فين حق الصحبه ؟؟؟ !!!!

[محمود الصاروخ]

السلام عليكم و رحمة الله و بركاته
==

موضوعى حبيت اعمله ب اسمى و مفكرتش ان اخرج و اعمل الموضوع ب زائر
ولا حاجه لأن هو موضوعى سؤال مش أكتر و موقف حصل

عاوز اعرف انا غلطت ف ايه بس
أو انا مش تمام ف ايه !

الموضوع ان واحد صحبى هو مش صاحب هو اخ و أكتر من اخ
حصل معاه موقف و مشكله مع ناس و أتدخلت معاه ف المشكله
عشان أشوف لو نقدر نحلها من غير مشاكل يبقى كويس
وكمان احنا ف رمضان و المشاكل بنحاول نقلل
منها بقدر الامكان

الموضوع ان كنت قاعد مع واحد صحبى من كام يوم بلليل ف الشارع عندنا
و كان عامل مشكله مع ناس و اتنين جم له واحنا قاعدين و اتكلمو معاه
انا مش رضيت اتدخل طول ما الموضوع ماشى تمام

لقيت الموضوع زاد عن حده و حصل ضرب و كلام من ده وطبعا
أى حد مكانى مش هيقف يتفرج أقل ما فيها هيشيل الناس عن بعضها
و يحاول يصلح الامور وخصوصا اننا ف رمضان

و فعلا دخلت ف النص و بدأت اشيلهم عن بعض

و كانت النتيجه ان أخدت خبطه ف دراعى بس كبيره شوية
و بوظت شكل دراعى خالص ويا عالم اما تخف هتفضل زى ماهى
كده ولا هتخف خالص

المهم ان واجب عليا انزل و احل المشكله
انما مش واجب ولا فرض انزل اتخانق عشان خاطر حد
لان محدش بيقدر الكلام ده

المشكله خلصت و اتحلت و تمام كده الحمدلله

اتفاجىء ان " صحبى " ده ماشى ف الشارع و لكل صحابنا
محمود ده مش تمام . محمود يوم المشكله عمل و عمل و عمل
محمود كان بيعمل و كان بيعمل . و كلام ملوش لزمه انه يتقال

طيب سؤالى بس ونفسى حد يجاوبنى عليه بجد
وميبصش ان محمود ده مش تمام او كده

هو فين حق الصحبه ؟
ليه لما نصاحب حد و يحصل موقف ملوش لزمه يخلينا نتكلم على بعض
قدام الغريب ؟؟؟
ليه اصلا ندخل الغريب ف النص ؟؟؟؟

هو انا واجب عليا ان انزل مشكله مليش فيها اصلا ؟؟
ولا ده بقى فرض وانا معرفش ؟؟

انـا نفسـى أفهـم

" فيـن حـق الصحـبه بس "

انـا حبيت اعمل الموضوع ب اسمى لان " صحبى " ده متابعنى هنا
وبيدخل يشوف مواضيعى و حبيت اعمله ب اسمى عشان لو دخل
يشوف السؤال ده

" فيـن حـق الصحـبه بس "

ليـه بنتكلم ع بعض ف ضهر بعض ؟
مش الأحسن ان لو ف حاجه تبقى ف الوش احسن ؟؟؟


انا عارف ان الموضوع ملوش لزمه
بس حبيت افضفض و أخد رأى الناس

" أنـا غلطـان ف إيـه "

[phalsteen]

منور القسم محمود
ليا عودة بالرد

[ana lola]

انا مش شايفه انك غلطان
ومستغربه هو صاحبك بوشين ليه دا انت ساعدته
مش سبته فى الخناقه ومشيت
وانت المفروض كنت تموت عشانه يعنى ما كفايه دراعك
على العموم شوفه هو ليه قال عليك كدا
ربنا يصلح ما بينكم

[ملاك صعبة الإمتلاك]

اولا الف سلاممه عليك ويارب ترجع زي اول واحسن
وبعدين بقى هوا يحمد ربووا ان عندوا صاحب زييك
بيداافع عنه من غير ما يطلب لان ناو مفيش الكلام ده
ولو هو مشي يتكلم عليك فالظاهر انه ما كنشي صاحب كويس
لان مع احترامي ليه لو كان كويس ما كنشي راح يتكلم عنكك يمين وشمال

[العاشق الذى لم يتب]

بارك الله فيك
وجزاك خيرا
لعظيم فائدة وحسن انتقاء
باقات ورودى وتحياتى

[حافظة القرآن]

وعليكم السلام ورحمة الله وبركاته

اولا : الف سلامة عليك
ان شاء الله ترجع زى الاول واحسن كمان

ثانيا : انا مش شايفة انك غلطان
بالعكس يعنى لما تشوف صاحبك بيتخانق قدامك
طبيعى انك تحاول تحل الموضوع
دة ساعات الغريب بيحاول يحل فشوف الصاحب بقا

يمكن هو شايف انك غلطان فى حاجة معينة
بس بردو حتى لو كدة يعنى هو شايف حاجة معينة
المفروض يقولك او حتى ميقولش خالص
ويمكن يكون متضايق من حاجة قديمة بس بردو
يعنى يقدر اللى عملته معاه
انما يروح ويقول للناس يعنى حاجة مش لطيفة خالص

ربنا يهدى الجميع
وان شاء الله الصحبة يبقى ليها حق وخاطر عند الناس
ويارب الصداقة الحقيقية هى اللى تبقى موجودة مش المزيفة

[Dodoz]

الف سلامة على ايدك يا محمود وان شاء الله تكون احسن ♥

بص انا حطيت نفسى مكانك ولقيت ان رد فعلك ساعه المشكلة طبيعى , وبعدين صاحبك شكله كان عاوزك تضرب الناس على ما اظن يعنى وده مش حل للمشكلة بالعكس دا هيزيد اكتر وانت كمان هتضر اكتر منه ^^

دا غير انه بيتكلم عنك فى ضهرك وبيقول محمود مش تمام ومحمود مش عارفة ايه و....الخ

الصاحب الى زيه حذر منه اشتغل بمبدأ " حذر ولا تخون " عشان لو بيحبك فعلا عمره ماكان هيخليك تخش فى مشكلة وهوا عارف انها لو اطورت وضربتهم هتزيد وتبقى مشكلتك انت كمان , ثانيا انه مشالش انك وقفت اول واحد معاه ساعه الخناقة دا غير ان الكدمه الى حصلت فى ايدك بسبب انك ادخلت ودافعت عنه وهوا مفتكرش ولا حاجة من دى خالص ^^

متزعلش من كلامى عليه بس هتعرف ان كلامى صح بعدين ^^

تقبل مرورى ~

والف سلامة عليك تانى ♥

ودى ~

[bobaOo]

ألف سلامة عليك
من.رأيي انك مش غلطان خالص بس شوف يمكن عملت حاجه دايقتو
اتكلم معاه واستفسر

وربنا يهديكم

[العاشق الذى لم يتب]

ورجعتلك تانى
وبعد التحية والذى منه
وكل سنة وانت طيب
اسمعت المثل اللى بيقول
ماينول المخلص إلا تقطيع ملابسه
صاحبك ده بيحبك اوى
وكان قصده انك تسيبه يفرموه علقة مظبوطة ويكسروه وينام فى المستشفى شهر
علشان انت تروح تزوره هناك وتديله خمسين جنيه
هو ده اللى كان فى نية صاحبك
علشان لو نيته سليمة ماكانش زعل منك فى تصرفك اللى انت حكيته
ولربمايكون فيه حاجة احنا ما نعرفهاش
نسيت تذكرها بسبب الصيام
نقول ربنايهدى الجميع
ويحببنا فى بعض
ومنور
على فكرة انت مزعل ناس كترهنا كمان
مش بس صاحبك فى المنصورة
عيب عليك ياحودة تعمل كده