الفروق الاجتماعيه والتعليميه هل تكون عائق للارتباط .. مسابقة الاقلام المميزه

[احساسى صحيح]

السلام عليكم ورحمة الله وبركاته

زمان فى افلام الابيض والاسود فريد شوقى
كان ميكانيكى مثلا وبيتزوج من بنت ارستقراطيه فى نهاية الفيلم
ورشدى اباظه كان مره دكتور بيطرى
وتزوج من بنت ناس ارستقراط وازى شوفنا روضها فى الفيلم
وجعلها تحبه وتنسى كل الاشياء الظاهره سيئه امام العامه
طبعا كل ده افلام ولكن الواقع اكيد بيختلف كتير
خاصاََ العصر الحالى
الاغلبيه بيقول ان الحب قادر على المستحيل
وان الحب قادر ان يذيب اى فوارق طبقيه
ربما يكون نظرياََ الكلام ساهل
ولكن واقع الامر لا يوجد اسره تقبل بزواج ابنتها
مثلا من شاب حرفى او تعليمه متوسط
لو كانت ابنتهم خريجه جامعيه مهما حدث بينهم من قصص الحب
او وجدت لدى هذا الشاب ذو التعليم البسيط
مواصفات لم تجدها فى شاب جامعى
ولكن دائماََ ابداََ كل شىء يصطدم بموافقة الاسره
وحرصها على حياة ابنتها من وجهة نظرهم هم
مهما حدث امامهم من مبررات تستعين بها ابنتهم

اللى حبيت اناقشه معاكم ,,

هل مممكن فى العصر الحالى
توجد تلك الصوره التى تحدثت عنها ؟
سؤال للبنات
هل لو كنتِ جامعيه ممكن تناقشى الفكره من الاساس
انك تقبلى ترتبطى بشاب اقل منك فى التعليم ؟

هل ممكن فى العصر الحالى اى بنت تتحدى اهلها
من اجل شاب احبته وامنت بقدراته وفضلته على الكثيرين
تجبر اهلها على الزواج به حتى لو كان اقل منها ماديا او تعليم ؟

انتظر تفاعلكم
تحياتى ..

[الآمير العآشق]

اقتباس هل مممكن فى العصر الحالى توجد تلك الصوره التى تحدثت عنها ؟

هو بالنسبه للصوره الحين موش تختلف كتير عن زمان
والاستشهاد بالافلام موش هو الي كان بيحصل زمان
بمعني صور الافلام حتي زمان بتختلف عن الواقع
زمان بردو بيكون فيه الشروط الموجوده الحين
وعن نفسي بشووف / لو الولد مؤهله اعلا
او اغني ماليا من البنت دا شي عادي
/ لكن.. لو البنت هلي الي اعلا مؤهلا
او اغني ماليا وبفرق واضح عن الشاب
وقتها موش بفضل هذي الزيجه او هذا الارتباط
مع اول مشكله بينهم او اول كلمه ممكن يسمعها من الناس
هتاثر علي حياتهم سلبيا

طرح راقي وجميل ياسر
دمت متالق
ومنتظر معك ارااء البنات

[Lamees]

شوف يا ياسر حالياً الوضع أختلف كتير
ولغة المال هي اللي بتتكلم
مش هروح بعيد صديقتي تزوجت من ابن خالتها
رغم أنه دبلوم صناعي وهي خريجة كلية الآداب
بس حبته مش مشكلة معاهم العذر
في واحد تاني معرفة تزوج من دكتورة
وهو خريج جامعة عمالية ورغم أن مكنش في حب
وافقت لأنها وجدت الشقة المناسبة والشبكة الكبيرة اوي
عشان كده بقولك لغة المال لغة مفهومة جداً الآن
ولا تهتم بالتعليم والمؤهلات الدراسية
العلم في الراس يا ياسر مش في الكراس
ورغم كده ده مش يمنع أن في زيجات ناجحة جداً
أهم شيء التفاهم والتحضر والتدين وأنه يراعي ربنا فيها
مثال أخير صاحبتي الأنتيم أحبت أبن الجيران ورغم أنه كان
معهد متوسط تقريباً وهي بكالوريوس تربية حاربت أهلها
من أجل أن تتزوجه وكان زواج ناحج بكل المقاييس
هو كمل تعليمه جامعة مفتوحه وترك العمل بالتدريس
وفتح مكتب توريدات وتطور الأمر معه وأصبحت شركة مقاولات
والآن مرشح لمجلس الشعب وهي سعيدة معه جداً
وأثبتت الأيام أن اختيارها كان صائب

شكراً للطرح ياسر

[توحد ارواح]

اقتباس سؤال للبنات هل لو كنتِ جامعيه ممكن تناقشى الفكره من الاساس انك تقبلى ترتبطى بشاب اقل منك فى التعليم ؟ هل ممكن فى العصر الحالى اى بنت تتحدى اهلها من اجل شاب احبته وامنت بقدراته وفضلته على الكثيرين تجبر اهلها على الزواج به حتى لو كان اقل منها ماديا او تعليم ؟

بالفعل فى حاجات كتيره اتغيرت ومقاييس اختلفت
ولكن بالنسبه للجزئيه اللى ف الموضوع
انا رأيى فيها ثابت وواضح
مش ينفع ان البنت ترتبط بشاب اقل منها
من الناحيه التعليميه اوالماديه الى حد ما
لان من اهم شروط الزواج الناجح ف رأيى
هو المستوى التعليمى زى بعض او قريب
وبرده النواحى الماديه تبقى قريبه من بعضها شويه
وف المقابل لو البنت اقل من الشاب عادى
ولو انى افضل برده انها مش تبقى اقل منه تجنبا لاى مشاكل مستقبليه
شكرا ع الطرح المميز
تحيتى

[محمود أبوزيد]

اخي الغالي راقني طرحك الراقي كثيرا

ولكني قد اتمشي مع جزء منه وقد لا

اتمشي مع الجزء الاخر بديهي الامر

اري ان الفروق الاجتماعية لم تعد كما

كانت كاولي العهود ولكن بالنسبة

لمستوي التعليم فمن رائي الشخصي

ان يكون متقارب ...

تحياتي

[Aya 7ekaya]

الفكرة او المشكله مش فى الطرفين يعنى الولد والبنت المشكله كلها بتكون من الاهل بغض النظر عن المشاعر اللى بين الولد والبنت

بالنسبه لسؤالك انا لو شايفه الانسان ده كويس ومتدين وعلى خلق مش هبص للشهاده اكيد
لكن اهلى موضوع الشهاده فارق معاهم جدا وماينفعش أخد حد أقل منى وجهه نظرهم ان ماينفعش تكون البنت اعلى من الراجل لانه احساسه بالنص ده ممكن يخلق مشاكل كتير بعد كده وانا عاصرت حكايه زى دى لخريجه صيدله اتجوزت مدرس وانتهى بالطلاق لانه ديما كان متضايق ان شهاداتها اعلى لكن لو الطرفين متفاهمين اكيد الموضوع ده مش هيفرق كتير

[™Amiliya]

عارف ياسر زمن احمد ومنى وعلي وانجي تقريبا هيعيش معانا الى الابد
لان سبحانك يارب الدماغ هي الدماغ الاهالي هما الاهالي مع شوية تطورات بسيطة
بس التفكير هو هو مهما اتعلمو والتكنولوجيا اقتحمت حياتهم لا مجال لاختلاف
وعن تجربة عينية

حتى لو الشب متعلم ومثقف يبقى الفارق الاجتماعي عائق
والمادي كمان مهم عندهم اوي وكانهم خرجو للدنيا من غير مراحل

سبحانك يارب احيانا اقول مايمكن احنا كمان نطلع زيهم وولادنا من كتر غلاوتهم عندنا ممكن نتشرط ع الي هيدخل حياتهم

مش عارفة

[SaMa.]

الفرق الاجتماعى اهم واخطر الفلوس ممكن تيجى بالكفاح والشغل
لكن الفرق ف التربيه والعادات بيكون صعب التاقلم معاه
ثانكس ع الموضوع

[Stop Ana Eltop]

حب مين والناس نايمين بقن

اول حاجه مفيش حاجه اسمها حب قبل الجواز دا كله مجرد تسالى
تانى حاجه المفروض كل واحد يحب على قده ( دا على اعتبار انه فيه حب اصلا يعنى )

المفروض العائق الوحيد قدام اى شاب فى الجواز هو الاخلاق
يعنى البنت واهلها يختاروا الولد على اساس دينه وخلقه
التعليم مبقاش له لزمه

بس بالنسبالى بصراحه عاوزه واحد زى تعليميا او اعلى منى
مش بقلل من الناس الى متعلموش بالعكس
بس هو مجرد حاجه فى نفسى كدا
يمكن عشان اولادى مستقبلا

بس فى الاخير المفاهيم وقت النصيب بتتغير

[احساسى صحيح]

اقتباس المشاركة الأصلية كتبت بواسطة الآمير العآشق هو بالنسبه للصوره الحين موش تختلف كتير عن زمان والاستشهاد بالافلام موش هو الي كان بيحصل زمان بمعني صور الافلام حتي زمان بتختلف عن الواقع زمان بردو بيكون فيه الشروط الموجوده الحين وعن نفسي بشووف / لو الولد مؤهله اعلا او اغني ماليا من البنت دا شي عادي / لكن.. لو البنت هلي الي اعلا مؤهلا او اغني ماليا وبفرق واضح عن الشاب وقتها موش بفضل هذي الزيجه او هذا الارتباط مع اول مشكله بينهم او اول كلمه ممكن يسمعها من الناس هتاثر علي حياتهم سلبيا طرح راقي وجميل ياسر دمت متالق ومنتظر معك ارااء البنات

اكيد عندك حق يا ماجد انا بتفق معاك
ان مفيش مشكله لو الوضع مختلف ان الشاب هو اللى اعلى
اكيد دى ميزه للشاب بتديله افضليه
النقطه التانيه هى اللى قصدتها فعلا
وهى دى لب المشكله اللى بتواجه شباب كتير
ان اهل اللى اختارها يقتنعوا بيه لو كان هو اقل منها فى التعليم
او البنت نفسها لو ارتبتط بيه تقدر تقنع اهلها
وده اللى حاليا بنشوف فيه صعوبه كبيره

شكرا على رايك يا ماجد
اسعدنى جدا