مش قادر افكر

انا شاب عندي25 سنه كنت لحد من فتره عمري ما حبيت ولا اعجبت بحد
الا واحده بس جمعني معاها مرة مناقشه بسيطه خلتني انشغل بيها
بس عرفت انها مرتبطه وكمان عن حب فدعتلها يوميها لانها فعلا تستاهل الخير
واكيد اللي حبته اكيد يستاهلها
في يوم وانا رايح خطوبه واحد صحبي بعد سنه ونص لاقتها هناك زي ما هيا متغيرتش بس شايله طفل علي رجلها فضلت ابصلها ولاقتها لوحدها
سألت صحبي عنها قالي انها قريبه العروسه وانها فعلا كانت متجوزة وانفصلت
بسبب ان جوزها مكنش انسان كويس وانها رافضه تتجوز تاني وهتعيش لابنها ودراستها
انا وقتها مكنتش عارف ازعل علي اللي هيا فيه ولا افرح انها ممكن تكون ليا
فضلت احاول اقربلها بكل المحاولات واسأل عن كل تفاصيل حياتها
وقولتلها اني بحبها ومن زمان واني مستعد احافظ عليها هيا وابنها طول عمري
والله عمري ما هظلمها ولا هقدر اعمل كدة
وروحت لاهلي ورغم رفضهم في اول الامر عشان جوازها اللي كان قبل كدة وكمان ابنها بس انا قولتلهم اني مش هتجوز غيرها وان ابنها دا ابني انا ومش يفرق معايا لو حتي عندها عشر عيال

بس صحبي جالي وبيقولي ان جوزها بيعمل محاولات كتير عشان ترجعله هيا وابنها واني كدة حرام عليا لاني بحرم ابن من ابوه وان جوزها ندمان علي غلطه
معاها وبيصلح من نفسه ووجودي في طريقهم ظلم مني

انا لو سبتها مش هتجوز غيرها انا حبتها بجد ؟
وعارف قد ايه هو ظلمها وجرحها بس هيا ممكن تقبل ترجعله عشان ابنها
ويكون هو فعلا اتغير ويعوضها عن اللي عمله فيها وابنهم ميتحرمش منه
وفي نفس الوقت انا ممكن اعمل اي حاجة عشان سعادتها هيا وابنها انا بحبهم ومبقتش احس غير انه ابني انا ولو اتجوزتها واخده منها
عشان ينتقم منها لو رفضت ترجعله
انا مش قادر افكر

[كبريت]

اولا اهلا وسهلا ومرحبا بحضرتك
انا قرأت بعمق قصتك اللي للاسف بتحصل في مجتمعنا كتير
ولسه اكيد هتحصل اكتر
وخصوصا وان اغلب البنات الطيبات بتنخدع في اوهام وشكليات
دون ما تفكر شوية بهدوء وعقلانيه


بالنسبة لمشكلتك
القرار في ايدها هي
هي وبس صاحبة القرار
خليها تصلي استخاره
وبعد صلاة الاستخاره ربنا سبحانه وتعالى هيوهبها الطريق والاختيار الصح
لو الاستخاره اكدت انك الافضل هتكون نصيبك وانت نصيبها يارب طليها يعمل ايه
ولو الاستخارة اكدت انها هترجع لجوزها عشان الطفل يبقا اسمح لي اقولك ابعد عنها وشوف نفسك
سيدنا محمد علية الصلاة والسلام توفاه الله
واستمر الاسلام وسيستمر ان شاء الله

اهم شيئ تخليها في اسرع وقت تصلي صلاة استخاره شكل ما وضحت لك
وبناء على كده
بيكون القرار وبكل وضوح
وفي كل الظروف بتمنى لك وليها ولكل الناس الخير كله
اتمنى اكون قدرت افيدك
شكرا جزيلا لك

[Lamees]

الأمر بسيط جداً استاذي يا ترى انت بتحبها فعلاً ولا الامر مجرد تعود عليها
لانك لقيت قدامك فرصة تحي بيها الامل اللي انتهى قبل ما يبدأ
عموماً هي صاحبة الامر في الاول والأخر لو جوزها اتغير فعلاً وهي عايزة ترجعله
هيكون افضل عشان الطفل بس لو جوزها ده زي ما هو وعلى فكرة اللي فيه عيب مش
بيقدر يغيره بسهوله يعني هي اللي هتحدد هتقدر ترجعله وتتحمله ولا لأ
لو مش هتقدر تعيش معاه تاني اكيد هترفض بكل اصرار
وقتها هتختار انها تجرب حظها تاني مع شخص هيحترمها وهيراعي ربنا فيها
هي وابنها يعني سيبها هي اللي تقرر واي كان قرارها لازم تحترمه
وربنا هيعوضك خير دام انت كنت عايز تعمل خير
وموضوع انك مش هتتجوز غيرها ده مجرد كلام
لأنك مش عارف ان في قوة كبيرة اسمها
قوة الأيام ودي كفيلة انها تغير حياتك كلها
وربنا يوفقك

[العندليب الاسـمر]

اخي الكريم عليك بالصبر والاحتساب

الصبر علي ما ابتليت به من امتحان

واحتساب ما ستقدم عليه من قرار لوجه الله

ويقينا سيعوضك الله خيرا

فكرة عودة هذه السيدة لزوجها الاول وخصوصا انه يبدو ان ادرك خطأة هي اصوب الحلول

لانك وهي وابنها ستظلون ما حييتم تعانون من تلك المعضلة

اتمني عليك ان تبتعد فعلا عن طريقها كي تعود لزوجها

لما فيه من خير لابنها الذي سيتربي بين ابوية في بيئة صحيحة

لانه ببساطة كما تفضلت وفكرت قطعا لن يتركه واالدة ليتربي في بيت غريم

خصوصا لو كان هذا الغريم هو من حرمه من زوجتة وابنه

وعليه لن تواجه مع هذا المراة غير الشقاء والتعب لك ولها

وستظل بقية حياتها تنظر لك علي انك السبب في حرمانها من فلذة كبدها

اما انت فما دمت قد احتسبت فيقينا سيعوضك الله بخير منها

وفكرة انك لن تتزوج بغيرها هي فكرة مؤقتة وطبيعية

لانك ستحرم فتاة اخري من رجل بمثل خلقك

فهل تقبل الا تكون سببا في عفة احدي نساء المسلمين لا اظن

وفقك الله لما فيه خيرا لك ولها

[phalsteen]

انا مش عارفه اعلق
بس الطبيعي ان الست طالما بعدت استحاله ترجع
ومش عارفه بالنسبة لموضوعك ايه الظروف
الواضح انه مش خلاف عادي والا مكنش الموضوع انتهي بالوضع دا
فتغييره مش هيمنع ولا هيسبب العوده
واذا كانت هيا مستعده للجواز منك او من غيرك
فيبقي اكيد عارفه ان جوزها السابق هيحرمها من ابنها
فالمشكله مش مشكلتك قد مهي مشكلته الآنثي
يعني في تساؤلات كتير ما بين اذا كانت هتقبل تعيش مع السابق
ولا هتقدر تعيش معك وتتحرم من ابنها
او تعيش مع ابنها وتستغني عنكم سواء الزوج او حضرتك
ربنا معاك ومعاها

[دمعه حائره]

العقل يقولك سيبها ترجع لجوزها ويربوا الولد سوا
مع ان محدش بيتغير عشان حد والسبب اللى سابته عشانه هايفضل موجود
ومش بعيد تطلق تانى
وانت بتحبها ولازم تدافع عن حبك لاخر نفس والا هاتفضل صورتها تلاحقك طول عمرك
ومش هاتخليك مرتاح ولاسعيد مع اى واحد تانيه
المهم هى تكون بتحبك والا مش هاتقدر تسعدك وده اللى هايبان لو اتقدمت ليها
شوف هاترفض ولاتوافق وتقدر تتحمل عواقب الخطوة دى
ربنا معاك ويلهمك الصواب

[توحد ارواح]

المشكله مش عاوزه تفكير كتير وذات شق واحد دون جدال
اولا هي من البدايه كانت مرتبطه و عن حب كمان و دي نقطه مهمه
اذا انت يوم معرفتك بيها وقلبك تعلق بها كان حب من طرف واحد
و بعد كدا حدث انفصال بعد انجابها طفل و زوجها عاوز يرجعها تاني
رأيي الشخصي اتركها ف كل الاحوال
سواء رجعت لزوجها من اجل تربية الطفل
او آثرت الانفصال ممتكن زوجها ياخد الطفل و تكون انت السبب

بالنهايه الحياه لا تقف علي شخص وباذن الله تتزوج وتعيش حياتك
وربنا ييسر ليك الامور يارب و الله المستعان

[همسه دموع]

حضرتك بتحبها ومتمسك بيها
السوال هنا هى بتحبك ؟
ولا لسه بتحبه هو ؟
لان اخى الكريم اللى بيحب صعب ينسى
وبالذات البنت استحاله تنسى اول انسان
حبته ما بالك ابو ابنها
وحتى لو حضرتك اتجوزتها
ابنها ليه اب وحضرتك او هى ما هتقدرو تبعدوهم عن بعض
اللى بيحب بيسامح ويغفر
القرار هى تاخده اكيد
بس واجب عليك اخى انك تنصحها
واوعى تفكر للحظه ان الحياه بمبى
واكيد فى يوم هتختلفو مع بعض
وحضرتك او غيرك عمركم ما هتعرفو حقيقه سبب انفصلها مع جوزها
لانه كانو ورى باب محدش يعلم غير الله
انت وهى اتكلمو والصالح للطفل وليها وليك اعملوه
ربنا يسعدك

[.Lamar]

تعددت الردود و الاراء
عليك و عليها بصلاة الاستخارة
اختيار رب العالمين هيكون الاحسن
حتى لو تعارض مع رغباتنا

تحياتى

[Aya 7ekaya]

مشكله صعبه جدابس هى اللى تختار واكيد هتقدر تقرر وتختار صح
وربنا يكتبلك الخير اكيد
خليك واثق ان اى حاجة هتحصل هتكون خير ان شاء الله