الزمالك يقسو على المنيا برباعية نظيفة

[აα∂ Ԑγεა]

حقق فريق نادي الزمالك فوزاً كاسحاً على ضيفه المنيا برباعية نظيفة
في اللقاء الذي جمع الفريقين على ملعب الدفاع الجوي في الجولة الـ 17 للمجموعة من الدوري العام .




أحرز أهداف الأبيض في لقاء الليلة كل من رامي ربيع الهدف الاول في مرماه ثم اضاف احمد علي الهدف الثاني
وعاد مؤمن زكريا ليحرز الهدف الثالث بطريقة رائعه
قبل أن يختتم محمد عبد الشافي أهداف الأبيض في الدقيقة الأخيرة من متابعة لتسديدة فتح الله من ركلة حرة مباشرة
ارتدت من الحارس لتجد عبد الشافي يودعها المرمى .


بهذه النتيجة يقتنص الزمالك المركز الثاني برصيد 25 نقطة ولديه مباراه مؤجلة ،
ويتوقف رصيد المنيا عند النقطة التاسعة في المركز الأخير من جدول المجموعة الثانية
ويقترب من لعب دورة الترقي للبقاء في الممتاز .

[აα∂ Ԑγεა]

نتيجة غريبة جدا وغير مستحقة بالمرة الحقيقة !
كمية فرص ضائعه من المنيا وسوء حظ عجيب من قعود اكتر من 4 اهداف محققة ضاعت !

وفي المقابل الزمالك بيسجل وبيجب اجوان !
النتيجة ظالمة الحقيقة لمجهود و اداء المنيا في المباراه !
اكيد كزمالكاوي سعيد للفوز , بس حزين للاداء الخزعبلي ف المباراه
واكثر حزنا للمنيا انها نتيجة كبيرة غير مستحقة ومش بتعبر عن سير الماتش

,,

اخطاء دفاعيه عجيبة من دفاع الزمالك ومفيش اي تمركز جيد علي الاطلاق !
كور بسهولة تبقي انفرادات ولولا عدم توفيق المنيا ,
كانت هتكون النتيجة كارثية علي الزمالك في الشوط الاول ,
فتح الله و صلاح سليمان تايهين في الملعب واي كورة مرتده او عرضية خطر كبير

,,

كمية تمريرات خاطئة من وسط الزمالك عجيبة جدا !
انا فعلا مش مقتنع بنور السيد كلاعب في الزمالك من الاساس ومشوفتش منه تمريرة عدله
نور صاحب مدرسه المس الكورة 10مرات وبص في كل الاتجاهات قبل ما تباصيها !
واما تباصيها باصيها غلط !
لاعب عقيم جدا وبطئ جدا وحلوله عقيمة للغايه ونقطة ضعف كبيرة في الزمالك

,,

نص الملعب شايله دايما مؤمن زكريا في اللقاءات اللي فاتت
والنهاردة اما مؤمن لعب في مركز الوينج ليفت , ظهر تخبط وسوء نص ملعب الزمالك
كنت متاكد من التغيير الاول للزمالك علشان النقطة دي ,
وكنت بكلم عمي وبقوله انه المفروض يخرج عبدالرحمن ويدخل مصطفي فتحي او فرج
علشان الزمالك محتاج مؤمن في نص الملعب , وقد كان ذلك

,,

مؤمن زكريا اكتر لاعب مجتهد ومتحرك وفعال في الزمالك
اي كورة خطرة من الزمالك هيكون مؤمن زكريا له الدور الاكبر فيها
حتي في قطع الكرات كذلك مؤمن هيكون له الدور الاكبر

احيان كتير مش بيصادفه التوفيق ودا كان في الكام ماتش اللي فاتوا
وظهر النهاردة في المباراه عموما , لانه ضاعت منه كور كتير
اوقات بيتصرف صح واوقات بيتصرف غلط اكيد
لكن في كل الحالات بيجتهد وبيحاول وبيقاتل علي كل كورة
واللي بيعمل كده اكيد اجلا ام عاجلا الكورة هتكافئه !

ومكافئته كانت في الهدف الرائع اللي سجله النهاردة
واللي بكل بساطة احد افضل اجوان الدوري الموسم دا :]

,,


نقط سريعه كالعادة
@ عبدالواحد لم يختبر للدرجة لانه اغلب الفرص برا الجون , لكنه اتصرف كويس
@ نور السيد لا يصلح لاعب خط وسط لفريق الزمالك !
@ احمد علي مهاجم من طراز عالي جدا , ومتحرك ومجتهد ,عكس جعفر في كل شيئ !
@ عبدالرحمن صلاح مينفعش احكم عليه من دلوقت , لكنه كان سيئ لكن جرئ
@ عمر اسماعيل يوسف كذلك , كان سيئ لكن بدري للحكم عليه
@ واضح تأثير غياب ياسر ابراهيم عن دفاع الزمالك " الشوارع " بدونه
@ مؤمن زكريا ببساطة لكل مجتهد نصيب
@ محمد ابراهيم وحشنا الملعب والفريق بوجودك , لا تخيب ظني !

,,
في الاخير
اداء خزعبلي , عشوائي , من الزمالك في الشوط الاول ,
صاحبه تحسن طفيف في الشوط التاني
لكن في المجمل ميستحقش الفوز الكبير دا علي الاطلاق
والنتيجة ظلمت المنيا فعلا !

[توحد ارواح]

بالفعل المباراه النهارده تعتبر الاسوأ بالنسبه للزمالك
رغم الاهداف الاربعه ولكنها لا تعبر عن سير المباراه
المنيا ضيعت حوالى 3 اهداف من فرص سهله جدا
يمكن الزمالك استهتر شويه على أساس ان المنياالاخير بالدورى
ولكن الكوره عموما مش ليها مقاييس
والزمالك كتير لعب برده ومش كان بيحالفه الحظ مره من نفسه بقا
ولكن المفروض يتداركوا الاخطاء قبل الماتش الجاى مع بتروجيت
مبارك للزمالك
شكرا كتير ع التحليل المنطقى والمجهود المميز
تحيتى

[ابتسامة الزهر]

تحليل رائع للمبارة
لكن الكورة فيها غالب ومغلوب
واحيانا كثير الحظ يلعب دور كبير فى الفوز
حتى ولو الأداء سىء
لكن واضح من التحليل والمتابعة
ان اللياقة والخبرة فى هذه المبارة أنعدمت
لكن برضه نقول للزمالك مبروك

[حرب الشعوب]

شكرا على الموضوع الرائع

[აα∂ Ԑγεა]

اقتباس المشاركة الأصلية كتبت بواسطة توحد ارواح بالفعل المباراه النهارده تعتبر الاسوأ بالنسبه للزمالك رغم الاهداف الاربعه ولكنها لا تعبر عن سير المباراه المنيا ضيعت حوالى 3 اهداف من فرص سهله جدا يمكن الزمالك استهتر شويه على أساس ان المنياالاخير بالدورى ولكن الكوره عموما مش ليها مقاييس والزمالك كتير لعب برده ومش كان بيحالفه الحظ مره من نفسه بقا ولكن المفروض يتداركوا الاخطاء قبل الماتش الجاى مع بتروجيت مبارك للزمالك شكرا كتير ع التحليل المنطقى والمجهود المميز تحيتى

احيانا الكورة بتبقي غريبة , علشان كده بيسموها غداره
مقدرش اقول المنيا استحقت الفوز مثلا
لانه اللي بيضيع الكم الكبير دا من الفرص الساهله يستحق انه يخسر الماتش !
بس الحقيقة 4 قاسية :]

اكيد طبعا الزمالك ياما ماتشات خسرها وهو كان الاحق بيها ,
اوقات كتير الحظ كان بيعاكسه وفي مباريات مهمه كتير
زي ما قلتي الكورة مش ليها مقاييس

تسلمي لوجودك وردك المميز دا
حقيقي نورتي القسم :]
يدوم النشاط والتميز

[აα∂ Ԑγεა]

اقتباس المشاركة الأصلية كتبت بواسطة ابتسامة الزهر تحليل رائع للمبارة لكن الكورة فيها غالب ومغلوب واحيانا كثير الحظ يلعب دور كبير فى الفوز حتى ولو الأداء سىء لكن واضح من التحليل والمتابعة ان اللياقة والخبرة فى هذه المبارة أنعدمت لكن برضه نقول للزمالك مبروك

الكورة غالب ومغلوب طبعا والحظ اوقات بيكون الاهم

اللياقة مقدرش اقول مش موجوده , لان الفريق واقف علي رجله لاخر الماتش
والكلام دا كان موجود الماتش اللي فات واللي قبله وخطف الفوز متأخر
لكن الماتش دا بالذات الخبرة كانت معدومه فعلا ,

مفيش فريق بيلعب كل مبارياته في اداء عالي دايما
لازم يكون في دروب من وقت لوقت , المهم ميطولش ,

مع رجوع محمد ابراهيم عندي امل الفريق يكون افضل
لانه ابراهيم الوحيد اللي يقدر يطلع حلول من برا المعتاد ويشكل خطورة
ان شاء الله يكون عند حسن ظني ,

تسلمي لوجودك وردك وان شاء الله الزمالك يستمر يكسب
منورة

[العاشق الذى لم يتب]

فعلا الزمالك كان قاسى وعنيف ضدالمنيا المتواضع
وخاصة انه اول موسم له فى الدورى
بعدغياب زاد عن حوالى 17سنة متكاملة
مبروك للزمالك
وشكرا لك
تحياتى