بنات<< هايفة ... تافهة ... رسيمة ... قلة ادب >> يوووووووه تانى

[ŌиĹч.Ḿё]

اعتقاد أن البنات
ما وراهاش حاجة غير الكلام فى
الموضة
وتسريحات الشعر
والماكياج
و مين عاكسنى
ومين بصلى
مين هايموت ويكلمنى ..

وان فيه جزء منهم بيتوتى يعنى مالهوش غير فى شغل المطبخ والقعدة أمام التليفزيون وحفظ الاغانى والافلام.. ومين قال ايه ويقصد ولا مايقصدش .

. طبعا أنا مابتكلمش عن المراه المصرية
.. لكن أنا بتكلم عن البنت المصرية
اللى لسه مشافتش دنيا المرمطة
واللى الكل بيبصلها على انها كائن ضعيف مسالم
وممكن يستغل بسهولة ويسلم برضه بسهولة
.. يعنى مش أكتر من انها سمكة ممكن اصطيادها بطعم مناسب وجذاب
.. وبعدين شويها وأكلها بالهنا والشفا


" احتمال " بس اللى أكيد ان مش كل البنات راكدين فى الميه ولو طلعوا منها يموتوا
.. فيه بنات كتير عايشين على الارض وشايفين الدنيا
وفاهمين قطارها ماشى ازاى ومحطاته فين ..
ودول بنات ذكية وبتفهم
, بيشوفوا من بعيد لبعيد
وبيتعلموا من بعيد بدون مايقربوا للخط الاحمر..

بس للأسف الناس برضه بتبصلهم على انهم متحررين
وعارفين اللى فيها
وبتعتبر ذكائهم نوع تانى ممكن يستغل أسوأ استغلال علشان كده تلاقى الناس بتتعامل مع النوع ده من البنات ببجاحة وبأقصر الطرق وده باعتبار ان ذكاءهم هايخليهم يمشوا أمورهم..

وفيه بنات بقى بتجيب من الاخر لانهم عارفين ان مهما عملوا ومهما راحوا موصومين بوصمة انهم بنات فى مجتمع الولد فيه هو بس اللى من حقه يعمل أى حاجة ويقول اللى هو عايزه من غير ماحد يعلق ,
والغريبة ان لسه فيه ناس لحد دلوقتى بتردد جملة " دا ولد وهو حر مفيش حاجة هاتضره " .

أما البنت فلازم يقفولها على الوحدة ويراقبوا تصرفاتها وقالت ايه ولمين وكانت واقفة بتتكلم وهى بتضحك ولا وهى مكشرة ده باعتبار ان البنت لما تضحك أو تبتسم وهى بتتكلم تبقى خرجت عن حدود الادب وتبقى بترسم وبتعيش الدور..
ولو اتكلمت وهى مكشرة تبقى برضه بترسم دور الادب والبنت اللى عايشة حياتها جد..
وياما تحت السواهى دواهى وراء التكشيرة دى أكيد فيه مليون سر وسر..
أما بقى لو البنت هادية بطبعها أو رقيقة يبقى يا سلام على السهوكة والرسم اللى على تقيل ويبقى هما دول البنات اللى نافعة واللى بتحاول تمشى أمورها بالصوت الهادى والمياصة والسهوكة..


ايه فى ايه؟! لاكده عاجب ولاكده عاجب ساكتين وحشين بيتكلموا برضه وحشين..
وفى الاخر هيفضلوا فى نظر الناس حبة بنات تافهة وهايفة مهما عملوا
والحل الاكيد ان كل بنت تعيش زى ما هى عايزة وميهمهاش أى حد ولا كلام الناس كده كده بيتكلموا بسبب أو من غير سبب يبقى مفيش فايدة من خوفكم..
ومافيش أحسن من التنفيض وتكبير الدماغ للكل..
مش انتو بنات هايفة..
أوكى اخليكم هايفين
بس محدش يبقى يحاسبكم..
وأهى هيافة بهيافة..
المهم تعيشوا مبسوطين مش مقهورين



اشطة عليكم يا احلى بنات فى الدينا
والله التوبيك دة عشان خاطر عيونكم انتوا وبس
لما لاقيت بنات كتير بتزعل منى لما بعمل مواضيع ضد البنات

ويارب يعجبكم
مستنى احلى اراء فى الدنيا

[Şα3Đ..♥]

اقتباس بس اللى أكيد ان مش كل البنات راكدين فى الميه ولو طلعوا منها يموتوا .. فيه بنات كتير عايشين على الارض وشايفين الدنيا وفاهمين قطارها ماشى ازاى ومحطاته فين .. ودول بنات ذكية وبتفهم

ممكن اعلق علي الجزئيه دي
هو طبعا في الحلوين والوحشين
وطبعا في ايطار التطور والانقلاب في الاخلاق
من ناحيه البنات والشباب
بعضهم طبعا مش كلهم
والدليل
كلامك
بس اللي اقدر اقوله
ان في الحلو وفي الوحش
وربنا يهديهم ويهدي بنات المسلمين
ويهدينا اجمعين

وشكرا ليك علي الموضوع
وتقبل مروري

[ŌиĹч.Ḿё]

شكرا على مرورك نورت

[ســــــــــاندي بيل]

اولا ميرسي ع موضوعك

زي ما قولت ان فى بنات تافهه وهايفه وفى بنات عاقله وزكيه وفاهمه الدنيا

لاكن من رائي ان مش اى بنت تهتم بلموضه وتفكر تلبس وتخرج وتعيش حياتها تبقه تافهه

وممكن تلاقى العكس كمان تكون بنت مابتلبسش وكل همها دراستها ومستقبلها ولو اتكلمت معاها

تلاقي ان تفكيرها ميح بمعنى اصح تلاقيها انسانه مش مستعده تفهم انت بتتكلم فى ايه من اصله

ده كان رائي ع موضوعك

وميرسي مره تانيه علي الموضوع

[ŌиĹч.Ḿё]

اولا شكرا على ردك دا وبعدين كان فى جزئيات كنت هرد عليهابس مش ينفع

نورت التوبك شكرا

[the silent love]

عندك حق والله احنا احتارنا وبقينا اي حركه نعملها او اي كلمه نقولها لازم نعملها الف حساب حتي لو كانت عاديه خوفا من الناس والمجتمع اللي احنا فيه اللي اما بيصدق اي كلمه تقولها عشان يقلبها ضدك وماشاء الله مجتمعنا ده مش شاطر الا في انه يقلب اي كلمه ع مزاجه.......في بنات كتير بتحاول تتجاهل كلام الناس بس صدقني برضه مش بتعرف لانها عايشه وسط الناس دي للاسف المشكله في الجتمع اللي اما بيتعود ع حاجه معينه مش بيحاول يفكر فيها تاني او يغيرها لو غلط...........شكرا ع كلامكlemooor وكويس بجد ان في حد فاهم اللي كتير من اللي البنات بيعانوا منه

[Mo7aMeD Lotfy]

موضوع جميل يا غالى

فى انتظار جديدك

خالص تحياتى

العندليب

[نور حبى]

بصراحه موضوعك هادف وانا من وجهة نظرى ان زى ما فى بنات هايفة فى بنات ذكية جداااااا

وزى ما فى بنات بتهتم بالموضة فى بنات لا تهتم بهذه الامور

لكن احسن شئ هو الوسطية يعنى تتهتم بالمظهر وفى نفس الوقت تهتم بدراستها او بعملها حتى تكون نموذج مشرف نفتخر به

[ســــــــــاندي بيل]

اقتباس المشاركة الأصلية كتبت بواسطة **lemo0or** اولا شكرا على ردك دا وبعدين كان فى جزئيات كنت هرد عليهابس مش ينفع نورت التوبك شكرا

ميرسي على ردك ليه

بس على ما اظن ان ده موضوع للنقاش بين الاعضاء

بمعنى انك لم كتبت الموضوع كتبته عشان يكون فى مناقشه وتقدر تفهمنا ونفهمك

واذا حضرتك مش هينفع ترد ع جزئيات فى ردي لموضوعك

يبقه سوري ليك واسمحلى اقولك انك كاتب الموضوع مش للمناقشه لا لفرض رائيك وخلاص

شكرا ليك مره تانيه

[ŌиĹч.Ḿё]

اقتباس:
المشاركة الأصلية كتبت بواسطة ســــــــــاندي بيل
اولا ميرسي ع موضوعك

زي ما قولت ان فى بنات تافهه وهايفه وفى بنات عاقله وزكيه وفاهمه الدنيا

لاكن من رائي ان مش اى بنت تهتم بلموضه وتفكر تلبس وتخرج وتعيش حياتها تبقه تافهه

وممكن تلاقى العكس كمان تكون بنت مابتلبسش وكل همها دراستها ومستقبلها ولو اتكلمت معاها

تلاقي ان تفكيرها ميح بمعنى اصح تلاقيها انسانه مش مستعده تفهم انت بتتكلم فى ايه من اصله

ده كان رائي ع موضوعك

وميرسي مره تانيه علي الموضوع



مدام انتى بقا مفكرة ان دا ضعف منى لا يبقى احساس غلط وياريتيكون عندك حسن الرد شويا

حضرتك بتقولى انتى احنا هنلبس ونخرج ونعيش حياتنا دلوقتى مبقاش فى حياء عند البنات

بصراحه يعنى وانا فى نظرى البنت اللى بتخرج دى وتقولى انا عايشه حياتى مع الموضه بتبقى مش

عندها قيمه ولا شخصيه انتى ايه الفرق بينك وبين البنت اللى بتكون محجبه ؟؟؟؟

على العموم انا مش عايز اكتر معاكى فى الكلام عشان بتزعلو من الواحد لما بيتكلم وبتشتكو

للادارة على العموم ردك اسعدنى وبتمنى اشوفك ديما وانشالله هتلاقى جايب ليكى مواضيع

بنفس الصيغه دى وعايزك تشكرينى الراى

شكرا