استجمام

[™Amiliya]

صحيت النهاردة عايزة اخرج مع صحابي شوية بما
اننا اجازة
الاجازة بالنسبالي مش مجرد يوم خالي من المسؤليات
بيكون يوم مليان حاجات جديدة بتترتب حسب مزاجي
وفي معظم الاحيان مش بعمل منها اي حاجة
غير حاجة وحدة متاحة

النهاردة قررنا نروح نزور صديقة لينا اتخطبت قريب
اشتريت ليها هدية بسيطة جدا تعبر عن فرحتي بموضوعها

رحنا داخلين بنهلل سوا والي تزغرط والي تقرصها في ركبتها كان يوم كلو ضحك وهيصة

جيه الجاتو والعصير والمكسرات
وقعدنا نتفرج ع صورها وفستانها الي كان هياكل منها حتت كان بصراحة ربنا تحفة فنية عليها
وعريسها زي مبيسموه البنات لقطة

وبدا الحديث عن يوم خطوبتها وقد ايه الناس كانو هيحسدوها وانها فعلا اتحسدت بمجرد مارجعت البيت
لقيت فستانها اتقطع وي طالعة السلم شبك بحاجة
وشوية حبشتكنات كدا عشان تبين لينا
ان الفرحة مبتكملش

وعدت الايام وجري الزمن ووحدة تانية اتجوزت
وجمعنا نفسنا تاني واشترينا الهداياورحنا بكل
سرور وانشكاح نبارك ونهلل

القعدة عند الوحدة المتجوزة مختلفة تماما سواء في الهدايا او الكلام او حتى الاحاديث الي تتفتح

مش عارفة ليه الي بتتخطب او بتتجوز بتحسس الباقين
انهم مساكين وفاتهم القطر

وتقعد تدعي للكل واكتر حاجة بلاحظها كلام عن ان الجواز غير الخطوبة والحياة اصعب وانو مطين عيشتها

وان انتو يابنات كويس انكم مجربتوش استمتعو بحياتكم متتورطوش زينا

طب ماهما قبل كم شهر كانو زينا وبيتمنو يرتبطو ويعيشو

الغريب ان نصائحهم دي مش حقيقة لان لو قلنالها مدام مش مرتاحة سيبيه انتو لسة في الاول الطريق

تروح بينها وبين نفسها تقول شوف الحقد ؟

بجد مبقتش فاهمة هو عشان ربنا بينعم ع حد بنعمة مش عايز زيها لغيرو ولا بيخاف حد يكون احسن منو

بقيت بتخنق من عزومة وبحضر نفسي نفسيا واهيئها لسخافة الحوارات

وخاصة لما يقولو يااااه انا زدت اوي بعد الجواز
لازم اخس شوية

ياه انا اسمريت م كدا يابنات؟
وشعري بيقع باستمرار؟

ال يعني كل دا مبيحصلش قبل الجواز

مواضيع بايتة زي البتنجان كل واحدة عايزة تفرض حاجة مختلفة ع الجميع وتحسس الي حواليها بنقص الاشياء
مش مهم احساسنا ايه
ولا قدرة تحملنا للتفاهات قد ايه

-

ايميليا

[SaMa.]

دايما بتلاقى النصيحة ع حسب التجربه الشخصيه
ودة الل اتاكدت منو
جميل اننا كل فتره نقابل صحباتنا بيدى دفعه ايجابية جوانا
ول. حتى فيه حاجة دايقتنا بتفيدنا بردو
حلوة الفصفضفه

[ساحر الأحزان]

وهو بعد دة كلة بقى استجمام ايمى

هو كدة ايمى

قبل الجواز ولا الخطوبة

وبعد الجواز

تقولو اية الى غصبكم يقولو حظنا وبختنا

طيب واية الى جبركم

يقولو لقينا ضل حيطة نتسند علية

هى معظم قاعدة البنات وسواليفهم ما بتخلى من جو النم

مع الدعابة

[دفاتر القمر]

لا هم مش خايفين من الحسد
ولا حاجه بس هما بيكلموا بصراحه
لان الجواز مسؤليه وكمان هما مفكرين
ان اللي متخطبتش او تجوزت حزينه
فبيحاولوا يرفعوا من معناويتهم عن طريق
تقول وتبين انها مش سعيده
علشان ماتجرحش مشاعر حد
شكرا علي الحوار

[۩۩ elMagic ۩۩]

هي بتبقى انطباعات وعادات مترسخه في العقول
والبركه في الحجه حمات العريس
البنات عموما بيبقى عليهم حاجات عجيبه
تعالي شوفي الولاد بيعملوا ايه في بعض
والعريس ما بيصدق يحكي لصحابه على اموره
وياخدوا الامور بهزار وضحك وعادي يعني بيييس
بصراحة العقول بتفرق

[الأميرة رودي]

ياااه استحملتي كل السخافات دي
انتى معاكي حق كلنا اتعرضنا لمواقف شبيهه لكده وأكتر والله
بس عارفه أجمل حاجه ايه
انتى بتبقى عارفه انها سخافه وهيافه بس ومع ذلك عايشه اللحظه معاها عادي
وكأنك مصدقه كلآمها..
المهم سيبك انتى
مفيش أحلى من الاستجمام ♥

[ابو نصير]

سيدتى رائحة القهوه ...
مواضيع بايته زى البتنجان الأسود المنيل بنيله وياسلام لو طبق مسقعه باللحمه المفرومه
سيدتى اميليا ..
من وجهة نظرى المتواضعه ..
عندما تتزوج البنت بالتراضى والحب تريد أن تخبر العالم والدنيا جمعاء بزواجها
وكأنها المرأه الوحيد التى تزوجت ولا تنظر للأخرين لأنها مرغوبه فى الحياه
وأما انا خسيت واسمريت والباجور ضرب فى وشى واتهبب كل هذا يا أستاذه
عشان تلفت النظر ويكون العكس صحيح انتى احلويتى بعد الزواج ووشك رد فيه الروح
وأما اللى بيغزى العين على إيه
بيحسدو الأعمى على سواد عنيه ولا على كحل عنيه
يارب ربنا يجوز البنات كلهم عشان نرتاح من الوكلوك
تقبلى مرورى
وتحياتى واحترامى لقلمك الذى يعالج الحياه الزوجيه فى الزياره الاولى
ابو نصير

[العندليب الاسـمر]

هوة دة عادة بيجي من حاجة من اتنين

لاما ان اللي قدامك بيحاول يحوش عنه العين

او انه كالعادة محدش عاجبة حالو

بس بما انك بتتكلمي علي جواز جديد

فالاولي هي الاقرب للصح

لان التانية عادة بتيجي بعد مدة مش بسيطة

وبتفكرني دايما لما تكوني داخلة علي شغل جديد في شركة

وتلاقي اغلب الموجودين يطلعولك فيها القطط الفطسانة

والواحد فيهم بقالة ستين سنة شغال فيها

طيب ولما هية بنت ستين في سبعين كدة امال انتة قاعد شغال فيها لييييية

مساءك ورد يا سيدة القهوة

[كريم عاصم]

روايه واقعيه طيبة أختى إيميليا هى الحياة كدة فيها وفيها هو الحسد مذكور في القرآن بس ممكن الناس تكون فهماة غلط أكتر ناس بتتحسد اللى هما متمسكين بالعبادة والدوام على الصلاة وقراءة القرآن أما الحسد من النوع الآخر موجود بس بنسبة ضعيفة عن قوة الايمان بالله جميلة فضفضتكـ والأجمل صراحتك في السرد الف تحية كريم عاصم

[™Amiliya]

اقتباس المشاركة الأصلية كتبت بواسطة sama. دايما بتلاقى النصيحة ع حسب التجربه الشخصيه ودة الل اتاكدت منو جميل اننا كل فتره نقابل صحباتنا بيدى دفعه ايجابية جوانا ول. حتى فيه حاجة دايقتنا بتفيدنا بردو حلوة الفصفضفه

احيانا بيدي واحيانا تانية لا الصراحة

منوراني ياسما يدوم لي تواجدك