الزمالك السلبي يتعادل سلبيا للمرة الثالثة علي التوالي

[აα∂ Ԑγεა]

فشل الزمالك للمباراة الثالثة على التوالي في احراز اي هدف
و تعادل سلبياً مع دجلة و اهدر كل الفرص التي اتيحت بالرغم من قلتها

الزمالك بدء اللقاء بتشكيل مكون من أحمد الشناوي و للمرة الاولى احمد سمير باك شمال
و للمرة الاولى ايضا في الدوري دويدار مساك مع علي جبر و حازم امام باك يمين
و في نص الملعب مؤمن زكريا ابراهيم صلاح و طارق حامد و احمد عيد
و في الهجوم خالد قمر و عبد الله سيسيه



كان واضحا من البداية ان فكرة اللعب براسي حربة فكرة غير ناجحة
خاصة و ان المزيج خالد قمر و سيسيه لم يؤدي بالشكل المطلوب
و بالرغم من ذلك فان الزمالك بدء بشكل قوي و انفراد لمؤمن من تمرير عيد
يتعامل معها مؤمن برعونة و اهدر هدف محقق
و بعدها ركلة جزاء للزمالك يهدرها عيد بعد تسديدة سيئة و يبدو ان عيد لا يحرز الا في الوديات

بعدها المباراة اصبحت سجال بين دجلة و الزمالك و بالرغم من الشناوي انقذ فرصتين لدجلة
الا كان واضحا في الشوط الاول سوء خروجه في العرضيات
و كان هناك اكثر من خطاء في التعامل مع العرضيات و ينتهي الشوط الاول بالتعادل السلبي

في الشوط الثاني خرج احمد عيد و تم الدفع بايمن حفني
ليتحسن اداء الزمالك عن الشوط الاول
و لكن سوء حالة سيسيه و قمر و بعدهم اوباما يفشل الزمالك في احراز اي هدف
و ظهر ان الزمالك يعني في الوسط الهجومي و في خط الهجوم

[محمود الصاروخ]

تشكيل غريب وعجيب وافتكاسات حب منها صلاح يقول انا موجود
دويدار فى ماتش زى ده مفيش ضغط هجومى على الزمالك
وجوده كان مقبول عشان فورمة الماتشات
ورطه مر بها الزمالك بعد رحيل عبد الشافى

وطاقم حكام للماتش تحت الصفر
احنا عاوزين حكام من الصيين

تسلم محمود

[აα∂ Ԑγεა]

مسلسل خزعبلات , اخراج محمد صلاح !

ادارة فنية للمباراة نقدر نقول عليها جريمة في حق جماهير الزمالك !
وسط كل الصفقات اللي الزمالك جابها اعطاء الفرصة للاسوء
تغييرات عجيبة جدا من محمد صلاح
متنمش ابدا عن فكر مدرب مبتدأ من الاساس !

اولا انا مش فاهم فايدة الدفع باحمد عيد من بداية كل مباراة
اكننا بنضيع الوقت مش اكتر !
طالما محدش فهمه انه المباراة ودية منتظرين ايه منه !
ليه يتم الدفع بيه من البداية وركن واحد زي ايمن حفني الافضل بمراحل ؟
كان هيختلف كتير الوضع بوجود حفني بموهبته ومهاراته وحلوله ف الملعب
عكس عيد ببطئه وتقل نقله للهجمات وضف بتضييع ركلة جزاء

ثم ف التغيرات تغيير مركز بمركز ليس الا من غير تغيير ف الاسلوب
انا مش فاهم ليه تخرج مهاجم من الاساس ؟
هل التعادل مقنع ؟!
لا و خرج مهاجم مجتهد ونشيط ومتحرك زي خالد قمر
وقعد مهاجم مش ف الفورمة ولا في الجيم وعشوائي جدا زي سيسيه !

ثم مؤمن زكريا دا ايه دوره في المباراة والاضافة اللي بيقدمها
علشان يلعب كامل المباراة وكل الدقايق دايما !
مش شايفله اي حاجة غير تسرع وربكة وتضيع مجهود فريق ,,

تغييرة اخر المباراة بخروج حازم امام ونزول محمد كوفي
دي ببساطة تغييرة حرق الدم
حازم امام " العشوائي" انصاب ولازم يخرج علي عينا وعلي راسنا !
هل لازم ينزل بداله باك يمين !
لازم يعني الخطة تفضل من اول لاخر المباراة 4 2 2 2 !
مفيش اي جرأءة او رغبه ف الفوز ؟!
ولا التعادل مقنع ؟
ولا الفريق بيقدم اداء هجومي شرس والمكسب جاي !


#عقم
عقم كبير جدا ف تفكير محمد صلاح

[აα∂ Ԑγεა]

المهم ف الاخير
ف نقط ايجابية كتيرة مش لازم نقف عند الجزء السلبي
حتي لو الاداء عموما والنتيجة سلبية ,

لكن
الزمالك حاليا عنده فريق كبير ولاعيبه علي مستوي عالي ف كل المراكز
لاول مرة من سنين يكون خط الدفاع بتاعنا مطمن جدا
كمان حارس مرمي هو الابرز في مصر ومستقبله كبير جدا وبيطمن
3 مباريات علي التوالي من دون ما تتهز شباكنا ,,
دي نقطة ايجابية

لاعب زي ابراهيم صلاح بيقدم مستوي كبير جدا جدا منذ عودته
واخيرا حسينا بتقل في نص الملعب مفتقدينه من وقت تامر عبدالحميد
كمان بجواره وتد اخر وهو طارق حامد اللي لو اتحرر شوية
هيكون وسط الزمالك عالمي بمعني الكلمة ,,



جيمي باتشيكو مقادش الزمالك ف اللقاء وكان يدوبك بيتفرج علي اللاعيبه
انا متفائل جدا بالفريق الحالي
شايف انه ناقصهم تجانس اولا واضافات بسيطة من المدير الفني
واخير الزمالك هيكون معاه مدير فني بعد عقم حسام و محمد صلاح ف الموسم
شكله فاهم ولما يتعرف علي قدرات اللاعيبه هيقدر يصنع توليفه ذكية تقدر تحقق الفوز
مجرد يكون عنده جرأءة زي اللي كانت مع احمد حسام ميدو وهيعمل انجازات

ان شاء الله الدوري للزمالك السنة دي وانا شايف دا من دلوقت