Show me the meaning of lonely فـ دائرة الضوء

[phalsteen]

اهلا ومرحبا بكم
في حلقة جديدة من دائرة الضوء
مع ضيف اجبرنا ابداعه علي تسليط الضوء عليه

هـــــــــــو


نجم لفت جميع الأنظار إليه , بأسلوبه العذب ,,
تميز في منتدانا بالرزانه , والهدوء ,الغموض ...
وتحيط به أيادي أعضاء المنتدى رافعة القبعات أعجاب وتقدير بقلمه وبأخلاقه ..
مبدع صاحب كلمات عذبه تدق أجراسها بالقلوب
وأَسحَرَ الجميع بإبدآعه ورزآنة عقله
أسعدنآ كثيراً بتواجده الدائم وبِنشاطه الملحوظ فـ ابداعات الاعضاء
بكل باقات الورود نُرَحِبْ بالعضو

Show me the meaning of lonely

من مبدعى المنتدى

كل دا اسم يا راجل
ايه اللي ورا الاسم دا ؟

اولا بحييكى على الكلام الجميل ده . اللى هو كتير فعلا عليا
و يارب اكون واصل ولو لواحد بس ده يكفينى
ثانيا موضوع اسمى مرتبط باغنية بنفس الاسم لباك استريت بويز . عجبتنى جدا ولما ترجمتها خطفتنى كلام ولحن واتعلقت بالحالة دى وحبيتها . دى كل الحكاية

ضع بيانات بطاقتك الشخصية

احمد عادل
القاهرة السلام
مواليد 29 -8-1987
بشتغل موظف فى شركة ادوية (ابن سينا فارما )

متضمنه الاسم والعنوان والوظيفه
والهويات والمستوي الدراسي والانتماء الكروي بالمرة ؟

الهوايات مممممم سماع الاغانى وتحديدا لمحمد فؤاد وبحب جدا منير وبسمعله
وطبعا منساش عمرو وتامر عاشور ورامى جمال وحماقى وتامر
الدراسة معهد حاسب الى
الانتماء الكروى بقى ده حكاية . انا زملكاوى متعصب ومش بحب الاهلى نهائى ومفتكرش انى ممكن احلم اشجعه

الله اكبر وكمان زملكاوي


ليه منتديات بنات مصر
وياتري اسم المنتدي عاملك مشاكل ولا حاجة ؟


ليه ميبقاش ولاد مصر ؟ وليه مش شباب مصر
تحسى كده اللهم اجعله خير ان البنات واخدة كتر من حقها
بس كله عند ربنا ههههههههههه هاقول ايه
على فكرة عمر الاسم ماعمل جمهور . المهم المضمون . وانا بحب المنتدى ده جدا

بتدخل اقسام تانية غير
الابداعات الادبيه ؟

بصراحة نادر جدا جدا يمكن عشان مش بلاقى نفسى الا فى الابداعات
مش عشان انا مبدع لاسمح الله . لكن عشان انا بحب العامية جدا وبعرفها

لمن يقرأ احمد .. من الشعراء والأدباء ؟
وبمن يتأثر ......؟

مرة واحدة فى حياتى قريت لنزار قبانى ولكن رغم موهبته الا انه فى كلام انا بشوف انه ميصحش اصلا انه يتعرض . لكن على المستوى الشخصى مش بقرا ومش غاوى قراية

متى تكتب ؟

لما بحس حاجة معينة . ولو محستش مبكتبش وكتير جدا بكتب وامسح بلا عودة
عشان دايما بشوف روح الكلمات احساسها وانا مش مستعد اقدم شىء ميت

ولمن؟
ولماذا؟

لمن
بكتب لنفسى ولكل حد عايش حالة قدرت اوصفها بكتب للذكرى عشان يكون عندى رصيد من الزكريات على النقيدين
لماذا اكتب ممممممممممم
اولا واخيرا لانى بحب اكتب جدا ومهتم جدا واتطورت كتير من سنة 2006 لحد النهاردة وانا بتقدم كتير . وعمرى ماصنفت نفسى شاعر ولا كاتب ولا اى كلام . وده مش تواضع ولا حاجة
انا مش حد دارس ومعرفش الكلام الكبير بتاع الوزن والقافية وكل ده . زى ماقولتلك بكتب عشان بحب الكتابة ولو نجحت فده شىء يفرحنى .لكن مش هاصنف نفسى ابدا

كتابات الي حد كبير غامضه يا احمد وحزينه
هل برأيك الحياه تستحق أن ندفن أنفسنا في أحزانها الى مدى طويل؟

لاء طبعا الحياة اجمل من كده بكتير اوى وكل حد فينا جواه وجع يمكن لسه بيعيشه ويمكن عاشه زمان لكن كيد مرت عليه ظروف غيرت كتير فى ملامحه
وعشان الحياة اغلبها مش فرح . فانا كتير عبرت عن الحالة دى لانها بتسود القلوب رغم لحظات الفرح اللى ممكن تيجى صدفة

لو حسبت عمرك الذي مضى وعمرك القادم أيهما سيكون أكثر ..سعادتك ام شقاءك ولو ستعيش عمر بعده مديد ان شاء الله..هل تظن انك ستعيش من السعاده القدر ذاته الذي فاتك؟

اكيد الحزن اكتر . كل الفكرة انى جوه كل حد فينا اسرار كتيرة اوى . يمكن ميقدرش يتخطاها . ويمكن يقدر ويتكلم ..س انا بصراحة ظلمت نفسى كتير زمان وقصرت فى حقها
وده سبب تغييرى من حاجة لحاجة ومن حالة لحالة .. لكن فى الاخير بحمد ربنا وبتمنى اعيش واموت وهو راضى عنى . ويتجاوز عن كل خطا فى حياتى

لكل منا بصمات ممميزة في حياته
ما هي أكثر بصمه مميزة قد تركت أثر واضح بحياتك

البنات عموما . والتجارب اللى عيشتها

لو كان بإمكانك أن تملك مفتاح العالم ليوم واحد ماهو اهم قرار ستتخذة سواء على الصعيد الشخصي او العالمى


على الصعيد الشخصى . هاحبس كل الناس فى اوضة مقفولة واعيش لوحدى اليوم ده بعيد عن الصداع والدوشة والهم والتفكير
على الصعيد العالمى . هاعمل الدول العربية كلها دولة واحدة . وزى مافى يورو نعمل الجنيه العربى . نفسى قبل ماموت احس اننا فعلا واحد فعلا مش كلام جرايد

من هم الأعضاء الذين تحب ان تقراء لهم ؟

بصراحة
جبل عالى بكتب حلو جدا وهيا شخصية متميزة بجد
ودمعة حائرة بسميها الشاطرة بتعرف توصل كلامها لكل الناس
وانتى فى حاجات قريتها ليكى بتشدنى وحبيتها
شاعر الحب عنده رسالة وحروف جميلة بس محتاج بعد مايكتب يعمل مونتاج ويبص تانى على اللى كتبه هيكون حاجة هايلة بجد
ممممممم فتحى عيسى متميز .. القيصر طبعا حبيبى
كده مش هاخلص المنتدى كله

هل جميع ما تكتبه ينم عن حالتك النفسيه ام ان هناك استثنائيات لكتاباتك ؟

هههههههههههههههههههه
منتهى النجاح لما الاقى حد بيقولى هون عليك ومتنسهاش وسيبها وعيش وربنا يعوضك
لدرجة انى حد قالى انا دمعت والله من الكلمات دى وليه عملت كده
وانا ابعد مايكون عن الحالات دى . انا بعيش الحالة باحساسى انا . وساعات بيكون فعلا حالتى بس مش كتير
ده معنى انك تكون ناجح

خاطرة قرأتها وكانت تعبر عن شيئ معين في حياتك الخاصة ماأسمها ؟ومن كاتبها ؟

هشام الجخ بصراحة مالوش حل بيمسنى كل قصايده وخصوصا قصيدة اسمها نانا دى لمستنى اوى

احسن اجابه شوفتها لحد دلوقتي بعد الزمالك بئه
الله ينور عليك

من هو صاحب القلم الذي يقول له احمد كفى لاأستطيع الردعليك ؟ ولماذا ؟

جبل عالى والقيصر

هل للحب دورا في حياة احمد الان

الحب ليه دور فى حياة كل بنى ادم مش احمد بس
واللى بيجمعنا حاليا هو حالة حب بالحب احنا عايشين
لكن لو تقصدى الجانب العاطفى . اكيد طبعا ليه دور . او عل الاقل كان ليه

هل سبق واعجبت بعضوة هنا ؟

اعجاب بشخصية محترمة ومجتهدة فى كتير اولهم جبل عالى ودمعة وانتى بالترتيب كده
بحس بمجهودهم فى المنتدى بجد
لكن لو تقصدى اعجاب وحب وكده . مستحيل طبعا اصل احنا مش انيمى عشان نتعلق بكلام وصورة الحب حياة بتجمع بين اتنين . ممكن يكون فى استلطاف من شخص للتانى وبداية حاجة . لكن عشان تكمل فى عوامل كتيرة وهتكون محتاجة جراءة وكلام ومقابلة وده صعب يحصل فى النت . مش صعب اوى فى الزمن ده بس هنقول صعب لاننا فى مجتمع اسلامى شرقى

قولت بحبك لعضوة هنا من عضوات المنتدي

دانا مقولتش بحبك للى حبيتها . هاقولها لعضوة . مفتكرش انى بالسذاجة دى

ولا اتقالتلك ؟

هاضحك طبعا واقولها كفانا هبل

عندك مانع تقولنا اسم حببتك او خطبتك او المدام ؟

نو كومنت



لو المدام المستقبلية قالتلك
يانا يا المنتدي دا

المنتدى طبعا . هههههههههههههههه

بصى انا محبس حد يقيدنى . واعرفى حاجة الغلط مش محتاج منتدى وفيس بوك الغلط جوانا . زى مالصح جوانا . من هنا بقى نقوووووووووول . الثقة

طلبت تسجل وتشارك هنا

معنديش مانع تسجل وتشترك تحت نظرى . ونرجع تانى ونقوووووووووووول . الثقة اساس الحب
قالتلك شغلي اهم من موضوع الاطفال والحكايات دي
هاطلقها . واقولها بيت ابوكى اولى بيكى . ومفتكرش ان انا الشخص اللى ممكن يتقاله كده

حبتها وبعدها قالت انك مرتبطة ومحبتكش

ممممممممممممم بصى انا متوقع اى حاجة من اى حد فمش هندم على حد . بس مفتكرش تحصل لانى الى حدا ما بفهم وخصوصا البنات . بالتجارب مش بالكلام . واصلا اللى تقول كده تبقى اصلا ..... الله يسهلها بقى

هدي نفسك انت هتضربني ولا ايه

ايه بئه مواصفات حوا المثاليه في وجهه نظرك ؟

حوا المثالية .
بنت شقية . ضعيفة وقوية . محترمة ومتربية
تصون ماتخون . تعشق بجنون .
واكون فى نظرها كل الكون
من وسط ناس متأصلين . وعندها دين
وتكون حلوة طبعا . ماهو مش لازم تكون كل ده ووحشة . اكيد فى بالمواصفات دى وحلوة او على الاقل . مقبولة

ربنا يرزقك ان شاء الله
بس انت قول يارب

انت مع فكرة المساواه يا احمد ؟

المساواة .. موافق لو البنت تدخل الجيش وتبقى عسكرى وشاويش
وتشتغل فى قهوة تقدم شيشة . وتشتغل تاكسى وتشتغل عامل بناء وتشيل اسمنت ورمل . وتشتغل مبيض محارة ونقاشة . مممممممم
لما ده يحصل ابقى كلمينى عن المساوة
وبعدين دى كلمة رفضها الدين . ازاى انا اقبلها ؟

ايه رأيك في البرنامج

فضايح بعيد عنك . اول مرة اشترك . ربنا يستر بجد

ندمان انك وافقت

مش عارف . بس انا جرىء بطبعى . ربنا يستر

عاوز تقول رساله منك لاي حد هنا
ياتري لمين وهتقول ايه

معنديش رسايل معينة الا . كل سنة وكل ام طيبة ويارب مايحد يتحرم من امه . ويارب رمضان يجى علينا ونكون اقرب لربنا . وياريت نبطل مجاملات شوية . عشان كل ماكتب الاقى الرد . انت مبدع . مفيش مرة انت تعبان . ايه الهبل اللى انت كاتبه ده . حاجة كده من اللى تفتح النفس

ههههههههههههههههه
تحياتى للجميع

نورتنا

وبكدة انتهت حلقتنا
والي لقاء جديد
وضيف اخر فــــ دائرة الضوء

[morshooo]

السلام السلام السلام السلام
^_^
منور يا معلم اليوميات
واجابات واضح انها لشخصيه مميزة
الحاجا الوحيدة الى معجبتنيش
انك زملكاوى ههههههههههه

[AHMED SEVEN]

محدش قلك شجع الاهلى يا معلم احنا ممكن نيدى للزمالك لو عايز ههه

كلام شخص واعي واجاباتك مميزة ..

شكرا ريـا على الحوار الرائع ههه .. اسئلة حلوة واجابات قوية

موفقين

[العاشق الذى لم يتب]

جميل شاعرنا أحمد
اول مرة اتشرف بمعرفة اسمه
مع انى نيمه بيقهرنى خالص
اناشخصيا كتيريعجبنى اشعاره وخواطره
ربنايوفقك اخى الكريم
بس ماليش حظ معاك
سما
شكرا على البرنامج الجميل
والاسئلة الرائعة
دوما التوفيق لك
تحياتى

[phalsteen]

اقتباس المشاركة الأصلية كتبت بواسطة ahmed seven محدش قلك شجع الاهلى يا معلم احنا ممكن نيدى للزمالك لو عايز ههه كلام شخص واعي واجاباتك مميزة .. شكرا ريـا على الحوار الرائع ههه .. اسئلة حلوة واجابات قوية موفقين

الله يخليك
نورتنا يا فندم

[phalsteen]

اقتباس المشاركة الأصلية كتبت بواسطة العاشق الذى لم يتب جميل شاعرنا أحمد اول مرة اتشرف بمعرفة اسمه مع انى نيمه بيقهرنى خالص اناشخصيا كتيريعجبنى اشعاره وخواطره ربنايوفقك اخى الكريم بس ماليش حظ معاك سما شكرا على البرنامج الجميل والاسئلة الرائعة دوما التوفيق لك تحياتى

لا منا استضفته مخصوص
علشان الفضول اللي عند الاعضاء
اصله شخصية مختلفة وغريبه
ههههههههه
منور يا رفعت والله

[Lost Pearl]

أهلا يا احمد منور الاستضافة

إجابات جميلة إلا دي

اقتباس قالتلك شغلي اهم من موضوع الاطفال والحكايات دي هاطلقها . واقولها بيت ابوكى اولى بيكى . ومفتكرش ان انا الشخص اللى ممكن يتقاله كده

ههههههه ليه يعني هي دي جريمة

و لا الجواز عشان تخلف بس و هي مش مهمة

تسلمي يا سما ع المجهود الجميل

[جبل عالي]

تااااااااااااني ؟؟؟ اسمي مكتووووب تاااااااااني ؟؟

ماشاء الله سمسمة حوار ولقاء مميز

مع شخصية بجد وصفتيها صح جدا


وحقيقة مش عارفة أشكرك أزاي احمد على رأيك بجبل

اهم شيء ان يفضل جبل صورته بينكم متتغيرش


وحقيقة احمد من الشخصيات اللي عارفة هدفها في الكتابة

يعني لو بيكتب لاجل يوصل احساس معين حتى لو قسوة

بيبرع فيه جداااا وبيقدر يخلينا نشعر بقمة القسوة

ولو احساس تاني ممكن يخليك تبكي فعلا

انت مميز وراقي فعلا ولك شخصية متفردة بقلمك

اتمنى لكم جميعا كل المودة والاحترام




ملحوظة بس .... جبل مش باللون البينك ياسمسم

[خارج عن القانون]

ازيك يا مستر احمد

للعلم كل ما بشوف اسم الاكونت بفتكر انك بنت ^^

ومتستغرب لما اكلمك كمان يوم بصيغه بنت

لانى ساعتها هكون نسيت انك اسمك احمد

احسن حاجه فى التوبيك انى عرفت انك ولد

تسلمى يا سما ع المعلومات القيمه ديه ^^

[روح صامتة]

حلوة الحلقة ^^
بس على فكرة كتاباتك تنفع تتلحن وتتغنى ..
ودا مش مجاملة
شكرا للاستضافة ^^