عاوزة اتعلم النــــــــفاق

[phalsteen]

مساء الخير مبقتش حاجة غريبه لو طلبت من الدنيا او من وجوه منافقه انهم يعلموني لاني باختصار مبعرفش اظهر عكس اللي جوايا لو بكره حد هيبان عليا ومش هعرف اتحكم في مشاعري لو شوفته ولو بحبه هيبان عليا بمجرد ما يبانلي اسمه ازاي اعمل العكس عشان اعرف اعيش سعيدة ؟ ازاي اضحك في وش حد وانا من جوايا بقول في حقه اسوء الصفات ؟ ازاي ابان صديقه وحبيبه لناس وانا بغير منهم وبحقد عليهم ؟ ياتري هتبقي من جواك مبسوط وانت بتمثل علي نفسك وعلي الناس ؟ طب انا عارفه اني مبعرفش اسامح واول مرة زي اخر مرة مهو اللي غلط في حقك مرة استحاله ميغلطش تاني وعاشر اقطع بئه علاقتي لاني مش هسامح ولا اتعامل واضحك في وشه وانا من جوايا شايفاه عفريت تفتكروا حاجة حلوة اننا نتعلم النفاق ؟ ولا الاحلي اننا نقطع علاقاتنا باللي ميستاهلش شرف حبنا واحترامنا ؟

[ساحر الأحزان]

عاوزة تتعلمى صفة مذمومة

وانتى عندك كتير من الصفات الحلوة

يبقى انتى كدة حتخسرى نفسك أول حاجة

وحينتظرك عقاب شديد من ربك

خليكى بطبيعتك الحلوة لان دة افضل ليكى

[مُنـــــايا]

وليه تتعلمي حاجه مش كويسه تشوهي بيها جمال روحك
وصفاء قلبك

خليكي زي ما ربنا خلقك بطبعك وجمال صفاتك

اصل النفاق حبيبتي ده مش شيء مُكتسب لا ده طبع بيكون
ملازم صاحبه
اعاذنا الله واياكم منه

قابلي السيئه بالحسنه وخليكي انتي الاحسن

صفاء الروح حلاوتها في تسامحها وكله عند ربك

لروحك السعاده

[شاعر الحب الحزين]

مين اللي قالك ان السماح نفاق وان الحب نفاق

بغض النظر عن الناس اللي بتتعاملي معاهم

بالعكس دي حاجات جميلة جدا بتدل على صفاء قلبك ونقاوته

لو ضحكتي ف وشهم وانتي من داخلك مش بتحبيهم

اكيد الضحكة دي هتفرق كتير وضحكة من هنا وضحكة هنا هتبقى الأمور تمام

نصيحتي اللي بتكرهيه حاولي تحبيه ولو ما قدرتيش تحبيه يبقى الأحسن تخسريه

انتي بصفاتك انسانة نبيلة وصاحبة خلق جميل

خليكي زي ما انتي كده

تسلمي يا سما

[Lamees]

مش لازم تقاطعيهم ولا تنافقيهم
عامليها باحترام وتجنبيهم وبس
ومش تتعلمي صفة مذمومة
خليكي زي ما انتي واضحة وصريحة
بس من غير ما تزعلي حد منك

[الأميرة رودي]

التسامح مش نفاق
عارفه لو غلط فيكي حد وانتى تاني يوم ابتسمتي وقولتى انا مسامحاه
انتى أجرك وقتها عند الله كبير جدا
كل كلمه بتتقال فى حقك من ورا ضهرك فى ميزان حسناتك انتى
انا مش هضيف على الردود قبلي
لانهم قالو المفيــد
ربنا يعافينا ويكفينا شر المنافقين

[SaMa.]

تؤ موش ينفع تتعلميه اتعلمى تعملى ديليت ليهم احسنلك

[mohamed hosny]

الا النفـــــــاق
الصدق والصدق والصدق
امكن تكون فى الصراحه دى الاصلاح للاخر
كلام جميل جدا تسلمى يارب

[احساسى صحيح]

زى ما قالت رونى ده الحل الوحيد
لا تقاطعيهم ولا تنافقيهم
عامليهم زى ما امرنا ديننا
عامل الناس بما يحبوا ان يعاملوك بيه
يعنى بتقدمى الطيب وفى حدود بدون افراط
وربنا يسلمك من اى شر

[كليوباترا *]

هو الاعتدال خير الامور يا سمسمه..

يعنى باختصار عادى جدا لما تكرهى حد اساء اليكى
و تحاولى تعامليه بالحسنى كانسان عادى ..

ديننا حتى وصانا بكده

من غير لا نفاق ولا قطيعه ..

اتعلمى كده شويه بشويه التسامح

وربنا يجعل ايامك كلها سعيده من غير مشاكل