام )كانت فكرة مميزة جدا كنت متوقع مين

الى يفوز بيها ؟

ماكنش في بالي حد معين

بس عايز اوضح حاجه يمكن قولتها في المستنقع

مع احترامي طبعا للفائز الاميرة رودي

الاميرة رودي مش حد جديد علينا ..دي حد قديم و من اعلام

المنتدى هنا ..زي مثلا لو حطيت منه و امجد و يمكن حد سالني

و هو زعلان انت ليه مش حطيت اداريين و مراقبين

و هنتهم زي ما اهنتنا !

طبعا استغربت جدا من فكرة ان حد حسبها باهانة !

كان ردي ببساطة هو اني عايز وجوه جديده ..و عايز كمان

المنافسة تكون عادلة ..الاداري اكيد بيتعامل مع اشخاص كتير

فبديهي الاصوات هتروحله

فأنا كنت بتمنى ان الاختيار يكون لشخص ظهر السنادي

لكنه ساب بصمة واضحة في فترة صغيره

و دا اللي بتعمله المجلات في اختياراتها ..مش كل مره هيختار

حد مشهور و معروف . كتير جدا بيكون خيارهم على

شيء ظهر فجاة لكن عمل تاثير كبير

بس

أما توقعاتي بعد انتهاء بعض الجولات ..فحسيت انه مسك الشهادة

و على فكرة الفرق بينهم كان صوت واحد بس

حتى انا اغلقت الاستفتاء و شيلت الموضوع من التنبيهات بدون

النظر للنتيجة و بعد ما شوفت النتيجة لاقيت الفرق صوت واحد

اضايقت و قولت ياريتني كنت سيبتها شوية

بحيث الفائز ياخدها بفارق كبير شوية

و فعلا شاورت عقلي ارجع افتحها تاني و اقول ان في تقارب كبير

فاللي مش صوت يصوت

((مع العلم ان معدل التصويت كان اكتمل بنفس الجولات السابقة

اللي هما خمسين عضو)) ..و بعدين حسيت ان الموقف هيكون

مشبوه و انت فاهم في ناس هنا نيتها حلوة

فقولت خلاص دا النصيب

و اللي أراحني هو اني اغلقته بدون النظر الى النتيجة

((و دا كنت بعمله في كل المراحل كنوع من اني اشوق نفسي))

س / مين العضو الى استغربت لما طلع يعنى كان مين ضد مين

وتوقعاتك كانت غلط ؟

نور كان المفروض يعد شوية الراجل نشيط جدا

بس وجوده مع مسك الشهادة اقصاه بادري ههههه

نور صاحب فكر سياسي و ليه توجه و بيختلف في النقاش و كدا

فاكيد مش هيبقى زي مسك الشهادة الراجل الطيب اللي في حاله

اللي استغربت من خروجه بدري هو عاشق متيم ..انا بصراحة

ماكنتش واخد بالي من توحد ارواح ..يمكن عشان هي مش

بتشارك في مواضيعي و انا برضو مهما كان نشاطي في المنتدى

محدود في اقسام محدده

لكن لما بحثت عن نشاطها و سألت عرفت انها نشيطه جدا

و برضو كانت تستاهل تكون من ال4 الكبار

س / شوفنا اعضاء قدام فى المنتدى بيخرجو من بدايه التصفيات

شايف ان الاعضاء الجدد هيكون ليهم دور الفترة الجايه فى

المنتدى ؟

مافيش حاجه بتفضل على حالها

مجرد ما انت كعضو نشاطك بيقل بتختفي شعبيتك

و دا امر مفروغ منه

س / كنت متوقع عزل ( مرسى ) فى 2013 ؟

لأ ..أول بيان بتاع اسبوع دا برضو مش اخدته بجدية ..

يوم 30 يونيو كمان لغايه اخره كنت بكلم واحد و بيقولي هيعزلوه

و بقوله لا ما اظنش ..شوفت انا نيتي حلوة ازاي

لكن بعد البيان ابو 48 ساعة خلاص طبعا الموضوع كان باين

و منتهي

س / مع بدايه حكم ( مرسى ) كنت متوقع ايه وتوقعاتك كانت صح

والا لا ؟

شوف أنا يوم التصويت في الاعادة ..صوت لمرسي و انا مش

مبسوط ..ماكنش عاجبني الاتنين بس قولت كاستقرار الافضل

هو مرسي

و انا خارج من اللجنة بعد التصويت ..كنت سرحان مع نفسي لاني

عارف اني بكدا بمكن الجماعة

بس استعوضت ربنا و قولت لعل القادم خير

و فعلا كانت عنده فرصة كويسه جدا لما فاز مرسي و كان في

تلاحم شعبي مقبول

و كنت مبسوط بدور مصر و ظهورها في الساحة كدولة مهمة ايام

حرب غزة و اوباما كل شوية يكلم مرسي

لكن بداية التخبط و الصراع و فقدان الثقة و التشكيك او تقدر

تقول التفتيت كانت مع الاعلان الدستوري

مع ان الموضوع ماكنش مستاهل نهائي الاجراء دا

تقدر تقولي ايه الفارق الجوهري بين دستور 2012 و 2013 ؟

يبقى ليه عملت صدام مع القوى المدنية بالشكل دا و تحط نفسك

في موضع تهمة ؟ اذا كانت الناس اصلا مشككه فيك من البداية !

لو فكرت فيها هتلاقيها ماكانتش مستاهلة

حتى لا كان حد هيسمع عن تحصين

وزير الدفاع و لا سيسي و لا بيسي

كل طرف و بالذات صاحب القرار يراعي التاني و كان الوضع

اتلم و مش اتأزم

لكن لب المشكلة هو ان صاحب القرار قرر انه يتصادم بعنف

س / ايه رئيك فى مسيرات الاخوان حتى الان ؟ وشايف ان ليها

فائدة ؟

زي ما انت عملت تمرد هو كمان هيعمل

و دا السيناريو اللي كنت متخوف منه

قبل كدا كتير جدا في استضافات كنت بقول مثلا البلاك بلوك دا

مالوش لازمة ..و غلط و حطيت تصور ان الطرف التاني هو

كمان يعمل كدا و دا تقريبا اللي حاصل دلوقتي

القضية اننا مش عارفين نعيش مع بعض

و دا كان واضح من بعد ثورة يناير اللي المفروض انها جمعتنا

كان كل طرف هامه و شاغله هو انه يقصي الآخر

طب ليه خلافاتنا ما تكونش محدوده و متفاهمه في حدود السياسة

بس زي ما بنشوف في الدول المحترمة !؟

الجهل يا مورشو قاضي على البلد دي

لما بتيجي تكلم جاهل بتلاقي مافيش تفاهم اصلا و لا في منطق

في الحوار

في شتايم و سب بس

و حتى الناس اللي المفروض انها مش جهله ماشيه في السكة

دي بسبب التأثر بالجو

س / فى اعضاء فى المنتدى مؤيدين لـ ( رابعه ) ؟ شايف ان

وجهة نظرهم سليمه وطبعا فى الاول والاخر اكيد وجهات نظرهم

تحترم ؟ لكن عايز اعرف وجهة نظرك الشخصيه فى عرضهم

للاحداث ؟

مش في ناس ماتت ؟

يبقى حقهم ..

و لو قللت من موضوع الناس اللي ماتت دا ابقى لا انساني

لكن انا ممكن اقولك ان في امور معينة فاقمت الوضع ..زي

التحصين اللي كانوا بيعملوه و المسلحين ..حتى لو كانوا 10

و لا 5 مسلحين

دا بحد ذاته ادا مبرر للعنف

مش منطقي يا مرشد اكون انا راجل سلمي و بؤمن بالسلمية و

اشارك في مكان ناس محصنه نفسها و جايبين مدافع رشاشة

انا شخصيا كنت هبعد عشان مش ادي غطاء لقتل الابرياء

لذلك انا اي مظاهرات كان فيها عنف ماكنتش بشارك فيها

مع ان على فكرة ممكن تخش و تلعب و تحدف حاكم بتبقى

لعبة صبيانية حلوة

بس انا مش عايز ادي غطاء بشري لحاجه زي كدا

فهي دي المشكلة من وجهة نظري

و للاسف احنا احترفنا مهنة الاتجار بالجثث

لو تفتكر موضوعي ضد جبهة الانقاذ يوم 26 يناير

كان واضح ان الجبهة نفسها جمهور الاهلي يولع في البلد ..

بس لما الحكم جه اعدام هديوا و انفعالهم كان ضعيف ..العنف

حصل في مكان محدود و هي بورسعيد بالتحديد

انتقدت هنا بتوع الانقاذ لان من المغزي فعلا هو اننا ندي

غطاء للعنف او نتمنى العنف

دا بالظبط اللي كان الاخوان عايزينه يحصل لبرابعه عشان

يكسبوا تعاطف

يا أخي ملعون ابو الكرسي اللي يخلينا نموت بعضنا !

لو شيلنا شهوة السلطة من كل طرف هتلاقي البلد زي الفل

س / ايه رئيك فى تفجير مديريه أمن المنصورة ؟ وايه الغرض منه

؟

انا قاعد في المنصورة على فكرة ..و ببعد عن المديرية تقريبا كيلو

.. كنت بجاوب على اسئلة رسالتك اللي فاتت لاقيت العمارة

اهتزت !! و صوت عالي ..عرفت انه انفجار على طول ..بس

استغربت مين هيفجر في المنطقة هنا !! مافيش مركز شرطة

قريب !!

الصوت كان كان اانفجار في الشارع اللي جنبنا

بعد ربع ساعة من الصوت قولت اما اكتب كدا في جوجل سماع

دوي انفجار في المنصورة و روحت عامل التوقيت (اخر ساعة)

..بدات الاقي نتائج بالاخص صفحات عالفيس و اكتشفت ان

المنصورة كلها سمعت الصوت و كل واحد مفكر ان الانفجار

في المنطقته

و بعدين ظهر ان الانفجار عند المديرية

دي صور صورتها الصبح بادري

المفروض دي مدرعة امن مركزي

مديرية امن المنصورة في قلب المنصورة و في منطقة حيوية جدا

و وراها اسواق

المحلات كلها ادغدغت ..و اثار الانفجار كبيرة جدا على مساحة

كبيرة بتوضح شدة الانفجار دا

دي مثلا قهوة

دا نادي من الناحية التانية من النيل لاحظ الازاز اتخلع ازاي

بالنسبة للشق التاني من السؤال ..ايه الغرض منه ..عقول مسمومة

بالتخريب بتهيص في القتل و ما بتصدق تلاقي جو مشحون

و مناخ مؤهل للقتل

تقدر تقولي اللي بيحصل في العراق ايه الغرض منه ؟

طب ليبيا ؟ طب تونس ؟ طب افغانستان ؟ طب باكستان ؟ طب

الصومال ؟ طب نيجيريا ؟

س / شايف ان هو دا الاسلوب المتبع من الجماعه المحظورة

والدليل احد القيادات قبل فض اعتصام رابعه قال واكلم عن

التفجيرات دى ؟

احنا مش بنعالج راس المشكلة و بالتالي بتفضل تعاني منها

عايز تشخص المشكلة يبقى لازم تشوف ايه دوافع الناس دي

و بتستند على ايه في تنفيذ عملياتها

هتلاقيهم بيستخدموا ايات تحريضية ..كل واحد فيهم عايش بقى

على وهم الحوريات في الجنة فيقولك نخلص بقى و نروح للحور

العين دول و نمارس الدعارة اللي هو محروم منها ..و اهو منها

جهاد كمان ..و بيقنع نفسه بان اللي بيعمله دا صح

يبقى لو سألنا سؤال : هو ايه لازمة الدين ؟

هيقولك عشان نبقى محترمين ..طيب و باقيت محترم ؟

بصراحة كدا لما بشوف تقرير منظمة الشفافية اللي بيصدر

كل سنة و بلاقي الدول الاكثر الحادا على مستوى العالم زي

الدنمارك و الدول الاسكندنافية ..و يكون ترتيبها هو اعلى حاجه

..كل سنة ياخدوا مراكز اولى في الشفافية و انعدام الفساد تقريبا

و بعدين ابص على حالنا و نلاقينا في مراكز متاخر و ملاقي كمان

مجتمع فاسد من صباع رجله الصغير لغايه شعر راسه !

في ناس بتفكر ان الفساد في الحكومة ..الفساد في المجتمع يا حبيبي

لما حد يفتح شركة و يشغل عيال اصحابه عشان معارف مش

عشان الكفاءة فدا فساد و بينعكس بالسلب عالمجتمع في عدم تكافؤ

الفرص و كمان في تدني الانتاج ..انت لما مش تاخد الكويس

المجتمهد و تاخد صاحبك فانت هنا ممكن تضر نفسك و المجتمع

..مكسبك يقل و بالتالي الضرائب تقل و بالتالي التنمية تضعف

و دي هي البيروقراطية اللي بنعاني منها

و كمان تبص تلاقي المجتمعات بتاعتنا عايشه كل يوم على

تفجير في حته

فدا بيخليني اقول : تصدق من غير دين احسن !!

ايه اقيمة الاخلاقية اللي بنكسبها من بث الكراهية ضد الشيعة

و لا المسيحيين ؟

يبقى طبيعي تلاقي تفجيرات و احداث عنف طائفي

س / تقول ايه للناس الى بتقول ان الداخليه والجيش هم الى بيفجرو وبيغتالو ؟

بطلوا تخلف

دا يدل على انهم اسوء بكتير من الاعلام اللي ليل نهار بيشتموا فيه

س / الكلام فى السياسه فى المنتدى عمل خلافات كتيرة جدا بين

الاعضاء ؟ كنت شايف ان الحل الوحيد هو عدم فتح المواضيع

السياسيه فى المنتدى ؟

وقتها اه ..و دا حصل برضو بعد اقرار الدستور

بحيث الناس تهدا شوية

المشكلة ان ناس كتير بتاخد الموضوع بشكل شخصي

و دا شيء مؤسف

فتلاقي العضو دا عشان مع علان فبقى بيديله لايكات .العضو دا عشان مختلف مع دا سياسيا تلاقيه مش طايقه و حاجات من دي

س / ليه وافقتو ان الاعضاء تتكلم فى السياسه فى صفحاتهم فقط ؟

مراقبة الصفحات صعبة

انا لما قولت بلاش سياسة ماكنتش عايز استثني قسم ..بس موضوع المراقبة و الحذف صعبين مش سهلين

و بعدين قولت خليهم يعبروا و يطلعوا اللي في نفسهم بدل ما حد

يلبس حزام نافس و لا حاجه

س / انتا كنت واحد من الاعضاء الى دخلو فى خلافات مع

الاعضاء المؤيدين لـ ( رابعه ) ؟ كان ايه سبب خلافك معاهم ؟

أنا راجل ليه راي مركب ..

مش بشوف طرف ملاك و التاني شيطان

ممكن تكون دي مشكلتي معاهم بس

يعني انا لو بتناقش مع حد مؤيد للجيش بتعصب ..حواري معاه

هيختلف لأن انا عارف الاستهبال اللي بيحصل من الجيش او من

القضاء

لكن دا مش يخلي الطرف الاخر بريء ..فتبقى المشكلة من انه

عايز يشيطن الطرف التاني فقط و في نفس الوقت يمجد الاخر !

عارف لو انت مثلا قولتلي اليوم السابع وحشه ..مش هقولك حاجه

اشطه

لكن تقول اليوم السابع وحشه و الجزيرة كميلة

يبقى الشخص دا يستاهل انك تتكلم معاه بحيادية !!؟

س / بخصوص الحريات الى فى المنتدى هو مين بيحاسب

( طارق ) على كلامه او تصرفاته فى المنتدى ؟

أنا بابا

ابقى اعترض في الموضوع و قول انا ضد كذا

ما انت كدا كدا هتوصل لطريق منتهي

يعني لو مش طارق و نفرض رحت منتدى تاني ..

هتحاسب صاحبه ازاي او المسؤول عنه ؟

اظن انت ليك موضوع اجمد عضو كل واحد بيخش

يقول اللي في نفسه

س / طيب دلوقتى مطلوب منك تختار ( الافضل ) فى 2013 ودا

بعيد عن انك ادارى ولكن كـ ( طارق ) ؟

افضل مراقب

لوست بيرل و الماجيك

هات منه و امجد يفاضلوا بينهم

افضل مشرف

آركو بالينو

افضل عضو

دي عايزه دراسة و استشارة

سوبر ستار المنتدى

مورشو

افضل قسم بالمنتدى

النقاش

افضل موضوع او سلسله مواضيع

نورو نار بتكتب قصص حلوة

س / اخيرا تحب تقول ايه لاعضاء المنتدى ؟

كل سنة و انتوا بخير و تمنياتي بعام سعيد

س / هنشوفك ادارى حتى 2014 والا ناوى على ايه ؟

ناوي على خير

وبكدا بتخلص حلقه النهاردة من

( أجمد عضو )

[Lost Pearl]

حلقة حلوة اوى و المشكلة بتاعت الارشفة انا على ما وصلت لآخر الشرح كنت دوخت هههههههه

تعبتو انتو الإتنين أسئلة و إجابة

أن شاء الله معدلات المنتدى ترجع تاني زي الأول ،، انا ممكن اعمله دعايا بس لما أقبض

تسلم ايديكو كتير ع الاستضافة ،،

[big bốss]

رغم جمال الحوار

الا انك صدمتنى بجد ان المنتدى ممكن يقف و يموت بعد سنتين

دى حاجه تحزن

بس احنا هنخلد فيه يعنى بكره نتجوز و نشيت مع مرتاتنا

* نقطة انى طلعت من شخصية العام بدرى علشان المنافسه كانت قويه

و علشان خلافى السياسي بين كتير من الاعضاء

و انا نفسي اتصدمت من النتيجه

* و جميل شهدتك ان احسن قسم النقاش

* و فعلآ عاشق متيم شاكك فيه انه عضو قديم

* كل سنه و انت طيب يا طارق

[حَرفُُ هجآءّ]

حلقة جميلة اوووى مورشووووو
وبصراحه الاسئله جميله
وردود طارق شملت كل الجوانب
بس تزعل اووى لو فعلا المنتدى انتهى بعد سنتين
ان شاء الله هيفضل موجود بكل اعضائه

بس سؤال اتعملت الحلقة دى ف شهر ولا ايه ؟

[Lamees]

جميلة الاستضافة مورشوو
واهلا بدكتور طارق وافكاره واراءه المفيدة

[كوين ميرو]

ياااااطوله بالكم

حوااااار طويل بس جميل

عقليه دكتور طارق من العقليات المحترمه

احمد بجد مجهووود راااائع وانت فعلا علم من اعلام المنتدى

وتستحق لقب سوبر ستار المنتدى لمجهودك وبصمتك المميزه فى المنتدى

سنه سعيده للجميع يااااااارب

[Stop Ana Eltop]

ايه دا ماشاء الله كل دى اجابات انا توهت مابين السطور

وكنت مفكره المنتدى دا حاجه سهله وتافهه بس بعد العنكبوت والكود ماطلعتش كدا

اجابات حلوه يا دكتور بس سؤال هو انت ماينفعش حد يحاسبك ليه

دول حاسبوا مورسى بحاله ولا انت زى حوسنى مش بتتحاسب

حلقه جمييله يا مورشو تسلم لمجهوودك واستمر

[Words Whisper]

اقتباس سيبني ياعم براحتي شوية احنا هنلائيها منك و لا من أمي

رأي ممتاز =))




الكلام عن التفجير تبع مديرية الأمن كويس
بس دا

اقتباس فدا بيخليني اقول : تصدق من غير دين احسن !!

لا طبعا
إلغاء الدين بيعمل تشتت نفسي
لأنه بيلغي الجوانب الروحانية في الإنسان
فبيسد دا بحاجات تانية
وكلمة دين هنا مش أقصد الإسلام بس وإنما أي دين
فالمشكلة مش ف الدين
وإنما في الجهل بالدين
وليس من الـ لاجهل إن نُقصي الدين بسبب استغلال البعض للجهل به
عايزين نلغي الجهل يبئا نعرف ربنا ونعرف ديننا
ومعرفة الله مش معناها نقعد نقرأ حرام وحلال ونحفظ قرآن وأحاديث وكلمات مقدسة
هو يعني إيه نعرف فلان ؟؟ هل معناها اننا عرفنا اسمه وساكن فين ؟؟ لاااااا طبعا
معناها اننا قربنا منه و فهمنا صفاته .... الخ و لله المثل الأعلى ..


مش ينفع أكون شخص مؤمن بإله ودين وأقصيهم من حياتي ..




حلقة حلوة
الحوار فيها عجبني
د.طارق عقلية تُحترَم حتى مع الاختلاف معها ..


شكراً أ.مرشدي
شكراً د.طارق ..
دوام التوفيق ..

[عاشق متيم]

حلقه روعه يا مورشو
واخترت الاسئله بعنايه
دكتور طارق من الشخصيات الجميله وعنده كاريزما
واسلوب وطريقه متفرد بيهم
===========

اقتباس عاشق متيم حد محترم و كويس

تسلم على كلامك وده من بعض ما عندكم

============

اقتباس اللي استغربت من خروجه بدري هو عاشق متيم

كلامك فى حقى فى المستقنع كأنى كسبت اللقب وزياده

===============

اقتباس مش هقدر اقولك مين هي العضوية دي يمكن عاشق متيم ههههههههههه (بهزر )

كنت لسه بقول بهزار لدمعه حائره من يومين انى عضو قديم وكنت ادارى ههههههه ؛
اهو طارق جاب لكى الخلاصه وطلعت مراقب عام هههههههه
انا بطالب انى ارجع لمنصبى السابق كمراقب عام هههههههه
انت بكلمتك دى هتخلى الاعضاء اللى بتشك انى عضو قديم تشك اكتر هههه

==================

نورت الحلقة يا دكتور طارق
وبتمنى لك التوفيق والسعاده
ونفرح بيك بقى انا مش عارف انت مستنى ايه ؟؟
العمر اللى بيعدى ما بيرجعش
ويارب 2014 تبقى عام خير وسعاده عليك
========
حوار رائع يا مورشو وابدعت كالعاده
وبذلت مجهود كبير ودى مش حاجه جديده عليك

وان شاء الله 2014 يبقى عام خير وسعاده وتستقبل مولودك الاول
ربنا يجعلها ذريه صالحه طيبه مباركه تقر بها اعينكم
بالتوفيق

[روح صامتة]

اقولك ايه بس ،،
زعلت انه المنتدى حاله متدهور
هوة بصراحة انا كنت شايفة دا بس بقول يمكن المشكلة في الخمول دا الناس بقت ع المواقع بتاعت التواصل
بس عشان فيه كدا عامل وكده بس رائي ان احنا كلنا نقول لهيثم ومحمود يلا بقه حسنولنا المنتدى
في انتفاضة شعبية
وما عنديش حاجة اقولها على الشرح الي قلته غير ان انا مفهمتش اوي بس اهم حاجة قرأت
فيه نقاط بختلف فيها معاك بس مش ناوية اتناقش لانه مافي وقت :d
والحلقة كويسة شكلها خدت مجهود منكم بجد ^^
شكرا ي احمد ع الحلقة :d
شكرا ي طارق ع الاجابات :d