ردود وموضوعـات بلآقيمه..والعد فى اللمون !!

[الأميرة رودي]

السلام عليكم

مساءكم خيـرات وبركـات وروائح من الجنـه تلآمس أرواحكم النقيــه

كل عام وانتم بألف خيــر

موضوعي ممكن يكون اتناقش قبل كده

بس هي فعـلا ظاهره وياريتها ظاهره كويسه
بالعكس
ظاهره سيئه جدا بتظلم من يستحق وتعطي من لآيستحق

الردود السطحيه العشوائيه ف الموضوعات واللى ممكن تساعد العضو على عمل عدد مشاركات خياليه ف اليوم

فى حين ان غيــره من يتقن الــرد ويتأنى فى قراءه الموضوع ويعطيه حقــه

هل الابداع في من يكتب اكتر من 50 رد كوبي بست فى كل الموضوعات
ف اقل من ربع ساعه بدون ان يقرأ حتى مضمون التوبيك

ولا فى ان يكتب 10 ردود فقط ويكن بمضمون قيــم واضافه قيمه للموضوع

انا لاحظت الظاهره دي

اني بلاقي عضو عامل كل الردود فى كل موضوعات قسم معين عباره عن رد واحد فقط ومتاخد كوبي

طب ازااااى ؟؟؟
كمان عضو ممكن يعمله 5 و 6 مواضيع يوميا يمتلك بيهم صندوق الابداعات وتلاقي الموضوعات اصلا بلا هدف أو معنى ولكن بيعمل كده من اجل الظهور

انا واى عضو تاني سهل اوي اننا نعمل فوق ال 300 مشاركه يوميا لو هو ده الابداع
لما عضو يعمل الكم الهائل ده من الردود السطحيه بلآ معني

ممكن نشوفه صاحب منصب مهم فى المنتدى !!
طب ماهو ده هيشجع بقيت الاعضاء الجدد والموجودين من زمان يعملو كده
لو الابداع الحقيقي والترقيه بقت بتستلزم فقط النشاط وكم المشاركات

ماهو سهل كلنا نعمل مشاركات كتييييييييره اوي
...

بس انا عن نفسي وغيري كتير زيي
مش بعرف ارد رد عشوائي واخده كوبي بست ف كل ردودي
الحكايه سهله جدا بس انا مش بعرف مش بتقن الحكايه دي وزيي كتير

بشوف منتديات كتير عامله تنبيه انه ممنوع الرد السطحي ولآزم يكون ف مضمون الموضوع

وان اى ردود سطحيه مش هتتحسب من نشاط العضو
وهنـا بيلزم الاعضاء على الابداع والاضافه واعطاء كل موضوع حقه

ســـؤالي/


ترقيه العضو الى مشرف بتستلزم فقط كم هائل من الردود بغض النظر عن نوعيتها ؟؟

ولآ فيه معايير تانيه لآزم بيتم النظر فيها؟؟

ولو فيه معايير تانيه ايه هيا المعايير اللى المفروض توافرها ف العضو من وجهه نظرك ؟؟

لو عضـو عمل كم عظيم من المشاركات والموضوعات ولكن لا قيمه لها ممكن يتم ترقيته على حساب عضـو أخر أكثــر رقيا وفكرا ومؤهل اكتر من غيره؟؟

الاداره حريصه على تشجيع الاعضاء الاكثر ردود ومواضيع حتى وان كانت منقوله وافكار مقتبسه ولا على المبدعين الحقيقين ؟

ليـه مش بيتعمل تنبيه اداري بالحكايه دي ويتم التأكيد على نقطه الترقيات
وانه مش هيتم ترقيه عضو بيتبع الاسلوب ده يمكن نلاقي الظاهره السيئه دي قلت ..؟؟

يمكن فيه مبدعين كتير سابو المنتدى ومشو بسبب انهم مش ظاهرين بأعداد هائله بالمشاركات وان التكريم لآصحاب المشاركات الأكثـر فقط ..
كلمه حــق كانو أقلآم وفــكر مش هيتعوض ..

خلـــونا نعمل حملــه لمحاربه الردود السطحيــه
أكيد شكل منتدانا هيتغير للأفضل وهتتغير حاجات كتيـر محتاجين تغييرها


ف انتظــار اائكم القيــمه

كمان محتاجين رأي الاداره ف الحكايه دي.. ممكن يساعدونا على الحمله دي
ممكن صحيح نشوف التنبيه ده قريب ويتعمل بيه؟؟؟

ملحــوظه /
انا كتبت موضوعي ومش بختص بيه حد بعينه
وكمان مش كتبته عشان اقصد نفسي فى اى كلمه وربي شاهد على النوايا
أنا بحــاول أرتقى بالمكــان الى الأفضــل
ونشوف السلبيات نحاول نعالجهــا
......

ف انتظار ارائكم

تحياتي

[Lost Pearl]

كل ده يبقي اسئلتي مش سؤالي ههههههه

لأ طبعا مش لازم يعمل 50 الف مشاركة فـ اليوم عشان يبقي مشرف

بس خلي بالك في اقسام اصلا منقولات فـ طالما العضو شغال فيها يبقي ليه لأ ، و مش كتير من المشرفين بيعملو كدة العدد قليل

انما الاقسام الحصرية طبعا لأ مافيش عضو يبقي بياخد copy و paste يتحط عليهم ، و لو بيعمل كدة فـ قسمه قوليلي و انا مش هاقول لحد ان انتي اللي قولتي ههههههه

هو لازم يهتم بالقسم ، ينشطه و مسابقات و كدة و يرد ع الموضوعات كلها و يهتم بالناس اللي بتدخل عنده

لأ ، لو في اتنين واحد بيعمل مشاركات فاضية و التاني بيهتم بالقسم بافكار جديدة و الاتنين نشيطين طبعا بيتاخد اللي بيفكر و بيعمل حاجات جديدة ، لأن ده اللي بينشط القسم بدال ما كل شوية تغيري مشرف

في نقطة بس ان اللي بياخد copy و paste ده مش وحش ، هو كدة بينشط المنتدي او القسم من وجهة نظره ، فـ لازم يكون ليه حق من التقدير

انا معاكي فـ الحملة يمكن الموضوع ده يخف شوية

و مفتكرش ان منة و امجد عندهم مانع فـ تنبيه زي ده لأنه مفيد للمنتدي

تسلمي ع الموضوع

[الأميرة رودي]

تمام ياجميله انا معاكي
كل سنه وانتى طيبه الأول

انا مش ضد الكوبي بست
وفعلا فيه اقسام كتير اصلا بتعتمد على كده وانا واحده من الناس اللى بنقل موضوعات فى الاقسام الغير حصريه
لآن اغلب اقسام المنتدى اصلا بالشكل ده
انا معنديش اى مشكله ف كده
انا بتكلم على نقطـه الردود من أجل زياده المشاركات
مثــلا عضو يدخل يرد فى قسم الازياء مثـلا
وتلاقي كل ردوده نفس الكلمتين على أكتر من 50 موضوع ورا بعض
كلهم ف نفس القسم
وكلهم نفس الكلمتين
الحكايه دي سهله اوي تتعمل لو الحكايه حكايه تزويد مشاركات

بس انا بتكلم عن حاجه تانيه
وهي اننا مش نغفل عن العضو صاحب الفكـر ( وأقل ردود )
ونميز فقط عضو عادي ( بأكثر ردود )

ولو اتعمل تنبيه يأكد بأن الردود السطحيه الل هي كوبي بست ف كل الردود دي مش هي المعيار الأساسي فى التكريمات..
ممكن نشوف تغيير حقيقي

نورتي
وتسلمى لرأيك

[big bốss]

هو كل عضو بيعبر عن فكره

و كتاباته و ردوده مرآه له و ما بداخله و ترجمه لثقافته

فأن كانت مواضيع و ردوده بلآ قيمه او منسخوه فهذه حدود عقله و فكره لآ يملك التجديد

او التميز الذاتى و العكس صحيح

أن كانت مواضيعه و ردوده ذات رقى و مضمون و تعبر عن أفكاره فهو أذا ذو فكر و شخصيه

انا معاكى فى ان الظارهره منتشره و كمان من مشرفين للأسف

و انا معاكى فى الحد منها

لآنى شايف اعضاء جدد كويسين اوى

شكرآ رودى لموضوعك

[ملاك صعبة الإمتلاك]

ع فكره ردود العضو ومواضيعه بتعبر عن شخصيتوا
في مواضيع لازم الواحد يقراها علشان يعرف يرد زي موضوعك
وفي مواضيع لا زي اقسام كتير انا بصراحه هعترف اني عملتها مره
كوبي بييست لنفس الرد لانوا عباره عن صور مش اكتر

[Dodoz]

الاول كل سنة وانتى طيبة ♥

تسلم ايدك على طرحك للموضوع وفعلا فى ناس كتير بيكونو كاتبين نفس الرد فى كل الاقسام كمان ^^

خلينى ارد على اسئلتك ♥

--------------

ترقيه العضو الى مشرف بتستلزم فقط كم هائل من الردود بغض النظر عن نوعيتها ؟؟

ولآ فيه معايير تانيه لآزم بيتم النظر فيها؟؟

لا طبعا اكيد مش لازم عشان يكون مشرف يبقى عامل مشاركات كتير , بالعكس المشرف المفروض يتم اختياره من ناحية نشاطه فى قسم معين وانه يكون مبدع فيه دا غير اسلوبه مع الكويس مع الاعضاء ^^


لو عضـو عمل كم عظيم من المشاركات والموضوعات ولكن لا قيمه لها ممكن يتم ترقيته على حساب عضـو أخر أكثــر رقيا وفكرا ومؤهل اكتر من غيره؟؟

لالا عشان كده هنكون بنظلم , بصى يا قمر هوا فى اعضاء ممكن تاخد كوبى وباست بس فى تفكيرهم انهم كده بينشطو القسم , هوا فعلا بيتنشط , بس بدون فايدة يعنى لو حد مثلا عاوز يعرف مناقشة حاجة معينة وعاوز يشوف رأى ناس لو دخل هيشوف ردود ملهاش اى علاقة اساسا بالموضوع , طب فين رأيك ؟! طب انا هستفاد ايه ؟!
عشان كده لازم يخلو بالهم كويس ^^

الاداره حريصه على تشجيع الاعضاء الاكثر ردود ومواضيع حتى وان كانت منقوله وافكار مقتبسه ولا على المبدعين الحقيقين ؟

عادى لو فى مواضيع مقتبسة , كل المنتديات كلها بتكون مقتبسة من بعضها

بس فى مواضيع بتكون ملكية فكرية لشخصية زى " النقاش والفضفضة ابداعات الاعضاء .. الخ

ليـه مش بيتعمل تنبيه اداري بالحكايه دي ويتم التأكيد على نقطه الترقيات
وانه مش هيتم ترقيه عضو بيتبع الاسلوب ده يمكن نلاقي الظاهره السيئه دي قلت ..؟؟

انا معاكى انه لازم تنبيه والادارة تعمل بيه يمكن الظاهرة دى تقل فعلا ^^

--------

تقبلى مرورى ♥

ودى ~

[bobaOo]

في أعضاء بتدخل المنتدى عشان ترتقي بالمشاركات وتكتر منها
سواء قرأ الموضوع وتمعن فيه أو مبصش في خلقتو أصلا
بالمقابل في أشخاص بتهتم بالمضمون والرد لازم يكون مقنع ويدل على صاحبه
أنا معاكي يارودي
معا نحو منتدى أفضل ههههه

تسلم ايدك ياقمري ع التوبيك

[عاشقة ذكر الله]

عندك حق فعلا لازم حمله تقضي علي الردود السطحيه
لأن فيه ناس أصلا مبتقرأش الموضوع مجرد انها تشوف دا مثلا تبع قسم المواضيع العامه يبقي الرد شكرا يسلمو توبيك جميل موضوع ممميز كدا يعنى كتير :d
بس علي فكره فيه ناس مش واخده بالها محتاجه تنبيه مش أكتر انا اول مادخلت المنتدى كان كدا لعند ماقعدت شويه و بدأت أفهم الجو فهى محتاجه تنبيه مش أكتر
تسلمي ي حبيبتي و كل سنه وانتي طيبه

[War ROFL]

عليكم السلام ورحمه الله وبركاته

انا بحس انه سياسه المنتدي قايمه علي كثره المشاركات وخلاص
ايا كانت بقه مفيده مش مفيده
حتي كتير من المسابقات مالهوش لزمه لانه محدش بيستفاد من كثره المواضيع في نطاق زمني ضيق بيترص مواضيع وردود وخلاص وجوائزها عباره عن زياده ف المشاركات باعداد مهوله
وكانه زيادة عدد مشاركات العضو هي هدفه ومبتغاه وكانه العدد الكبير من المشاركات بيعطي قيمة للشخص

فطبيعي طالما توجه الادارة كدا يبقي دا الحال (مجرد رأي )
برده مواضيع كتيير جدا بتكون شبه مالهاش لزمه علي الاقل بالنسبه لي بتضيع وسطها المواضيع القيمه
يعني الواحد بيدخل يلاقي اكتر من صفحة من المشاركات او المواضيع الجديدة مبيستفادش منها بمعلومه او غيره الا بعدد قليل
حتي قسم النقاشات الي هوا المفروض ارقي الاقسام
ممكن تلاقي اكثر من قضيه مطروحه للنقاش في نفس اليوم و مبتاخدش حقها
و الي بيدخل يناقش في الغالب مبيقرأش اصلا ردود الاعضاء بيرد ع صاحب البوست فقط ومحدش بيغير رأيه يعني بيحط رأيه و يطلع وخلاص في الغالب ,, دا الي لاحظته

انا رأيي الشخصي الغير ملزم لحد انه المفروض يتم تحدد عدد المواضيع الجديدة الي بيسمح بوضعها لكل عضو في كل قسم بخلاف المواضيع المتجددة
و بكدا كل موضوع ياخد حقه من حيث المناقشات ,, قرآءه الاعضاء ليه واستفادتهم
و ميكونش اي موضوع يتحط وخلاص
يعني ملاقيش موضوع مثلا 3 اسطر وهدفه انه مفيش هدف !

وبرده عدد المشاركات يتحدد بحيث الواحد وهوا بيرد ينتقي فعلا الموضوع القيم الي يرد فيه لانه مش هيشارك كتير

وكذلك الي هيحط موضوع هيختار كويس قبل ما يحطه

و سياسة المشاركات ك جوائز المفروض تستبدل ب وضع لوحه شرف
او وسام لفتره زمنيه معينه او تصميم توقيع او غيره

لانه كثرة الاشياء دي بتفقدها معناها اصلا
ومش معقول واحد (يرزع ) 20 موضوع كوبي باست مثلا يقوم واخدله 100 ولا 200 مشاركه
لا هوا قرأ المواضيع ولا غيره هيقرأهم ولا هيا اصلا مفيده ( في بعض الاحيان )
شكرا لموضوعك الهام

[حَرفُُ هجآءّ]

ردوى بجد الموضوع مهم جدا
ومحتاج اهتمام من الاعضاء والادارة لرقى المنتدى

نيجى بئا لاسئلتك

ســـؤالي/


ترقيه العضو الى مشرف بتستلزم فقط كم هائل من الردود بغض النظر عن نوعيتها ؟؟

ولآ فيه معايير تانيه لآزم بيتم النظر فيها؟؟

انا ضد كثرة الردود الغير هادفة يعنى لو هرد رد أو اتنين ذات قيمة عندى احسن بكتير من 100 رد
غير هادفين والمقصد منهم كثرة المشاركات

اكيد ترقية العضو لمشرف تتبع معايير معينه
منها اهتمام العضو بالقسم من حيث الافكار اللى بيقدمها واللى اغلبها تكون حصرية
اذا القسم حصرى واهتمامه بمواضيع القسم عامة

ولو فيه معايير تانيه ايه هيا المعايير اللى المفروض توافرها ف العضو من وجهه نظرك ؟؟

المعايير المفروض توافرها الاهتمام بالمحتوى لا الكم
اذا العضو له اهتمام بقسم معين تبدء الادارة والاشراف فى متابعته
من حيث ردود العضو الهادفة مش بكثرة مشاركاته فى القسم ده

لو عضـو عمل كم عظيم من المشاركات والموضوعات ولكن لا قيمه لها ممكن يتم ترقيته على حساب عضـو أخر أكثــر رقيا وفكرا ومؤهل اكتر من غيره؟؟

من وجهه نظرى الكمية مش سبب للترقية اه اشجعه بس مع التوجيهه لرقى ردوده
والتحفيز ويكون سبب الترقيه هو رقى المشاركات ومحتواها القيم فى صلب المواضيع
وتكون مشاركاته هادفة

الاداره حريصه على تشجيع الاعضاء الاكثر ردود ومواضيع حتى وان كانت منقوله وافكار مقتبسه ولا على المبدعين الحقيقين ؟

بصى الادارة مش هتمشى ورا كل مشاركه عشان تشوفها منقوله او لا
ده غير وظيفة الاقسام الحصرية هى معرفه المواضيع منقوله او لا
وده اللى هيحدد ابداع العضو وتميزة
اما عن نقل الردود فدى بترجع للعضو واللى المفروض بردوا يكون فى توجيهه بعدم الردود السطحية
تعرفى انا بشوف منتديات الردود فيها كمان بيتكلموا على مثلا التنسيق
ولو فى هيدر اللى بيرد بيعبر عن اعجابه او لا بالهيدر
فاهمه تفاصيل الرد بتكون فى ادق الاشياء اللى منها ذوق العضو صاحب الموضوع

ليـه مش بيتعمل تنبيه اداري بالحكايه دي ويتم التأكيد على نقطه الترقيات
وانه مش هيتم ترقيه عضو بيتبع الاسلوب ده يمكن نلاقي الظاهره السيئه دي قلت ..؟؟

ده المفروض اللى يحصل من الادارة انها تعمل اعلان او تنبية فى الصفحة الرئيسية للمنتدى
بعدم الردود السطحية ويكون الحافز هو الترقية او نظام مكافأت

يمكن فيه مبدعين كتير سابو المنتدى ومشو بسبب انهم مش ظاهرين بأعداد هائله بالمشاركات وان التكريم لآصحاب المشاركات الأكثـر فقط ..
كلمه حــق كانو أقلآم وفــكر مش هيتعوض ..

والله فى بعض الناس للنهارده والله كلمتهم على الفيس عشان يرجعوا بس للاسف رفضوا
وفعلا كلامك صح التقدير مهم جدا
غير ان المفروض اننا مش نخسر المبدعين لان تواجدهم اساس لرقى المنتدى
سواء العضو ساب المنتدى او انه على خلاف مع اى حد من الفريق الادارى
وحصر نفسه فى الصفحات
بجد بشوف اعضاء فى الصفحات لهم من التقدير والاحترام والفكر والابداع اللى خسارة انه يفضل حابس نفسه فى الصفحات ونشاطه مقتصر عليها بس

انا معاكى رودى فى الحملة
وياريت الادارة تهتم بالموضوع معانا

وكل مشرف عليه دور مهم هو تحفيز العضو صاحب الردود السطحية على رقى محتوى مشاركاته فى قسمه

وبالنسبه لمواضيع صندوق الابداعات
بجد عندك حق فيها وناس كتير بردوا مضايقه من الموضوع ده
والله دى حاجه انا بعملها
ساعات بيكون عندى اكتر من موضوع عايزة اعملهم
ولو هكتب 3 او 4 مواضيع برحل 2 لليوم اللى بعده
عشان غيرى ياخد حقة فى ظهور موضوعه لفترة اكتر
والمفروض مش عشان اظهر انى نشيط انزل اى موضوع عشان يظهر فى صندوق الابداعات

بس عارفه دى بترجع لكل عضو واقتناعه باهمية موضوعه وانه شايف انه موضوع جامد
وكمان هو عايز الظهور المتكرر عشان يظهر نشاطه
والمفروض بردوا الادارة ترقيتها تكون على المحتوى سواء فى المواضيع او الردود مش على الكمية

ايه الرغى اللى انا رغيته ده

اكيد هتصدعى ارودى