بانوراما اشتغالات

[a7med -3del]

يانهار جهل مبقاش فيه عقل قالو هتبقى قد الدنيا لاقيناها خل فى خل ابهرنا العالم بالكفتة وده اختراع واحد مختل والحرية ده تمثال برة حتى الفكر بقى محتل مش من يوم ولا يومين الضياع ده من سنين لما ميزان العدل اختل والكلام عن التغيير اصبح مستهلك وممل وبنسال ايه الحل اسمع ياسيدى عايشين فى بلد .. يجى كام سنة حضارة وشباب الغد مشغول واقف ع الناصية بيلف سيجارة او بيعاكسو بنت جارتهم ساكنة معاهم فى نفس الحارة مكسوفين مش دى الحقيقة وبتسالو ايه العبارة ياعم صلى على النبى داحنا خيبتنا جبارة ؟ اقولكو حاجة بصو ومن غير كسوف هيا حكاية جحش وماسك فى خناق خروف والكلب شايف من بعيد لكن ميت مـ الخوف بيتفرج ومش فى الصورة اصل الكلب ده مش معروف وشكل الجحش ده على نياته او ذهنيا كده مخطوف قال لو اقرب ولا احوش يمكن يضربنى بخرطوش ومتفاقوش لا ده هيسيب ولا ده هيسيب ولا ده هيحوش اصل الكلب لو مات كلب ميلزمهوش واهى ماشية بالمقلوب والراكب بقى مركوب بلد العيشة فيها ابتلاء تقدر تقول تخليص ذنوب لا بنات نافعة ولا حتى شباب نخرج من وكسة نلاقى هباب والاحلام شبه الاوهام ومحدش عارف مين كداب حتى كلامى ده يطلع ايه محدش يسالنى ده عن ايه انا شخصيا كده مش فاهم ماهو ده اللى احنا عايشين فيه جوه قصة فيلم هندى والاحول بقيت كوميدية سيدنا الشيخ يطلع ارهابى وفيفى عبده ام مثالية شوفت الخيبة القوية ؟ اهل العيبة صبحو رموز واحنا بقينا دمية غبية مين بقى طفى النور ولا اصلا مين شايف الكل بيعبر عن رايه حتى اللى مش عارف تقريبا فى حاجة اتشقلبت مش حاجة واحدة دول حاجات معلوماتنا اتلخبطت والسبت بقى شبه يوم التلات وبنشوف الدنيا على قناة واحدة بانوراما اشتغالات ههههههههههههههههههههههههههههه انا بجد مش قادر اكمل من الضحك اصلها لو طولت عن كده هتبقى مصيبة والواحد بدا يتوتور ههههههههههه a7med adel

[phalsteen]

الغريب انك شايفها تضحك
برغم ان كلها وجع
دا ممكن نعتبره شر البليه ما يضحك
اللي يضحك فعلا فيفي عبده بقت مثاليه
شوفتوا الخيبة القوية
والخيبة التانية بئه
ان الموضوع عجبني اوي
وفايف ستارز مني ودي مبتحصلش
خدت الجودة يا احمد

[الأميرة رودي]

بانوراما الـ عك .
الوقت اللى بنعيشه ده من أكتر الأوقات مرار وسواد
لا بقينا فاهمين مين الصالح ومين الجبان
ولا عارفين نصدق مين ونكدب مين
وفعـلا زي ماذكرت حاجات كتير اتبدلت
ويمكن أكتر حاجه حسست الناس بخيبه الأمل
موضوع الأم المثاليه لـ فيفي عبده ده
قمـه التدني !

كلمات جميله وفى الصميم
تسلم ايدك وف انتظار كل روائعك

[Ana Ganbk To End]

رغم انها مليانه دمار × دمار
الا ان كل حد فينا مش قادر يبعد عنها
ولا حتى يستغنى عن حضنها

ساعات بحس انى بعشق مصر كوطن بس بكرهها ااووووى كدوله
مش عارفه دهـ ليه
بجد ربنا يلطف بينا ع اللى احنا فيه ده

اللهم ارفع مقتك وغضبك عنا

[شاعر الحب الحزين]

التعبيرات كلها واقعية هي بقت وادي للديابة

ومهما نقول ونتكلم برده محدش هيفهم حاجة

للأسف هي فعلا بانوراما اشتغالات

وانتا حطيت هنا تردداتها بالوزن العمودي والأفقي

ولخصت كلام كتير في قلوب ناس كتير نفسها تقوله

موهوب ومبدع وجريء في التعبير والكتابة وده اللي اتعودته منك دايما

احترامي وتقديري لك وكل الشكر والتحية