طنط حشرية

[™Amiliya]

صباح السعادة ع عيونكم

صباحكم غيررر

في حكاوي الستات لازم ولابد سيرة الجواز تكون العنصر الاهم في الكلام
والطبيعي لما تكون في بنت في العشرينات وقربت ع 25 ومافوق بتكون محور الحديث المتواصل

هي متجوزتش ليه ؟ هي ناقصها ايه؟
طب ماهي كويسة اهي مالها بقا محدش بيجيلها ؟
هما الشباب اتعمو ؟
تلاقيها مأنزحة عشان كدا اتاخرت ؟
لا دي عندها شروط كتير فتأخرت عن الجواز؟

وكلو كوم والسؤال المعتاد انتي اتاخرتي ليه في الجواز؟

وكان الواحدة مننا المفروض ان السن دا ميعديش بدون متتخطب او تتجوز

والي يحرق الدم اكتر الايمان والتقوى الي في اخر الكلام بتاعهم ( كلو قسمة ونصيب)

حكاية القسمة والنصيب مش هتكون محور كلامي لانها قدر لا مفر منه

خليني اكلمكم عن الناس دي في حياتنا والي بنرمزلهم ( طنط حشرية )

محدش فينا مبيحلمش يكون له بيت واسرة وجوز يكون هو الحياة للبنت
الاتنين يلاقو السند مع بعض

بس في حاجة مهمة اوي ان كل البيوت ممكن تلاقي بنت او تلاتة متتجوزوش لسة وسنهم قرب ع نهاية العشرينات والموضوع مش مسلة حلوة ولا وحشة ولا صفات تانية

الموضوع غير انه قدر هو اختيار وظروف اقتصادية مش متوازنة او متفقة مع الي بنحلم بيه كبنات

اه البنت بدور ع الستر وراحة البال بس في ناس كتير حاطة في بالها ان المادة هي السبب

المادة مش سبب وحيد المادة عائق للرفاهية ان لم توجد

وكل بنت نفسها تعيش زي ماعاشت في بيت اهلها بل احسن

يبقى ليه احكم عليها عشان محدش يقولها عنستي .... كبرتي.. الخ
انها تجوز اي جوازة والسلام ويتكتب عليها بيت واسرة هي مش سعيدة في تكوينها
ولا بنات العيلة وسخافاتهم المستمرة يااما نظرات او كلام متغطي او مكشوف وواخد برد

الالم الي بيسببو الناس دي من تكرار الاسئلة بيوجع اوي صاحبة الموضوع
ومش بس كدا بيدخلها في حالة نفسية هي في غنى عنها

بسبب سؤال وكلمتين من كلام ستات حشريات وثرثارات ممكن جدا تدمر نفسية بنت قدامها حاجات كتير تعملها في حياتها غير انها تتجوز وتخلف

طب لنفرض ان ربنا مكتبش ليها الجواز المفروض بقا تعمل ايه تنتحر؟

دا غير اهلها في البيت وتسلط الضوء المستمر عليها واحساسها انها حمل عليهم
وكلو كوم لو اختها الصغيرة اتجوزت قبلها تقوم الدنيا ومتقعدش

مجتمع غير انساني بالمرة ايل يسبب ضغط نفسي ع حد من غير منراعي شعوره اصلا

يكفي انه هو حاسس بان عندو مشكلة بس في بنات كتير لجأت لمواقع الجواز والعلاقات النتية وغيرها عشان ترضي نفسها وترضي انوثتها بانها مرغوبة

وفي بنات صبرت ونالت النصيب الكويس

وفي بنات قاعدة بلا عمل وبلا امل وبلا حياة حكمت ع نفسها بالموت البطئ

بس في بنات شاطرة سابت كل حاجة تيجي في وقتها واشتغلت ع نفسها

علمتها ... نزلت واشتغلت ... اهتمت بنفسها وبامور تخصها

مسبتش نفسها عرضة للتهلكة وكلام ناس لا هيقدم ولا يأخر غير انه يغرس فينا ابر مسمومة تأثر علينا وع حياتنا

/

من فضلك ياطنط حشرية ممكن تهدي شوية علينا

/

ايميليا الجنزوري

[phalsteen]

دي حكايه مجتمع
بتتكرر للأسف كل يوم في كل بيت
الحريه مرتبطه بالزواج
الاهم من الفكرة وتسليط الضوء عليها
هو الايمان بالنصيب وبوجو البنت حتي لو مرتبطش حياتها بزوج
هيفضل ليها مستقبلها وشخصيتها المستقله
المجتمع كله بئه طنط حشرية يا ايمي
موضوع مميز فعلا
تحياتي وتقييمي يا قلبي

[حـيـــــآة ❤]

فعﻵ مشكله..
بس يﻵ كله قسمه ونصيب
تسلمئ ي قمر

[SaMa.]

ده لانهم اتجوزوا صغيرين تلاقيهم بيتحشروا ويستغربوا
بعد كام سنه هاتختفى الحشريه ل حاجة زى كده لان بقا
عادى تاخر سن الجواز عشان الدراسه والشغل والبنات بقا تفكيرهم انضج
موضوع حلو ثانكس

[العاشق الذى لم يتب]

وهذه نسبة تختلف
تنقص وتزيد من مكان للتانى
ومن ظروف اسرة للتانية
ربنايعف بناتنا وشبابنا
شكرا لك
مودتى

[Lamees]

يعني هو الجواز الغاية الوحيدة في حياة البنت
ده تفكير عقيم اووي
الحالة العامة متشجعش على الجواز ابداً ايمي
هتبقى كبت حريات في الدولة والحياة العامة
وكمان واحد يكبت حيرياتك الخاصة
ده الموت وقتها ارحم من كل ده
وطنط حشرية دي منها كتير
اصلهم فاضيين فبيتسلوا

فضفضة حلوة ايمي

[جبل عالي]

احلى حاجة المسمى اللي قلتيه

طنط حشرية



هى سقطات بالمجتمع عموما

وبتتسبب في كثير من الكوارث مش بتصلح




تسلمي ايمي لجمال طرحك


واسلوب تناولك الرائع

[احساسى صحيح]

بس متنكريش ايميليا
ان اللى زى طنط حشريه دى
بتكون عامل ضغط نفسى كبير على البنت واهلها
وكلامها بيأثر بشكل سلبى على البنت فعلا
وللاسف لو طنط حشريه دى من اللى بيلفوا وينقلوا حشريتهم فى كل بيت شويه
بتكون النتائج صعبه على اى بنت واسرتها
ربنا يكفيكى شرها ايمى
فضفضه حلوه تسلمى

[Words Whisper]

الجواز مش هو محور الحياة الأوحد
هو جزء من الحياة زي كل الأجزاء
كدا كدا الحياة هتكمل بوجوده أو عدمه
انما التعامل معاه انه هو إنجاز الحياة
فدا لاتعليق عليه لأنه العقليات اللي شايفاه كدا نو كمنت
وأكتر كلمة تتقال وتتعصب : لو وصلتِ السما ف الآخر هتكوني زوجة .. يعني إيه ؟!
ولاَّ شوفي فلانة خدت معهد مش عارف إيه واتجوزت وبئا عندها عيال وليها قيمة ف الحياة !!
وااااوووو فعلا عملت إنجاز حياتها انها اتجوزت وبئا عندها عيال ودا اللي خلا لها قيمة !!
عارفة احنا لو مش مجتمع متخلف كان مجتمعنا هيقدر يفهم ان الجواز مسؤولية وقدر ومليون حاجة
مش مجرد حاجه لازم عند سن معين تحصل زي بالضبط ماهو لازم تشتري حاجه ف وقت معين !!
والأهم من كل دا بئا
جواز مش هيحقق للشخص الحياة اللي يحب يعيشها وهتكون عيشه والسلام يبئا عدمه أحسن ..


تسلمي ياحلوة ..

[عيون مصرية]

كنت لسه من كام يوم بتناقش فى الموضوع ده
بجد كانك كنتى قعده معايا و سمعه كلامى فيه
دى مشكله بنعانى منها كتير فى المجتمع ده
و ده لان فى ناس شايفة ان البنت اقصى انجاز ممكن
تحققه انها تتجوز و تخلف و يربطوا الموضوع بالسن
و انها لو عندها مش عارفة كام سنة قطر الجواز فات
و كلام عجيب كدا و المشكلة ان طنط حشرية دى بقا
بتعمل مشاكل و تقول كلام ملوش اى اساس من الصحة
ربنا يبعدها عننا لان دى شخصيات مريضة
تسلمى يا جميلة على التوبيك و المجهود

ودى