همسه رمضانيه بقلم ( ساحر الاحزان )

[phalsteen]

ســـــــــلام عليكم كل سنه وانتوا طيبين النهاردة موعدنا مع همسه جديدة بقلم عضو معايا النهاردة صاحب القلم المميز والروح الصافيه زعيم منتديات بنات مصر ساحر الأحزان بسم الله الرحمن الرحيم لما وعيت عينى على الحياة وكبرت شوية وبدأت أفهم يعنى أية صيام كنت أنا أصغر واحد فى أخواتى وكنت بشوف التجمع العائلى وقت الفطار على حاجة أسمها طبلية ألى هى السفرة الأيام دى كنا بنفرش الأرض وبنقعد عليها غير السفرة طبعا كراسى ؛كانت أيام حلوة كان فية واحد بيبيع تلج كان بيجيب لوح تلج ويقطع فية قطع صغيرة كدة والقطعة كانت بعشر قروش وأوقات كنت بروح لعمتى فى مكان قريب مننا أجيب من عندها تلج وكان الصيام فى الوقت دة فى عز الحر كنت بصوم الأول كام ساعة ولما ريقى ينشف كنت بفطر ولما بقى كبرت شوية تعودت على جو الصيام زى أخواتى ؛ لحلول الشهر الكريم كان لة مذاق خاص عندى وخصوصا وقت الدراسة كنت بنتظر بقى المسحراتى أبوطبلة أنا وأصحابى بعد وقت المذاكرة وصلاة العشاء والتراويح كنا بنفضل نلعب لحد لما المسحراتى يجيى ونجرى وراة وننتظر بقى لوقت السحور وصلاة الفجر كانت أيام حلوة ويمكن وأنا صغير كان والدى رحمة الله علية ياخدنى أنا وأخواتى ويا يشترى لينا ملابس جاهزة يأما يجيب قماش ونودية لخياط قريب مننا يعمل لينا جلابيات والواحد بقى فرحان ومبتهج وكل ما الواحد يكبر كل ما المسئولية تكبر وفرحت رمضان فى الكبر أقل منها فى الصغر فى حياتنا؛ الشهر الكريم دة بيكون فرصة حلوة لينا أننا نتجمع على سفرة واحدة ونزور بقى الأقاريب والأصحاب وفى النهار قراءة الذكر الحكيم يمكن أنا بقالى دلوقتى أكتر من خمس سنين ما قضيت الشهر فى البيت أو الأعياد ألا السنة قبل ألى فاتت حضرت رمضان بسى ما كملتة رجعت قبل العيد بحوالى أربع أيام لظروف أقامتى هنا الشهر دة فرصة أننا نتسامح مع بعض ونتصافى وننسى أى خلاف وندعو ربنا بدوام الوفاق للجميع نتصالح مع أنفسنا ومع غيرنا وندعو الغفور الرحيم أنة يتقبل منا صالح الأعمال وكل سنة وأنتم طيبين وانت بصحه وسعادة امجد نورت اخي الغالي انتظروني قريبا مع همسه جديدة بقلم الرائع / عاشق لم يتب

[جبل عالي]

يااااااه يا امجد !!! الطبلية !! والتلج !!!


تصدق بالله نفس الحجات دي انا شفتها

وقلت لو حكيت عنها محدش هيفهم قصدي ايه


هههههههههههههههههههه


الله الله الله ده انت عجوز زي جبل بقاااا





همسة حقيقي عفوية وصادقة جدا ماشاءالله

رمضان كريم عليك ياامجد وان شاءالله

رمضان الجاي تكون وسط اهلك وناسك وفرحان بيهم




تسلمي سمسمة للهمسة الطيبة هنا

وحشتينا ياهانم بقااا

[ana lola]

همسه رمضانيه جميله
كلمات أ\ آمجد آجمل
تسلم آيدكـ نفرتيتى

[مُنـــــايا]

همسه رمضانيه طيه تتسم بالبساطه والتلقائيه

اللي مفتقدنها في الزمن ده

مبارك عليك الشهر الكريم

وكل عام وانت بخير

يسلموا جهودك سما

[اميره الشعر الشجين]

طبليه والتلج ايام جميله وتحس فيها معنى اللمه عشتها كتير بس كنت صغيره كانت ايام بجد هيا فعلا المعنى الحقيقه لرمضان واللمه همسه طيبه وبسيطه منك يامجد

[™Amiliya]

همسة منك امجد ولا اجمل
دام عليك النعمة وان شاء الله تجتمع مع الاهل وتكتمل افراحكم

[دمعه حائره]

ذكريات جميله للشهر الكريم
ان شاء الله ترجع بالسلامه لبلدك وتقضيه تانى مع العيله
نورت ياامجد وكل عام والجميع بخير

[ساحر الأحزان]

شكرا ليكى سما

أنك أتحتى لية الفرصة أنى أفضفض بذكريات عدت علية من سنين


بسى لسة موجودة بداخلى ما بقدر أنساها

وأنا عارف أن الطبلية يا جبل راحت أيامها أنتى وأميرة


بسى كل ما أفتكرها وأفتكر اللمة بحس فعلا بجو رمضان

ألى مفتقدينة الأن بسبب الأشغال والظروف

كل سنة وأنتم طيبين

[ملاك صعبة الإمتلاك]

جميل جدا منك فعلا ذكريات بنتمنى انها ترجعع
تسلمي يا قمري .. منتظرين الهمسه الاخرى