بنت آدم اللطيفة

[انا جيجي]

الست خادتني توديني الهايبر اشتري طلبات البيت
الست دي عايشة في قصر بمفهوم المصريين وبيت غالي وحلو بمفهوم الأمريكان
بتلبس احسن لبس راكبة احسن عربية
ملهاش غير بنت واحدة .. مهندسة ثلاثينية
الست دي بتدور على أرخص سعر في السوق لحد ما تلاقيه للشيء اللي عاوزة تشترية..بس نفس الست ها تصرف 300 دولار على أكل القطط والكلاب والسناجب بكل اريحية
الست دي ها تجمع كانز البيبسي والكوكولا الصفيح علشان ترجعهم الستودع وتاخد في الواحدة 5 سنت..يعني 5 قروش..بس نفس الست ها تطلع شيك بآلاف مؤلفة لأن بنتها حوشت من شغلها ونفسها تشتري بيت وهي ها تديها هدية مبلغ محرز في تمن البيت

لو خارجين مع بعض تستخسر تشتري جمبري أو فستان عاجبها..ومرة قلت لها ليه؟ متشتريش ليه؟ لو اكلة نفسك فيها أو فستان عاوزاه وانتي بلا مسئوليات وبنتك كبيرة ايه المشكلة لو تدلعي نفسك؟ ردت علي باستغراب بالإلتزامات اللي عليها نحو البشرية والنساء المقهورات في العالم ودرس طويل عريض في المعذبين في الأرض وحاجة تقرف الصراحة..الست بتقطع من قوتها علشان تعول قطط الشرق الأوسط والنساء الوحيدات في الشرق الأدنى وترسل أموال لتنمية أصحاب الحرف الصغيرة في امريكا اللاتينية

الشاهد
هي مبسوطة..بتحب الناس وبتخدم كل الغرباء وانا منهم..بتحب الحيوانات وبتأكلهم حتى لو حيوانات برية..بتدفع فلوس للغلابة انترناشونال..مش بتاكل لحمة ولا فراخ ولا بتشرب لبن علشان بيعذبوا الحيوانات وبيربوهم في مزارع ضيقة وبياخدوا منهم صغارهم علشان يسرقوا اللبن لنفسهم
-طب ومش بتاكلي بيض؟
-لأ باكل بيض من الفراخ السعيدة o_O
-وبتقيسي سعادة الفراخ ازاي يا ست؟
-جارتي بتربي فراخ سعيدة مش محبوسة وبتأكلها أكل حلو وبتسيبها بحرية بدون حبسة فبشتري منها بيض..لأن فراخها سعيدة


إلى حد ما مجنونة..مش مجنونة..لاسعة شوية..ليها قيم ثابتة عليها حتى لو معجبتش حد أو أقنعت حد
بقول لها انتي ها تدخلي الجنة لأنك بتعملي خير كتير
قالت: ها ادخل جنة الحيوانات مش جنة البني آدمين

بتقول لي انا انفصلت من بعد جوازي ب6 شهور..كان راجل فوضوي ومقرف ومقدرتش استحمله
ضحكت وصعبت علي
ده معناه ان الست دي محبتش خالص في عمرها الطويل
لو حبت كانت عرفت من غير ما اتعب نفسي واشرح لها

ست غريبة.. لكن حالة تستحق التفكر .. وكمان في بعض المواقف يمكن الإقتداء بها..او بالنسبة للزاهدين في الرفاهيات زيي ممكن يرفعوا راسهم ويقولوا احنا مش مجانين..احنا شبه ام فراخ سعيدة دي

[targetseo]

موضوع مميز

[العاشق الذى لم يتب]

رائع ماتفضلت به وطرحت
وجليلة الإفادة والمضمون
بوركت وجزيت خيرا
تحياتى وودى