العشــــرهـ الطيبــــــه

Şα3Đ..♥ · منذ /08-10-2014, 09:03 PM

1 ,,,

الدنيا ساعه وماشيه
والاخره بالاعمال
ولا عمر جاه ولا حاشيه
هينفعك ولا مال
ايه اللي فاد الفاشيه
غير انهم في ضلال

2,,,

النوته والقلم
اكتر ما ليا صديق
والجرح والألم
عاملين عليا فريق
وان قلبي يوم اتظلم
فـ هو عمره ما شال

3,,,

الزرعه لو يوم مالت
محتاجه جمبها
وكل الحالات قالت
بان الصحاب سند
وانا جنبي ناس شالت
عن ضهري حمل جبال

4,,,

الدنيا دي شبه الزار
وكل اللي فيها مجاريح
والناس كما الزوار
والغلابه مدابيح
ووخدانا في التيار
لحد ما هنتشال

5,,,

العشق لا هو قواله
ولا بيحب التمثيل
العشق ده كلمه وحاله
وفلوكه ف وسط النيل
العشق حاجات متشاله
ف القلب لازم تتقال

6,,,

الناس اشكال وانواع
وبيجروا جوا سباق
والنفس راحات وطباع
والرك علي الاخلاق
وزماننا ده ياما اتباع
وانضربت بيه امثال

7,,,

الفقر ده تاج مرفوع
فوق راس واحد شقيان
والعدل ده شيء مصنوع
يتنفذ ع الغلبان
كام واحد مات من الجوع
علشان يعيش الاندال

8,,,

الحلوه بنت الاصول
اللي ادبها مثال
دي تنطلب علي طول
ومتتاقلش بمال
وكل المزايا تزول
لو كانت البنت شمال

9,,,

قرب من الناس واعرفهم
ما هو عشق الناس دي كنوز
وازرع ورودك واقطفهم
وافرح وقت ماهتعوز
خلي حبك يخطفهم
خليك للطيبه مثال

10,,,

وديما كده تحمد ربك
ع القسمه وع المكتوب
وادعيه يغفرلك ذنبك
وفارق الشر تتوب
تلاقيه ريحلك قلبك
وصلح لك في الاحوال

ويبقى الأثر · منذ /08-10-2014, 11:09 PM

ماشاء الله
عوده جميله وقويه سعد
عارف رأيى فى حروفك اخى قوه ومعنى ووزن ربنا يزيدك ابداع
لاتحرمنا جديدك

العاشق الذى لم يتب · منذ /08-10-2014, 11:31 PM

الله عليك شاعرنا سعد
خاطرة راقية ومتقفية وموزونة
ومعانى جميلة وراقية
حمدالله على السلامة
تحياتى وود ى

احساسى صحيح · منذ /08-11-2014, 02:06 AM

,,,

الناس اشكال وانواع
وبيجروا جوا سباق
والنفس راحات وطباع
والرك علي الاخلاق
وزماننا ده ياما اتباع
وانضربت بيه امثال

ما شاء الله سعد رائعه بحق
وفعلا صدقت
اهم حاجه الاخلاق مهم اختلفت طباع الناس
لازم نحافظ عليها
تسلم وعوده موفقه
تحياتى