برنامج عيشها صح الحلقه الرابعه مع "كوين ميرو"

[۩۩ elMagic ۩۩]

السلام عليكم ورحمة الله وبركاته الحلقه السابقه كانت منورانا مشرفتنا الجميله نور ونار مش عايز اقول السابقه http://forums.banatmisr.com/msryat462634/ أما حلقة النهارده معانا ضيفه راقيه صاحبة قلم راقي جدا واخلاق عاليه معانا ومعكم كوين ميرو "الحلقه الرابعه من برنامج عيشها صح مع كوين ميرو" كوين ميرو من مبدعى المنتدى الفقره الاولي : عيشها صح * فى البدايه عرفنـا على نفسكـ ؟ وقولنا ملامح شخصيتكـ ؟ انا اسمى مارى 27 سنه متزوجه وعندى ولدين الكلمات دى بتوصفنى ببساطه ان كنت من من يهمهم سماع أخباري فإعلم إنني مهما جرى .. لا أتغيّر كثيرآ.. أبقى بسيطه كما أنا أهتم بأشياء صغيرة قد لايهتم بها أحد أبقى متمسكه بمعتقدي في التواضع و أبقى اُقدس لغتي الأم .. أمقت الظلم والظالمين أنى كانوا .. لا أُجيد المجاملة … أو التطبيل لدي قلم لا أعرف كيف أسيطر عليه يهوى الكتابة في يوم.. وعشرة لا تراني مستيقضيا في فجري أسأل نفسي اسألة كثيرة تبتدأ ب لماذا .. عادة أمتلك من العبر ما قد يمتلكه عجوز بضِعف عُمري ! أمتلك من (الجنون) ما قد لا يمتلكه طفل بنِصف عمري ! لا أسعى لإمتلاك آي شيء مادي حياة البُسطاء تناسبني تمامآ.. هذه ....... انا * قولنا بقى انت شايف انكـ عايشها صح ؟ نوعا ما بحاول اعيشها صح وبصراحه احيانا بحس بالرضا واحيانا لا الحمد لله دايما على كل حال * الى اى حد انت طموح ؟ وياترى ايه هى طموحاتكـ ؟ طموووحه جدا رغم للاسف عجزى لاسباب خارجه عن سيطرتى اهم طموحاتى حاليآ انى اكون ام ناجحه واسس اولاد تأسيس صحيح علشان ف المستقبل اشوفهم ناجحين وطموحين مقاتلين لتحقيق طموحهم عندى طموح تانى وبعتبره تحدى لنفسى ولظروفى بس احب احتفظ بيه لنفسى حاليآ ربنا يحققلك كل احلامك وطموحاتك انتي شخصيه راقيه وتستحقي كل خير * ممكن تقولنا ايه الصعوبات اللى واجهتكـ فى حياتكـ ؟ وياترى قدرت تواجهها وتتخطاها ولا استسلمت لها ؟ اصعب حاجه انى انثى فى مجتمع شايفنى نص كيان ونص انسان مجتمع له الحق يتدخل فى احلامى وطموحاتى لانى بنت لـ راجل واخت لــ راجل وزوجه لــ راجل والمفروض بقى علشان كل ده اكون انا اخر شخص يقرر عايزه ايه ومش عايزه ايه ،، واحيانا بحس انى عندى القوه والصبر انى اوجهها بس للاسف فى معظم الاحيان بستسلم بحتفظ بالامل انى فى يوم هقدر اوجهها .. * لما الدنيا بتخبط معاكـ وتديكـ ظهرها بتعمل ايه ؟ بقرأ فى الكتاب المقدس وبصلى ساعتها بحس بتعزيه كبيره وانى مش لوحدى وده بيدينى قوه وصفاء ذهنى علشان افكر بشكل صحيح * فى رأيكـ ايه الاسباب الى بتخلى الواحد يستسلم بسهوله لأى عقبه تقابله ؟ اولآ الياس وبعدين عدم ثقته فى نفسه وقدرته واحيانا بتكون الظروف المحيطه * لما يواجه المرء مشكله معينه فى رأيكـ الافضل ان يواجهها بمفرده ولا يجب ان يستعين بمن هو أكثر خبرة منه ؟ اكيد كلنا لسه بنتعلم ومع المواقف والمشاكل بنكتسب خبرات علشان كده ليه لا انى استعين بشخص اكون واثقه فى رؤيته الساقبه وطريقة تعامله مع المشاكل * لو افترضنا ان الشخص دا رفض الاستعانه بأحد أتسمى ذلكـ غرور ؟ ولو لاء .. امتى يكون غرور فى رأيكـ ؟ لا مش غرور يمكن معندوش ثقه فى شخص لدرجه انه يشركه او يستعين بيه فى مشكله ويمكن شايف فى نفسه القدره على المواجهه وعنده استعداد يتحمل النتائج ويتعلم منها ،، ويكون غرور لما يكون رافض يتسعين بحد علشان شايف ان رأيه هو بس الصح .. * فى رأيك الثقه بالنفس ليها دور فى الموضوع دا ؟ اكيييييييد * وانت شايف انكـ على درجه عاليه من الثقه بنفسكـ ؟ نوعا ما بحاول اثق اكتر فيا ^_^ * تقدرى تقولينـا بقآ الاثار المترتبه على الثقه بالنفس الزياده عن حدهـا لدى الفرد ؟ بين الغرور والثقه بالنفس شعره الانسان اللى بيفقد السيطره على ثقته بنفسه بيتحول لمغرور واحيانا ده بيخليه وحيد وغير محبوب ومكابر ومستحيل يعترف بغلطه ومش بيسمع غير صوت نفسه وبس .. * قولينا بقى انت بتعمل ايه لما تواجهكـ مشكله بتستعين بحد ولا بتواجهها لوحدكـ ؟ بصراحه انا بستعين بكرستين صحبتى وحتى لو انى واثقه انها معندهاش حل مجرد مشاركتها واحساسى انها معايا بيدينى قوه واحس وكأنى بفكر بصوت عالى وممكن سوا نوصل لحلول * ايهم من له الاولويه فى عملية إتخاذ القرار قلبكـ أم عقلكـ ؟ للاسف للاسف للاسف قلبى * يا ترى شايفه مستقبلكـ ماشـى ازاى ؟ لو فضلت بنفس ظروفى حاليا ونفس المعوقات حاليآ للاسف هيكون عكس ما بتمنى لكن لو قدرت اغير من حاضرى وده اللى بحاول اعمله يمكن مستقبلى هيكون زى مابتمنى علشان كده هيكون ازاى دى لسه مش عارفها اللى اعرفه انى بحاول اصنع المستقبل اللى بتمناه .. جميل اننا منكابرش ونعترف بتقصيرنا ونسعي للأفضل ربنا يكرمك ويصلحلك الاحوال .. * متى شعرت بالفشل ؟ وماذا فعلت حينها ؟ حسيت بالفشل لما اتخليت عن احلامى طوعآ او اجبارآ مش عارفه بصراحه علشان ارضى ناس بحبهم وقتها اليأس كان ملينى بس حاليآ بحاول استرد احلامى وبرضه من غير ما اخسر رضاهم علشان هما اهم شئ عندى ويمكن اهم من نفسى .. * اتفكـر فى الكلام قبل ان تقوله ؟ دى مشكلتى اللى نفسى امرن نفسى على حلها مش بعرف افكر فى الكلام وارتبه اللى بحسه بقوله على طول * هل لكلام الناس تأثير على شخصيتكـ ؟ للاسف احيانا اه بس بحاول حاليآ اغير ده فيا * اذا خانكـ أعز صديق لكـ أتتقبل عزره واسفهـ ؟ لو اه .. امتـى لا تتقبله ؟ بتقبل وبنسى كمان لاننا كلنا بشر ولينا اخطأنا وعلى قدر محبتى للشخص ده على قدر مسامحتى له ،، ومش هتقبل لو سامحت واديت فرصه تانيه واتكررت نفس الاخطاء وخان ثقتى * ايه رأيكـ فى موضة الملابس ؟ أتتبعها ام تتجاهلها ؟ عن الموضه حاليآ فاحدث ولا حرج ^_^ بقى فى حاجات مثيره للاشمئزاز انا مش بتهمنى الموضه على قد مايهمنى اللى يليق عليا ويعكس شخصيتى * "وقتكـ كالسيف إن لم تقطعه قطعكـ" بمناسبة المقوله دى بقـى قوليلى انت من الشخصيات التى تفضل تخطيط وتنظيم الوقت ولا سايباها على الله زى ما تيجى ؟؟ بأعتبار ان كلنا سايبنها على الله طبعا فى كل الاحوال بصراحه انا حياتى روتنيه شويه وده بيخلينى مش مهتمه بترتيب الوقت وبسيبها زى ماتيجى * "المال يصنع السعادة" ايه رأيك فى المقوله ديه اتتفق معها ام لا ...مع ذكر وجهت نظركـ فيها ؟ انا مش معاها ومش ضدها يعنى انا شايفه ان المال ممكن يساعد فى سعدتنا لكن ميصنعهاش يعنى ممكن يكون فى انسان غنى بس مريض بمرض فلوس الدنيا كلها متشفهوش منه وممكن برضو يكون فى انسان بسيط راضى بحياته وسعيد باسرته محتاج كام الف بس يعمل بيهم عمليه يرجع تانى بصحه كويسه ويعيش وسط اهله ببساطه من غير ترف فا هنا المال ممكن يكون سبب سعاده * بيقولوا ان الحب بيصنع المعجزات ياترى ممكن فى يوم تتنازلى عن مبادئكـ فى سبيل إرضاء من تحب ؟؟ ممكن بس فى حدود علشان للاسف المتحكم فيا قلبى اكتر من عقلى * هل للكرامه والاعتزاز بالنفس وجود فى الحب ؟؟ اكيييييد لازم يكون لهم وجود ولما يكون فى حب بجد الطرفين بيحافظو على كرامة بعض زى بظبط حفاظهم على حبهم * ايه رأيك فى المقولات ديه *الواد دا وشه فقرى *البنت دى نحس *انا حظى وحش فى الدنيا دى *ابعد عنى انت عينكـ وحشه ؟؟ هههههههههه انا ممكن اقولها بس كا هزار لكن مش جد احنا اللى بنصنع حظنا مش هو اللى بيصنعنا * ما مفهوم كلاً من : "من وجهة نظركـ " الحياه رحله علشان نوصل لحياه اكبر واجمل النجاح تحقيق لاحلامنا الفشل محاوله نجاح اليأس أفه الامل قوه وعزيمه الموت حصاد لرحلتنا على الارض * قولينا بقآ كام نصيحه كده للجمهورعلشان يقدر يعيشهـا صح ؟ انصح نفسى وانصحكم نتمسك باحلامنا ونبعد عن اليأس مش عيب اننا نغلط ونتعلم من غلطنا العيب اننا نكرر نفس الغلط احنا هنعيش الحياه مره واحده ومش لازم نضيع فرصتنا دى لازم نحب ونضحك ونجرب ومنخفش من التجربه ونتجنن احيانا لو حكمت منستسلمش للحزن والياس علشان ممكن يقتلو فينا الحياه ونحط ربنا بينا وبين كل مشكله وضيقه علشان نعرف نوصل لحلول ,واهم حاجه اننا يبقى عندنا يقين ان حياتنا رحله لحياه اطول بكتير واجمل ان شاء الله واللى هنزرعه دلوقتى هنحصده فى الاخر علشان كده لازم نحسن اختيار زرعتنا ونراعيها كويس .. (Y) الفقره الثانيه : الآدبيه أسماء :: ميرو قلم بسيط بيعبر أكثر منه أدبي والقراءة لها ممتعة بـ[بساطة] ..~ @ لماذا تكتب ميرو ؟ ومالذي يجعلها تكتب ؟؟ بكتب لما تكون فى فكره شاغله بالى او عن حاجه لمست قلبى علشان كده زى ماقولت مش بكون مهتمه انه يكون موضوع ادبى بقدر ماهو بيعبر انى اللى بكون حاسه فى اللحظه دى @ ينتهى المنطق عندما يبدء الحب عندما يبدأ الحب يكون من الصعب انسحابه لأجل المنطق ، نعم ليس الحب منطقيا لكن لايخلو من المنطق تماما ، فهناك وجود متحكم للمنطق في الاختيار مبدئياً ، هذا ماأراه أنا .. برأيك أيتواجد المنطق في الحب بنسبة ما أم هو ملغي تماما ؟؟ برأى المنطق فى الحب بظبط زى القفص الذهبى لعصفور شكله جميييل بس فى النهايه قفص المنطق بيحط قواعد وحسابات ممكن القلب ميعترفش بيها يعنى مثلا من المنطقى ان شخص اجتماعى متكلم جرئ ينجذب لشخصيه بنفس مواصفاته نتفاجئ ان الحب ممكن يخليه ينجذب لشخصيه انطوائيه مش متكلمه مش جريئه ،، الحب ملهوش منطق او قواعد هو احساس وحاله انقلاب على المنطق احيانا .. @ تعددت الاسباب والموت واحد !!!! الثقة تُكتَسَب .. ماهي حدود الثقة ؟؟ انا بنسبه لى حدود ثقتى فى شخص بيحددها الشخص نفسه حسب المواقف اللى بنمر بيها سوا بيحدد مدى ثقتى فيه لانى زى ماقولت الثقه لازم تكتسب مش هبه @ الانتماء الإنتماء يعني أن نعتبر ماننتمي له ، هو جزء لاينفصل عنا ، وانتماءاتنا تختلف أهميتها تبعا لماهيتها ، فالانتماء لوطن بالتأكيد أكثر أهمية من الانتماء لشخص لأنه أعم ، لكن هناك من يختار الانتماء لشخص حين التخيير بينهما .. ماذا يعني لكِ الانتماء لشخص ؟ ومن أكثر شخص تنتمين له ؟ انك تكون منتمى لشخص معناه انك تكون مؤمن او مقتنع بافكاره ومبادئه ودى بيكون شئ متغير مع تغير المواقف بمعنى ممكن تفقد انتمائك للشخص ده لو اصبحت افكاره غير مطابقه لما تؤمن او مقتنع بيه وانا شخصيآ لى انتماء لكل شخص مثقف واعى ومدرك ولديه خبره @ الصلاه وعلاقتنا الخاصه مع ربنا من رأيي أن أمر الله لنا بالصلاة ، هو دليل آخر على محبته لنا ، فهو يدعونا لنكون أقرب إليه ، وهذا يعطينا طاقة داخلية أكثر إيجابية ، تُخفِّض أحمالنا وتمنحنا تصالحاً ذاتيا ، مهما اختلفت صلواتنا .. لأي شيء تلجئين حين تُثْقل الدنيا حملك ؟؟ الصلاه لان زى ماذكرت فى التوبيك ان دايما باب ربنا مفتوح لنا فى وقت محتاجينه ندخل ونتكلم معاه وده بيخلينا نحس اننا مش لوحدنا وبيدينا قوه وتعزيه مهما كان الحمل تقيل علينا @ الحب بيجى بعد الجواز !!!! فرق كبير بين الحب و بين الاعتياد ، ماهي الفروق برأيك أو كيف تردين على من لايُفرق بينهما ؟؟ فرق كبيييير بينهم او بمعنى اصح مينفعش نعمل بينهم مقارنه التعود بيكون عباره عن تاقلم مع امر واقع ورجوعا لتقليدنا وعاداتنا المريضه بيكون ده الحل الوحيد اللى بنلجآ له علشان المركب تمشى انا شخصيآ شايفه ان الحب لازم يكون موجود قبل الجواز علشان حياتنا متبقاش مجرد تعود ورضوخ لامر واقع ووجود الحب بين الطرفين بيكون بمثابه صمام امان فى حال حدوث صعوبات او خلفات ومشاكل بيكون الحب هو الحكم العادل بينهم @ حاجات يمكن عندك انت ملهاش لازمه وصغيره لكن عندها هى كبيره برأيك لماذا لايهتم الجنس الآخر -خاصة الرجال- بمتطلبات الآخر ؟ بمعنى آخر أهو جهل أم لامبالاة أم ماذا ؟ مجتمعنا الشرقى بعاداته وتقاليده الخاطئه بيخلق من ادم نصف اله بيصنع مخلوق انانى مكابر دايما للاسف شايف انه هو الطرف الاهم فى حياه الشركه بينه وبين زوجته وده بيخليه بينسى او يتناسى حقوقها ومتطلباتها ودايما مطلوب منها كا الطرف الاضعف التنازل والتأقلم وده بيهدر كتير من حقوقها .. اجابات مميزه جدااا سعيد بوجودك معانا فى الحلقه نورتينا أكيد ميرو انتي شخصيه جميله وتستحق كل الاحترام والتقدير ربنا معاكي ويوفقك بإذن الله فى حياتك وتحققي كل ما تتمنيه ،، وبكده تكون انتهت رابع حلقه نتمني نكون وُفقنا فيما تم عرضه تابعونا مع المزيد من الضيوف الراقيين ,,

[انا دنيته وهو حياتى]

برنامج حلو
وحلقه جميله مع ضيفه جميله

تسلم ع المجهود يا احمد
يدوم التميز والنشاط

[حنان الجزائرية]

حلقة اليوم رائعة مع الضيفة المميزة
والاسئلة في منتهى الروعة والاجابات راقية
الله يعطيكم الصحة
وبالتوفيق في الحلقات القادمة

[حالمة باميرى]

حلقة روعة مع ضيفة اقدم لها كل احترام وتقدير
وفعلا انسانة جميلة الاخلاق
ربنا يخليها لاولادها وتفرح بيهم
تسلم احمد على الحلقة الجميلة دى

[-esraa-]

حلقة جميلة جداً
وإجابات فيها أمل وتفاؤل
تسلمو : )
بانتظار الحلقة القادمة

[انوثة طاغية]

برنامج حلو
والحلقة منوراها مبعة من مبدعي المنتدى
تسلم ع المجهود يامجيك

[AHMED SEVEN]

حلقة واسئلة ممتازة

والافضل والاهم الشخصية دي ماري شخصية مميزة جدا واضح من اسلوبها

عجبني اسلوبك فى الحياة وطريقة تفكيرك .. ربنا يخليلك اسرتك

شكرا ليك ماجك على الحلقة الممتعة

تحياتي

[Caramilla]

حلقه جامده
واجوبه راقت لي

[Ana Ganbk To End]

اجاباتها حلوه اوى
وباين علييها شخصيه جميله
^^

نايس حلقه بقا هههههههه

[ايمان طلعت]

حلقه حلوة مع كوين ميرو
شخصيه راقيه وخلوقه
شكرا احمد للحلقه
تحياتى