كيف تتكلّم مع الناس ؟

[مي عز الدين]

عنوان غريب مش كده؟؟


عمرك لقيت إنك مش عارف تتواصل مع حد معين؟؟ رغم إنك فعلا عايز تكلمه؟
لقيت مرة واحد مابتحبّش تتكلم معاه خالص؟؟ كده لله في لله؟؟

هل مرة لقيت إنك مش عارف تبيع سلعتك للزبون بتاعك رغم إنك حاولت بكل إخلاص؟
أكيد أيوه.. مش كده؟

طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل.. والحاجة دي اسمها

التحدث بإيجابية



في البداية عايز أوضح لك حاجة مهمة جدا عن عقلنا اللاواعي
هنعرفها من المثال الصغير ده :




هاقول لك جملتين عايزك تركز فيهم قوي وتنفّذ اللي فيهم

ماتفكرش في وردة حمراء
ها ها ها.. ينفع؟ طيب خد دي كده
ماتتخيّلش سيارة سوداء

ها؟ خدت بالك من اللي حصل ده؟؟ أكيد أكيد فكرت لا إراديا في الوردة الحمراء وفي السيارة السوداء كمان
*********


إيه اللي حصل ده؟

اللي حصل يا جماعة إن العقل اللاواعي بتاعنا مابيسمعش الكلام قوي.. ببساطة بياخد الجملة ويقعد يفكر فيها كلمة كلمة عشان يقدر يستوعبها.. فعلشان تفهم الجملتين اللي فاتوا كان لازم العقل اللاواعي بتاعك يتخيل الوردة والسيارة السوداء

يعني إيه؟؟ يعني لو أنا عايز أأثر على العقل اللاواعي للشخص اللي باتكلم معاه, ومش عايزه يفكر في وردة حمراء.. يبقى لازم الجملة مايبقاش فيها وردة حمراء .. صح كده؟؟
*********

طبعا المسألة مش مسألة وردة حمراء وسيارة سوداء
عشان تفهم قصدي اقرا الأمثلة دي

البائع : الأسعار بتاعتنا مش غالية.. احنا مش حرامية ونصابين
الجملة دي غلط تماما وهتأثر في اللاشعور بتاع الزبون.. هيلاقي نفسه ببساطة ( مش مستريح) للصفقة دي, ومش لازم يكون عارف ليه.. لكن احنا عارفين طبعا

جملة (مش غالية) دي هيركز اللاشعور على كلمة (غالية) لا إراديا.. والجملة التانية (احنا مش حرامية ونصابين) هيفهم منها إنهم (حرامية ونصابين).. ده أكيد
يبقى المفروض البائع يقول مثلا : أسعارنا مناسبة جداً .. احنا يهمنا ثقة العملاء

*********


نفهم من كده إيه؟؟

نفهم إن إنت لو عايز تأثر في اللي قدامك بحاجة, يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض
الطبيب : ماتخافش.. الحقنة مش بتوجع خالص
هه.. إيه رأيك في المثال ده؟؟
يلاّ مع بعض نطلع الكلمات السلبية :

أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف
ثاني كلمة سلبية هي: (مش بتوجع).. دي هتخليه يتخيل الألم والوجع
يبقى المفروض يقولها ازاي؟؟


الطبيب : اطمئن.. هتحس براحة بعد ثواني
( ملاحظ إننا ماذكرناش كلمة "حقنة" أصلا؟ )

ملحوظة: لكل الأطباء اللي بيقروا الموضوع ده.. التكنيك ده مفيد كتير جدا -كدكتور - في إقناع المريض بأخذ الحقنة

تجنب الكلمات السلبية زي: ماتخافش، ماتقلقش، زي شكة الدبوس
كلّمه يا دكتور عن الراحة والشفاء وإن حقنة البنج مريحة لأنها حقنة بنج أساساً
*********

خدت بالك؟
ببساطة لأن هي دي الحقيقة, بس المهم هنوصلها له بأي طريقة؟
البنت لخطيبها : ماتقلقش يا حبيبي.. عمري ما هاخونك أو أكرهك
طبعا كلنا حسينا بصدمة من الكلام ده.. لكن احنا عرفنا ليه.. عشان الكلمات السلبية زي: ماتقلقش- هاخونك – أكرهك

المفروض الجملة دي تتقال كده
البنت لخطيبها : اطمئن يا حبيبي.. أنا مخلصة لحبنا وهافضل أحبك على طول
شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى
*********


نستفيد من الكلام ده إيه بقى؟؟

نتكلم عن الحكمة بتاعة التهاردة

مهم جدا معنى الكلام الذي نقوله.. والأهم هو: كيف نقول هذا المعنى
استخدم كلمات إيجابية دائما في حياتك.. ولاحظ الفرق الذي سيحدث في علاقاتك مع الناس .. واعرف الحقيقة دي..

الناس اللي بيستخدموا كلمات سلبية كتير في كلامهم, الناس بتبتعد عنهم ومش بتحب تتكلم معاهم .. افتكر حد مش بتحب تتكلم معاه.. يا ترى إيه السبب؟؟ بيشتكي دايما من الظروف؟ بيشتم كتير؟
بيثير الإحباط؟؟ ركز في كلامه هتلاقي الكلمات اللي قلنا عليها.. الكلمات السلبية

على عكس الناس اللي الناس بتحب تتكلم معاهم.. فكر في واحد بتحب تتكلم معاه وبتستمتع بكده.. مبتسم؟ متفائل؟ بيهوّن على الناس اللي حواليه مشاكل الحياة؟ ركز في كلامه هتلاقي الكلمات اللي بنقول عليها: الكلمات الإيجابية
*********

قبل ما نختم بقى تعالوا نلعب لعبة

اختار الجمل والكلمات الإيجابية اللي توصل المعنى بصورة صحيحة, وحط قدامها علامه: صح

أنا مش عبيط.. أنا فاهم كل حاجة
صح غلط

خليك ذكي وركز معايا
صح غلط

الجو النهارده كويس
صح غلط

ياباشا البضاعة بتاعتي مش بتعفن بسرعة
صح غلط

ماتقلقش.. الموضوع بسيط
صح غلط

هابطّل السجاير, واكون إنسان جديد
صح غلط

البارفان ده ريحته مش وحشة خالص.. بالعكس
صح غلط

ماتفتكرش إن صحتي راحت.. أنا زي الفل
صح غلط

مش هاخذلك يا معلّم
صح غلط

أنا إرادتي قوية جدا.. ثق في كده
صح غلط

ماتبقاش غبي يا بني.. فتّح مخك معايا
صح غلط

بحبك
صح غلط

[محمد الشريف]

مى

موضوع رائع ولكن التحدث غالبا مايعبر عن شخصية المتحدث وموضوعك بأمثلته من مصادفات التعاملات

التى لاتخلوا من توقع حدوثها وهناك مثل يقول : الملافظ سعد ... فهناك تعامل عابر يترك أثر طيب فى نفس

المتلقى للحديث وهناك العكس لاسيما فى مجالات التعامل مع محلات الخدمات أو الشراء ومإلى ذلك..

فأحيانا يكون الدافع للتعامل معها حسن الأسلوب والابتسامة وأحيانا العكس .

رائع ماطرحتى وموفقة دوما وتقبلى تحياتى

[ياسمينة البلاد]

توبيك مية مية و احلى من الطماطم مع الطعمية يا ميوي .....



غلط

صح

صح

غلط

صح

صح يا شعبولة لازم تبطل سجاير


غلط


غلط


غلط



صح



غلط

[شموسه]

موضوع جميل جدا واستفدت منه كتير وفعلا لما فكرت فى الناس اللى مش بحب اتكلم معاهم لقيت فعلا كلامهم كده لكن الناس اللى بلاقى الناس بتستريحلهم على طول كلامهم جميل

ميرسى يا قمر وتسلمى على الموضوع الجميل

[ساحل الوفاء]

موضوع رائع

[مي عز الدين]

اقتباس:
المشاركة الأصلية كتبت بواسطة محمد الشريف
مى

موضوع رائع ولكن التحدث غالبا مايعبر عن شخصية المتحدث وموضوعك بأمثلته من مصادفات التعاملات

التى لاتخلوا من توقع حدوثها وهناك مثل يقول : الملافظ سعد ... فهناك تعامل عابر يترك أثر طيب فى نفس

المتلقى للحديث وهناك العكس لاسيما فى مجالات التعامل مع محلات الخدمات أو الشراء ومإلى ذلك..

فأحيانا يكون الدافع للتعامل معها حسن الأسلوب والابتسامة وأحيانا العكس .

رائع ماطرحتى وموفقة دوما وتقبلى تحياتى



مرورك الاروع

نورت التوبييييييييك

لك خالص ودى واحترامي

[مي عز الدين]

اقتباس:
المشاركة الأصلية كتبت بواسطة ياسمينة البلاد
توبيك مية مية و احلى من الطماطم مع الطعمية يا ميوي .....



غلط

صح

صح

غلط

صح

صح يا شعبولة لازم تبطل سجاير


غلط


غلط


غلط



صح



غلط



ميييييييرسي يا قمر لمرورك الرائع

بس الاجابات هتكون كالتالى انت ملخبطه شويه

اقتباس أنا مش عبيط.. أنا فاهم كل حاجة صح غلط خليك ذكي وركز معايا صح غلط الجو النهارده كويس صح غلط ياباشا البضاعة بتاعتي مش بتعفن بسرعة صح غلط ماتقلقش.. الموضوع بسيط صح غلط هابطّل السجاير, واكون إنسان جديد صح غلط البارفان ده ريحته مش وحشة خالص.. بالعكس صح غلط ماتفتكرش إن صحتي راحت.. أنا زي الفل صح غلط مش هاخذلك يا معلّم صح غلط أنا إرادتي قوية جدا.. ثق في كده صح غلط ماتبقاش غبي يا بني.. فتّح مخك معايا صح غلط بحبك صح غلط

ثانكس يا قمر لتواجدك الرائع
دمتى بكل الحب

[مي عز الدين]

اقتباس:
المشاركة الأصلية كتبت بواسطة شموسه
موضوع جميل جدا واستفدت منه كتير وفعلا لما فكرت فى الناس اللى مش بحب اتكلم معاهم لقيت فعلا كلامهم كده لكن الناس اللى بلاقى الناس بتستريحلهم على طول كلامهم جميل

ميرسى يا قمر وتسلمى على الموضوع الجميل




مرورك الاجمل يا شموسه

ثانكس لتواجدك الجمييييييييل

دمتى بكل الحب

[مي عز الدين]

اقتباس:
المشاركة الأصلية كتبت بواسطة ساحل الوفاء
موضوع رائع


مرورك الاروع

نورت التوبيييييييييك

[محمود تيتو]

والله كلام جميل جداااااااااااااااا