مورشو فى حديث المساء..!

[Sea Pearl]

مساء الخير كل سنة وانتم طيبين ورمضان كريم ضيفى اليوم ضيف مميز معروف بعناده ومشاكله الكتيرة وقولت استضيفه بقى لأنه مبهدل الاعضاء استضافات ومولع المنتدى ..! morshooo مشرف سابق مساء الخير مورشو كل سنة وانت طيب ورمضان كريم وربنا يعوده علينا باليمن والبركات كل سنه وجميع الاعضاء بخير ورمضان كريم على الجميع وسعيد بالاستضافه شايف المنتدى فى تقدم دلوقتى ولا لأ؟ المنتدى انتى عارفا الفترة الاخيرة كان فيه مشاكل خاصه بالسيرفر وقبلها كانت فترة امتحانات والاعضاء بتهتم اكتر اكيد بالدراسه فكدا كدا شهر ( 5 و 6 ) بيكونو أقل الشهور تواجد للاعضاء فدا طبيعى واعتقد ان من اول شهر رمضان هيكون فى نشاط كويس بالمنتدى . ايه رأيك فى الاعضاء اللى اخذت عضوية التميز قبل ما تكمل الف مشاركة مع ان قبل كده كان العضو بيجتهد جدا ويعمل اكتر من الف مشاركة عشان ياخد عضوية التميز بس؟ التمييز المفروض يكون صعب يعنى عشان اخد تمييز لازم اخده بعد فترة معينه مشكله المنتدى انك بتلاقى عضو ماشى كويس جدا وعامل نشاط وبينزل حاجات مميزة جدا خلال شهر مثلا وبعد كدا بيختفى او بيقل نشاطه ..... الخ فى نفس الوقت لو قولنا هندى التمييز بعد الـ 1000 مشاركه ممكن عضو فى اليوم يعمل 200 مشاركه فمستحيل بعد اسبوع هنقوله انتا مميز فالعمليه اعتقد عايزه ترتيب كويس واكيد الادارة بتاخد بالها من الكلام دا انت كنت الاول مهتم بصفحة المنتدى على الفيس وبتزل بعض مواضيع الاعضاء وبعض الاقتباسات من مدونتهم ..ليه اهتمامك قل دلوقتى؟ ولسه دا بيحصل بس انتى عارفا الفترة الاخيرة المنتدى وقع وكان فيه مشاكل فربنا يسهل والصفحه تتظبط تانى انت متابع لمدونات الاعضاء وكنت قولت انك بتشوف العجب فيها..ايه اللى بيثير اهتمامك وايه اللى انت مش بتحبه فى المدونات؟ توبيك مورشو وصفحات الاعضاء كان سبب انى ادخل صفحات كتير من الاعضاء والموضوع مكنش سهل كتير كنت بدخل صفحات وتعجبنى مشاركات واقول هجبها فى التوبيك بس مكنتش بعرف اجبلها تعليق يخلى العضو لما بشوف التوبيك يضحك على الحلقه حتى لو بنسبه 75% كل حلقه كنت بجيب تقريبا 5 مشاركات اكيد مش كلهم هيعجبو العضو لكن الحمد لله التوبيك كان ناجح جدا الى بيثير اهتمامى ان العضو يكون متنوع فى مدونته مش شرط اكون مثالى ودائما اكلم بمثاليه لان مفيش حد بالشكل دا . هل غياب سيلفر سبكترا مأثر ع المنتدى وهل مأثر ع القرارت التى تتاخذها الادارة ؟ وايه رأيك فى الأداره الأن ؟ طارق اكيد غيابه بيأثر بشكل كبير على المنتدى وطارق من الاعضاء الى عملو بنات مصر القرارات اعتقد فى حاجات كان ممكن ماتحصلش لو كان موجود بس دا مابيقللش من الاداريين الموجودين عشان بيحاولو يحافظو على المنتدى واعضائه موروشو السيساوى شايف مصر دلوقتى ازاى وشايف انها هتقدر تتغير للأفضل ؟ فى تغيير كبير بيحصل وهيحصل خاصه فى الجانب الآمنى ودا انا معاه لازم يكون فى داخليه انتى لحد شهور قليله كان اى خناقه بنلاقى السلاح طلع واكنك فى حرب مش هقول ان دا اختفى لكن مبقاش زى الاول واكيد مع الوقت ان شاء الله الامور هتتغير مين اكتر ناس بتحتقرهم وبتعتبرهم محسوبين على الثورة؟ هو بغض النظر عن بحتقرهم دى عشان محدش يزعل كلنا فى الاول والاخر عايشين فى وطن واحد والى بيحصل دا طبيعى هتلاقى فى مؤيدين ومعارضين وناس بتحشر نفسها هههههههه يعنى تلاقيه مع الاخوان والحزب الوطنى ومع كل نظام بيحكم . ايه رأيك فى الانفجارات اللى حصلت فى مترو الانفاق والعبوات الناسفة التى يتم تصنعها وتهريبها عن طريق ميناء الاسكندرية؟وتعتقد مين وراء هذا؟ مين وراء معرفش طالما مفيش حاجا اتقالت من الجهات المسئؤله رئى اكيد ضد الكلام الفارغ دا واعتقد ان خلاص مش هنشوف الكلام دا تانى والى بيعمل التفجيرات دى جماعات جبانه ما رأيك فى مقولة(قبل ما نثور ضد الانظمة المستبدة لازم نثور على اخلاقنا وانسانيتنا)..! من ايام ثورة يناير وانا بقول مفيش حاكم هيجى يغير سلوكياتنا احنا الى لازم نتغير الاول يعنى مفيش رئيس هيجى يخلى عامل الحكومه قبل ما يخدمك تلاقيه فتحلك درج المكتب عشان تحطله 10 جنيه الرئيس مش هيجى يقولك لما تشوف ست كبيره واقفه فى المترو مثلا تقفلها عشان هى تقعد الرئيس مش هيجى يقولك ماتبقاش استغلالى وتبنى مثلا قوضين زياده فى شقتك الرئيس مش هيجى يخلى سواق الباص ياخد أجرة زياده عن الى بياخدها كل دا لو اتغير هنشوف البلد بشكل تانى لان كل دى عيوب فينا احنا مش فى الرئيس ما رأيك فى ظاهرة ضرب الزوج للزوجة ؟ وظاهرة تعدد الزوجات؟ الزوجه ليها كل الاحترام مهما وصلت الخلافات الواحد مش مجوز بنت من الشارع عشان يهينها ويضربها تعدد الزوجات اكيد ضده لكن لو فى ظرف قوى اكيد خلاص الزوج من حقه انه يتزوج مره تانيه والمقصود بظرف قوى يعنى مثلا لا قدر الله الزوجه مش بتخلف مثلا فأكيد من حق الزوج انه يشوف ولاده ويحملو اسمه زى بالظبط من حق الزوجه لو زوجها مش بيخلف مثلا تطلب الطلاق ودا مش عيب والا حرام . ما رأيك فى التلفزيون المصرى الان وان هيفا عملت مسلسل وصافينار برنامج وسما المصرى فوازير؟ لو تقصدى التليفزيون المصرى ( القنوات الارضيه ) مش بتابعها لكن بما ان فيها صافيناز وسما المصرى يبقى صوما مقبولا ان شاء الله هل تعتقد ان تعديل قانون التحرش يستطيع الحد من ظاهرة التحرش؟ اعتقد احنا والحمد لله فى المراكز الاولى فى التحرش كلنا تابعنا القضيه الاخيرة او الفيديو الاخير بتاع الواد الى من المرج دا البنت راحت قالت كنا بنهزر فتفتكرى دى واحده يهمها قانون التحرش اساسا اتمنى ان القانون دا يعمل حاجا انت قولت فى مدونتك (اذا قرر الرجل الزواج فهذا يعتبر اخر قرار يسمح له بأتخاذه) تعليقك؟وفعلا دى حقيقة؟ انا قولتها بهزار مش بجد يعنى ههههههههههه بصى الامور كلها بتختلف فعلا بعد الزواج فى حاجات الواحد مابيقدرش ياخد قرار فيها لوحده لازم يكون مع الزوجه ومن اهمها ( الماديات ) عمر الزوجه ماتقول هات حاجا وتقولها لا مش هجبها عشان لو مجبتهاش ماتسئلش معملتيش دا ليه عشان هتقولك مانا قولتلك وانتا مجبتش انها الزوجه هل من الممكن ان تخبر أمرأتك بماضيك وعلاقاتك السابقة؟ الماضى والعلاقات اكيد عاديه يعنى الواحد مكنش بيبع حشيش مثلا ومخبى عليها او كان مقضيها مع واحده اكيد كلها كانت حاجات عاديه ولو فى صداقات كانت ايام الدراسه مش اكتر ايه اكتر شىء يلفت انتباهك فى شكل المرأة ومن الشخصية النسائية التى يعجبك تفكيرها ؟ الشكل مابهتميش بيه قوى يمكن الى بيهمنى اكتر تفكيرها واخلاقها دى اهم من انها تكون جميله وبتلبس كويس .... الخ كلمنا عن مورشو وبعض صفاته ؟ اكلمت كتير عن نفسى ههههههههه ممكن تسئلى اى عضو تانى عن مورشو هيقولك الكلمتين الى بقولهم كل مره شاب عادى ليه طموحات الحمد لله حققت منها والباقى بحاول احققه وان شاء الله اقدر على دا متزوج وعندى ( حودة ) كلمنا عن ارتباطك بأسرتك ومدى تأثير الوالد فيك ؟ اكيد الواحد بيكون مرتبط بالاسره سواء البيت قبل الزواج او الاسرة الخاصه بيه الزوجه والاولاد والدى الحمد لله من الناس الى عمل حاجات كتير فى حياته اشتغل وقدر يصرف على 6 ابناء جوزهم والحمد لله وفاضل الاصغر لسه فى طريق الارتباط طبعا ( حودة الكبير ) الواحد ميقدرش يديله حقه اكيد فربنا يخليه لينا هل مراهقة زمان اصبحت مختلفة عن مراهقة الان؟ وايه النصيحة اللى توجهها لـ شباب وبنات دلوقتى؟ المراهقه اكيد بتختلف من كل وقت لاخر يعنى ايام زمان غير الفترة بتاعتى مثلا غير الفترة الحاليه وكلنا بنمر بالفترة دى غصب عننا فى بيندم عليها وفى بيمر بيها بشكل طبيعى فربنا يهدى الجميع واتمنى ان محدش يندم على فتره زى دى فى حياته لانها فترة صعبه جدا ايه احساسك اول ما اصبحت اب وشوفت محمود؟ اكيد احساس غريب بس المشكله انى مش بحب اشيل الاطفال الصغيرين انا تقريبا لحد دلوقتى شيلت محمود مرتين تلاته لكن وهو ع السرير بتاعه مقضينها بوس والحمد لله ما هى الاحداث التى غيرت حياتك رأسا ع عقب؟ كل فتره وليها ظروفها يعنى فتره وفاة والدتى فتره نجاحى وتخرجى فترة الارتباط كل دى مواقف غيرت من حياتى بس اكيد الفراق بيكون اصعبهم واخيرا هتقضى رمضان ازاى وايه اخبار العزومات معاك؟ انا مابتعزمش هههههههه بصى اول يوم اجازة عشان جاى يوم ( الاحد ) ودى اجازتى اساسا باقى الايام بروح الشغل الساعه 12ظ ارجع على الفطار انزل على الشغل تانى اروح على الساعه 1 والا 2 حاجا تقرف الحقيقه ميرسى على قبول الدعوة مورشو

[Lost Pearl]

حوار جميل و مورشو السيسي بيه منور ههههه

حلقاتك بتاعت الصفحات دي كنت بحبها اوي بصراحة

استمر عليها بقي

باقي الاستضافة جميلة و منور يا باشا

تسلمي يا حبيبتي ع الاستضافة و المجهود

فـ انتظار اللي جاي

[CAN _ 7LM]

حلو كتيير الحوار
اسئله مميزه واجابات قيمه
تسلمى ع المجهود

[gold rose]

جميل اووي اوووي منور يا ابو محمود والله ..؛
واكيد مورشو من اهم اعضاء المنتدى ..،
وهوا انسان طيب جدا والله .،؛
ربنا يحمي يااا رب .؛
حميله الاستضافه يا قمر ..؛

[العاشق الذى لم يتب]

جميل البرنامج
ماشاءالله عليه
فيه حوالى 300سؤال
ومرشوادها وقدود
ماشاءالله عليه خبيروقديرومنور
تسلمى وتسلم مرشو
كل سنة وانتوطيبين
مودتى

[bobaOo]

استضافة جميله
وحوار أروع
استمتعت بالأسئلة والأجوبة
في اتظار جدبدك

[شهيده تحت الطلب]

حوار جميل
وضيف مميز
واجاباته جميله
تسلمي عالحوار ♥

[morshooo]

طبعا بشكرك على الاستضافه
وكنت سعيد باسئلتك جدا
اتمنالك التوفيق دائما
وياريت تستمرى فى التوبيك