هيا طيبة بس غبية شوية

السلام عليكم
انا هادخل في الموضوع على طول
واحدة صاحبتي اوي يعني رشحتني عروسة لاخوها وبصراحة هوا شاب محترم ومتدين وكل حاجة وزارونا في البيت بس زيارة عادية زيارة تعارف بس لان هوا مكانش يعرفني قبل كدة يعني مقالوش عايزين نخطبك ولا حاجة زيارة بس لكم مفهومة يعني ان لو حصل قبول وعجبنا بعض هايتقدم
المهم هوا بقى يسال عليا على طول عن طريق اخته يعني ويطمن على امتحاناتي وكدة
بعدها بفترة انا تعبت شوية كان بيجيلي صداع جامد كدة طول الوقت مش بيفارقني فبعدين رحت لدكتور مخ واعصاب يعني قالي اعملي اشعة رنين عالدماغ والاشعة دي بسيطة يعني فعشان التعب ده بعدت شوية عن الناس قفلت النت من موبايلي مش عايزة اكلم حد الا صاحبتي دي لانها كانت قريبة مني فكلمتها وقلتلها حصل كذا كذا بعدها بكام يوم كدة لقيت واحدة صاحبتي بتسال عني وتقولي طمنيني اخبار صحتك ومش عارفة ايه استغربت من لهجتها جداا يعني فقالتلي صاحبتنا دي اللي قالتلها اني تعبانة وهولت الموضوع اوي والصدمة بجد بقى والمشكلة مش في كل ده المشكلة انها راحت قالت لاخوها اللي هوا عايز يخطبني ده اني تعبت وكدة فراح قالها دي صاحبتك اللي عايزة تخطبيني ليها عايزة تخطبيني لواحدة عيانة طبعا البنت بتقولي الكلام الللي حكتو صاحبتي ليها ..
انا مش عارفة مين الغلطان دلوقتي ياترى انا غلطانة لاني قلتلها
ولا هوا اللي حيوان ^^
والا الغلط من مين
انا بجد انصدمت بصراحة
والحمد لله الاشعة طلعت سليمة كانوا بس بيطمنوا يعني

[✿ Celiηα]

انتي واخدة الموضوع بحساسية ليه !
ملكيش دعوة مين قال ايه لمين
ولما تكون حاجة تخصك اتعودي متقوليش حاجة لحد
لا لصاحبتك ولا لجارتك ولا لأي شخص كان
هترتاحي من وجع الدماغ وبعدين الجواز نصيب

[جبل عالي]

انتي قلتي اللي فيها ف النهاية للأسف

هو نوع من الغباء البشري اللي بيصدم الناس

وبيخلي جواهم نقطة سوداء .... بجد الله يسامحهم بقاا

شوفي هو قدر الله وماشاء فعل ويمكن موضوع الاشعة ده

ربنا جعله سبب عشان تعرفي طريقة تفكير البني آدمين دول

مش بقولك تكرهي لا ... بس اعرفي سطحية التفكير

وبالتالي متزعليش أبداااااا على اللي حصل ده

اعتبريه خير من ربنااا وإنقاذ من عقول سطحية


عشان لو الوضع معكوس عمر ماكان هتطلع كلمة زي كده ابداااا


ربنا يوفقك في اللي يقدروكي ويعرفوا قيمة مشاعر غيرهم

[الأميرة رودي]

وايه المشكله لما نتعب شويه ونعمل اشعه ونطمن على نفسنا
هو صحبتك اللى اتصرفت خطأ
لآنه فيه ناس بتحب تحتفظ بخصوصياتها زيك كده .
وبعدين ياحبيبتي احمد ي ربنا والجواز ده نصيب
يمكن ربنا جعل الموضوع ده كاختبار ليهم
وانتى الكسبانه صدقيني
وحمد االله على سلامتك أهم شئ انك بخير
وأى حاجه تانيه تتعوض..

[كوين ميرو]

ياااسلام

بتقولى هو شخص محترم ومتدين بس مع اول موقف وضح انها مجرد مظاهر

انت بتقولى كان بيطمن على امتحاناتى وكده

من باب اولى لما يعرف انك تعبانه يسئل ويطمن وبعد كده يشوف حكايه الارتباط دى

مش مجرد مايسمع انك تعبانه يقول لاخوته عايزه تخلينى اخطب واحده تعبانه

بصى ياقمر انا شايفه ان ربنا وقف جانبك وبين معدنه وعلشان كده المفروض تشكرى ربنا مش تزعلى

[Ana coco]

على فكرة الموضوع مافيش فيه اي حاجه
الكلام واصلك من صاحبة صاحبتك و طبيعي هي هتكلمها بدون دبلوماسية و بتحكيلها عادي : اخويا قالي انتي جايبالي واحده تعبانه و كدا
موضوع الصداع دا بيجي لكل الناس
المهم ماتشليش في بالك و لا تزعلي من حد حتى لان فعلا مافيش حاجه حصلت
حتى لو رفض فدا امر وارد

[دمعه حائره]

بلاش تتسرعى ولازم تتأكدى انى صاحبتك قالت كده للتانيه
ولو فعلا ده حصل ماتزعليش لان الانانيه وحب النفس
ماتنفعش فى الزواج وطالما ابتعد لمجرد انه عرف انك تعبتى
يبقى مش هايكون امين عليكى
وده مش غباء منها ولاحاجه قد ماهى مابتعرفش تكتم سر
ده لو كنتى قولتلها ان مرضك سر ومش تقوله لحد
ممكن تكون قالته لما صاحبتك التانيه واخوها سألوا عليكى
والف سلامه ويارب ماتشوفى شر ابدا

[العاشق الذى لم يتب]

ولا محترم ولامتدين ولايحزنون
وكويس
ان الموقف ده حصل
قبل مايتقدم لخطبتك
وربماضارة نافقعة
وكبرى دماغك
وسيبك منه وكمان من اخته بالمرة
ربنايشفيك ويشفينى
ويوفقك
تحياتى

[Silver Flower]

الله يسامحك ما نتي عارفه الناس بتخاف
عادي بتحصل
بس انتي دائماً أتعلمين انه ما تخبرني حد عن حالك وخصوصا
ال الصحيه
الانه الناس ما بترحم
وان شالله ربنا يعوضك خير

[ساحر الأحزان]

هو موقف عادى جدا كل شخص معرض للتعب ولازم يطمن على نفسة

هو فية حد سليم اليوم

وبعدين هو البنات بيتبل فى بقها فولة


يبقى وريها الكشف تورية لاخوها

على شان نفسيتك ترتاح

وتقطعى الكلام

ربنا يوفقك