صوت السكـــــوت " انا وقلمي والموسيقي

[Şα3Đ..♥]

صوت السكوت وسط البيوت والليل بيودع القمر والشمس حاضنه ف الملكوت ماشيه تصبح ع البشر تغزلهم من النور خيوط وتزغلل ف عيون الكسل وتقوله قوم الفجر فات وبعد السواد ما يقوم يموت بحوالي تلت اربع ساعات يوميا اصحي ف وقتنا اقعد افكر ف الحاجات ومين لسه باقي عندنا ومين اللي مات مين فكر انه يهدنا ومين جه يلملم جرحنا وباقي الفتات اه يا رفاق اه يا فراق نفس المعاني والحروف سيبتونا نلعن الاشتياق وسط الظروف والضحكه مليانه نفاق مليانه خوف اه يا حبيبي ياللي غاب الليل طويل هات الجراح ويا العذاب عذب يا ليل اه يا زمان علمتنا ازاي نخاف وزرعت خوفنا ف قلبنا والقلب شاف مين كان يصدق اننا الفرح اللي فاض مننا يصبح جفاف كنا زمان ميت الف حد متلفلفين بنداوي بعض دخل الزمان وف لحظه هد كل البنا فاكرين با ولاد من كام سنه كنا بنتجمع هنا وانا وانتوا والليل والسهر كنا ندوب غلبنا فاكرين كمان ساعه المطر كنا نلملم نفسنا ونتحامي في دفو الكلام و نقول حكاوي عن البشر واحنا ف غايه الانسجام ونقعد نقلب ف الصور و بعدها بنقوم ننام امته نعيد اللي حصل امته الليالي دي تعود ادونا حتي شويه امل خلينا نقوي ع الصمود هون يارب ع اللي غاب ومعاه يارب وانصفه سامح يارب اللي ساب بكره الليالي تعرفه واصبينا من بعد الشياب اصل احنا قربنا نموت

[* ادم *]

جميلة جدا يا سعد

عجبتني

تسلم ايدك عليها

[phalsteen]

انت موهوب يا سعد يا ابني
بس نصيحة مني
العب بعيد
ومتجيش علي اختك سما
علشان هتخسر
عجبتني اوي يا سعد
كالعادة معنديش رد ليك

[العاشق الذى لم يتب]

إيه الحلاوةدى ياسعد
انت شاعركبيراوى
وحساسا اوى
بس بلاش نبرة التشاؤم اللى بشوفهافى كتاباتك
تسلم الايادى
وربنايوفقك فى المسابقة
تحياتى وودى

[Şα3Đ..♥]

اقتباس المشاركة الأصلية كتبت بواسطة * ادم * جميلة جدا يا سعد عجبتني تسلم ايدك عليها

الاجمل هو مرورك يا ادم
نورتني بجد
تسلم يا غالي

[Şα3Đ..♥]

اقتباس المشاركة الأصلية كتبت بواسطة Nefertiti انت موهوب يا سعد يا ابني بس نصيحة مني العب بعيد ومتجيش علي اختك سما علشان هتخسر عجبتني اوي يا سعد كالعادة معنديش رد ليك

ربنا يكرمك يا ابله
هههههههه
حاضر ماشي
هحاول اخسر بقي
:-p

[Şα3Đ..♥]

اقتباس المشاركة الأصلية كتبت بواسطة العاشق الذى لم يتب إيه الحلاوةدى ياسعد انت شاعركبيراوى وحساسا اوى بس بلاش نبرة التشاؤم اللى بشوفهافى كتاباتك تسلم الايادى وربنايوفقك فى المسابقة تحياتى وودى

ربنا يكرمك يا اخي والله
بس ديما بقول
ان الكاتب علشان يبان انه موهوب
لازم يطلع اللي جواه
وده للاسف اللي جوايا
مش هينفع اكدب في اللي بكتبه
فا ادعيلي بقي حاجه حلوه تيجي علشان اكتبلها

ونورتني والله

[™Amiliya]

قلمك بجد جميل سعد

دمت بتميز مستمر

[a7med -3del]

بتكتب حلو اوى

وعندك صور وتسلسل وقفلات حلوة جدا

وفى كلام صيغاه بطريقة جديدة

احييك

[توحد ارواح]

بوح يتسم بالبساطه ورقى الكلمات
جدا جميل بالتوفيق