زعلانه من نفسي

[phalsteen]

مساء الخير
اول مرة اعمل توبيك
اشتكي فيه من نفسي
بس بجد مش قادرة هنفجر
حالتي وحشه جدا
وانا الغلطانه
ودا اللي مأثر فيا اوي

عصبيه لدرجه لاتطاق
واصلا مش بنام والله العظيم
لو حسيت اني زعلت حد

انا حاليا بئه مزعله اغلي حد في حياتي
يعني اللي الدنيا كلها في كفه وهو في كفه

اخــــــــــــــويا

امبارح نزلت في طلب ضروري
ومعرفتش اخد ابني معايا
فصحيت اخويا وقولتله يخليه معاه
وهو متأخرش بالعكس فرح اوي
وقالي متخافيش

ما علينا المهم نزلت ورجعت ادور عليهم مش لاقتهم
اتصلت عليه قالي جاي
ولما دخل لاقيت ابني جسمه ساخن جدا من الحر وكمان معيط
وهو بيتعب من العياط
لارئته ضعيفه فمش بيعرف يتنفس لما يعيط بالمنظر اللي كان فيه
فوقتها بئه لما شوفته مسمعتش حاجة اساسا
وزعقت لاخويا والمصيبه انه كان معاه واحد صاحبه

والله اول مرة اعملها بس كنت متعصبه اوي

بعدها روحت اتأسفله
قالي خلاص

بس برضو حساه زعلان
لا بيرضي يشيل محمد
ولا حتي يجي يصبح عليه زي كل يوم

هموت من الزعل لدرجه اني والله مخنوقه جدا
ومرعوبة ليسبني وانا ما اصدقت انه بقي معايا

هو فهم اني ابني اعز منه
او اني بحبه اكتر منه
بس والله لا
انا كريم عندي اغلي من محمد كمان
لانه ابني قبل ما يكون اخويا
انا مقصدتش احرجه ولا اي حاجة
كل الحكاية اني مرضتش انزل بيه عشان كدة
وقولتله مينزلش وانا متأخرتش
وهو مقاليش انه نازل


انا لو فضلت بالمنظر دا
تقريبا هموت من الزعل

[الأميرة رودي]

بعد الشر عليكي ياحبيبتي
كلنا بنتعصب واوقات بنعمل حاجات ونندم عليها
اخوكي اكيد قلبه طيب زيك
مش هيشيل ويزعل لدرجه انه يسيبك
انتى بطريقه غير مباشره حاولي تفهميه وتحسسيه انه غالي عندك
وانك متقصديش تجرحيه
ربنا يخليكم لبعض

[Lamees]

معلش يا سما مفيش اخ بيزعل من اخته متخافيش
هو هيرجع لطبيعته بسرعة بس انتي لطفي الجو
وبلاش تفضلي كده مخنوقة وفوتي وكأن حاجة محصلتش
بس انتِ كان لازم تطولي بالك اكتر من كده
خصوصاً ان اخوكِ كان معاه صاحبه
بس اللي حصل متقلقيش اخوكِ
عمره ما يستغنى عنك
هو بس مضايق من اللي حصل
ومهمتك انتِ بئا تنسيه
وربنا معاكِ
وربنا يخليكم لبعض

[همس الحنين]

الف بعد الشر عنكِ يا سما

انت فعلا اتسرعتِ شويه

وعذرك القلق والخوف على ابنك

بس المفترض عارفه انه فى امان طالما مع خاله

مهما كانت الظروف بس الامر كان محتاج منك انك تمسكِ نفسك

لحد ما تبقوا لوحدكم والاهم ان ابنك اطمئنتى عليه

دى بالدنيا كلها

اما اخوكِ ما تقلقيش استحاله هيزعل لانه هيقدر انك ام

بس كل شئ بياخد مده

ربنا يسعدكم

امين

[A-rab3awya]

حبيبتى أنتى كانت ردة فعلك طبيعيه كردة فعل أم يعنى
يعنى حمنى كان شكله تعبان وأنتى أتخضيتى عليه
بس وزعقتى شويه وأدام صاحبه
فمعلشى بقى
أنتى أخوكى غالى عليكى أوى زى مانتى غاليه عليه
وصدقينى قريب جدا كل حاجه هترجع زى الأول و أحسن كمان
ربنا يخليكوا لبعض كلكم
متزعليش بقى يا قمر أنتى قلبك طيب أوى ربنا يسعدك حبيبتى

[احساسى صحيح]

ايوه زى ما قالت الاء
انتى رد فعلك طبيعى وفطرى زى اى ام
يعنى بدون تفكير
والظروف اللى زى دى المفروض مفيش حد يتحاسب عليها
هو اخوكى طبعا له حق يزعل وانتى كمان
هى المسئله بسيطه واكيد هو شوية وقت واخوكى هيتفهم
وانتى فى اى مناسبه قريبه
هاتى هديه حلوه وكلمتين حلوين وهيبقى الامور تمام
وربنا يخليكوا لبعض

[شاعر واسير الحب]

قال رسول الله صلي الله علية وسلم
لا تغضب

تصرفك طبيعي جدا وهو دا قلب الام
اما بالنسبة لزعل الاخ واخد علي خاطرة شوية وهتزول المحنة واكيد لما الابن محمد ينظر بس اليه هيروح اليه لان محمد اكيد كريم بيحبة اكتر ممن انت بتحبية
خاله بقي وربنا يخليهم وتكوني عليهم حافظة وربنا يحفظكم من كل عين حاسدة
دمت بخير

[الاميرة نورهان]

موضوع عصبية ده عادى الكل بيتعصب


وبرده اخوكى لازم يقدر ان ابنك كان تعبان

وان شاء الله مش هيحصل حاجة وحشة

[مُنـــــايا]

بعد الشر عنك حبيبه قلبي

هو انتي اه اتعصبتي اوي علي اخوكي عشان خاطر سي حمني
ربنا يحميه ويحفظه من كل شر يارب ..ده كان من منطلق الامومه
الغريزي وخوفها علي ابنها .....
وده مش يقلل من حبك لاخوكي ابدا ..بس كمان بعد كده امسكي
نفسك شويه..

خاله هيخلف عليه زيك واكتر
وكمان مش تخافي هو هيقدر حالتك وموقفك لانه اكيد بيحبكم
انتم الاتنين .
وانتي عليكي تفهميه موقفك وتأكدي حبك ليه وانه غالي عندك
برضوا

وان شاء الله خير
ربنا يصلح الحال