خلاف بين الزمالك وحفني وجيبور والاهلي يدخل في الصورة

[كريم عاصم]

ا

لأهلى برده عندة ازمات ماليه وخصوصا بعد تورط حسن حمدى في قضايا كثيرة بس سؤالى هنا ليه النادى الأهلى المرة ده مش بيحاول يتعاقد مع لعيبه من الاسماعيلي جت فترة كنا بنقول على الأهلى الاسماعيلى (ب) صفقات الزمالك من المحتمل الأكبر انها تتم في شخصية قويه رئيس النادي مرتضى منصور النوادى كلها بتعمله الف حساب الزمالك محتاج مدافع كويس زى ديويدار ... وحارس مرمى كويس لان عبد الواحد ضعيف في الكور العرضيه ومعظم الأخطاء والأهداف بتكون منه ومحتاج رأس حربة هداف مثل خالد قمر وتقريبا هو وقع للزمالك اما ايمن حفنى فهو زملكاوى فعلا ومتوقع ان كفته هتتأرجح لنادى الزمالك تسلم على الخبر الف تحيه

[ღ Gի๐sτ ღ]

كريم عاصم

ازيك يا كريم ؟ إن شاء الله تكون بخير

الاهلى ازمتة المالية ملهاش علاقة بحسن حمدى لان حمدى مكنش بديفع حاجة من جيبه للاهلى .. الاهلى كان بيعتمد على موارد النادى من البث والتذاكر والرعاية وبعض رجال الاعمال كان بيساهموا فى مرتب جوزية فقط ..

تاني جزء فى كلامك .. انا سبق ورديت عليك قبل كدة عن حكاية الاهلى والاسماعيلي ووضحتلك ان الاهلى ماخدش حد من الاسماعيلي بشكل مباشر الا عدد قليل ولو هاتحسبها باللى لعب فى الاسماعيلي فهتلاقى ان لاعبى الاهلى بالاسماعيلي اكتر من اللى احنا خدناهم ولعبوا فى الاسماعيلي من قبل بس الاعلام هو اللى كبر الموضوع واقتصر ان احنا بس اللى بناخد منهم ولعلمك الاسماعيلي عايز لعيبة من الاهلى بس مستنين الاهلى يسيبهم مجانا عشان ميصرفوش ولكن علاء عبدالصادق واخد اتجاه ان اللى هاسنتغني عنهم يكون بتبادل فى صفقات احنا محتاجينها

تالت جزء .. ممكن تقولي لية مرتضي مدخلش فى صفقات كويسة ومميزة للعيبة زى محمود عزت واحمد حمودى واحمد رفعت واحمد سمير وباسم علي وكريم الضو اللى الاهلى بيتفاوض معاهم وحسب كلام مرتضي انه هايدخل فى اي صفقة احنا بنتفاوض فيها ولحد دلوقت مبيتفاوضش مع دول
او بمعنى ادق ، لية مرتضي مبيتعاقدش غير مع لاعبى الشرطة والجيش فقط ؟؟
الحكاية ملهاش علاقة بشخصية مرتضي .. كل الحكاية ان في شغل من فوق والاسباب تتلخص فى حاجتين الغاء الهبوط و الالتراس ومرتضي ماشي بشكل كويس معاهم بيقاتل على الغاء الهبوط وبيهاجم الوايت نايتس اما العكس فى الاهلى محمود طاهر رافض الغاء الهبوط وبيساند التراس اهلاوى اللى المسؤلين زعلانين من مساندتة ليهم عشان بيشتموا الشرطة والاساءات اللى تمت ع العسكر مؤخراً دة سبب كل الحكاية وان مسؤلي اندية الجيش والشرطة اولويتهم هاتكون للزمالك بسبب التعاون مع مرتضي والعكس اختلافات مع طاهر اللى رافض يؤيدهم ومختلف معاهم فى حكاية الالتراس والهبوط ، طبعا انت ممكن تفتكر انى بقولك كلام مش صحيح او بقولك كلام وخلاص ودة حقك ليك كل الحرية تصدق او متصدقش .. بس دة الواقع ولو ليك مصدر قريب تثق فيه ممكن ياكدلك الكلام دة

[აα∂ Ԑγεა]

اقتباس المشاركة الأصلية كتبت بواسطة ღ gի๐sτ ღ جيبور بعيد تماما عن الاهلى والزمالك ايمن حفني عمل كشف طبى فى الاهلى من حوالى 3 اسابيع واتضح ان اللاعب عنده اصابة مزمنة فى الحوض وميقدرش يلعب ماتش كامل والادارة كلمت مدربين دربوا اللاعب يسألوهم وكل المدربين أكدوا صحة الكشف الطبي وان الاعب عنده اصابة مزمنة فعلا تمنعه من اللعب بشكل طويل وبسبب كدة الاهلى صرف النظر عن التعاقد مع اللاعب واخفى المعلومة احترامًا ليه وعشان مستقبله ولكن في اكتر من واحد موثوق فيهم أكدوا المعلومة والخبر هاينتشر الايام الجاية فى المواقع بعد تسريب السبب ،، بعدها حفنى مضي مع الزمالك من يومين وخد مقدم عقد والزمالك مستني يخلص مع ادارة الجيش ملحوظة * الزمالك معملش كشف طبي للاعب ، مرتضي بيتريق وشايف ان الكشف مبيتعملش غير للي داخل كلية حربية ودة عيب كبير جداً لان الكشف الطبى من اهم العوامل اللى تخليك تتعاقد مع اللاعبين او العكس وملحوظة تاني بردوا بما ان الموضوع عن الصفقات ، الاهلى كل تركيزه فى تجديد فتحى وشراء محمود عزت او اسلام جمال ، وحمودى او احمد رفعت وبيخلص مع عبدالله سيسيه مش جيبور فيه اختلافات ع المرتب لو اتحلت يبقى معانا ولو متفقناش اللاعب هيتفق مع الزمالك بس بشرط ياخد مستحقاتـه وفي مفاوضات مع لعيبة تانية كويسين بس الاولوية للى ذكرت اسمهم دلوقت ،، والزمالك مركز مع احمد صبرى وبنسبة كبيرة ممكن يخلص معاه لو تم الاتفاق مع ادارة الحدود

بخصوص جيبور مهواش بعيد ولا حاجة وكان في اخبار كتيره عن اقترابه للطرفين ,
وامره بيخص طلائع الجيش يعني لو اتقدملهم عرض كويس هيوافقوا
فمش بعيد عن الاهلي ولا الزمالك في حاجة علي فكرة ويعتبر صفقه سوبر السوبر

اما عن حفني , اولا انا مش عارف طبعا مين مصدرك في الكلام دا الحقيقة !
واكيد مش عارف مدي قربه وتوغله جوا النادي الاهلي
لدرجة انه الاهلي يخفي الموضوع وهو يعرف !
في كل الحالات الكلام دا ملهوش اي دخان حتي ف الصحافة كلها خالص
فازاي يكون مصدرك بس اللي عرف الموضوع دا ؟!
هل مصدرك اقوي واخطر من مصادر كل الصحف والمواقع المصرية !

اما عن الاصابة المزمنه حفني لعب في المقاصه والجيش وكمان في ليبيا ومصدرش كلام عن دا
وكمان كان بيلعب مباريات كاملة مع كل الفرق اللي ذكرتها دي
وكان نجمهم الاول والافضل دايما
انا شايف الكلام دا ماهو الا اشاعه لا اكثر ولا اقل اتعودنا عليها كتير في الفتره دي ,.
والغرض منها تبرير ازاي الزمالك قدر يخطف حفني ومعروف في وقت ماكان الاهلي الاقرب ,
حفني كان اعتراضي عليه سنه لا اكثر ولا اقل اما عن المستوي فهو يتحدث عن نفسه !


بالنسبة لنقطة مرتضي والكشف الطبي , فالكشف الطبي مهم في كل الاندية اكيد
ومرتضي يعلم دا تماما طبعا
كلامه اللي ذكره هو عن حالة اسلام شكري فقط لا غير
انه حتي لو عمل كشف طبي مش حاجة رسمية يعني مش معناها انه راح الاهلي ؟!
هو مذكرش فكرة الكشف الطبي انها مش مهمه في التعاقد , هو ذكر انها مش تعاقد !
والدليل معروف يوسف كشف طبي في الاهلي والزمالك تعاقد معاه !
اذا الكشف الطبي مش حاجة ومش دليل علي حاجة ودا اللي هو كان بيقصده
وحفني لسه كذلك موافقة الطلائع واجبه ووقتها يكون الكلام عن الكشف الطبي
وبقولهالك من دلوقت اشاعه موضوع الاصابه
لان الحاجات دي مش بتتخبي واسأل صلاح الاثيوبي اللي اتقال عليه نفس الكلام الفتره اللي فاتت
بس السؤال ياتري اداره الاهلي مخبتش ليه الخبر دا ومنعت تسريبه علشان سمعه اللاعب :]


الاهلي كان مهتم بصفقات كتير ولكنه خرج منها لما خسرها والكلام هنا مش محتاج تجميل
كان الاهلي بيحاول علي العزب ومعروف وقمر وكمان صبري ومكي وغيره

محمود عزت واسلام جمال و حمودي ورفعت خيارات ممتازة وسنهم صغير
ولو الاهلي خلص معاهم هيكونو ممتازين لمستقبل الفريق
سيسه اخر المهاجمين المحترمين اللي لعبو في مصر لكن للاسف سنه 31 سنه حاليا

اولوية الزمالك حاليا احمد صبري ودا بنسبة كبيرة جدا في الزمالك الفتره الجايا
وكمان الكلام مع الشناوي او مسعود في مركز حراسه المرمي
وهيخلصو ثنائي الشرطة اللي فاضل دويدار وقمر وصانع العاب الشرقية الشحات

[აα∂ Ԑγεა]

اقتباس المشاركة الأصلية كتبت بواسطة كريم عاصم ا لأهلى برده عندة ازمات ماليه وخصوصا بعد تورط حسن حمدى في قضايا كثيرة بس سؤالى هنا ليه النادى الأهلى المرة ده مش بيحاول يتعاقد مع لعيبه من الاسماعيلي جت فترة كنا بنقول على الأهلى الاسماعيلى (ب) صفقات الزمالك من المحتمل الأكبر انها تتم في شخصية قويه رئيس النادي مرتضى منصور النوادى كلها بتعمله الف حساب الزمالك محتاج مدافع كويس زى ديويدار ... وحارس مرمى كويس لان عبد الواحد ضعيف في الكور العرضيه ومعظم الأخطاء والأهداف بتكون منه ومحتاج رأس حربة هداف مثل خالد قمر وتقريبا هو وقع للزمالك اما ايمن حفنى فهو زملكاوى فعلا ومتوقع ان كفته هتتأرجح لنادى الزمالك تسلم على الخبر الف تحيه

مفيش نادي في مصر معندهوش ازمه مالية حاليا ودي امر مش محتاج نقاش
مظنش ينفع الربط بين قضايا حسن حمدي وبين الازمه لانه الازمه موجوده في عهده كذلك
لكنه طبعا كان بيعرف يسير الامور بطريقته

بخصوص لاعيبه الاسماعيلي مش قاعدة ثابته اكيد ,
وحاليا مش شايف اللاعيبه الفذه لدرجة انه يتم الصراع عليها

مرتضي ماشي صح لحد اللحظه والعضويات الخاصة واتفاقية التعاون اللي من يومين
ادت النادي سيولة مادية كبيرة تخليه يقدر يدخل الصفقات وهو مطمن
المادة هيا كل شيئ وحاليا موجودة :]

الزمالك بيفاوض الشناوي وكمان مسعود لمركز حراسة المرمي
وعبدالواحد من الاساس هيتعزل بنهايه الموسم الجاري وهنخلص من تقلباته :]

خالد قمر الحاجة الوحيدة اللي تشفعله عندي انه زمالكاوي
لكني مش شايف هيكون الاضافه الكبيرة في نظري وبفضل محترف افريقي !

ايمن حفني اضافه كبيرة جدا للزمالك ولاعب مفيش خلاف علي مستواه
حزين من تأخر الانتقال لانه سنه دلوقت 29 سنه الشهر اللي جاي !
لكن في صفقات كتيرة تألقت في وقت متأخر من عمرها ,
يبقي فقط احمد صبري بجواره والتاني زمالكاوي وهيفيد النادي فعلا

منور القسم يااستاذ كريم اتمني نشوفك بشكل مستمر

[აα∂ Ԑγεა]

اقتباس المشاركة الأصلية كتبت بواسطة ღ gի๐sτ ღ كريم عاصم ازيك يا كريم ؟ إن شاء الله تكون بخير الاهلى ازمتة المالية ملهاش علاقة بحسن حمدى لان حمدى مكنش بديفع حاجة من جيبه للاهلى .. الاهلى كان بيعتمد على موارد النادى من البث والتذاكر والرعاية وبعض رجال الاعمال كان بيساهموا فى مرتب جوزية فقط .. تاني جزء فى كلامك .. انا سبق ورديت عليك قبل كدة عن حكاية الاهلى والاسماعيلي ووضحتلك ان الاهلى ماخدش حد من الاسماعيلي بشكل مباشر الا عدد قليل ولو هاتحسبها باللى لعب فى الاسماعيلي فهتلاقى ان لاعبى الاهلى بالاسماعيلي اكتر من اللى احنا خدناهم ولعبوا فى الاسماعيلي من قبل بس الاعلام هو اللى كبر الموضوع واقتصر ان احنا بس اللى بناخد منهم ولعلمك الاسماعيلي عايز لعيبة من الاهلى بس مستنين الاهلى يسيبهم مجانا عشان ميصرفوش ولكن علاء عبدالصادق واخد اتجاه ان اللى هاسنتغني عنهم يكون بتبادل فى صفقات احنا محتاجينها تالت جزء .. ممكن تقولي لية مرتضي مدخلش فى صفقات كويسة ومميزة للعيبة زى محمود عزت واحمد حمودى واحمد رفعت واحمد سمير وباسم علي وكريم الضو اللى الاهلى بيتفاوض معاهم وحسب كلام مرتضي انه هايدخل فى اي صفقة احنا بنتفاوض فيها ولحد دلوقت مبيتفاوضش مع دول او بمعنى ادق ، لية مرتضي مبيتعاقدش غير مع لاعبى الشرطة والجيش فقط ؟؟ الحكاية ملهاش علاقة بشخصية مرتضي .. كل الحكاية ان في شغل من فوق والاسباب تتلخص فى حاجتين الغاء الهبوط و الالتراس ومرتضي ماشي بشكل كويس معاهم بيقاتل على الغاء الهبوط وبيهاجم الوايت نايتس اما العكس فى الاهلى محمود طاهر رافض الغاء الهبوط وبيساند التراس اهلاوى اللى المسؤلين زعلانين من مساندتة ليهم عشان بيشتموا الشرطة والاساءات اللى تمت ع العسكر مؤخراً دة سبب كل الحكاية وان مسؤلي اندية الجيش والشرطة اولويتهم هاتكون للزمالك بسبب التعاون مع مرتضي والعكس اختلافات مع طاهر اللى رافض يؤيدهم ومختلف معاهم فى حكاية الالتراس والهبوط ، طبعا انت ممكن تفتكر انى بقولك كلام مش صحيح او بقولك كلام وخلاص ودة حقك ليك كل الحرية تصدق او متصدقش .. بس دة الواقع ولو ليك مصدر قريب تثق فيه ممكن ياكدلك الكلام دة

مكنش بيدفع من جيبه اكيد ,
لكنه كان بيتصرف بطرق تانية وباستغلال اماكن تانية
وعارف انك مش هتقتنع بدا ابدا لاننا سبق واتكلمنا في دا
بس عالعموم الحرامي ف البيت هيبقي حرامي ف الشارع وفي الجامع كمان :d

مش عايزك كذلك تنكر انه افضل جيل في تاريخ الاهلي تم التعاقد معاه من الاسماعيليه
اما عن طريقة التعاقد سواء بشكل مباشر او ترانزيت من برا
مش هتختلف في شيئ لانه بتتم العملية دي عن طريق الاهلي نفسه طبعا !
مسألة الاسماعيلي والفلوس الاسماعيلي مكنش بيجري ورا لاعيبه الاهلي في يوم من الايام
لكنه نادي بيعاني طول عمره ماديا ومش مستغرب لو اتعامل مع الفري بس والدرجة التانية


ليه مرتضي مدخلش في باقي صفقات الاهلي !
سؤال غريب الحقيقة ومكنتش فاهم انه لازم الزمالك والاهلي يقطعو علي بعض في كله !
في حاجة اسمها احتياجات فريق مش اكتر مش كل صفقه الخصم يدخلها هيدخلها
بل انه من الاول كان المفروض في بروتوكول بين الناديين
وطالما انت متابع لصفقه اسلام رشدي اظن انك عارف انه اداره الاهلي مخرجتش
ونفت انه الزمالك قدم الاول علي اللاعب !
وانا مشوفتش اي تصريح لمرتضي بيقول انه اي لاعب الاهلي هيحاول عليه هناخده !
شوفتله بيقول احلام جماهير الزمالك هتحقق , و شوفت موضوع هنتعاقد مع رئيس الاهلي !
لكنه مذكرش انه كل الصفقات هندخل فيها والكلام دا !

ولعلمك حكاية اسلام رشدي دي عباره عن ضجه اعلامية بيعملها مرتضي
بسبب حكاية الهبوط والكلام دا اكيد ولكن كذلك علشان يشغل اداره الاهلي
اللي مش هتقبل بانها تخسر اللاعب قدام الرأي العام الاهلاوي !
ومرتضي في نفس الوقت بيخلص في صفقات تانية اهم للنادي من اللاعب دا !
وهتشوف الكلام دا عملي قريب :]
واللي مظنش باي حال من الاحوال انه يستحق الكلام دا كله


جزئية مسانده الالتراس مش عارف جبتها منين وايه دورها في الصفقات
لكني متفق انه فكرة الغاء الهبوط مديه مرتضي علاقة جيده مع الفرق اللي بتعاني دي
زي المنيا وحرس الحدود والطلائع وهكذا
لكن مش عارف ازاي ذكرت الشرطة وسطهم !
لانه الشرطة بينافس الزمالك علي الصعود ومش من مصلحته خساره لاعيبته ابدا !
بل انهم معترضين علي دا وقدموا بيان رسمي بيقولو مش هنبيع لو خسرنا !

وكل اللاعيبه اللي مضي معاهم الزمالك هم نفسهم اللي مضو ولسه اداراتهم !
يعني مثلا لاعب فري زي العزب او معروف مضوا للزمالك علشان علاقات الشرطة مع مرتضي ؟!

الحقيقة مستغرب من مدي جبهذه المصدر الخاص بيك اللي بتكرر ذكره !
صدقني نص الكلام تجميل موقف اداره الاهلي مش اكثر
علاقات مرتضي مع الهابطين مثلا مش هتحسم اي صفقه من الشرطة " المنافس ! "
ولا هتاخد اي لاعب فري عقده منتهي زي العزب و كوفي !
ولا هتخلي لاعب يمضي بشكل مباشر الزمالك قبل موافقة ناديه زي حفني ولا قمر !!
المسألة كلها الماده انه الزمالك عنده انفراجة مالية وقدر انه يدفع المطلوب !

[Eng Esraa]

تسلم ايدك ع المجهود الرائع

[ღ Gի๐sτ ღ]

აα∂ Ԑγεა

مصدرى مؤكدة 100% ،، الخبر لو اتسرب هايطلع ف كل المواقع
اما انه لية مفيش ضجة على الخبر فدة انا ذكرته ، ادارة الاهلى احترمت اللاعب ومصرحتش ولا هاتصرح عن الاصابة الموجودة احتراما ليـه ولمستقبله فقط
على فكرة ايمن حفني كان احطياطى فى طلائع الجيش وبينزل فى اخر الماتش
ومكنش بيلعب بشكل كامل فى ليبيا وتم الاستفسار عن مدربي اللاعب وأكدوا دة
-
تاني رد ليكـ .. لأ الاهلى مخسرش الصفقات الاهلى هو اللى انسحب من اغلبها
واظن انت بتتابع اخبار الرياضة يعنى وعرفت من خالد قمر نفسه ان الاهلى هو اللى اوقف المفاوضات معاه ، واحمد مكى طلع قالها مع شلبيى ان رغبتة الاولى الاهلى وايمن حفني رغبتة كانت الاهلى وذكر دة اكتر من مرة فى موقع سبورتانا اللى مسؤل عنه هيثم عرابي اكبر صحفي فى مصر ليه مصداقيـة وحتى شلبى قال من حديثه الشخصي معاه الاهلى كان متفق ولكن فجأة الاهلى انسحب من الصفقة .. يعنى اللعيبة اصلا كتير منهم رغبته الاهلى واغلبهم أكد ان الاهلى هو اللى انسحب والاسباب مغالاة الحدود وامضاء قمر لاكتر مع نادى بنفس الوقت ودة ممكن يعمل مزايدات احنا فى غنى عنها وايمن حفني بسبب اصابة اللاعب ..
الوحيد اللى كشف طبي وبعدها راح خلص مع الزمالك بارادتة معروف يوسف و ممكن يغير رأيه ويوافق على الاهلى لو الاهلى عرض مبلغ مادي عالى عليه لانه يهمه الفلوس بالمقام الأول
-
مش جزئية الهبوط بس اللى عاملة علاقات جيدة مع مرتضي .. بردوا مشكلة الالتراس وانا متأكد منها والاولوية هاتكون للزمالك ولو الزمالك مش عاوز حد او لاعب مصمم ميلعبش فى الزمالك وقتها ممكن ينتقل للاهلى
-
فى الوقت اللى انا كتبت فيه الرد دة اهتمام الزمالك كان مع احمد صبرى فقط ولكن بدئوا يدخلوا من ساعات فى جيبور ومهند عبدالرحمن وتقريبا جيبور عنده عرض احتراف فى اوروبا وانا شايف ان المخاطرة معاه مش كويسة لإنه مقدمش اداء كويس فى ليبيا يعنى مستواه مش ثابت ومش شرط ينجح فى فريق عاوز ينافس على بطولات زى الزمالك او يتحمل ضغوط الزماللك
وانا مبجملش فى ادارة الاهلى ولا حاجة ، بالعكس انا اصلا مكنتش مؤيد لمجلس طاهر وزعلت جداً ان المجلس دة نجح ومكدبش عليك في اخطاء بتحصل منهم انا مش قادر اتقبلها عكس مجلس حسن حمدى كان في اخطاء كتير بس كنت بتقبلها لان كان فيه مميزات بتغفرلهم دة عندنا كمشجعين بس بنفس الوقت كتبت رد بمعلومات متأكد منها والا حتى مكنتش اتكلمت عن صفقات كويسة للزمالك وفى صالح مجلس منصور زي احمد صبرى او مهند عبدالرحمن اللى الاهلى اول فريق اتكلم مع وكيله ..
بالمناسبة معلومة جديدة ليك في كلام بين ادارة الاهلى وانبي على مؤمن زكريا وممكن يجيلنا من اول يناير القادم لو الامور مشيت معاهم تمام

طيب ماهو قمر وحفني اللى انت ذكرتهم ماضين بردوا للاهلى ؟ وقمر ماضي لانبى ولنادى رابع كمان معنى كلامك ان ادارة الشرطة موافقة على البيع للاربع اندية ؟ الشرطة اصلا مبتتفاوضش مع حد حالياً بس الاولوية هاتكون ليها للزمالك بالمقام
الاول انما كل اللى حصل الايام اللى فاتت سواء من الاهلى او من الزمالك مع لعيبة الشرطة مفاوضات مع اللاعبين بشكل اساسى ومن بعيد كلام مع ادارة الفريق وكمان لازم تعرف ان انت فى مصر مش فى اوروبا .. في حاجات بتحصل الواحد ميتوقعهاش ولا يتخيلها وكل يوم الرأى بيتغير بشكل غريب سواء من اللعيبة او من الادارات وكل يوم كلمة غير اللى قبلها حتى مجلس ادارة الاهلى نفسه في صفقة مفترض اننا كنا انسحبنا منها بس الاهلى ناوي يدخلها تاني لو اللى فى دماغ الادارة متمش
-
كلها شهور وممكن ترجع لكلامى دة وتتأكد من صحة كلامي او العكس لو مكنتش مقتنع ودة حقك طبعا لانك ملكش ثقة فيا .. بس انا بقولك كدة عن ثقة وتأكد وانا بكتلك الكلام دة هنا بشكل فردى بيني وبينك او مع العضو كريم مش فى موقع .. يعنى مفيش هدف ولا مصلحة فى انى اكتب كلام مش صحيح طالما مش بسىء لحد يعنى لو كنت فاتح موقع ولا صاحب جريدة كنت ممكن تقول انا بعمل كدة عشان الاعلانات ولا زيادة البيع ولكن انا مليش مصلحة فى الكلام اللى بكتبهولك دة
فقط معلومات عرفتها من مصدر موثوق فيه وكتبتها بما انى زورت الموضوع وهو جايب سيرة الصفقات

[აα∂ Ԑγεა]

مش موضوع شخصي اكيد لكن الحقيقة الكلام مش لاقي طريقه لدماغي
وللاسباب اللي ذكرتها في الرد ,,
انه مش معقول مهما كان مصدرك انه يكون وحده اللي عرف الخبر دا !
ياراجل دا التعاقدات والخناقات بتتسرب ,,
كمان نفس الكلام خرج علي صلاح الدين الاثيوبي
فعلي نفس المبدأ لماذا لم يتم التكتم عليه والحفاظ علي سمعه اللاعب ؟!

ثانيا حفني الاهلي بيحاول عليه من شهور وشهور وكمان المواسم السابقة نفس الكلام
فعلي مبدأ كلامك انه ( المدربين السابقين ) عارفين انه مصاب
ياتري مذكروش الكلام دا للاهلي ليه كبيتهم قبل ما يتم الكشف الطبي !


عارف الكلام دا اللي انت ذكرته انا بحاول اتابعه من يومين علشان الاقيله دليل
ف الاخر وصلت لانه موقع نجم الجماهير " وما ادراك ما نجم الجماهير "
عمل مانشيت كبييييير بالكلام الي انت ذكرته دا ,
فتأكدت من كلامي انا :]
لو شوفت تعقيبي الاساسي في الموضوع هتلاقيني انا مكنتش عايز حفني
واني بفضل ضم احمد صبري بمراحل , لكن الكلام دا مش لعوامل فنيه ولا لاصابات
لانه سنه 29 سنه الشهر اللي جاي وانا عايز الفريق يكون شباب :]


بالنسبة للاهلي فهو خسر حفني وخسر معروف يوسف وكمان دويدار
لان كل دور كان بيحاول معاهم " بجدية "
كمان انسحاب الاهلي من صفقة ما قبل ما تتم ومماطلته فيها
لحد ما اللاعب يقبل العرض من الزمالك ويقول محدش كان جد معايا
دا مش معناه ابدا انه الاهلي " مش عايز " اللاعيبه دي , بل انه " مش قادر "
لانه الازمه المالية بتحكم حاليا في النادي ولسه محمود طاهر بيرتب ورقة
لسه في صفقات كتير هيحسمها الاهلي , لكنه كذلك فشل في دول مش محتاجة تجميل :]

..

ذي ما ذكرت انه جيبور علي ردار الزمالك من فتره وفي محاولات
موضوع العرض لو فعلا نادي برتغالي اظن هيحسم وجهته المستقبلية

مهند عبدالرحمن علي ما تابعت الاهلي والزمالك الاثنين بيحاولوا عليه ,
والكلام دا له كذا يوم والمفروض اللاعب هيوصل مصر قريب ,

مؤمن والاهلي ؟ مش جديدة ولا حاجة
مانا عارف انه الاهلي داخل فيها وبيحاول يخلصه من انبي
والصراحة لو مرتضي فرط فيه ومحسمش الصفقة يبقي ولا عمل اي حاجة
لانه مؤمن زكريا ثاني اهم لاعب في الزمالك بعد محمد ابراهيم في نظري :]

جزئية انه اللاعب مضي مش النادي دا كان كلامي في ما معناه انه مش علاقات مع انديه !
انها مجرد اللي قادر يدفع عرض مادي قوي
والزمالك ملهوش اولوية في الشرطة ولا حاجة العرض الاكبر هيكسب
حتي الصفقات اللي المفروض مضت زي خالد قمر وزي حفني وكمان دويدار
ملهاش اي قيمة امضتهم اكيد وممكن في لحظه نشوف الايه اتعكست
وتلاقي النادي رافض او مقرر ميديش الزمالك ,
لسه كتير ,

[აα∂ Ԑγεა]

نسيت اجيب المانشيت

الخبر السري من المصدر مبقاش سري ولا حاجة
ومن جريدة مصداقيتها عالية :]

بفرقين
الاول انه جاب كلام سابق لميدو قبل الانتقال وعمل انه بعد الانتقال !
ووالثاني انك قلت في الحوض وهما قالو في الخلفية !


زي ما ذكرت انا في ردودي كلها اني مش مؤيد لفكرة حفني علي قد ما انا بتمني صبري
واسبابي هيا اللي ميدو كذلك مقتنع بيها وهو عامل السن بتاع اللاعب
لكن في المجمل مستوي ومهاره وامكانيات اللاعب حاجة معروفة ومش مستاهله كلام
اما عن الاصابات فشغل الصحافة الصفراء مبيبطلش :d
اتمني الطلائع يتزمت شوية في الفلوس لعل وعسي يصرف النظر ويتجاب الشحات و صبري
بس تفتكر وقتها هيروح الاهلي ولا لا :d
اما لو تم التعاقد واكتمل فهيا " برضوة صفقة سوبر " وصانع العاب مبدع

المانشيت اضغط هنا

[ღ Gի๐sτ ღ]

sad eyes

مفيش لاعب الاهلى خرج من صفقته بسبب الفلوس الا احمد حسن مكي لان الحدود كان طالب مبلغ عالى اما باقى اللاعبين فانا ذكرتلك ايمن حفني بسبب اصابته وانت بتقول لية المدربين مقالوش كدة من الأول ، فاحنا اصلا كشفنا طبي زيه زي اى لاعب ولما النتيجة طلعت مش فى صالح اللاعب ناس من عندنا حاولت تتأكد من المدربين لزيادة تأكيد لا اكتر ولا اقل .. وخالد قمر زى ماكتبتلك الاهلى محبش يعمل مزايدات مع باقى الاندية عليه لأنه ماضي لاكتر من نادي ودة ممكن يخلق جو من المزايدات الا لو اللاعب حب يروح الاهلى من غير مزايدات مع اندية تانية اما معروف يوسف فهو اللى اختار الزمالك بعد ماحنا اتفقنا معاه ودة انا كتبتهولك فوق .. مع ان كلمة مش قادر دة مش تنطبق لان فى كل الاحوال في رجال اعمال هاتمول الاهلى واظن انت عارفهم ودة اتفاق موجود من قبل الانتخابات ولو منفذوش كلامهم والناس اللى مع محمود طاهر خذلته ودة ممكن يحصل بردوا لان ناس كتير اتخلت عنه بسبب وبدون سبب .. محمود طاهر هايدفع من جيبه الشخصي مع انه رافض فكرة انه يدفع فلوس بس هايعملها .. يعنى فى كل الاحوال الناس هاتتصرف مش هاتسكت يعنى ! .. مع العلم ان في لعيب احنا اوقفنا التفاوض معاه من فترة ولكن الاهلى ناوي يدخل بتقله تاني ويخلص الصفقة لو اللى الادارة بتخطط ليه دلوقت محصلش

اللاعب مصاب فى الحوض مش فى العضلة الخلفية ،، اما المصدر اللى عارف المعلومة فالمصدر مش وحده بس اللى عارف المعلومة لأ كتير جداً فى النادي عندنا عارفين المعلومة دى ولكن مفيش حد بيصرح باي تصريح اعلامي ودة عهد الادارة واخداه .. وكون ان جريدة نجم الجماهير هي تنزل الخبر فى العدد القادم بتاع الاتنين الجاي او متنزلهوش فدة مش يعنيني لان زى ماقلتلك الخبر ممكن ينتشر لو اتسرب .. مع العلم انى مش متفق معاك فى ان مصداقيتها عالية ، انا معرفهاش ومبتابعهاش عشان محكمش عليهم بالسلب بس لحد دلوقت مشفتش جريدة ولا موقع صادق الا سبورتانا فقط ودة لثقتى فى هيثم عرابى ومن بعيد يالا كورة اما باقى المواقع مستواها قل للأسف حتى المواقع الكبيرة زى في الجول والاهلى ويلا كورة مبقاش زى زمان عشان كدة مبقتش اتابع ولا موقع ولا جريدة من سنين غير موقع سبورتانا فقط واما موضوع صلاح الدين فدة كان اشاعة على اللاعب عشان مكنش بيلعب مع دجلة مؤخراً فألفوا الاشاعة دى ودة طبيعى انك تلاقى اشاعات كتير موجودة من مختلف المواقع خاصة ان كلهم بينقلوا ويرددوا الكلام من بعض ودة بسبب هبوط المصداقية لمعظم المواقع والصحف زى ماقلتلك .. يعنى لو خبر نزل فى يلا كورة مثلا هاتلاقيه انتشر على اغلب المواقع

اما رأيك فى حفنى انا متفق معاك بشكل كبير انا بردوا مش حابب فكرة التعاقد معاه من الأول عشان سن اللاعب عسك لعيبة تانية شباب ممكن يبقى قدامهم مستقبل كبير .. مع العلم ان الاصابة دى مش شغل صحافة صفرا ولا حاجة دة انا متأكد من كلامى ولو مش مصدق ليك كل لحرية ..
مين اللى يروح الاهلى ؟ غالبا احمد صبرى لو انتقل هايروح الزمالك بس بشكل عام كل حاجة ممكن تتغير ومن هنا لحد فتح باب الانتقالات كل حاجة ممكن تتغير فى ثانية واحدة لانى زى ماكتبتلك امبارح الواحد بيشوف العجب كلام لعيبة وادارات كل يوم بيختلف عن اللى قبله وفي لعيبة كانت شبة رسمية فى الاهلى والزمالك ولكن حصل حاجات غريبة عركلت الطريق والعكس صحيح ..

وبصراحة انا نفسي لعيبة الشرطة يروحوا الزمالك عشان تخلصوا فلوسكم عليهم ونفضي احنا بقى للعيبة التقيلة فعلياً لعيبة انبى وسموحة والمقاولين
ودة لان فى رائي لعيبة الشرطة هاتكون دعم للدكة مش للفريق الاساسي لان دويدار مش كويس كمساك عكس اما كان بيلعب ليبرو وخالد قمر موجود مهاجمين افضل من عندنا زى عمرو جمال والمهاجم الافريقي القادم ولو رجعنا عبدالظاهر مش هايقل عنه والوحيد اللى كان كويس لإن ملوش بديل فى سوق التعاقدات هو معروف يوسف ومش شرط يروح الزمالك بردوا لان اللاعب دة اكتر لاعب رأيه بيتغير كل شوية كل ماحد يكلمه عن الفلوس وانا مقلق من نجاحه لأن شكله بالعقلية بتاعته دي مش هايعمر سواء فى الاهلى ولا الزمالك ولا اي نادي تاني يروحله لان الاندية هتتأخر فى دفع المستحقات وبكدة ممكن يهرب